Nefij Iskay Kaj Libron

1 Jinataj ñoqa, Nefi, hermanosniyta yachachisqaytawan, tatayku, Lehipis, paykunata ashkha imasta yachachillarqataj — imaynatachus Señorqa jatun ruwanasta paykunapaj ruwarqa paykunata Jerusalen jallp’amanta orqhospa, chayta.

2 Paykunaman parlarqataj yakus patapi phiñanakusqankumanta, Dios paykunaj kawsayninkuta salvanampaj khuyayninmantapis, mana jatun qhocha paykunata p’ampaykunampaj.

3 Paykunaman parlarqataj prometisqa jallp’amanta, mayqempichus paykuna kasharqankuña — imaynatachus Señorqa ancha khuyayniyoj karqa ñoqaykuman willaspa Jerusalen jallp’amanta ayqenaykupaj, chaymantapis.

4 Uyariwaychis, nerqa, rikusqay kan, imamantachus yachaniña Jerusalen tukuchisqaña kasqanta; Jerusalempi quedakusunman karqa chayqa, ñoqanchispis tukuchisqaña kasunchisman karqa.

5 Chaywampis, nerqa, phutiyninchiskunawampis, prometisqa jallp’ayoj kanchis, jallp’a mayqenchus tukuy waj jallp’asmanta aswan ajllasqa; jallp’a mayqenchus Señor Dios ñoqawan tratochawarqa wawasniypaj chayaqe jallp’anku kanampaj. Arí, Señorqa kay jallp’ata ñoqaman, wawasniyman ima qonawanta niwarqa wiñayninkama, waj runasmampis, pikunachus waj llajtasmanta Señorpa makinwan pusamusqas kanku, paykunamampis qonanta willawarqa.

6 Chayrayku ñoqa, Lehi, sut’inchani Espiritoj ruwasqanman jina, mayqenchus ñoqapi kashan, mana ni pipis kay jallp’aman jamonqankuchu pikunachus mana Señorpa makinwan pusamusqa.

7 Chayrayku kay jallp’a t’aqasqa, kayman pusamusqa kajkunapaj. Sichus paykuna kamachisqasninman jina payta sirvinkutaj chayqa, paykunapaj libre jallp’a kanqa; chayrayku mana ni jayk’aj presochasqaschu kanqanku; mana chayqa, presochasqas kanqanku sajra kasqankurayku; sajra ruwanas kanqa chayqa, kay jallp’a maldecisqa kanqa paykunarayku, chaywampis kamachisqata junt’ajkunapaj kay jallp’a wiñaypaj bendecisqa kanqa.

8 Kosa kashasqataj waj llajtas manaraj kay jallp’amanta yachanankupaj; imaraykuchus ashkha llajtas kay jallp’aman jamunkuman, mana chayaqepaj campo kanankama.

9 Chayrayku ñoqa, Lehi, qoyta tarerqani. Pikunatachus Señor Dios Jerusalen jallp’amanta pusamun, paykuna paypa kamachisqasninta junt’anku chayqa, kay jallp’api allin paykunata renqa. Waqaychasqas kallanqankutaj tukuy waj llajtasmanta, kay jallp’a paykuna kikinkuta kapunampaj. Kamachisqasninta junt’anku chayqa, kay jallp’a patapi bendecisqas kanqanku, manataj ni pipis paykunata molestanqachu, manataj pipis paykunamanta chayaqepaj jallp’ankuta qhechonqachu, wiñaypajtaj allin tiyakonqanku.

10 Chaywampis mana creejtinku, chay jina may ashkha bendicionesta Señorpa makinmanta jap’isqankutawan — mundoj ruwasqa kasqanmanta yachajtinku, tukuy runastaj, Señorpa jatun t’ukuchinapaj ruwanasta kay mundoj ruwasqa kasqanmantapacha rejsishajtinku; paykunaman qosqa atiyniyoj kashajtinku tukuy imata ruwanankupaj fenejta; qallariymantapacha tukuy kamachisqas kapushajtinku, paypa wiñaypaj k’acha kasqanman jina kay prometisqa jallp’aman pusamusqas — qhaway, nini, p’unchay kajtin mayk’ajchus Israelpa Ajllasqanta neganku, cheqa Mesiasta, Kacharichejninkuta Diosninkutapis, chaypachaqa cheqapuni Juzgajpa juzgaynenqa paykunaman jamonqa.

11 Arí, waj llajtasta paykunaman pusamonqa, atiyta paykunaman qollanqataj, kapuyninkuna jallp’asta paykunamanta qhechullanqataj, paykunata ch’eqerachenqataj sufrichenqataj.

12 Arí, uj miray wajman pasashajtin yawar jich’achinas kanqa, jatun sajra jamuykunaspis kallanqataj; chayrayku wawasníy, yuyarinaykichista munayman; arí, nisqasniyta uyarinaykichista munayman.

13 O rijch’ariwajchis; puñuyniykichismanta rijch’ariychis, arí, ukhu pachaj puñuyninmantapis rijch’ariychis, thalarakuychistaj millay waskhasta, mayqenkunachus qankunata watanku, mayqen waskhaschus runaspa wawasninkuta watanku, mayqenkunachus wiñaypaj llakiy, muchuy wayq’oman pusanku presos kanankupaj, chaykunamanta.

14 ¡Rijch’ariychis! Jallp’amanta jatarikuychistaj, uj kharkatitej tatajpa nisqasninta uyariychistaj, pejpa makisnin, chakisninwan pisipiwan chiri, ch’in aya p’ampanapi siriykonqanku, maymantachus mana ni mayqen viajero runa kutimuyta atinchu; pisi p’unchaypiwan ñoqa kayu jallp’aj ñanninnejman risaj.

15 Chaywampis qhawaychis, Señorqa ñoqata ukhu pachamanta kacharichin; k’anchayninta rikunitaj, munakuy makisnimpi wiñaypaj marq’asqa kashanitaj.

16 Señorpa kamachisqasninta, juiciosnintawan kasuyta yuyarinaykichista munayman; imaraykuchus kayqa munayniy qallariymantapacha.

17 Wakin tiempospi muchoj, llasa sonqoyoj karqani, manchachikusqayrayku, ichapis rumi sonqoyoj kasqaykichisrayku, ichapis rumi sonqoyoj kasqaykichisrayku Señor Diosniykichis tukuy k’ajaj phiñakuyninwan qankunaman jamusunkichisman wiñaypaj qharqosqas, tukuchisqastaj kanaykichispaj.

18 Mana chayrí, maldecisqa kanaykichispaj ashkha miraykuna pasanankukama; espaddanejta wañunaykichispaj, jatun yarqhayniyoj kanaykichispaj, chejnisqas kanaykichispaj, supaypa munasqanman jina pusasqas kanaykichispaj paypa presosnin kanaykichispajtaj.

19 O wawasníy, kaykuna mana qankunaman jamuchunkuchu, astawanqa Señorqa munasqa, ajllasqa llajtan kawajchis. Chaywampis paypa munaynin ruwasqa kachus; imaraykuchus paypa ñanninkuna wiñaypaj cheqan kanku.

20 Payqa nin: Kamachisqasniyta junt’ankichis chayqa, kay jallp’api allin risunkichis; mana kamachisqasniyta junt’ankichischu chayrí, ñoqamanta qharqosqas kankichis.

21 Kunantaj kusikuyniyoj qankunarayku kanaypaj, sonqoypis kusikuyniyoj qankunarayku kay jallp’amanta llojsinampajtaj, mana aya p’ampanaman llakiyniyoj, muchuyniyojtaj siriykunaypaj, wawasníy jallp’amanta jatarikuychis, allin qharis kallaychistaj, uj yuyayniyoj, uj sonqoyoj, ujllapi tukuy imapi kaychis mana presochasqas kanaykichispaj;

22 Mana sajra maldicionniyoj kanaykichispaj; chay jinapis, mana juchayoj, cheqan Diospa phiñaynin mana qankunaman jamunampaj, tukunaykichiskama, arí, espirituykichis, cuerpoykichiswan mana wiñaypaj juchachasqas kanankupaj.

23 Rijch’ariychis, wawasníy; tukuy Diospa maqanakunasninta jap’iychis. Qankunata watanapaj waskhasta qankunamanta thalarakuychis, laqhamanta llojsimuychistaj, jallp’amanta jatarikuychistaj.

24 Amaña hermanoykichispa contranta jatariychischu, pejpa rikusqasninchus sumaj kanku, pichus Jerusalenmanta llojsimusqanchismantapacha kamachisqasta junt’an; pitajchus Diospa makisnimpi ruwaj karqa kay prometisqa jallp’aman pusamunawanchispaj; mana payqa ñoqanchiswan kanman karqa chayqa, yarqhayninchisrayku ch’impi wañupusunman karqa; chaywampis, qankuna payta wañurachiyta munarqankichis; arí, payqa ancha muchuyniyoj qankunarayku karqa.

25 Ñoqa anchata manchikuni, kharkatitinitaj qankunarayku, watejmanta payta muchuchinaykichisrayku; imaraykuchus, qankunata kamachinampaj atiyniyoj kayta munasqanta tumpankichis; chaywampis ñoqa mana qankunata kamachinampaj atiyniyoj kayta munasqanta yachani, astawanqa payqa Diospa k’anchayninta mask’an, qankunaj wiñaypaj allin kanaykichista munallantaj.

26 Sut’inta parlasusqaykichismanta thutullankichistaj. Qankunawan sinchi kasqanta ninkichis. Qankunawan phiñakusqanta nillankichistaj; chaywampis paypa sinchi kaynenqa Diospa palabrampa atiynimpa sinchi kaynin, mayqenchus paypi kashan. Imatachus phiñaynin kasqanta ninkichistaj, chay cheqa kajkunari, Diospi cheqa Kajkunaman jina. Chaytaj mana jark’akuyta aterqachu, chayta mana manchachikuspa qhawachisorqachis juchasniykichisrayku.

27 Diospa atiynintaj paypi kanan tiyan, qankunata kasunaykichispaj kamachinankamapis. Chaywampis Senorpa Espiritonqa, manataj pay kikinchu, siminta parlanampaj kicharerqa mana chayta wisq’ayta atinankama.

28 Kunantaj wawáy, Laman, Lemuel, Sampis, wawasníypis, pikunachus Ismaelpa wawasnin kankichis, qhawaychis, Nefij kankichis. Payta kasullankichistaj chayqa, bendicionta qosqaykichis, ñawpaj bendicionniytapis.

29 Chay jinapis, mana payta kasunkichischu chayqa, ñawpaj bendicionniyta qhechusqaykichis, arí, chay bendicionniy paypaj kanqa.

30 Kunantaj Zoram, qanman parlayki: Qhaway, Labampa kamachin karqanki; chaywampis, Jerusalen jallp’amanta pusamusqa kanki, wawaypa, Nefi, wiñaypaj cheqa amigon kasqaykita yachani.

31 Chayrayku qampa wawasniyki, allin kasukoj kasqaykirayku, paypa wawasninwan bendecisqas kanqanku, unayta sumaj kawasyniyoj tiyakunankupaj kay jallp’a patapi; mana ni imapis kay jallp’a patapi wiñaypaj sumaj kawasayninkuta nanachenqachu ni molestanqachu, sajra ruwayninku, chaylla chayta molestanman.

32 Chayrayku Señorpa kamachisqasninta junt’anki chayqa, Señor kay jallp’ata t’aqan wawasniykipaj, wawaypa wawasnimpaj ima mana ni ima sajra paykunaman chayanampaj.