1 Kunantaj ñoqa, Nefi, tataypa Josemanta, mayqen Josechus Egiptopi presochasqa, paymanta sut’inchayninkunamanta parlasaj.

2 Imaraykuchus cheqamanta tukuy mirayninmanta sut’incharqa. Escribisqan sut’inchaykuna ancha sumaj, chay jina sumaj sut’inchaykuna casi mana kanchu. Ñoqaykumanta, jamoj mirayniykumantapis sut’inchallarqataj. Bronce planchaspi chaykuna escribisqas kanku.

3 Chayrayku tatayqa Josej sut’inchayninkunata willaytawan Lamampa wawasninta, qharista, warmista wajyarqa. Paykunaman nerqataj: Qhawaychis, wawasníy, pikunachus ñawpaj wawaypa wawasnin kankichis, uyarinawaykichista munayman.

4 Imaraykuchus Señor Dios nin: Kamachisqasniyta junt’ankichis chayqa, kay jallp’a patapi allin risonqachis. Mana kamachisqasniyta junt’ankichischu chayrí, ñoqamanta qharqosqas kankichis.

5 Chaywampis uyariwaychis, wawasníy, manaraj qankunata bendecishaspa, mana sepulturayman riyta atinichu; imaraykuchus sumaj purinaykichista yachachisqa kankichis chayqa, chay sumaj purinaykichismanta mana qonqankichischu, chayta yachani.

6 Chayrayku juchachasqas kankichis chayqa, bendicionniyta qankunapaj saqeni juchachasqa kasqaykichista qhechunaypaj tatasniykichispa umasninkuman chayanankama.

7 Chayrayku, bendicionniyrayku, Señor dios mana tukuchisqas kajta saqesonqachischu. Chayraykutaj qankunawan, wawasniykichiswan ima wiñaypaj wiñaynimpaj khuyayniyoj kanqa.

8 Jinataj tatay Lamampa wawasninman parlaytawan Lemuelpa wawasninta, qharista, warmista paypa ñawpaqenman pusacherqa.

9 Paykunaman parlarqataj, nispa: Qhawaychis, wawasníy, pikunachus iskay kaj wawaypa wawasnin kankichis, kikin Lamampa wawasnimpaj bendicionniyta saqeykichis. Chayrayku mana q’alitumanta tukuchisqaschu kankichis, chaywampis tukukuypi wawasniykichis bendecisqas kanqanku.

10 Jinataj tatay paykunaman parlaytawan, Ismaelpa wawasninman parlarqa, arí, tukuy familianmampis parllallarqataj.

11 Paykunaman parlaytawanrí, Samman parlarqa, nispa: Bendecisqa kanki wawasniykiwan, imaraykuchus hermanoyki jina, Nefi jina, kay jallp’ayoj chayaqeykipaj kankichis. Qampa wawasniykitaj paypa wawasninwan yupasqas kanqanku. Qampis hermanoyki jina kallankitaj. Wawasniykipis paypa wawasnin jina kallanqankutaj. Bendecisqataj kanki tukuy p’unchayniykipi.

12 Jinataj tatayqa, Lehi, tukuy familianman sonqompi kasqanman jina, paypi Señorpa Espiritunman jinataj parlaytawan, payqa viejoyarqa. Payqa wañuporqataj, p’ampasqataj karqa.

13 Jinataj pisi p’unchaykuna tataypa wañusqanmanta, Laman, Lemuelpis, Ismaelpa wawasnimpis ñoqawan phiñakorqanku, Señor paykunata k’amisqanrayku.

14 Imaraykuchus ñoqa, Nefi, Señorpa nisqanman jina paykunaman parlanay karqa. Ashkha imasta paykunaman, tataymanwan, manaraj pay wañupushajtin, willarqani. Ashkha willasqasniy escribisqas kanku waj planchasniypi, imaraykuchus waj planchasniypi aswan ruwasqasniymanta escribisqas kan.

15 Kaykunapirí espirituypa imasninmanta escribini, ashkha bronce planchaspi escribisqastapis kaypi escribillanitaj. Imaraykuchus espirituy anchata escrituraswan kusichin, sonqoytaj chaykunamanta t’ukun. Chaykunata escribinitaj wawasniy amañanankupaj, ñawpajman rinankupajtaj.

16 Qhawaychis, espirituyqa anchata kusikun Señorpa ruwanasnimpi. Sonqoytaj, imatachus rikuni, uyarinitaj, chaykunamanta t’ukun.

17 Chaywampis Señor ñoqata jatun, t’ukuchinapaj ruwanasta rikuchiwajtimpis ancha k’acha kasqanwampis, sonqoy qhaparin: ¡O mana tiyniyoj runa, pichus ñoqa kani! Arí, sonqoy phutikun aychayrayku. Espirituytaj phutikun sajra ruwasqasniyrayku.

18 Mayt’usqa tarikuni tentacionesnejta, sapa kuti jamoj juchanejtataj.

19 Kusikuyta munajtiyrí, sonqoy waqan juchasniyrayku. Chaywampis yachani pipichus confiani ñoqa.

20 Diosniy yanapawan; payqa ch’in pampaspi phutiyniykunamanta pusamuwarqa. Jatun qhocha ukhu yakus patapipis yanapallawarqataj.

21 Payqa munakuyninwan junt’achiwan aychay ruphanankama.

22 Enemigosniytataj pantachin, ñawpaqeypi kharkatitinankukama.

23 Qhawariy, p’unchaypi wajyayniyta uyarin, tutapitaj yachachiwan rikuykunawan.

24 P’unchaypi kallpachakuni Diosmanta sumajta mañakuspa ñawpaqempi. Arí, wajyayniyta altuman qhaparerqani. Angelestaj uraykamorqanku, yachachiwarqankutaj.

25 Espiritumpa lijrasnimpi cuerpoy ancha altu orqosman apasqa karqa. Ñawisniyrí jatun ruwanasta rikunku, arí, chaykuna may jatun, mana runas rikunankupaj jina. Chayrayku mana saqewanchu chaykunata escribejta.

26 Chantataj chay jatun ruwanasta rikojteyqa, Señorqa runaspa wawasninkuman mana jatunchakuspa, paykunata khuyayninwan visitamojtintaj, ¡Imaraykutaj sonqoy waqanman, imaraykutaj espirituy muchuy wayq’opi quedakunman, imaraykutaj aychay ismunman, kallpaytaj pisiyanman, phutiyniykunaraykú?

27 ¡Imaraykutaj juchaman urmayman, aychayraykú? Arí, ¡Imaraykutaj juchaman urmayman, supay sonqoypi kanampaj tiyasqa sonqoyta tukuchinampaj, espirituyta muchuchinampajtaj? ¡Imaraykutaj enemigoyrayku phiñakunirí?

28 ¡Espiritúy, rijch’arikuy! AmÁ juchaman urmaychu. Kusikuy, o sonqóy, amañataj lugarta saqeychu espirituypa enemigompaj.

29 Amaña enemigosniyrayku phiñakuychu. Amataj phutiyniykunarayku kallpayta pisiyachiwaychu.

30 Kusikuy, o sonqóy, Señorta wajyaytaj, niytaj: O Señor, qanta wiñaypaj yupaychasqayki. Arí, qampi espiritoyqa kusikonqa, Diosníy, salvacionniypa rumin.

31 O Señor, ¡Espirituyta kacharichinkichu? ¡Enemigosniypa makisninkumanta ayqechiwankichu? ¡Juchaj ñawpaqempi kharkatitichiwankichu?

32 ¡Ñoqaj ñawpaqeypi infiernoj punkusnin wisq’arayasqas kachun, imaraykuchus sonqoyqa llakisqa, espirituypis k’umuykusqa! ¡O Señor, ama allin ruwanasniykej punkusninta wisq’awaychu, valle ukhu ñampi purinaypaj, pampa ñampi cheqanta purinaypajtaj!

33 ¡O Señor, allin ruwanasniykej p’achanwan p’achallichiway! ¡O Señor, enemigosniymanta ayqechiway! ¡Nanniyta ñawpaqeypi cheqanchariy! ¡Amataj urmajta saqewaychu — ñanniyta ñawpaqeypi llimphuchariy, amataj ñanniyta jark’aychu, chaywampis enemigoypa ñanninta jark’ay.

34 O Señor, qampi confiani, wiñaypaj confiaykitaj. Manataj aychaj makimpi confianichu, imaraykuchus aychapi confiaj juchachasqa kasqanta yachani. Arí, runapi confiaj, aychanejta kamachejwan juchachasqas kasqankuta yachani.

35 Arí, Dios mañakojman mana k’amispalla qonanta yachani. Arí, Diosniy cheqata mañakojtiy qollawanqa, chayrayku wajyakusqayki. Arí, qanman wajyasqayki, Diosníy, allin ruwanaypaj rumiy. Qhaway, wajyakuyniy wiñaypaj qanman wicharimusonqa, rumíy, wiñaypaj Diosníy. Amen.