1 Jinataj paykunaqa Señorta yupaycharqanku; ñoqawan rerqankutaj; ancha sumaj k’ullustataj llajllarqayku. Avesnintaj Señor rikuchiswarqa imaynatachus barcopaj k’ullusta llajllanytay.

2 Kunantaj ñoqa, Nefi, mana runaspa yachayninkuman jinachu k’ullusta llajllarqani, manataj barcota runaspa yachayninkuman jinachu ruwarqani, astawanqa ruwarqani Señorpa rikuchiwasqanman jina. Chayrayku mana runaspa ruwasqankuman jinachu karqa.

3 Ñoqataj, Nefi, sapa kuti orqoman rerqani, sapa kutitaj Señormanta mañakorqani. Chayrayku Señor jatun cosasta rikuchiwarqa.

4 Jinataj barcota ruwasqaytawan Señorpa parlasqanman jina, hermanosniy allin kasqanta rikorqanku, ancha allin ruwasqa kasqantawan. Chayrayku watejmanta Señorpa ñawpaqempi k’umuykorqanku.

5 Jinataj Señorqa tatayman nerqa jatarikunaykuta, barcoman uraykunaykutawan.

6 Jinataj uj p’unchaymantawan, tukuy imata wakichiytawan, ch’in pampasmanta ashkha poqoykunata, aychatawan, ashkha misk’itawantaj, imatachus Señor kamachiwarqayku apanaykupaj, chayta wakichiytawan, barcoman uraykorqayku, tukuy q’episniykuwan, mujusniykuwan ima, imatawanchus aparqayku, sapa ujniyku watasniyoj kasqaykuman jina. Chayrayku tukuyniyku barcoman uraykorqayku, warmisniykuwan, wawasniykuwan ima.

7 Tataypataj, iskay wawasnin nacekorqanku ch’in pampaspi. Kuraj kajta suticharqa Jacob nispa, sullk’a kajtataj Jose nispa.

8 Jinataj tukuyniyku barcoman uraykuytawan, tukuy kawsanaykupaj cosasta cargaytawan, mayqenkunachus kamachiwarqayku carqanaykuta, jatun qhochaman yaykorqayku. Wayraj ñawpaqentataj apasqas karqayku prometisqa jallp’anejman.

9 Ashkha p’unchaykunapaj wayraj ñawpaqempi apasqas kajtiykukama, hermanosniy Ismaelpa qhari wawasninwan, warmisninkuwan fiestata ruwayta qallarerqanku, tusuyta, takiyta, millay parlaytataj qallarerqanku. Arí, paykuna qonqarqanku mayqen atiywanchus kayman pusamusqas kasqankuta. Arí, paykuna millay ruwayninkupi oqharinakorqanku.

10 Ñoqataj, Nefi, anchata mancharikorqani Señor ñoqaykuwan phiñakunanmanta, jasut’inawaykumantataj juchallikusqaykurayku, jatun qhocha ukhupi p’ampasqas kanaykupaj. Chayrayku ñoqaqa, Nefi, phutisqa sonqoyoj kaspa paykunaman parlarerqani. Chaywampis paykunaqa ñoqapaj phiñakorqanku nispa: Mana saqesajkuchu sullk’a hermanoyku kamachejniykuman tukojta.

11 Jinataj Lamanqa, Lemuelwan ñoqata waskhaswan watawarqanku, sajrata ruwawarqankutaj. Jina kajtimpis Señorqa chayta ruwajta saqerqa rikuchinampaj atiyninta, parlasqan junt’akunampaj, mayqentachus parlarqa juchallikojkunamanta.

12 Jinataj paykuna watawasqankutawampacha mana kuyunaypaj, pusana morq’o mayqentachus Señor wakicherqa, manaña purerqachu.

13 Chayrayku mana yacharqankuchu maymanchus barcota pusanankuta. Chantá, sinchita paramuyta qallarerqa, arí, wayra oqharikorqa, kinsa p’unchaypajtaj qhepaman pusasqas karqayku. Chaymanta paykuna manchayta mancharikorqanku jatun qhochapi p’ampasqa kaj jina kasqankurayku; chaywampis mana paskawarqankuchu.

14 Tawa p’unchayta qhepaman pusasqas kajtiyku, aswan jatunta paramorqa, wayramorqataj.

15 Jinataj jatun qhochapi p’ampasqa kaj jina kasharqayku. Tawa p’unchayta yakuspi qhepaman pusasqa kasqaykutawan, hermanosniy yacharqanku Diospa juzgananta paykuna pataman urmaj jina kasqanta. Yachallarqankutaj wañunankuta mana juchasninkumanta Diosman kutirikojtinkoqa. Chayrayku ñoqaman jamorqanku, waskhasta paskararqankutaj, mayqenkunawanchus makisniyta watawarqanku. Makisniytaj ancha punkisqas karqanku. Chaki ñañusniypis ancha punkisqallataj karqanku, anchatataj nanawarqanku.

16 Chaywampis Diosniypi confiarqani, p’unchaynintintaj payta yupaycharqani. Manataj Señorpa contranta thutorqanichu ñak’ariyniykunarayku.

17 Tataytaj, Lehi, paykunaman, Ismaelpa qhari wawasninmampis ashkhata nerqa; chaywampis ñoqata yanapawajkunata mancharichinankupaj parlarqanku. Tatasniytaj ashkha watayojña kasqankurayku, wawasninkumanta ancha phutisqas kasqankuraykutaj onqosqalla karqanku, arí, cama patapi wijch’urayasqas karqanku.

18 Nanayninkurayku, phutisqa kasqankurayku, hermanosniypa juchallikusqankuraykutaj paykunaqa kay kawsaymanta llojsej jina karqanku Diosninkuwan tinkunankupaj. Arí, yuraj chujchasninku jallp’a ukhupi p’ampasqa kaj jina karqanku. Arí, phutiyniyoj paykuna yaku ukhupi p’ampasqa kaj jina kasharqanku.

19 Jacob, Josewan wawallaraj kaspa, allin mikhunata necesitaspataj, anchata phutikorqanku mamanku phutiyniyoj kasqanrayku. Ñoqaj warmiytaj waqaspa, Diosmanta mañakuspataj, wawasniypis mana hermanosniypa sonqosninkuta llamp’uyacherqankuchu ñoqata kacharinawankupaj.

20 Mana imapis Diospa atiynillan, paykunata tukuchej jina kasqanrayku, sonqosninkuta llamp’uyachiyta aterqa. Chayrayku jatun qhocha ukhupi chinkasqa kaj jina kasqankuta rikuspa, paykunaqa juchallikusqankumanta Diosman kutiriporqanku, ñoqata kacharerqankutaj.

21 Jinataj kachariwasqankutawan, pusana morq’ota jap’erqani, purerqataj munayniyman jina. Jinataj Señormanta mañakorqani. Señormanta mañakusqaytawantaj manaña wayramorqachu, manañataj paramorqachu, ancha tiempo calmasqalla karqa.

22 Jinataj ñoqa, Nefi, watejmanta barcota pusacherqani yakus patapi prometisqa jallp’anejman rinaykupaj.

23 Jinataj ashkha p’unchaykunapaj barcopi tuytusqaykumanta, prometisqa jallp’aman chayarqayku. Jallp’a pataman rerqaykutaj, carpasniykuta sayaricherqaykutaj. Jallp’atataj suticharqayku prometisqa jallp’a nispa.

24 Jinataj jallp’ata llank’ayta qallarerqayku, mujusta tarpuyta qallarerqaykutaj. Arí, tukuy mujusniykuta jallp’aman churarqayku, mayqen mujustachus Jerusalen jallp’aman churarqayku, mayqen mujustachus Jerusalen jallp’amanta apamorqayku. Jinataj chay mujus allinta poqorqanku, chayrayku ashkhawan bendecisqas karqayku.

25 Jinataj ch’in pampaspi rishaspa, prometisqa jallp’a patapi tukuy imaymana animalesta sach’a ukhuspi tarerqayku. Vacasta, bueyesta, burrosta, caballosta, cabrasta, k’ita cabrastawan, tukuy imaymana k’ita animalta tarerqayku runas llank’achinankupaj, mikhunankupajtaj. Jinataj tukuy imaymana mineralta tarerqayku, qorita, qolgeta, cobretawan.