1 Ia oqo, raica, oi kemudou na wekaqu lomani, au nanuma ni dou sa vakananuma tiko e lomamudou na ka mo dou cakava ni dou sa curu rawa ena sala. Ia, raica, a cava dou sa vakananuma kina e lomamudou na veika oqo?

2 Dou sa sega beka ni nanuma ni’u a kaya vei kemudou ni dou sa ciqoma oti na Yalo Tabu dou na rawa ni vosa me vaka ena vosa ni agilosi? Ia oqo, sa rawa vakaevei mo dou vosa me vaka ena vosa ni agilosi kevaka sa sega na Yalo Tabu?

3 Era sa vosa na agilosi ena kaukauwa ni Yalo Tabu; o koya, e ra sa vosataka kina na vosa i Karisito. O koya, au sa kaya kina vei kemudou, mo dou kana magiti ena vosa i Karisito; ia raica, na vosa i Karisito sa tukuna vei kemudou na veika kece mo dou kitaka.

4 Ia, oqo ni’u sa tukuna oti na veivosa oqo, kevaka e sega ni macala vei kemudou, sa baleta ga ni dou sa sega ni kerekere, se tukituki; o koya, dou sa sega ni kau mai kina ki na rarama ia dou na rusa ga ena butobuto.

5 Ia raica, au sa kaya tale vei kemudou kevaka dou sa curu ena sala, ka ciqoma na Yalo Tabu, ena vakaraitaka vei kemudou na veika kece mo dou kitaka.

6 Raica, oqo na ivakavuvuli i Karisito, ia ena sega tale ni soli e dua na ivakavuvuli me yacova ni sa vakaraitaki Koya vakayago vei kemudou. Ia ni sa vakaraitaki Koya vakayago vei kemudou, mo dou muria sara ka kitaka na veika ena tukuna vei kemudou.

7 Ia oqo koi au, ko Nifai, sa sega ni rawa me’u vosa tiko ga; sa tarovi au na Yalo me’u kakua ni vosa, ka’u tu ka bikai ena rarawa ena vuku ni tawa vakabauta, kei na ivalavala ca, kei na yalobutobuto, kei na nodra domodomoqa na tamata; ni ra sa sega ni via vakasaqara na vuku, se kila na veika lelevu, ni sa tukuni vakamatata vei ira, ena vosa sa matata sara.

8 Ia oqo, oi kemudou na wekaqu lomani, au raica ni dou sa vakatataro tiko ga e lomamudou; ka sa ka ni rarawa vei au me’u vosa me baleta na ka oqo. Ia kevaka dou vakarorogo vua na Yalo o koya sa vakavulica vua na tamata me dau masu, dou na kila ni sa dodonu mo dou dau masu; ia na yalo ca, sa sega ni dau vakavulica na tamata me dau masu; sa vakavulica ga vua me kakua ni dau masu.

9 Ia raica, au sa kaya vei kemudou mo dou daumasu tiko ga, ka kakua ni ceguoca; mo dou kakua ni vakayacora vua na Turaga e dua na ka vakavo ga ni dou sa masulaka taumada vua na Tamada ena yacai Karisito, me qai vakatabuya ko koya vei kemudou na nomudou cakacaka, ia na cakacaka oqo me na vinaka kina na yalomudou.