1 Kunantaj ñoqa, Nefi, mana tukuy llajtaypura yachachisqasta escribiyta atinichu. Jinataj escribiypi mana parlaypi jina ancha atiyniyojchu kani, imaraykuchus maypachachus runa Santo Espiritoj atiyninman jina parlan, chaypacha Santo Espiritoj atiynin nisqasninta chayachin runaspa wawasninkoj sonqosninkuman.

2 Chaywampis ashkha runas sonqosninkuta rumiyachinku Santo Espiritoj contrampi, chayrayku paykunapi mana lugarniyojchu. Chayrayku paykuna ashkha escribisqasta wijch’unku q’opata jina, chaykunatataj mana kasunkuchu.

3 Chaywampis ñoqa, Nefi escribiniña imatachus escribini, chaykunatataj allimpaj qhawani, sumaj valorniyoj kallankutaj llajtaypaj. Llajtaypaj Diosmanta mañakuni p’unchaypi, ñawisniyrí camayta joq’ochanku tutapi paykunarayku. Diosniyta wajyanitaj feniyoj kaspa, wajyasqayta uyarinanta yachallanitaj.

4 Señor Dios oracionniyta uyarinanta yachallanitaj llajtayta yanapanampaj. Escribisqastaj, mayqenkunatachus escribini mana kallpayoj kaspa, kallpachasqas paykunapaj kanqanku, imaraykuchus sumaj ruwanankuta munachin. Tatasninkumanta yachachin, Jesusmanta parlantaj, paypi creenankupaj munachillantaj, tukukuykama sumajta sayanankupaj, chaytajqa wiñay kawsay.

5 Sinchita parlantaj juchaj contrampi, cheqa kajpa sut’i kasqanman jina. Chayrayku ni mayqen runapis kay nisqasmanta, mayqen nisqastachus escribini, chaykunamanta mana phiñakonqachu. Supaypa espiritunmanta runalla kay escribisqasniymanta phiñakunman.

6 Ñoqa sut’i kajkunarayku kusikuni. Cheqa kajkunarayku kusikuni. Jesusniypipis kusikullanitaj, ukhu pachamanta kacharichiwasqanrayku.

7 Llajtaypaj munakuyniyoj kani, cristopi ashkha feniyoj kallanitaj ashkha llimphu runasta taripanaypaj juzgana ñawpaqempi.

8 Judiokunapaj munakuyniyoj kani — nini judio, imaraykuchus pikunamantachus jamorqani, paykunapaj munakuyniyoj kani.

9 Gentilkunapajpis munakuyniyoj kallanitaj. Chaywampis paykunachus mana Cristoman allinyachisqaschu kanku, manachus k’ullku punkuman yaykunkuchu, manachus cheqan kawsayman pusaj ñampi purinkuchu, manatajchus chay ñampi allin rikuchiskunankupaj p’unchayninkuna tukukunankukama purinkuchu chayqa, paykunapaj mana suyakuyniyoj kayta atinichu.

10 Kunantaj munasqa hermanosníy, judiostaj, tukuy kay pachataj kay nisqasta kasuychis, Cristopi creellaychistaj. Mana kay nisqasta creenkichischu chayqa, Cristollatapis creeychis. Cristopi creenkichis chayqa, kay nisqastapis creenkichis, imaraykuchus Cristol nisqasnin kanku. Ñoqaman qollawantaj. Kaykunastaj tukuy runasman sumaj ruwanankuta yachachinku.

11 Manachus Cristoj nisqasnin chayqa, juzgaychis — imaraykuchus Cristoqa qhepa p’unchaypi nisqasnin kasqankuta rikuchisonqachis atiywan, sumaj k’anchaywan ima. Ñoqawan, qanwan uyasninchista qhawanakusun paypa juzgana tiyanampa ñawpaqempi. Ñoqa paymanta kamachisqa kasqayta, kaykunata escribinaypaj, mana kallpayoj kajtiypis, chayta yachanaykichista yachani.

12 Tatamanta mañakullanitaj, Cristoj sutimpi, ashkha ñoqanchismanta, jinapis tukuyninchis kachun, jatun qhepa p’unchaypi reinompi salvasqas kananchispaj.

13 Kunantaj, munasqa hermanosníy, pikunachus Israelpa wawasnin kankihcis, tukuy kay pachataj, jallp’amanta qhaparej jina parlaykichis: Chay jatun p’unchay chayamunankama allinta kawsaychis.

14 Qankunataj, pikunachus mana Diospa k’acha kayninta munankichischu, mana judiospa nisqasninta kasunkichischu, manataj ñoqaj nisqasniyta kasunkichischu, manataj Diospa Corderompa nisqasnintapis kasunkichischu chayqa, qankunata wiñaypaj kacharparini, imaraykuchus qhepa p’unchaypi kay nisqas qankunata juchachasonqachis.

15 Imaraykuchus imatachus ñoqa kay jallp’api sellani, chayqa juzgana tiyanaj ñawpaqempi qankunaj contraykichispi kanqa. Chayta ruwanaypaj Señor kamachiswarqa, kasunallaytaj tiyan. Amen.