1 Jinataj ñoqa, Nefi, Señorwan parlasqaytawan tataypa carpanman kuterqani.

2 Jinataj tatay parlawarqa nispa: Ñoqapaj mosqoy kapuwarqa, mayqempichus Señorqa kamachiwarqa, qan, hermanosniykiwan Jerusalen llajtaman kutinaykichista.

3 Imaraykuchus Labanta kapun judiospa ruwasqasninkumanta escribisqa, qampa unay tatasniykej mirayninkumanta escribisqawan. Chaykunataj bronce planchas patapi escribisqa kanku.

4 Chayrayku Señorqa kamachiwarqa qan, hermanosniykiwan Labampa wasinman rinaykichista, escribisqasta mask’amunaykichista, kay ch’in pampasman apamunaykichistataj.

5 Kunantaj hermanosniyki phiñakunku nispa, imatachus ruwanankuta munarqani, chay ancha trabajo. Chaywampis mana ñoqachu ruwanankuta munarqani, astawanqa Señor chayta kamacherqa.

6 Chayrayku wawáy, riy, Señorqa yanapasonqa mana phiñakusqaykirayku.

7 Jinataj ñoqa, Nefi, tatayman nerqani: Ñoqaqa ruwamusaj imatachus Señor kamacherqa chayta, imaraykuchus ñoqaqa yachani Señor mana imatapis kamachisqanta runaspa wawasninkuman, mana wakichispa uj ñanta paykuna kamachisqanta junt’anankupaj.

8 Jinataj maypachachus tatayqa nisqayta uyarerqa, chaypacha may chhikata kusikorqa, imaraykuchus yacharqa Diosmanta bendecisqa kasqayta.

9 Ñoqataj, Nefi, hermanosniywan ch’in pampasnejta purerqayku carpasniykuwan, Jerusalen llajtaman wicharinaykupaj.

10 Jinataj Jerusalen jallp’aman chayaspaña ñoqa, hermanosniywan parlanakorqayku.

11 Suertestataj ajllarqayku, yachanaykupaj pichus ñoqaykumanta Labampa wasinman yaykunan kanman. Jinataj suerte Lamampaj llojserqa. Lamantaj Labampa wasinman yaykorqa, wasimpi tiyashajintaj Labanwan parlarqa.

12 Labanmanta mañakorqa chay bronce planchaspi escribisqasta qonanta, mayqenkunachus willanku tataypa unay tataspa mirayninkumanta.

13 Jinataj Laan phiñakorqa, ñawpaqenmanta qharqorqataj. Mana munarqachu planchasta qoyta. Chayrayku payman nerqa: Suwa kanki, ñoqataj wañuchisqayki.

14 Chaywampis Laman ñawpaqenmanta qyqerqa, willawarqaykutaj Labampa ruwasqasninta. Ñoqaykutaj anchata phutirikorqayku. Hermanosniytaj tatayman, ch’in pampasman kutipoj jina karqanku.

15 Chaywampis ñoqa paykunaman nerqani: Señorpa kawsasqanman jina, kawsasqanchisman jinataj, manapuni tatanchisman, ch’in pampasman uraykusunchischu, imatachus Dios kamachiwarqanchis, chayta junt’ananchiskama.

16 Chayrayku feniyoj kasun Señorpa kamachisqasninta junt’ananchispaj. Jaku uraykamuna tatanchispa chayaqempaj jallp’anman, imaraykuchus payqa qorita, qolqeta, ashkha qhapaj kapuynintawan saqerqa. Chayta ruwarqataj Señorpa kamachisqasninrayku.

17 Imaraykuchus yacharqa Jerusalen tukuchisqa kananta runas juchallikusqankurayku.

18 Paykuna profetaspa parlasqankura qhesacharqanku. Chayrayku taaychus chay jallp’api tiyakunmampuni karqa chayqa, jallp’amanta llojsinanta kamachisqantawan tataypis tukuchisqa kanman kallarqataj. Chayrayku payqa jallp’amanta ayqenan karqa.

19 Cheqamanta Diospa yachasqanman jina, kay planchasta jap’inanchis tiyan, tatasninchispa parlayninkuta waqaychananchispaj wawasninchispaj;

20 Tukuyllimphuchasqa profetaspa nisqasninkuta yachanankupajtaj, mayqen nisqaschus Diospa Espiritunnejta, atiyninnejtataj paykunaman willasqas karqanku, mundoj qallariyninmantapacha, kunan p’unchaykama.

21 Chay jinatataj parlaspa hermanosniyta umancharqani Diospa kamachisqasninta junt’anankupaj.

22 Jinataj chayaqe jallp’aykuman uraykorqayku, tukuy qoriykuta, qolqeykuta, qhapaj kapuyniykutapis tantarqaykutaj.

23 Tukuy chaykunata tantaytawan watejmanta wicharerqayku Labampa wasinman.

24 Jinataj Labampaman yaykorqayku mañakuspa qonwaykuta chay escribisqasta, mayqenkunachus bronce planchas patapi escribisqas karqanku. Ñoqaykutaj payman qoykuman karqa qoriykuta, qolqeykuta, tukuy qhapaj kapuyniykutawan.

25 Jinataj maypachachus Laban qorisniykuta rikorqa, ashkha kasqankuta, munapayarqa. Paytaj ñoqaykuta qharqowarqayku, kamachisninta kacharqataj wañuchinawaykupaj, qorisniykuta jap’inampaj.

26 Jinataj Labampa kamachisninmanta ayqerqayku, sosasniykuta saqenayku karqa. Chaykunatataj Laban jap’érqa.

27 Jinataj ch’in pampasman ayqerqayku, qaqa jusk’upitaj pakaykukorqayku Labampa kamachisnintaj mana alcanzamuwarqaykuchu.

28 Jinataj Lamanqa ñoqawan, tataywan ima phiñakorqa. Lemuelpis phiñakullarqataj Lamampa palrlasqanta uyarisqanrayku. Chayrayku Lamanqa, lemuelwan ñoqaykuta, sullk’a hermanosninku, k’amiwarqayku, k’aspiwan wajtawarqaykutaj.

29 Jinataj ñoqaykuta k’aspiwan wajtawajtiyku, uj Señorpa angelnin rikhurerqa, paykunaj ñawpaqempi sayarerqataj, paykunamantaj parlarqa nispa: ¿Imaraykutaj sullk’a hermanoykichista k’aspiwan wajtankichis? ¿Manachu yachankichis señor payta ajllasqanta qankunata kamachinampaj juchallikusqaykichisrayku? Uyariychis, qankuna watejmanta Jerusalen llajtaman wicharinkichis. Señortaj Labanta makisniykichisman churanqa.

30 Angeltaj ñoqaykuman parlaytawan, riporqa.

31 Angel ripusqantawan, Laman, Lemuelwan ujtawan thutuyta qallarerqanku nispa: ¿Imaynata Señor Labanta makisninchisman churanqa? Imaraykuchus Labanqa ancha kallpayoj. Payqa phishqa chunka runasta kamachiyta atin, rí, phishqa chunka runasta wañuchiyta atinman. ¡Imajtintaj mana ñoqanchista wañuchiswasunmanchu?