1 Ia, oqo, koi au, ko Nifai, au na vosa mada me baleta na parofisai a vosa kina ko tamaqu, me baleti Josefa, ka a kau yani ki Ijipita.

2 Ia raica, a parofisai vakaidina ko koya me baleti ira na nona kawa kecega. Ia na veiparofisai ka a vola ko koya, e sega soti ni levu me uasivia cake. E a parofisai ko koya me baleti keda kei ira na noda itabatamata ena gauna mai muri; ka ra sa volai tu ena peleti parasa.

3 Ia, ni sa tinia oti ko tamaqu na nona vosa me baleta na parofisai i Josefa, sa kacivi ira na luvei Leimani, ko ira na luvena tagane, kei ira na luvena yalewa, ka kaya vei ira: Raica, oi kemudou na luvequ tagane, kei na luvequ yalewa, na luvena tagane kei na luvena yalewa na noqu ulumatua, au gadreva mo dou vakatudaliga ki na noqu vosa.

4 Ni sa kaya vakaoqo na Turaga na Kalou: Kevaka dou na muria na noqu ivakaro, dou na tiko sautu ena vanua; ka kevaka dou na sega ni muria na noqu ivakaro, dou na muduki tani mai na noqu iserau.

5 Ia raica, oi kemudou na luvequ tagane kei na luvequ yalewa, au na sega ni rawa ni lako sobu ki na noqu ibulubulu ka vakavo ni’u sa biuta e dua na veivakalougatataki vei kemudou; raica, au kila ni kevaka dou sa susugi cake ena sala e dodonu mo dou lako kina, dou na sega ni lako tani mai kina.

6 Ia, kevaka dou sa cudruvi, raica, au sa biuta na noqu veivakalougatataki vei kemudou, me kau tani mai vei kemudou na cudru ka me saumi e uludra na nomudou qase.

7 Ia, ena vuku ni noqu veivakalougatataki, ena sega kina ni laiva na Turaga na Kalou mo dou rusa; ia, ena yalololoma ko koya vei kemudou kei ira talega na nomudou kawa ka sega ni mudu.

8 Ka sa yaco ni sa tinia ko tamaqu na nona vosa vei iratou na luvena tagane kei na luvena yalewa ko Leimani, sa qai vakarota me ratou kau mai vua na luvena tagane kei na luvena yalewa ko Lemueli.

9 Ka sa vosa vei iratou, ka kaya: Raica, oi kemudou na luvequ, na luvena na ikarua ni luvequ; raica, au sa biuta vei kemudou na veivakalougatataki vata ga ka’u a biuta vei iratou na luvei Leimani; o koya, dou na sega kina ni vakarusai vakadua sara; ia mai muri, era na vakalougatataki na nomudou kawa.

10 Ka sa yaco ni sa tinia ko tamaqu na nona vosa vei ira, raica, sa qai vosa vei iratou na luvei Isimeli tagane, io, vei ira kece sara na nona vuvale.

11 Ia ni sa tinia na nona vosa vei ira, sa qai vosa vei Semi, ka kaya: Ko sa kalougata ko iko, kei ira na nomu kawa; ni ko na taukena na vanua me vakataki Nifai na tacimu. Ka ra na wili vata na nomu kawa kei ira na nona kawa; ia, ko na vakataki tacimu, ka ra na vakataki ira na nona kawa ko ira na nomu kawa; ka ko na kalougata ena nomu bula taucoko.

12 Ka sa yaco ni sa vosa oti ko Liai na tamaqu vei ira kece na nona matavuvale, me vaka na gagadre ni yalona kei na Yalo ni Turaga sa tu vua, sa yaco me sa qase mai. Ka sa yaco ni sa mate, ka bulu.

13 Ka sa yaco ni sega mada ni oti e vica na siga na nona mate, eratou sa cudruvi au ko Leimani kei Lemueli kei iratou na luvei Isimeli tagane ena vuku ni veivunauci ni Turaga.

14 Ni’u a uqeti koi au, ko Nifai, me’u vosa vei iratou, me vaka na nona vosa; ni’u a sa vosataka oti e vuqa na ka vei iratou, ka vakakina ko tamaqu, ni bera na nona mate; ka vuqa na vosa oqori era sa volai tu ena noqu peleti kadua; ni sa volai tu e levu cake na itukutuku ni veika sa yaco ena noqu peleti kadua.

15 Ia au sa vola ena peleti oqo na veika ni yaloqu, kei na vuqa na ivolanikalou ka volai tu ena peleti parasa. Ni sa dau taleitaka na yaloqu na ivolanikalou, ka sa dau vakananuma na lomaqu, ka’u sa vola me ra vuli kina ka me yaga vei ira na luvequ.

16 Raica, sa dau rekitaka na yaloqu na veika ni Turaga; ka sa dau vakananuma tiko ga na lomaqu na veika au sa raica ka rogoca.

17 Ia, e dina ga ni sa rui vinaka vakaoti na Turaga ena nona vakaraitaka vei au na nona cakacaka lelevu ka talei, sa kaya vakaoqo na yaloqu: A tamata vakaloloma dina koi au! Io, sa rarawa na yaloqu ena vuku ni noqu itovo vakayago; sa yaluma na yaloqu ena vuku ni noqu caka cala.

18 Au sa vakavolivoliti, ena vuku ni veitemaki kei na ivalavala ca sa dau vakaleqai au vakarawarawa.

19 Ia ni’u sa gadreva me’u marau, sa vutugu na yaloqu ena vuku ni noqu ivalavala ca; ia, au sa kilai Koya ka’u sa vakararavi vua.

20 Sa dau totaki au na noqu Kalou; sa tuberi au ena noqu rarawa mai na loma ni lekutu; ka a maroroi au mai na wasaliwa titobu.

21 Sa vakasinaiti au ena nona loloma, ka sa caucaudre tu e yagoqu taucoko.

22 Sa vakataqayataki ira na noqu meca, ka sa vakavuna me ra sautaninini e mataqu.

23 Raica, sa rogoca na noqu tagi ena siga, ka vakavukui au ena raivotu ena bogi.

24 Au sa daumasu vagumatua vua ena siga; io, ka’u sa tabalaka cake na domoqu; ka ra sa lako sobu mai na agilosi ka qaravi au.

25 Ia ena taba ni Yalona, sa kau cake kina na yagoqu ki na dela ni veiulunivanua cecere sara. Ka sa raica na mataqu na veika cecere, io, na veika sa rui cecere vua na tamata, o koya au a vakaroti kina me’u kakua ni volai ira.

26 Ia, kevaka au sa raica na veika cecere vakaoqo, kevaka sa lomani ira na luve ni tamata na Turaga me sikovi ira ena loloma cecere levu, a cava me qai tagi kina na lomaqu ka tiko voli na yaloqu ena buca ni rarawa, ka sa yavu yani na yagoqu, ka luluqa mai na noqu kaukauwa, ena vuku ni noqu rarawa?

27 Ka cava me’u soli au kina ki na ivalavala ca ena vuku ni malumalumu vakayago? Io, a cava me’u rawai kina ena veitemaki, me dua kina na nona tikina e lomaqu o koya na vu ni ca me vakacacana na noqu vakacegu ka vakararawataka na yaloqu? A cava au sa cudru kina ena vukudra na noqu meca?

28 Mo yadra mai, na yaloqu! Mo kakua tale ni vakaloloku ena ivalavala ca. Mo reki na lomaqu, ka kakua tale ni soli tikina ki vua na meca ni yaloqu.

29 Mo kakua ni cudru ena vukudra na noqu meca. Mo kakua ni luluqa ko iko na noqu kaukauwa ena vuku ni noqu veika rarawa.

30 Mo reki, o iko na lomaqu, ka tagi vua na Turaga, ka kaya: Oi kemuni na Turaga, au na vakacaucautaki kemuni tiko ga me sega ni mudu; io, ena rekitaki kemuni na yaloqu, na noqu Kalou, kei na uluvatu ni noqu veivakabulai.

31 Oi kemuni na Turaga, mo ni na vueta beka na yaloqu? Mo ni na sereki au beka mai na ligadra na noqu meca? Mo ni vakayacori au mada me’u na sautaninini ni’u sa raica na ivalavala ca?

32 Me sogo tiko mada ga e mataqu na matamata ni koro kei eli, ni sa raramusumusu na lomaqu ka bibivoro na yaloqu! Oi kemuni na Turaga, mo ni kakua ni sogota e mataqu na matamata ni nomuni yalododonu, me’u lako voli kina ena sala ni vanua bucabuca, ka qaqarauni ena sala rawarawa!

33 Oi kemuni na Turaga, mo ni ovici au ena isulu ni nomuni yalododonu! Oi kemuni na Turaga, mo ni vakarautaka na sala me’u dro tani kina mai vei ira na noqu meca! Mo ni vakadodonutaka na noqu sala e mataqu! Mo ni kakua ni biuta e dua na itatarabe ena noqu sala—ia, mo ni caramaka mada na noqu sala e mataqu, ka kakua ni vakalatia na noqu sala, ia na nodra sala ga na noqu meca.

34 Oi kemuni na Turaga, au a sa dau vakararavi tiko vei kemuni, ka’u na dau vakararavi tiko ga vei kemuni me sega ni mudu. Au na sega ni vakararavi ki na liga ni tamata; ni’u kila ni na cudruvi ko koya sa vakararavi ki na liga ni tamata. Io, ena cudruvi ko koya sa vakararavi ki na tamata se vakayacora me ligana na tamata.

35 Io, au kila ni na solia vakalevu na Kalou vua sa kerekere. Io, ena solia vei au na noqu Kalou, kevaka au sa sega ni kerea na ka tawadodonu; o koya au na tabalaka cake kina na domoqu vei kemuni; io, au na tagi vei kemuni, na noqu Kalou, na uluvatu ni noqu ivalavala dodonu. Raica, ena cabe cake tiko ga yani na domoqu vei kemuni ka sega ni mudu, oi kemuni na noqu uluvatu kei na noqu Kalou tawavakaiyalayala. Emeni.