1 Ut anajwan laa’in, aj Nefi, ink’a’ ninru chixtz’iib’ankil chixjunil li k’a’aq re ru kik’utman sa’ xyanq lin tenamit, chi moko kaw ta inmetz’ew chi tz’iib’ak jo’ chanru chi aatinak; xb’aan naq jo’q’e na’aatinak junaq winq xb’aan lix wankil li Santil Musiq’ej, lix wankil li Santil Musiq’ej naxk’am sa’ xch’ooleb’ li ralal xk’ajoleb’ li winq.

2 A’ut k’ehomaq reetal, wankeb’ naab’al li neke’xkawob’resi li raameb’ chiru li Loq’laj Musiq’ej, re naq maak’a’aq xna’aj rik’ineb’; jo’kan naq neke’xtz’eq chirixeb’ naab’al li na’leb’ li tz’iib’anb’il, ut neke’ril chanchan k’a’aq re ru maak’a’ xloq’al.

3 A’ut laa’in, aj Nefi, xintz’iib’a li k’a’ru xintz’iib’a, ut laa’in nink’oxla naq nim xloq’al, ut q’axal wi’chik choq’ reheb’ lin tenamit. Xb’aan naq rajlal nintijok chirixeb’ chi kutan, ut lix naq’ wu naxt’aqresi xsok injolom chi q’eq sa’ xk’ab’a’eb’, ut nin’elajin chiru lin Dios rik’in paab’aal, ut ninnaw naq a’an taarab’i lin tij.

4 Ut ninnaw naq li Qaawa’ Dios taarosob’tesi lin tij choq’ re lix chaab’ilal lin tenamit. Ut li aatin li kintz’iib’a sa’ xq’unal inmetz’ew, taak’ehe’q xkawilal xmetz’ew chiruheb’, xb’aan naq naxq’unb’esiheb’ xch’ool chixb’aanunkil li us; naxk’eheb’ chixnaw chirixeb’ lix yuwa’eb’; ut na’aatinak chirix li Jesus, ut naxq’unb’esiheb’ xch’ool chixpaab’ankil a’an, ut chi kuyuk toj sa’ li roso’jik, a’an li yu’am chi junelik.

5 Ut kaw na’aatinak chirix li maak, jo’ chanru lix saqenkil ru li yaal; jo’kan ut, maajun winq taachalq xjosq’il rik’in li aatin xintz’iib’a, ka’ajwi’ wi na’oken rik’in lix musiq’ laj tza.

6 Ninnima inloq’al rik’in li k’a’ru saqen ru; ninnima inloq’al rik’in li yaal; ninnima inloq’al rik’in lin Jesus, xb’aan naq a’an xtoj rix li waam chiru li xb’alb’a.

7 Wan rahok wik’in choq’ re lin tenamit, ut nim inpaab’aal chirix li Kristo naq k’iila aamej teb’ink’ul chi maak’a’eb’ xtz’ajnil sa’ lix raqleb’aal aatin.

8 Wan rahok wik’in choq’ re laj Judio—ninye laj Judio, xb’aan naq ninye, eb’ li kin’el wi’ chaq.

9 Wan ajwi’ wik’in li rahok choq’ reheb’ laj Gentil. A’ut k’ehomaq reetal, maajun reheb’ a’in taaruuq taawanq wi’ inyo’onihom wi ink’a’ te’xk’am wi’chik rib’ sa’ usilal rik’in li Kristo, ut te’ok sa’ li ka’ch’in ruhil okeb’aal a’an, ut te’b’eeq chiru li laatz’il b’e li naxik sa’ li yu’amej, ut te’kanaaq chi b’eek sa’ li b’e toj taaraqe’q xkutankil li yalok-ix.

10 Ut anajwan, ex was wiitz’in raarookex inb’aan, jo’ ajwi’ at Judio, ut chejunilex lix maril li ruchich’och’, chex’ab’inq chiru li aatin a’in ut chepaab’ li Kristo; ut wi ink’a’ nekepaab’ li aatin a’in chepaab’ li Kristo. Ut wi teepaab’ li Kristo, teepaab’ ajwi’ eb’ li aatin a’in, xb’aan naq a’aneb’ li raatin li Kristo, ut a’an kixk’eheb’ we; ut neke’xk’ut chiruheb’ chixjunil li winq naq tento te’xb’aanu li us.

11 Ut tz’ilomaq rix laa’ex ma maawa’ ta li raatin li Kristo—xb’aan naq li Kristo tixk’ut cheru, rik’in wankilal ut nimla loq’alil, naq a’an li raatin, sa’ roso’jik li kutan; ut laa’ex ut laa’in taqil qilob’aal chiqib’il qib’ chi xaqxo chiru lix raqleb’aal aatin; ut laa’ex teenaw naq taqlanb’ilin xb’aan a’an chixtz’iib’ankil li k’a’aq re ru a’in, us ta wan xq’unal inmetz’ew.

12 Ut nintijok chiru li Yuwa’b’ej sa’ lix k’ab’a’ li Kristo naq naab’al qe, wi moko chiqajunil ta, taaruuq tookole’q sa’ li rawa’b’ejihom, sa’ li xnimal ru ut roso’jikil kutan a’an.

13 Ut anajwan, ex was wiitz’in raarookex inb’aan, chejunilex li xkomonex lix junkab’al laj Israel, ut chejunilex lix maril li ruchich’och’, nekexwaatina jo’ lix yaab’ xkux junaq li naxjap chaq re sa’ li poqs: Chinwan, toj taawulaq li xnimal ru kutan a’an.

14 Ut laa’ex li ink’a’ teeraj xyalb’al lix chaab’ilal li Dios, chi moko xk’eeb’al xloq’al li raatineb’ laj Judio, jo’ ajwi’ li waatin laa’in, ut eb’ li aatin li te’eelq chaq sa’ xtz’uumal re lix Karneer li Dios, k’ehomaq reetal, nekexinchaq’rab’i chi junelik q’e kutan, xb’aan naq li aatin a’in texxjit sa’ roso’jik li kutan.

15 Xb’aan naq li k’a’ru nintz’ap chaq sa’ ruchich’och’, taak’ame’q chejitb’al sa’ li raqleb’aal aatin, xb’aan naq jo’ka’in kinixtaqla li Qaawa’, ut tento tin’ab’inq chiru. Amen.