1 Ni na lomani ira na Jekope na Turaga, ka digitaki ira tale na Isireli, ka vakatikori ira ki na nodra vanua; ia ko ira na vulagi era na okati vata kei ira, ka kabiti ira na mataqali i Jekope.

2 Ia ko ira na tamata era na kauti ira ki na nodra yasana; io, mai na vanua vakayawa ki na iyalayala kei vuravura; ka ra na lesu ki na nodra vanua yalataki. Ia na mataqali i Isireli ena taukeni ira, ia na vanua ni Turaga ena nodra na tamata dauveiqaravi kei ira na vada; ka ra na vesuki ira vakabobula ko ira era a vakabobulataki ira e liu; era na qai lewai ira era a sa vakasaurarataki ira

3 Ia ena qai yaco ena siga ko ya ena vakacegui iko kina na Turaga, mai na nomu rarawa, kei na nomu rere, kei na veivakabobulataki kaukauwa ko a vakasaurarataki kina.

4 Ia ena qai yaco ena siga ko ya, ko na qai kauta cake na vosa vakaibalebale oqo vua na tui Papiloni, ka kaya: E rawa vakaevei me mudu ko ira na dauveivakasaurarataki, me mudu na koro koula!

5 Sa musuka na Turaga na nodra isamu na tamata ca, na nodra matanakilagi na iliuliu.

6 O koya ka dau yaviti ira tiko ga na tamata e na cudru waqawaqa, ko koya ka daulewa na veimatanitu ena cudru, e na vakacacani, ka na sega ni dua e tarova.

7 Sa qai vakacegu ko vuravura taucoko, ka vakanomodi; era sa qai tabalaka na seresere.

8 Io, sa reki na veikau ena vukumu, kei na sitari talega ni Lepanoni, ka sa kaya: Ni ko sa qai davo no, sa sega ni lako mai na dautakau me vakacacani keimami.

9 Ena vakayavalati ko eli ena vukumu, ka na tavaki iko ena nomu lako mai; ena vakayavalati ira na mate ena vukumu, io ko ira sara ga na turaga ni vuravura; sa vakaduri mai na nodra itutu vakatui ko ira kecega na tui ni veimatanitu.

10 Ka ra na vosa ka kaya vei iko: Ko iko talega ko sa malumalumu li me vakataki keimami? Ko sa vakataki keimami li?

11 Sa biu sobu na nomu lagilagi ki na ibulubulu; kei na domo ni nomu vaioli sa sega ni rogoci; sa tevu e rukumu na ulo, ka sa ubi iko na ulo.

12 Ko lutu vakacava mai lomalagi, isa Lusefa, na kalokalo ivolasiga! Ko sa tamusuki sobu ki na qele, o koya era sa vakamalumalumutaki kina na veimatanitu!

13 Io ko a kaya e lomamu: Au na cabe cake ki lomalagi, ka’u na vakacerecerea na noqu itikotiko vakatui me cecere cake mai na kalokalo ni Kalou; ka’u na dabe talega mai na dela ni ulunivanua ni soqoni, ena tikina ki na vualiku;

14 Ka’u na cabe cake me sivia na o; ka’u na vakataki koya sa Cecere sara.

15 Ia ko na biu sobu ga ki eli, ki na yasa ni qara titobu.

16 Ko ira era raici iko era na raici iko vakaqiqo, era na vakananumi iko, ka kaya: Oqo li na tamata ka sautaninini kina ko vuravura, ka vakayavalata na veimatanitu?

17 Ka cakava na vuravura me lekutu, ka dauvakarusa na kena veikoro, ka sega ni dolava na vale ni nona kaivesu?

18 Ko ira kece na tui ni veimatanitu, io, ko ira kecekecega, era davo ena lagilagi, ko ira yadua ena nodra dui vale.

19 Ia ko iko ko sa biu tani mai na nomu ibulubulu me vaka na taba ni kau sa vakasisilataki, kei ira na ivovo ni vakamatei, era sa lausua ena iseleiwau, ka lako sobu ki na veivatu ni qara titobu, me vaka na yago ni mate sa butubutuki.

20 Ko na sega ni bulu vata kei ira, ni ko sa vakarusa na nomu vanua ka vakamatei ira na nomu tamata; era na sega sara ni rogo na nodra kawa na ivalavala ca.

21 Me vakarautaki na veivakamatei me baleti ira na luvena ena vuku ni nodra ivalavala ca na nodra qase, me ra kakua ni tucake tale, se taukena na vanua, se vakatawana na delai vuravura ena veikoro.

22 Ni’u na tucake ka saqati ira, sa kaya na Turaga ni Lewevuqa, ka muduka tani mai Papiloni na yaca, kei na ivovo, kei na luvena tagane, kei na vugona, sa kaya na Turaga.

23 Au na cakava talega me nodra itikotiko na belo, kei na veitobu wai; ka’u na taviraka laivi ena itataviraki ni veivakarusai, sa kaya na Turaga ni Lewevuqa.

24 Sa bubului kina na Turaga ni Lewevuqa, ka kaya: E dina, me vaka au sa lewa ena qai yaco vakakina; ia me vaka au sa nakita, ena yaco me vakakina—

25 Ni’u na kauti koya na kai Asiria ena noqu vanua, ka buturaki koya sobu ena dela ni noqu ulunivanua; ia na nona ivua ena qai biu tani vei ira, kei na nona icolacola ena kau tani mai tabadra.

26 Oqo na kena inaki sa nakiti ki vuravura taucoko; ia oqo na liga sa dodo yani ki na veimatanitu kecega.

27 Ni sa nakita ga na Turaga ni Lewevuqa, ia ko cei me vakadaroya? Ia sa dodo yani na ligana, ia ko cei me na vakasuka lesu?

28 Ena yabaki ka mate kina ko Easi na tui, sa votu kina na icolacola oqo.

29 Mo kakua ni reki ko iko, Filisitia raraba, ni sa qai ramusu na ititoko ikoya ka yaviti iko; ka ni na tubu mai na vu ni gata na gata batigaga, ia na vuana ena gata vuka vakabukawaqa.

30 Ena qai kana na nodra ulumatua na dravudravua, ka ra na davo sobu vakavinaka ko ira na vakaloloma; ka’u na vakamatea na wakamu ena dausiga, ia na ivovo ni nomu kawa ena vakamatea ko koya.

31 Mo qoqolou, na matamata; Mo tagi, na koro; Ko iko, Filisitia raraba, ko sa waicala sara; ni na lako mai na vualiku e dua na kubou, ena sega e dua me tiko taudua ena nona gauna lokuci.

32 Ia na cava me qai saumi vei ira na mata ni veivanua? Ni sa tauyavutaki Saioni na Turaga, ia ko ira na nona tamata dravudravua era na nuidei kina.