1 Jinataj ujtawan ch’in pampaspi purerqayku, chaymantapachataj inti llojsimuynejman rerqayku. Ch’in pampaspi kaspataj, ashkha phutiykunawan purerqayku; warmisniykupis wawallikorqanku ch’in pampaspi.

2 Señorqa anchata bendeciwasqaykurayku, chawa aychata mikhushajtiyku ch’in pampaspi, warmisniyku ashkha lecheyoj karqanku wawasninkupaj, warmistaj kallpayoj karqanku, arí, qharis jina, chayrayku puriyta qallarerqanku mana thutuspa.

3 Chaymanta rikunchis Diospa kamachisqasninta junt’akunankuta. Runaspa wawasninkuchus Diospa kamachisqasninta junt’anku chayqa, paykunata mikhuchin, kallpachan, ñantapis wakichillantaj paykuna ruwanankupaj, imatachus Dios paykunata kamacherqa, chayta. Chayrayku ñanta wakichipuwarqayku ch’in pampaspi purishajtiyku.

4 Ñoqaykutaj ashkha wataspaj purisharqayku, arí, pusaj watasta ch’in pampaspi karqayku.

5 Uj jallp’amantaj chayarqayku, mayqen jallp’atachus suticharqayku Sumaj jallp’a nispa, ashkha poqoykuna kasqanrayku, tukuy ima misk’i kasqanraykutaj. Tukuy kaykunatataj Señor wakicherqa mana wañunaykupaj. Rikorqaykutaj jatun qhochata, imatachus suticharqayku Irreantum, mayqenchus tijrasqa ninayan ashkha yakus.

6 Jinataj ñoqayku carpasniykuta sayaricherqayku jatun qhochaj kantumpi. Ñoqaykutaj ashkha phutiykunata, mana walej kajkunatapis muchorqayku, arí, escribiyta atisqaykumanta astawanraj. Chaywampis anchata kusikorqayku jatun qhochaj kantunman chayaspa. Chay lugartataj suticharqayku Sumaj jallp’a ashkha poqoyniyoj kasqanrayku.

7 Jinataj ashkha p’unchaykunapaj ñoqa, Nefi, Sumaj jallp’api kashajtiy, Señorpa nisqanqa ñoqaman chayamuwarqa nispa: Jatarikuy, orqoman wichariytaj. Jinataj ñoqa jatarikorqani, jatun orqoman wicharerqani, Señorta wajyarqanitaj.

8 Jinataj Señor parlawarqa nispa: Barcota ruwanki, imaynamantachus rikuchisqayki, chay jinata, llajtaykita kay yakuspa chimpannejman apanaypaj.

9 Ñoqataj nerqani: Señor, ¿Maymán risaj metalkunata tarinaypaj, chayta fundispa barcota ruwanaypaj herramientasta ruwanaypaj, imaynamantachus qan rikuchiswanki, jinata?

10 Jinataj Señorqa willawarqa maymanchus rinayta metalkunata tarinaypaj, barcota ruwanaypaj herramientasta ruwanaypaj.

11 Jinataj ñoqa, Nefi, animal qaramanta phukunata ruwarqani, ninata phukunaypaj. Qaramanta phukunata ruwasqaymantataj, iskay rumista takanacherqani ninata ruwanaypaj.

12 Imaraykuchus Señorqa mana saqewarqaykuchus ninata ruwajta, ch’in pampasnejta purejtiyku, imaraykuchus nerqa: Mikhunaykichista misk’iyahisaj mana wayk’unaykichispaj.

13 Jinallatataj ch’in pampaspi k’anchayniykichis kasaj. Ñoqataj ñawpaqeykichispi ñanta wakichisaj, kamachisqasniyta junt’ankichis chayqa. Chayrayku, kamachisqasniyta junt’ankichis chayqa, prometisqa jallp’aman pusasqa kankichis, yachallankichistaj ñoqanejta pusasqa kasqaykichista.

14 Arí, Señorqa nillarqataj: Prometisqa jallp’aman chayaytawan, yachankichis ñoqa, Señor, Dios kasqayta. yachallankichistaj ñoqa, Señor, tukuchisqa kanaykichismanta ayqeyta yanapasusqaykichista, arí, Jerusalen jallp’amanta orqhosusqaykichista.

15 Chayrayku ñoqa, Nefi, Señorpa kamachisqasninta junt’anaypaj kallpacharqani, hermanosniymantaj parlarqani feniyoj, llimphutaj kanankupaj.

16 Jinataj ñoqa rumismanta fundisqay metalkunamanta barcota ruwanapaj herramientasta ruwarqani.

17 Maypachachus hermanosniy rikuwarqanku barcota sayarichiyta qallarejta, chaypacha paykuna ñoqaj contrayta thutorqanku nispa: Hermanonchis wampu, barcota ruwayta yuyasqanrayku. Arí, yuyallantaj kay ashkha yakusta chimpananta.

18 Chay jina hermanosniy ñoqaj contrayta rimarqanku, mana llank’ayta munarqankutajchu. Imaraykuchus mana creerqankuchu barcota ruwayta atinayta, manataj creerqankuchu Señormanta yachachisqa kasqayta.

19 Jinataj ñoqa, Nefi, anchata phutikorqani rumi sonqoyoj kasqankurayku. Phutikojta rikuwaspataj paykuna sonqosninkupi anchata kusikorqanku, chayrayku niwarqanku nispa: Ñapis yacharqaykuña mana barcota ruwayta atisqaykita mana yachasqaykirayku. Chayrayku mana chay jina jatun ruwanata ruwayta atinkichu.

20 Qantaj tatanchis jina kanki, sonqompi wampu yuyasqasninmanta pusasqa; arí, payqa Jerusalen jallp’amanta pusamuwarqanchis, kay ashkha wataspajtaj ch’in pampasnejta muspanchis. Warmisninchispis wawayoj kanayashaspapis llank’arqankuraj. Paykunataj ch’in pampaspi wawallikorqanku tukuy imata muchuspa, wañuyllatataj mana. Aswan allin kanman karqa paykuna wañunanku, manaraj Jerusalenmanta llojsimushaspa kay phutiykunata muchunankumantaqa.

21 Qhawariy, kay chhika wataspaj ch’in pampaspi muchunchis, kay wataspaj kusikuyniyoj kasunman karqa kapuyninchismanta, chayaqe jallp’anchismantawan, arí, kusikusunman karqa.

22 Yachaykutaj Jerusalen llajtapi tiyakojkunaqa allinta ruwajkuna kasqankuta Señorpa leyninkunata, juiciosnintawan, kamachisqasnintawan junt’asqankurayku, Moisespa leyninman jina. Chayrayku yachayku allinta ruwajkuna kasqankuta. Tatanchistaj paykunata juzgarqa, ñoqanchista pusamuwarqanchistaj paypa parlasqanta uyarisqanchisrayku; arí, hermanonchispis pay jinallataj. Chay jinata parlaspa, hermanosniy ñoqaykoj contraykuta phiñakuspa thutorqanku.

23 Jinataj ñoqa, nefi, paykunaman parlarqani nispa: ¿Creenkichischu tatasninchis, pikunachus Israelpa wawasnin karqanku, paykuna Egipto llajtayojkunaj makisninkumanta pusasqa kasqankuta, mana Señorpa parlasqanta uyarejtinkoqa?

24 Arí, ¿Creellankichistajchu presochasqankumanta salvasqa kasqankuta mana Señor Moisesta kamachejtenqa presochasqankumanta pusanampaj?

25 Yachankichispuni Israelpa wawasnin presochasqas kasqankuta. Yachallankichistaj sinchi llank’ayniyoj kasqankuta, imachus paykunata anchata phuticherqa. Chayrayku yachankichisña allin kasqanta presochasqankumanta pusasqas kanankupaj.

26 Kunantaj yachankichisña Señor Moisesta kamachisqanta chay jatun ruwanata ruwanampaj. Yachallankichistaj parlasqanrayku Puka qhochaj yakusnin uj ladumanta, waj laduman t’aqasqanta. Paykunataj chawpinta chimparqanku.

27 Chaywampis yachankichis egipciokuna, Faraompa soldadosnin, yakupi p’ampasqas kasqankuta.

28 Yachallankichistaj ch’in pampaspi mikhuchisqa kasqankuta maná nisqawan.

29 Arí, yachallankichistaj Moises parlasqanman jina, Diospa atiyninman jina, mayqenchus Moisespi karqa, rumita takarqa. Yakutaj llojsimorqa, Israelpa wawasnin ch’akiyniyoj kasqankuta thañichinankupaj.

30 Señor Diosninku, Kacharicherjninku paykunata ñawpashajtimpis, p’unchaypi pusajtimpis, tutapitaj k’anchayta qojtimpis, tukuy imata paykunapaj ruwapojtimpis, imastachus runas necesitanku, paykunaqa sonqosninkuta rumiyacherqanku, yuyayninkuta ciegoyacherqankutaj Moisespa contranta, cheqa kawsaj Diospa contrantawan qhesacharqankutaj.

31 Jinataj parlasqanman jina paykunata tukucherqa. Parlasqanman jinataj paykunata pusarqa. Parlasqanman jinataj tukuy imata paykunapaj ruwarporqa. Manataj imapis ruwasqachu karqa mana parlasqanwan.

32 Jordan mayuta pasasqankutawan, paykunata kallpacharqa chay jallp’aj wawasninta qharqonankupaj, arí, paykunata ch’eqerachinankupaj tukuchisqas kanankupaj.

33 Kunantaj ¿Creenkichischu kay jallp’aj wawasnin, mayqenkunachus prometisqa jallp’api karqanku, pikunatachus tatasninchis qharqorqanku, paykuna allin ruwajkuna kasqankuta creenkichischu? uyariwaychis, qankunaman niykichis, manapuni sumaj runas kasqankuta.

34 ¿Creenkichischu tatasninchis aswan ajllasqa kankuman kasqanta allin ruwajkuna kankuman karqa chayqa? Niykichis, Mana.

35 Uyariychis, Señorqa tukuy aychata kikillantataj qhawan; pichus allinta ruwan, payqa astawan yanapasqa Dioswan. Jinapis uyariychis, kay runasqa tukuy Diospa parlasqanta qhesacharqanku, millay ruwaypi poqosqastaj karqanku. Diospa sinchi phiñaynin paykunapaj karqa. Señortaj jallp’ata paykunaj contranta maldicerqa. Tatasninchispajtaj jallp’ata bendicerqa. Arí, paykunapaj jallp’ata maldicerqa tukuchisqa kanankukama, tatasninchispajtaj jallp’ata bendecerqa jallp’api atiyniyoj kanankukama.

36 Uyariychis, Señorqa kay pachata ruwarqa runas kaypi kawsanankupaj. Wawasninta ruwarqataj, kay pachayoj kanankupaj.

37 Allinta ruwaj llajtatataj jatarichin. Sajrata ruwaj llajtastataj tukuchin.

38 Allinta ruwajkunatataj pusan allin jallp’asman, sajrata ruwajkunatataj tukuchin, paykunapaj jallp’ata maldecintaj paykunarayku.

39 Payqa janaj pachapi kamachin, imaraykuchus chayqa paypa tronon. Kay pachataj chakimpa sarunan.

40 Paytaj munakun pikunatachus Diosninku kanampaj jap’inku. Uyariychis, payqa tatasninchista munakorqa, paykunawan tratocharqataj, arí, Abrahamwan, Isaacwan, Jacobwam ima. Paytaj paykunawan tratochasqanta yuyarerqa, chayrayku Egipto jallp’amanta paykunata orqhorqa.

41 Paytaj paykunata ch’in pampaspi k’aspinwan cheqanyacherqa, sonqosninkuta rumiyachisqankurayku, imaynamantachus qankunapis sonqosniykichista rumiyachinkichis, jinata. Señorqa paykunata cheqanyacherqataj juchallikusqankurayku. Phawaj lawrayniyoj katarista paykuna ukhuman kacharqa. Khanisqa kasqankutawantaj wakicherqa imaynamantachus thañisqas kanankupaj. Qhawanallanku karqa thañisqas kanankupaj, chaywampis, ancha facil kasqanrayku, ashkhas wañorqanku.

42 Wakin kutista sonqosninkuta rumiyacherqanku, Moisesta qhesacharqanku, Diostapis negallarqankutaj. chaywampis yachankichisña Diospa tukuymanta aswan allin atiyninwan pusasqa kasqankuta prometisqa jallp’aman.

43 Kunantaj tukuy kaykunamanta, sajrata ruwajkunaman tukunankupaj tiempo chayamunña, arí, millay ruwaypi poqosqas kanankukama. Manataj yachanichu ichapis kunan p’unchaypi tukuchisqa kaj jina kashanku, imaraykuchus yachani tukuchisqas kanankupaj p’unchay jamunanta, mayqempichus pisilla mana tukuchisqaschu kanqanku, paykunataj presochasqankuman pusasqas kanqanku.

44 Chayrayku Señorqa tatayman kamacherqa ch’in pampasman llojsinanta. Judiostaj payta wañuchiyta munarqanku, arí, qankunapis payta wañuchiyta munallarqankichistaj. Chayrayku sonqosniykichispi wañuchej runas kankichis, paykuna jinataj kankichis.

45 Usqhayta juchallikunkichis, allinmantataj Señor Diosniykichista yuyarinkichis. Uj angelta rikorqankichis, qankunamantaj parlasorqachis. arí, avesnin qankuna nisqanta uyarinkichis, qankunamantaj parlasorqachis ch’in, juch’uy nisqanwan, chaywampis mana uyarerqankichischu rumi sonqoyoj kasqaykichisrayku. Chayrayku qankunaman qhon qhon nimun kikinta parlasorqachis, mayqen parlasqachus kay pachata kharkatiticherqa partikoj jinata.

46 Yachallankichistaj kallpasapa parlasqampa atiyninwan kay pachata tukuchiyta atisqanta; arí, yachankichisña parlasqanwan orqosta pampasman tukuchiyta atisqanta, pampastataj p’akichiyta atisqanta. ¿Imaraykutaj chantá, qankuna ancha rumi sonqoyoj kayta atinkichisri?

47 Qhawariychis, espirituy phutiywan p’akisqa kashan qankunarayku, sonqoytaj nanawan. Manchikunitaj wiñaypaj wiñayninkama qharqosqa kanaykichista. Qhawariychis, Diospa Espiritunwan junt’asqa kani, chayrayku mana kallpayojñachu kani.

48 Jinataj paykunaman parlasqaytawan, paykuna poqapaj phiñakorqanku, paykunataj jatun qhochaman choqawayta munarqanku. Ñoqaman chimpamuwajtinkutaj makisninkuwan jap’iwaj, paykunaman parlarqani nispa: Tukuy atiyniyoj Diospa sutimpi, kamachiykichis ama ñoqata llankhanawaykichista, imaraykuchus Diospa atiyninwan junt’asqa kani, aychay ruphanankama. Pitajchus makinta ñoqaman churawanman, payqa ch’aki soqos jina ch’akisqa kanqa. Mana ima jinataj kanqa Diospa atiynimpa ñawpaqempi, imaraykuchus Dios payta jasut’enqa.

49 Jinataj ñoqa, nefi, paykunaman nerqani manaña tatankoj contranta thutunankuta; manataj ñoqamanta llank’ayninkuta mich’anankuta, imaraykuchus Dios kamachiwarqa barcota ruwanaypaj.

50 Paykunamantaj nerqani: Dioschus tukuy imata ruwanaypaj kamachiwanman chayqa, ñoqa tukuy imata ruwayta atiyman. Sichus kamachiwanman kay yakuman ninayta, Jallp’aman kutiy chayqa, jallp’amampuni kutinman. Chayta Jallp’aman kutiy chayqa, jallp’amampuni kutinman. Chayta niyman chayqa, ajinapuni kanman.

51 Kunantaj, Señorchus kay jatun atiyniyoj, kay chhika milagrosta runaspa wawasninku chawpinkupi ruwan chayqa, ¿Imajtintaj mana ñoqaman yachachiwanmanchu barcota ruwanaypaj?

52 Jinataj ñoqa, Nefi, ashkha cosasta hermanosniyman nerqani ch’inyachisqa kanankukama mana ñoqawan phiñakunankupaj. Manataj makisninkuta ñoqaman churayta munarqankuchu, manataj dedosnillankuwampis llankhawayta munarqankuchu ashkha p’unchaykunapaj. Chayta ruwayta mana munarqankuchus, ñawpaqeypi mana ch’akisqas kayta munasqankurayku, Diospa Espiritun ancha atiyniyoj kasqanrayku. Chay jinataj paykunawan ruwarqa.

53 Jinataj Señor ñoqaman nerqa: Watejmanta makiykita jayway hermanosniykiman, manataj ñawpaqeykipi ch’akenqankuchu, astawanqa paykunata kharkatitichisaj, nin Señor, chaytataj ruwasaj yachanankupaj Señor Diosninku kasqayta.

54 Jinataj ñoqa makiyta jaywarqani hermanosniyman. Paykunataj mana ch’akerqankuchu ñawpaqeypi, astawanqa Señorqa paykunata kharkatiticherqa, parlasqanman jina.

55 Kunantaj paykuna nerqanku: Cheqamanta yachayku Señorqa qanwan kuska kasqanta, imaraykuchus yachaykuña Señorpa atiynin kharkatitichiwasqaykuta. Ñawpaqeypi urmarqankutaj ñoqata yupaychanawankupaj. Manataj paykunata saqerqanichu nispa: Ñoqaqa hermanoykichis kani, arí, sullk’a hermanoykichis. Chayrayku Señor Diosniykichista yupaychaychis, tataykichista, mamaykichistawan kasuspa, ashkha watasta jallp’api kawsanaykichispaj, mayqen jallp’atachus Señor Diosniykichis qosonqachis.