1 Jinataj ch’in pampasman, tataykuman chayasqaykutawan, payqa anchata kusikorqa. Mamaykupis, Sariah, kusikullarqataj imaraykuchus cheqamanta ñoqaykurayku phutikorqa.

2 Imaraykuchus pantaspa yuyarqa ch’in pampaspi wañusqaykuta. Paytaj tataypa contranta phiñakorqa nispa rikoj runa kasqanta. Nerqataj: Qhawariy, qanqa chayaqepaj jallp’anchismanta pusamuwarqayku, wawasniytaj manaña kawsankuchu, ñoqanchispis ch’in pampaspi wañusunchis.

3 Chay jinata parlaspa mamayqa tatayta k’amerqa.

4 Jinataj tatayqa payman parlarqa nispa: yachaniña rikoj runa kasqayta imaraykuchus mana Diospa cosasninta rikojteyqa, mana Dios ancha sumaj kasqanta yachaymanchu karqa, astawanqa Jerusalempi hermanosniywan quedakuyman karqa paykunawan wañunaypaj.

5 Chaywampis prometisqa jallp’ayoijña kani, chayrayku anchata kusikuni. Arí, yachallanitaj Señor wawasniyta salvanananta Labampa makisninmanta ayqenankupaj, paykunata ñoqanchisman, ch’in pampasman pusamunantawan.

6 Chay jinamantataj parlaspa tatayqa mamayta sonqocharqa ñoqaykumanta, ch’in pampasnejta Jerusalen llajtaman wicharejtiyku judiospa escribisqasninkuta apamunaykupaj.

7 Jinataj maypachachus taaypa carpanman kutiporqayku, paykunaqa sonqo junt’asqa karqanku, mamaytaj sonqochasqa karqa.

8 Mamaytaj parlarqa nispa: Kunanqa cheqamanta yachani Señor qosayta kamachisqanta ch’in pampasman ayqenampaj. Cheqamanta yachallanitaj Señor wawasniyta qhawasqanta, Labampa makisninmanta ayqenankupaj yanapasqantawan, paykunaman atiyta qosqantawan, mayqen atiywanchus Señorpa kamachisqanta junt’ayta aterqanku. Chay jinata mamay parlarqa.

9 Jinataj paykuna may chhikata kusikorqanku. Paykunataj sacrificiosta, ruphachina rikuchiskustawan señorman jaywarqanku, Israelpa Diosninman agradecerqankutaj.

10 Israelpa Diosninman agradeceytawan, tatay, Lehi, bronce planchasmanta ruwasqa escribisqasta jap’erqa, qallariyninmantapacha chaykunata qhawarqataj.

11 Repararqataj Moisespa phishqa escribisqasnin chaypi kasqankuta, mayqen escribisqasninchus mundo ruwasqanmanta parlanku, Adanmanta Evamantawan, pikunachus ñawpaj tatasninchis karqanku, paykunamantataj.

12 Willallantaj judiospa ruwasqasninkumanta qallariyninkumantapacha, Sedeciaspa, Judaj reynin, kamachiyta qallarisqankama.

13 Willallantaj llimphuchasqa profetaspa sut’inchasqasninkutapis, qallariymantapacha, Sedeciaspa kamachiyta qallarisqankama ashkha Jeremiaspa sut’inchasqasninmantawan.

14 Jinataj tatay, Lehi, bronce planchaspi tariparqa, wañusqa tatasnimpa mirayninkunat, chayrayku yacharqa Josemanta rikhurimusqanta, arí, chay Jose, mayqenchus Jacobpa wawan karqa, pichus vendesqa karqa Egipto llajtaman, pitachus Señor salvarqa paypa tatanta, Jacob, tukuy familiantawan yarqhaymanta salvanampaj.

15 Paykunataj presochasqankumanta kacharisqas karqanku, Egipto jallp’amanta pusasqastaj karqanku chay kikin Diosnejta, pichus paykunata salvarqa.

16 Chay jinatataj tatayqa amañarqa wañusqa tatasnimpa mirayninkuta. Labampis Josemanta rikhurimullarqataj, chayrayku payqa, tatasninwan planchaspi escribisqasta waqaycharqanku.

17 Kunantaj maypachachus tatay tukuy kaykunata rikorqa, chaypacha Espirituwan junt’asqa karqa, sut’inchayta qallarerqataj wawasninmanta.

18 Kay bronce planchasqa tukuy llajtasman, ayllusman, parlaykunasman, runasman ima, mayqenkunachus wawasninmanta kanku, paykunaman rinanta nerqa.

19 Chayrayku nerqa bronce planchas mana jayk’ajpis tukuchisqa kanankuta, manataj waj jinaman kutinankuta p’unchaykuna pasashajtinkupis. Ashkha imastataj sut’incharqa wawasninmanta.

20 Jinataj kunan p’unchaykamapis, ñoqaqa, tataywan, kamachisqasta junt’aspa karqayku, mayqen kamachisqastachus Señor kamachiwarqayku.

21 Ñoqaykutaj chay escribisqasta jap’erqayku, mayqen escribisqastachus Señor kamachiwarqayku jap’inaykuta. Chaykunatataj allinta qhawarqayku, amañarqayku allin kasqankuta jap’inaykupaj. Arí, ancha valesqa kasqankuta amañarqayku, wawasniyku yachanankupaj Señorpa kamachisqasninta.

22 Chayrayku Señorpa yachayninman jinakarqa chay escribisqasta ch’in pampasnejta apanaykupaj prometisqa jallp’aman rishajtiyku.