1 Bwa taraia, a na mwaiti—n te bong arei are N na waaki iai ni karaoa te mwakuri ae raoiroi i buakoia, bwa I aonga n uring au berita aika a tabu ake I a tia ni karaoi nakoia natiia aomata, are N na kona iai ni manga kamaiuia au botanaomata n te kaua tai, aika kaain te bata are Iteraera;

2 Ao I aonga naba n uring taian berita ake I a tia ni karaoi nakoim, Nibwaai, ao nakon naba tamam, are N na uringia kanoam, are a na otinako aia taeka kanoam mai wiiu rinanoia kanoam; ao a na katiitii au taeka nako tabon aonaba, bwa baireaia au botanaomata, aika kain te bata are Iteraera.

3 Ao ngkai a na tang nako n au taeka nako tabon aonaba—a na mwaiti Tientaire aika a na kangai: Te Baibara! Te Baibara! Iai ara Baibara, ao a na akea riki te Baibara i rarikina.

4 Ma e taku ana taeka te Uea ae te Atua: O aika kam burababa, e na reke irouia te Baibara; ao e na reke mai irouia Iutaia, aika au botanaomata i nanon te berita ae tabu ma ngkoa. Tera aia kaaitau nakoia Iutaia ibukin te Baibara are a tia ni karekea mai irouia? Eng, tera ae a nanonna Tientaire? A uring taian kaangaanga, ma taian beku, ma marakiia Iutaia, ma kakaonimakia nakoiu, ibukin karekean te kamaiuaki nakoia Tientaire?

5 O ngkami aika Tientaire, kam uringia Iutaia aika au botanaomata i nanon te berita ae tabu ma ngkoa? Kam aki; ma kam a tia ni kamaraiaia, ao man ribaia, ao kam tuai ni buoka kaokakia. Ma taraia, N na kaoki rekenikai aikai nakoimi; bwa Ngai ae te Uea, I tuai ni mwaninga taekaia au botanaomata.

6 Ao ngkoe ae baba, ae e na kangai: Te Bwaibwara, iai ara Bwaibwara, ao ti aki kainnanoa te Bwaibwara riki teuana. Iai te Bwaibwara iroumi ae aki reke mai irouia Iutaia?

7 Kam ataia ke kam aki ae a rawata riki aaba nakon ae ti teuana? Kam aki ataia ae Ngai, ae te Uea ae Atuami, ae I karikiia aomata ni kabane, ao I uringia ake a mena iaon aban marawa; ao I tautaeka naba i eta i karawa ao n te aonaba are i aana; ao I tataekina au taeka nakoia natia aomata ni kabane, eng, nakoia aaba ni kabane iaon te aonaba?

8 Bukin teraa kam ngurengure ngkai kam na karekei au taeka aika mwaiti riki? Kam aki ataia ae kakoaua man aaba aika uoua bon kakoauau nakoimi ae Ngai te Atua, ao I uringa te aaba teuana n aron uringan te aba are teuana? Mangaia ae titebo au taeka nakon te aba teuana ma are I taekinna nakon te aba are teuana. Ao ngkana a ikotaki aaba aika uoua ao a na ikotaki naba taian kakoaua man aaba aika uoua.

9 Ao I karaoa aio bwa I aonga ni kakoaua nakoia aika mwaiti bwa titebo Ngai ngkoa, n te bong aio, ao n aki toki; ao I tataekin au taeka n aron oin kukurein nanou. Ao ngkai I a tia n taekina au taeka teuana, tiaki nanona bwa N na aki manga taekina riki au taeka teuana; bwa e tuai n toki au mwakuri; ao e na bon aki toki ni karokoa tokin te maiu iaon te aonaba, man te tai anne ao n aki toki.

10 Mangaia ae ngkai iai iroumi te Bwaibwara, kam na tai taku bwa a bane au taeka ni kabane i nanona, ke n taku bwa akea riki te boki are I a tia n tuatua bwa e na koreaki i rarikina.

11 Bwa I a tia n tuatua nakoia aomata ni kabane i mainiku, i maeao, ao i meang, ao i maiaki, ao i aban marawa, bwa a na koroi taeka ake I taekin nakoia; bwa N na motika taekan te aonaba man taian boki ake a koreaki, aomata ni kabane n aron aia mwakuri, n aron are e a tia ni koreaki.

12 Bwa taraia, N na tuangiia Iutaia bwa a na koroia; ao N na tuangiia Nibwaite bwa a na koroia; ao N na tuangiia naba mwakoron te bata are Iteraera riki tabeua, ake I a tia ni kairia nako, bwa a na koroia; ao N na tuangiia naba aaba ni kabane iaon te aonaba bwa a na koroia.

13 Ao e na koro bukina bwa e na reke irouia Iutaia aia koroboki Nibwaite, ao e na reke aia koroboki Nibwaite irouia Iutaia; ao Nibwaite ma Iutaia e na reke irouia aia taeka ana baronga Iteraera ake a bua ao Iteraera ake a bua e na reke irouia aia taeka Nibwaite ma Iutaia.

14 Ao e na koro bukina bwa a na manga botaki iai au botanaomata, aika kain te bata are Iteraera, iaon aban rikiia; ao a na botaki naba au taeka n ti teuana. Ao N na kaotia nakoia ake a kaaitarai au taeka ma au botanaomata, aika kain te bata are Iteraera, ae Ngai te Atua, ao I a tia ni berita n ae tabu nakon Aberaam bwa N na uringia kanoana n aki toki.