1 Jinataj Señor tatayman parlarqa, arí, uj mosqoypi payman parlarqa nispa: Bendecisqa kanki Lehi ruwasqasniykirayku. Feniyoj kasqaykirayku, kay runasman willasqaykiraykutaj imatachus kamacherqayki, chayta. Chayrayku wañuchisuy ta munanku.

2 Jinataj Señorqa tatayta mosqoypi kamacherqa familianwan ch’in pampasman llojsinanta.

3 Jinataj Señorpa parlasqanta kasorqa, chayrayku Señorpa kamachisqanta ruwarqa.

4 Jinataj ch’in pampasman riporqa. Paytaj saqerqa wasinta, chayaqe jallp’anta, qorinta, qolqenta, allin kapuynintawan. Familianta, mikhunasta, carpastawan apaspa ch’in pampasman riporqa, manataj astawan imatapis aparqachu.

5 Paytaj janaj manta Puka qhochaspa chimpanman uraykorqa. Chaymanta ch’in pampasta purerqa, mayqenkunachus Puka qhochaj chimpannejpi kanku. Paytaj ch’in pampasta purerqa familianwan, pikunachus karqanku Sariah, mamay, Laman, Lemuel, Samwan, pikunachus hermanosniy kanku.

6 Jinataj kinsa p’unchayta ch’in pampasta puriytawan, payqa sayaricherqa carpanta vallepi, mayqenchus mayu kantupi karqa.

7 Jinataj payqa rumi altarta sayaricherqa, Señorman uywata wañucherqa, Señor Diosninchismantaj graciasta qorqa.

8 Jinataj chay mayuta suticharqa Laman nispa. Chay mayutaj Puka qhochaman chayarqa. Valletaj mayoj chayasqan kantupi karqa.

9 Maypachachus tatayqa rikorqa chay mayoj yakusnin Puka qhochaman chayajta, chaypachaqa Lamanman parlarqa, nispa: ¡O, kay mayu jina kawaj, tukuy allin ruwaypaj qhochaman wiñaypaj chayaspa!

10 Lemuelmantaj nerqa: ¡O, kay valle jina kawaj, rumi jina, mana kuyuspa Señorpa kamachisqasninta junt’anaykipaj!

11 Chaykunata nerqa Lamanman, Lemuelmanwan sinchi umayoj kasqankurayku. Imaraykuchus paykuna tatankoj contranta ashkha imasta thutorqanku, payqa rikuyniyoj runa kasqanrayku, paykunata Jerusalen jallp’amanta pusamusqanraykutaj, saqenankupaj chayaqe jallp’ankuta, qorinkuta, qolqenkuta, allin kapuyninkutapis, ch’in pampaspi wañunankupaj. Nerqankutaj kaykunata ruwasqanta sajra sonqoyoj kasqanrayku.

12 Chay jinamanta Laman, Lemuelwan, kuraj kaspapis, tatankoj contranta thutorqanku. Thutorqankutaj imaraykuchus mana yacharqankuchu diospa ruwasqasninta, mayqen Dioschus paykunata ruwarqa.

13 Manataj creerqankuchu chay jatun Jerusalen llajta tukuchisqa kananta, profetas nisqankuman jina. Paykunataj Jerusalempi judios jina karqanku, pikunachus tatayta wañuchiyta munarqanku.

14 Jinataj tatayqa paykunaman parlarqa Lemuel sutiyoj vallepi kaspa. Payqa parlarqa atiywan, Espirituwan junt’asqa kaspa, chayrayku paykunaqa tataypa ñawpaqempi kharkatiterqanku. Paytaj paykunata ch’inyacherqa mana paypa contranta parlayta munanankupaj. Chayrayku paykuna kamachisqasninta kasorqanku.

15 Tataytaj carpapi tiyakorqa.

16 Jinataj ñoqa, Nefi, ancha joven kaspapis, jatun runa karqani. Ñoqataj tukuy Diospa pakasqa cosasninta yachayta munaspa, Señormanta mañakorqani. Pay watukuwarqa, sonqoyta llamp’uyacherqataj, tukuy tataypa parlasqasninta creenaypaj, chayrayku mana tataypa contranta ch’ajwarqanichu hermanosniy jina.

17 Ñoqataj Samman parlarqani, yachachispa imatachus Señor ñoqaman willawarqa Santo Espiritunnejta. Jinataj parlasqayta creerqa.

18 Chaywampis Lamanqa, lemuelwan mana uyariwarqankuchus parlasqayta. Ñoqataj phutikuspa rumi sonqoyoj kasqankurayku, Señorta wajyaporqani paykunapaj.

19 Jinataj Señorqa ñoqaman parlawarqa nispa: Bendecisqa kanki Nefi feniyoj kasqaykirayku, imaraykuchus mana samaspa mask’awarqanki, llamp’u sonqoyoj kaspa.

20 Kamachisqasniyta junt’ajtiykeqa, tukuy imapi allin risonqa. Qantaj prometisqa jallp’aman pusasqa kanki, arí, mayqen jallp’atachus qankunapaj wakicherqani, arí, chay jallp’aqa tukuy jallp’asmanta astawan allin.

21 Hermanosniykichus qampa contraykita ch’ajwankutaj chayqa, paykunaqa Señorpa ñawpaqenmanta qharqosqas kanqanku.

22 Qanchus kamachisqasniyta junt’ankitaj chayqa, qanqa hermanosniykej kamachejninkuman, yachachejninkumantaj tukunki.

23 Qhaway, mayqen p’unchaypichus paykuna ñoqaj contrayta ch’ajwanku, chay p’unchaypi ñoqaqa paykunata juchachasaj sajra maldicionwan. Paykunataj mana atiyniyojchu kanqanku qampa wawasniykita atipanankupaj, qampa wawasniyki mana ñoqaj contrayta ch’ajwajtinkoqa.

24 Ñoqaj contrayta ch’ajwanqankutaj chayqa, wawasniykita sufrichenqanku yuyarikunankupaj.