1 Kunantaj, Jacob, qanman parlayki: Qan ch’in pampaspi, phutiy p’unchayniykunapi ñawpaj nacesqa waway kanki. Qhawaytaj, wawa kaspa anchata muchorqanku, phutiyniyoj kallarqankitaj hermanosniyki sajra kasqankurayku.

2 Chaywampis, Jacob, ñawpaj ch’in pampaspi nacesqa wawáy, Dios k’acha kasqanta yachanki; paytaj phutiyniykirayku bendecisunki jtaunchasqa kanaykipaj.

3 Chayrayku bendecisqa kanki; hermanoyki, Nefiwan, allin qhawasqa tiyakunkitaj; Diospa munayninta ruwaspalla kawsankitaj. Chayrayku, kacharisqa kasqaykita yachani, Kacharichejniykej junt’aj kasqanrayku; imaraykuchus junt’aj p’unchaykunapi runasta salvaj jamunanta rikorqanki.

4 Joven kaspataj paypa k’anchayninta rikorqanki; chayrayku paymanta bendecisqa runas jinalla kanki, pikunatachus pay aychayoj kaspa bendicenqa; imaraykuchus Espiritu kikillan, qayna, kunan, wiñaypajtaj. Ñan wakichisqaña runaj urmasqanmantapacha, salvakuytaj qhasilla tukuypaj.

5 Runastaj yachachisqasña kanku allin kajkuna, sajra kajkunamanta rejsinankupaj. Leytaj runasman qosqa. Manataj leynejtachu runas mana juchayojchu kanku; jinapis, leynejta runas qharqosqas. Arí, kay jallp’aj leyninnejta qharqosqas; jintaj, espiritu leynejta allin kajkunamanta t’aqasqas kanqanku, wiñaypaj muchuyniyoj kanankupaj.

6 Chayrayku Santo Mesiasnejta kacharichiy jamun; payqa khuyaywan, cheqa kajkunawan ima junt’asqa kasqanrayku.

7 Qhawaychis, payqa sacrificio jinalla juchasrayku jaywakun, tukuy leyta q’alitumanta kutichinampaj, tukuy paykunapaj, pikunachus llakisqa sonqoyoj, k’umuykusqa espirituyoj ima kanku, paykunapaj; paykunallapaj, ni pipajwantaj chay jina ley q’alitumanta kutichisqachu.

8 Chayrayku kaykunata yachachisqa kananku tiyan tukuy kay pachapi tiyakojkunaman, yachanankupaj mana ni mayqen aycha Dioswan tiyakunanta, astawanqa Santo Mesias ruwanasninrayku, khuyayninrayku, k’acha kasqanraykutaj Dioswan tiyakuyta atikun, imaraykuchus aychamanta wañupun, cuerponta Espiritoj atiyninwan mosojmanta jap’ikapullantaj. Chayta ruwantaj wañusqasta kawsarichinampaj, payqa ñawpaj kawsarimoj kaspa.

9 Chayrayku, tuky runaspaj allinyachisqanrayku, Diospaj ñawpaj poqoy jina, paypi creejkuna salvasqas kanqanku.

10 Tukuypaj allinyachisqanraykutaj, tukuy runas Diosman jamunku; chayrayku paypa ñawpaqempi sayanku cheqa kasqanman jina, k’acha kasqanman jinataj juzgasqas kanankupaj. Chayrayku tukuy leyqa, mayqentachus Ajllasqa Kaj qon, chaypa jasut’iynin kan. Chay jasut’iyninrí kusikuynimpa contrampi, chay jinataj tukuy allinyachiyninta kutichinampaj —

11 Imaraykuchus tukuy imajpa contran kanan tiyan. Manataj chayrí, ñawpaj ch’in pampaspi nacesqa wawáym allin kajkuna mana kanmanchu, manataj sajra kajkunas kanmanchu, manataj k’anchaykuna, ni muchuykunas kanmanchu, chay jinapis mana k’acha ni sajra kallankumantajchu. Chayrayku, tukuy ima kankuman ujllapi; jinapis, sichus uj cuerpolla kanman chayqa, wañusqa jinalla kanman, mana kawsayniyoj, manataj wañuyniyoj, mana ismuyniyoj, ni mana ismuyniyojpis, mana kusikuyniyoj, ni muchuyniyojpis, manataj ni yuyayniyoj, ni mana yuyayniyojpis.

12 Chayrayku mana ni imapaj ruwasqa kanman karqa; chayrayku kawsaynimpi mana ni imata ruwanan kanmanchu. Chayrayku chayqa Diospa yuyayninta, wiñaypaj ruwanasnintawan tukuchinman karqa; chay jinapis, Diospa atiyninta, khuyayninta, justiciantawan tukuchillanmantaj.

13 Mana ley kanchu ninkichis chayqa, mana jucha kanchu nillankichistaj. Mana jucha kanchu ninkichis chayqa, mana leyta junt’ay kanchu nillankichistaj. Mana leyta junt’ay kanchu, chayrí mana kusikuypis kallantajchu. Mana leyta junt’ay, ni kusikuy kanchu chayqa, mana ni jasut’iy, ni muchuy kallantajchu. Chaykunas mana kanchu chayqa, mana Diospis kallantajchu. Manachus Dios kanman chayqa, ñoqanchispis mana kanchischu, nitaj kay pachapis kanchu; imaraykuchus tukuy imat rikhurichimuy mana kanmanchu karqa, mana ruwanankupaj, ni ruwasqas kanankupaj; chayrayku tukuy ima tukukapunkuman karqa.

14 Kunantaj, wawasníy, kaykunamanta parlaykichis allinniykichispaj, amañanaykichispajtaj; imaraykuchus Dios kan, tukuy imata rikhurichimuntaj, janaj pachatapis, kay pachatapis, tukuy chaykunapi cosastapis, imaschus ruwanankupaj, imaschus ruwasqas kanankupajwan.

15 Wiñaypaj ruwanasninta junt’anampaj runaj kawsaynimpi, ñawpaj tatasninchista rikhurichimusqantawan, chajrapi animalesta, wayrapi p’isqostawan, arí, tukuy imata, imaschus rikhurichimusqas kanku, chaykunasta rikhurichimusqantawan, contra kanan karqa; jark’asqa poqoypis wiñay kawsaymanta sach’aj contrampi; uj misk’i ujtaj k’allku.

16 Chayrayku Señor Dios runaman qorqa pay kikimpaj ruwananta. Chayraykutaj runa mana kikimpaj ruwayta atinmanchu mana payta gustajtin uj cosa, chayrí, waj cosa.

17 Ñowataj, Lehi, leesqayman jina, reparanay tiyan, uj Diospa angelnin, escribisqasman jina, payqa janaj pachamanta urmarqa; chayrayku supayman tukorqa, Diospa ñawpaqempi sajra kajkunata mask’aqanrayku.

18 Janaj pachamanta urmasqanraykutaj, wiñaypaj muchuyniyoj kasqanraykutaj, tukuy runasta muchuchiyta munan. Chayrayku Evaman nerqa, arí chay unay ñawpaj katari, pichus supayqa, pichus tukuy llullaspa tatan, chayrayku pay nerqa: Jark’asqa poqoyta mikhullay, manataj wañupunkichu, astawampis Dios kikillan kanki, allin kajkunasta sajra kajkunasmanta yachaspa.

19 Adanwan Evawan jark’asqa poqoyta mikhusqankutawampacha, Eden nisqa huertamanta wijch’usqas karqanku, jallp’ata llank’anankupaj.

20 Wawasta nacecherqankutaj; arí, tukuy kay jallp’a patapi tiyakojkunatapis.

21 Runaspa wawasninkoj p’unchayninkunataj karunchasqas karqanku Diospa munayninman jina, cuerpoyoj kajtinku Diosman kutirinankupaj; chayrayku paykunaj kawsayninkoqa kasukojchus manachus rikuchikunankupaj, kay pachapi kawsanankupaj p’unchaykunataj karunchasqas karqanku, Señor Dios runaspa wawasninkuman kamachisqasninman jina. Imaraykuchus payqa tukuy runas Diosman kutirikunankuta kamacherqa; tukuy runasman chinkasqas kashasqankuta rikucherqataj tatasninkoj juchallikusqankurayku.

22 Kunantaj, qhawaychis, Adan mana juchallikunmanchu karqa chayqa, mana urmanmanchu karqa, jinapis Eden nisqa huertapi quedakunman karqa. Tukuy rikhurichimusqa imastaj rikhurichimusqantawan kikin kawsayninkupi quedakunkuman karqa; chay jina kankuman karqa, tukukuyninku mana kanmanchu karqa wiñaypaj.

23 Mana wawayoj kankumanchu karqa; chayraykutaj mana yuyayniyoj kawsay quedakunkuman karqa, mana kusikuyniyoj, mana muchuyta yachasqankurayku; mana ni ima allin ruwanata ruwaspa, juchata mana rejsisqankurayku.

24 Chaywampis tukuy ima ruwasqa tukuyta Yachajpa yachayninman jina.

25 Adan urmarqa runas kawsanankupaj; runastaj kawsanku, kusikuyniyoj kanankupaj.

26 Mesiastaj jamun junt’aj p’unchaykunapi runaspa wawasninkuta kacharichej Adampa urmasqanmanta. Adampa urmasqanmanta kacharisqas kasqankuraykutaj wiñaypaj libres kanku, allin kajkunata, sajra kajkunamanta rejsinkutaj. Chayta yachaspa kikillankupaj ruwanku, manataj ruwanankuta kamachisqachu, kamachisqas kanku leypa jasut’iynillanwan, Diospa qosqaña kamachisqasninman jina.

27 Chayrayku runas aychamanta libres kanku; tukuy necesitasqa kajkunastaj paykunaman qosqa. Runas libres kallankutaj ajllanankupaj libre kayta, wiñay kawsaytawan, tukuy runasta jatun allinyachisqanejta, mana chayqa ajllanankupaj preso kayta, wañuytawan, supaypa presochayninman jina, atiynnman jinataj; imaraykuchus supayqa tukuy runasta muchuchiyta munan pay jina kanankupaj.

28 Kunantaj wawasníy, jatun Allinyachejman qhawanaykichista munayman, paypa jatun kamachisqasninta junt’anaykichista munallaymantaj; Paypa nisqasnimpi feniyoj kanaykichista munayman, wiñay kawsayta ajllanaychispaj Santo Espiritumpa munasqanman jina;

29 Amataj wiñay wañuyta ajllaychischu aychaj munasqanman jina, chaypi sajra kasqanman jinataj, imachus supayman atiyta qon presochanampaj, qankunata ukhu pachaman pusanampaj, kikin reinompi qankunata kamachinampaj.

30 Kay uj, iskay palabrallatapis parlaykichis, wawasníy, kay qhepa kaj p’unchyaniykunapi kasukojchus manachus rikuchikunaypaj pachapi. Kuraj parteta ajllani profetaj nisqanman jina. Wiñaypaj allin kanaykihista munaspallataj kaykunasta parlaykichis. Amen.