1 Jinataj ñoqa, nefi, hermanosniyman parlasqaytawan, paykuna ñoqaman nerqanku: Qanqa anchata k’amiwayku, manataj uyariyta atiykuchu manchayta parlasqaykirayku.

2 Jinataj ñoqaqa paykunaman nerqani: yachaniña cheqa kajkunaman jina, sajrata ruwajkunaman sinchita k’amisqayta. Allin ruwajkunata allinyachini. Paykunamantataj willani qhepa p’unchaypi oqharisqa kanankuta; chayrayku juchasapa runasqa mana cheqa kajta uyariyta munankuchu cheqa kaj paykunata nanachisqanrayku.

3 Kunantaj hermanosníy, qankunachus allinta ruwaspalla, cheqa kajta uyariyta munaspallataj kankichis Diospa ñawpaqempi cheqanta purinaykichispaj chayqa, mana cheqa kajmanta phiñakuwajchischu nispa: Qanqa anchata k’amiwayku.

4 Jinataj ñoqa, Nefi, tukuy sonqoywan hermanosniyman nerqani Señorpa kamachisqasninta junt’anankuta.

5 Jinataj paykunaqa Señorpa ñawpaqempi k’umuykorqanku. Chayrayku anchata kusikorqani, anchata suyarqanitaj sumaj ñankuna patapi purinankupaj.

6 Kunantaj tukuy kaykuna ruwasqas, parlasqastaj karqanku tatayqa carpampi tiyakojtin, Lemuel sutichasqa vallepi.

7 Jinataj ñoqa, Nefi, Ismaelpa warmi wawasninmanta ujninta ajllarqani kasarakunaypaj. Hermanosniypis Ismaelpa warmi wawasninmanta ujkunata ajllarqanku kasarakunankupaj. Zorampis Ismaelpa kuraj warmi wawanta ajllarqa kasarakunampaj.

8 Chay jinatataj tatayqa tukuy Señorpa kamachisqasninta junt’arqa, mayqenkunachus payman qosqos karqanku. Ñoqataj, Nefi Señormanta sumajta bendecisqa karqani.

9 Jinataj tutapi Señorpa parlaynin tatayman parlarqa, kamacherqataj q’ayantin ch’in pampasman llojsinanta.

10 Jinataj tatayqa tutamanta jatarispa, carpampa punkunman rispataj, waj jina ruwasqa morq’ota pampapi rikorqa. Chaytaj sumaj broncemanta ruwasqa karqa, may chhikata payta t’ukucherqataj. Morq’oj ukhumpi iskay agujas karqa, ujnintaj rikuchiwarqayku maymanchus ch’in pampasnejta purinaykuta.

11 Jinataj ch’in pampasmman apanasniykuta, puchoj mikhunaykutawan, mayqentachus Señor qowarqayku, chaykunata tantarqayku. Ñoqaykutaj tantarqayku tukuy laya mujuta ch’in pampasman apanaykupaj.

12 Jinataj tukuy carpasniykuta apaspa, ch’in pampasman llojserqayku, laman sutiyoj mayuta pasaspa.

13 Ñoqaykutaj tawa p’unchaypi purerqayku inti llojsimuynejman, uranejman rispa. Carpasniykuta ujtawan sayaricherqaykutaj, chay lugarta suticharqaykutaj Shazer nispa.

14 Jinataj ñoqaykoqa arcosta, flechastawan jap’erqayku, ch’in pampasman rerqaykutaj animalesta wañuchej familiasniyku mikhunankupaj. Animalesta wañuchiytawan, ch’in pampaspi familiasniykuman kutiporqayku, Shazer sutiyoj lugarman. Jinataj watejmanta cheqallantapuni riporqayku ch’in pampasman aswan allin jallp’asnejta, mayqenkunachus Puka qhochaj kantumpi karqanku.

15 Jinataj ashkha p’unchaykunapaj purerqayku, animalesta wañÚchispa arcoswan, flechaswan, rumiswan, warak’aswan ima.

16 Morq’oj willaswasnintataj qhaterqayku, mayqenkunachus ch’in pampaspi aswan allin jallp’asnejta pusawarqayku.

17 Ashkha p’unchaykunapaj puriytawan, uj tiempopaj carpasniykuta sayaricherqayku samarikunaykupaj, familiasniykupaj mikhunata jap’inaykupajtaj.

18 Jinataj ñoqa, Nefi, animalesta wañuchej rispa, arcoyta p’akerqani, mayqen arcochus allin aceromanta ruwasqa karqa. Arcoyta p’akisqaymanta, hermanosniy ñoqapaj phiñakorqanku arcoy chinkasqanrayku. Chayraykutaj mana jap’erqaykuchu mikhunata.

19 Jinataj mana mikhunayoj kaspa familiasniykuman kuterqayku. Paykunataj may sayk’usqa karqanku purisqankurayku, anchatataj sufrerqanku mikhunamanta.

20 Jinataj Lamanqa, lemuelwan, Ismaelpa qhari wawasninwan anchata thutuyta qallarerqanku ch’in pampaspi sufrisqankurayku, phutiyniyoj kasqankuraykutaj. Tataypis Señor Diosnimpa contranta thutuyta qallarillarqataj. Arí, tukuyninku may chhika phutisqas karqanku, chayrayku Señorpa contranta thutorqanku.

21 Jinataj ñoqa, Nefi, hermanosniywan phutisqallataj karqani arcoyta p’akisqayrayku, paykunaj arcosninku llawqheyasqankuraykutaj. Ancha trabajo kayta qallarerqa, arí, chayrayku mikhunata mana jap’iyta aterqaykuchu.

22 Jinataj ñoqa, Nefi, anchata parlarqani hermanosniyman watejmanta sonqosninkuta rumiyachisqankurayku, Señor Diosninkoj contranta ch’ajwanankukama.

23 Jinataj ñoqa, Nefi, uj arcota ruwarqani k’aspimanta, uj flechatapis ruwallarqanitaj cheqan k’aspimanta. Chaymanta arcota, flechatawan, warak’atawan, rumistawantaj aparqani. Tatayta taporqanitaj nispa: ¿Mayman risaj mikhunata jap’ej?

24 Jinataj payqa Señorta taporqa, imaraykuchus paykunaqa llamp’u sonqoyojña karqanku parlasqayrayku. Imaraykuchus ñoqaqa ashkhata paykunaman parlarqani kallpayman jina.

25 Jinataj Señorqa tatayman parlarqa, cheqamantataj tatay k’amisqa karqa Señorpa contranta thutusqanrayku. Chayrayku tatayqa anchata phutikorqa.

26 Jinataj Señorqa payman nerqa: Morq’ota qhaway, imastachus chaypi escribisqas leenaykipaj.

27 Jinataj tatayqa qhawarqa imastachus morq’opi escribisqa kasqanta. Paytaj anchata mancharikorqa, kharkatiterqataj, hermanosniypis, ismaelpa qhari wawasnimpis, warmisniykupis.

28 Jinataj ñoqa, Nefi, chay morq’opi agujasta rikorqani, yacharqanitaj feniyoj kasqaykuman jina, llimphu kasqaykumana jina, chaykunata kasusqaykuman jinataj purisqankuta.

29 Chaykunapitaj mosoj escribisqa karqa, mayqenchus sut’i karqa leenapaj, mayqenchus yachachiwarqayku Señorpa ruwanasninmanta. Uj kutimanta, waj kutikama chay escribisqa waj jinayasqa karqa, escribisqataj karqa chaypi feniyoj kasqaykuman jina, llimphu kasqaykuman jinataj. Chay jinataaj yachasunman juch’uy kajkunanejta Señorqa jatun cosasta ruwan.

30 Jinataj ñoqa, nefi, jatun orqoman wicharerqani, morq’opi willasqasman jina.

31 Jinataj ñoqa campo animalesta wañucherqani, chayrayku mikhunata jap’erqani familiasniyku mikhunankupaj.

32 Jinataj carpasniykuman kuterqani, wañuchisqay animalesta apaspa. Chantataj mikhunata jap’ejta rikuwaspa, ¡Paykuna anchata kusikorqanku! Jinataj paykuna Señorpa ñawpaqempi k’umuykorqanku, agradecerqankutaj.

33 Jinataj watejmanta purerqayku, qallariypi jina ñannejta cheqallantapuni purispa. Shkha p’unchaykunapaj purisqaykutawan, watejmanta carpasniykuta sayaricherqayku chaypi uj tiempo quedakunaykupaj.

34 Jinataj Ismael wañuporqa. Paytaj p’ampasqa karqa Nahom sutiyoj lugarpi.

35 Jinataj Ismaelpa warmi wawasnin anchata waqarqanku, tatankoj wañusqanrayku, ch’in pampaspi muchusqankuraykutaj. Tataypa contranta thutorqanku paykunata Jerusalen jallp’amanta pusamusqanrayku nispa: Tatayku wañusqaña. Arí, ñoqaykutaj ashkhata ch’in pampaspi puriyku, muchuykutaj ashkhata, yarqhayta, ch’akiyta, sayk’uytawan. Kunantaj tukuy chaykunata muchuspaña, chi’in pampaspi wañusakjku yarqhayniykurayku.

36 Chay jinatataj tataypa contranta thutorqanku, ñoqaj contraytapis. Paykunataj Jerusalen jallp’aman kutipuyta munarqanku.

37 Lmantaj Lemuelman, ismaelpa qhari wawasninmanwan nerqa: uyariychis, wañuchimuna tataykuta, hermanoyku Nefitapis, pichus ñoqanchispa, kuraj hermanosnin, kamachejninchisman, yachachejninchisman ima tukushan.

38 Kunantaj payqa nin Señor payman parlasqanta, angelestaj payta yachachisqankutawan. Jina kajtimpis yachanchisña llullakuwasqanchista. Paytaj kaykunata niwanchis, ashkha imastataj ruwan engañoyoj ruwasqasninrayku, ñawisninchista, yuyayninchistawan engañanawanchispaj, ichapis uj mana rejsisqa ch’in pampaman pusanawanchispaj. Ñoqanchista pusawasqanchistawantaj, payqa munan reyninchisman, kamachejninchismantaj tukuyta. Imatachus munan ñoqanchiswan ruwayta, chayta ruwanampaj. Chay jinata parlaspataj, Lamanqa sonqosninkuta phiñacherqa.

39 Jinataj Señorqa ñoqaykuwan karqa, arí, Señorpa parlaynimpis jamorqa, paykunaman parlarqataj, paykunata anchata k’amillarqataj. Señor paykunata k’amisqantawampacha, paykuna manaña phiñakorqankuchu, juchasninkumantataj Diosman kutiriporqanku. Chayrayku Señorqa watejmanta mikhunawan bendeciwarqayku mana wañunaykupaj.