1 U issa araw, ġara li n‑nies kollha tal‑pajjiż semgħu l‑kliem li ntqal, u taw xhieda tiegħu. U wara li ntqal dan il‑kliem waqa’ s‑skiet fil‑pajjiż għal bosta sigħat;

2 Għax in‑nies tant stagħġbu li ma komplewx jibku u jixhru aktar għat‑telfien ta’ qrabathom li sfaw maqtula; għalhekk waqa’ s‑skiet madwar il‑pajjiż kollu għal bosta sigħat.

3 U ġara li n‑nies reġgħu semgħu leħen, liema leħen kulħadd semgħu u ta xhieda tiegħu, jgħid:

4 O nies ta’ dawn l‑ibliet il‑kbar li waqgħu, intom li ġejjin min‑nisel ta’ Ġakobb, iva, li intom mid‑dar ta’ Iżrael, kemm‑il darba jiena ġbartkom flimkien kif qroqqa tiġbor il‑flieles taħt ġwinħajha, u jiena ħadt ħsiebkom.

5 U kemm‑il darba wkoll jiena ġbartkom flimkien kif qroqqa tiġbor il‑flieles taħt ġwinħajha, iva, O nies tad‑dar ta’ Iżrael, intom li waqajtu; iva, O nies tad‑dar ta’ Iżrael, intom li tgħammru f’Ġerusalemm, intom ukoll li waqajtu; iva, kemm il‑darba ridt niġborkom flimkien kif qroqqa tiġbor il‑flieles tagħha, u intom ma ridtux.

6 O wlied id‑dar ta’ Iżrael, li jien kelli ħniena minnkom, jien lest niġborkom flimkien kemm‑il darba kif qroqqa tiġbor il‑flieles tagħha taħt ġwinħajha, jekk intom tindmu u dduru lejja b’impenn sħiħ f’qalbkom.

7 Iżda jekk ma tagħmlux dan, O dar ta’ Iżrael, l‑inħawi li intom tgħammru fihom se jispiċċaw ħerba sa meta jiġi fis‑seħħ il‑patt li sar ma’ missirijietkom.

8 U issa ġara li wara li n‑nies semgħu dan il‑kliem, araw, huma nfexxew jibku u jnewħu għal darb’oħra minħabba t‑telfien ta’ qrabathom u ħbiebhom.

9 U ġara li b’hekk għaddew it‑tlett ijiem. U sebħet l‑għodwa, u d‑dalma għebet minn fuq wiċċ l‑art, u l‑art ma komplietx titriegħed, u l‑blat ma kompliex jinqasam, u t‑tnehid tal‑biża’ waqaf, u waqaf ukoll it‑tgeġwiġ kollu.

10 U l‑art reġgħet ġiet ħaġa waħda, u baqgħet ferma; u l‑biki, u t‑tnehid u t‑tinwiħ ta’ dawk li baqgħu ħajjin waqaf; u l‑biki tagħhom inbidel f’ferħ, u t‑tnehid tagħhom inbidel f’tifħir u radd il‑ħajr lill‑Mulej Ġesù Kristu, il‑Feddej tagħhom.

11 U sa issa ġiet fis‑seħħ l‑iskrittura li ġiet imħabbra mill‑profeti.

12 U dawk li salvaw kienu l‑aktar nies twajbin minn fost il‑poplu, u kienu huma li laqgħu fosthom lill‑profeti u ma ħaġġruhomx; u dawk li ħelsuha kienu dawk li ma ċarċrux demm il‑qaddisin—

13 U huma ħelsuha u ma ġewx mirduma u midfuna fl‑art; u ma ġewx mgħarrqa f’qiegħ il‑baħar; u ma nħarqux bin‑nar, u lanqas ma ħaduha għal isfel u mietu mgħaffġin; u lilhom ma ġarrhomx ir‑riefnu; u huma lanqas ma nħakmu mill‑biża’ minħabba l‑fwar tad‑duħħan u d‑dalma.

14 U issa, ħa jifhem min jaqra; u min għandu l‑iskrittura ħa jifliha, u jara jekk dawn l‑imwiet u din il‑qerda permezz tan‑nar u d‑duħħan, u permezz tat‑tempesti u l‑irwiefen, u permezz ta’ qsim l‑art biex fiha tilqagħhom, u dan kollu, jara jekk dan seħħx biex jiġu fis‑seħħ il‑profeziji ta’ bosta profeti qaddisa.

15 Araw, jiena ngħidilkom, Iva, mal‑miġja ta’ Kristu ħafna kienu li taw xhieda ta’ dawn il‑ħwejjeġ, u huma sfaw maqtula għaliex taw xhieda ta’ dawn il‑ħwejjeġ.

16 Iva, il‑profeta Żenos ta xhieda ta’ dawn il‑ħwejjeġ, u anke Żenok tkellem dwarhom, għax huma kienu jixhdu dwarna b’mod partikolari, aħna li aħna fdal ta’ nisilhom.

17 Araw, missierna Ġakobb ukoll xehed dwar fdal ta’ nisel Ġużeppi. U araw, m’aħniex aħna fdal ta’ nisel Ġużeppi? U dawn il‑ħwejjeġ, li jixhdu għalina, mhumiex huma miktubin fuq il‑pjanċi tar‑ram li missierna Leħi ġab miegħu minn Ġerusalemm?

18 U ġara li fl‑aħħar jiem tas‑sena erbgħa u tletin, araw, jiena se nurikom li n‑nies ta’ Nefi li spiċċaw ħelsuha, u dawk li kienu jissejħu Lamaniti, li ħelsuha, raw b’għajnejhom għemejjel ta’ tjubija kbira, u barkiet kbar ġew imsawba fuqhom, hekk li ftit wara t‑tlugħ is‑sema ta’ Kristu huwa tabilħaqq wera lilu nnifsu lilhom—

19 U lilhom huwa wera l‑ġisem tiegħu, u lilhom huwa għallem; u rakkont tal‑ministeru tiegħu se jingħata aktar ’il quddiem. Għalissa, għalhekk, jien se ntemm kitbieti.