1 Ao ngkai, Ngai ae Nibwaai, I aki kona ni koroi bwaai ni kabane ake a tia n reiakinaki nakoia au botanaomata; ao I aki naba kona ni koroboki ma te korakora, n aron korakorau ngkana I taetae; bwa ngkana e taetae te aomata ni mwaakan te Tamnei ae Raoiroi ao a uotaki ana taeka ni mwaakan te Tamnei ae Raoiroi nako nanoia natiia aomata.

2 Ma taraia, a mwaiti ake a tia ni kamatoai nanoia ni kaitaraa te Tamnei ae Tabu, n riki n akea nnena irouia; mangaia ae a karenakoi bwaai aika a mwaiti ake a tia ni koreaki ao n taekinna bwa akea bonganaia.

3 Ma Ngai ae Nibwaai, I koroi bwaai ake I a tia ni koroi, ao I taekinna bwa a bongana, ai moaraa riki nakoia au botanaomata. Bwa I aki toki n tataro ibukiia n te ngaina, ao e a mwaimwai uningau n ranin matau n te tairiki, ibukiia; ao I tataro ni kabaibati nakon Atuau ma te onimaki, ao I ataia bwa e na ongo au tataro.

4 Ao I ataia bwa te Uea ae te Atua e na katabua au tataro bwa te kakabwaia ae tabu ibukiia au botanaomata. Ao taeka ake I a tia ni koroi n te mamaara a na kakorakoraki nakoia; bwa e na anai nanoia bwa a na karaoa ae raoiroi; e na kaongoraia taekaia aia bakatibu; ao e na taekina Iesu, ao e na kairi nanoia bwa a na kakoaua, ao n teimatoa ni karokoa te toki, ae te maiu are akea tokina.

5 Ao e kabuakaka te bure, n aron ootan te koaua; mangaia ae bon akea te aomata ae e un n taeka ake I a tia ni koroi ma ti ngkana e rootaki n tamnein te riaboro.

6 I kimwareirei n te oota; I kimwareirei n te koaua; I kimwareirei iroun au Iesu, bwa e a tia ni kabooa tamneiu mai moone.

7 Iai au tangira ae kororaoi ibukiia au botanaomata, ao te onimaki ae korakora iroun Kristo bwa a mwaiti tamnei aika a itiaki aika N na kaitibo ma ngaiia matan ana kai ni motikitaeka.

8 Iai au tangira ae kororaoi i bukiia Iutaia—I kangai Iutaia, ngkai I nanoniia ake I roko irouia.

9 Iai naba au tangira ae kororaoi ibukiia Tientaire irou. Bwa taraia, akea mai buakoia ae e na kamaiuaki ma ti ngkana a karekea aia itoman ma Kristo, ao n rin n te mataroa are wariki, ao n nakonako n te kawai ae eti are kaineti nakon te maiu, ao ni waaki iaon te kawai ni karokoa tokin te bong ni kataki.

10 Ao ngkai, tariu aika kam tangiraki, ao Iutaia naba, ao ngkami naba aika kaain te aonaba ni kabane, ongeaba nakon taian taeka aikai ao kakoaua Kristo; ao ngkana kam aki kakoauai taeka aikai, ti kakoaua Kristo. Ao ngkana kam kakoaua Kristo ao e na reke kakoauan taeka aikai iroumi, bwa bon ana taeka Kristo, ao e a tia n anganai; ao a reireinia aomata nako bwa a na karaoa ae raoiroi.

11 Ao ngkana tiaki ana taeka Kristo, ao kam na baireia—bwa ae e na kaotia nakoimi Kristo n te bong ni motikitaeka, n te mwaaka ma te mimitong ae korakora, bwa bon ana taeka; ao ngai ma ngkoe ti na uaia n tei imatan ana kai; ao ko na ataia ae I a tia n tuangaki irouna bwa N na koroi bwaai aikai, e ngae ngke tiaki te tia koroboki ae korakora ngai.

12 Ao I tataro nakon te Tama n aran Kristo bwa a na mwaiti i buakora, ngkana arona bwa tiaki ngaira ni kabane, aika a na kamaiuaki n ueana n te kabanea ni bong ae kakawaki.

13 Ao ngkai, tariu aika kam tangiraki, ngkami ni kabane aika kain te bata are Iteraera, ao kaain te aonaba ni kabane, I taetae nakoimi n aiaron bwanaan ae e a tia ni mate: Ti a boo ni karokoa rokon te bong are kakawaki.

14 Ao ngkami ake kam aki kan katoonga raoiroin te Atua, ao ni karinei aia taeka Iutaia, ma au taeka, ma taeka ake a na otinako mai wiin Ana Tiibu te Teei te Atua, taraia, I anga au taeka ni kaboo nakoimi ae e aki totoki, bwa ana karekea kaim taeka aikai n te bong n toki.

15 Bwa bwaai aika I kabaei iaon te aonaba, a na riki bwa katian taekam i matan te kai ni moti; bwa e a tia n tuatua te Uea bwa N na karaoia, ao I riai n ongeaba nakoina. Amen.