1 Ao e a koro bukina bwa ngke e a tia Iesu n taekin taeka aikai nakon Nibwaai, ao nakoia ake a tia ni weteaki, (ngkanne mwaitia ake a tia ni weteaki, ma ni karekea te mwaaka ke te kariaiakaki ni bwabetito, bon tengaun ma uoman) ao nooria, e arora baina nakoia aomata ake a uanao, ma n takarua nakoia, ni kangai: Kam na kakabwaiaki ngkana kam ongo n aia taeka naaka tengaun ma uoman ake I a tia n rineia mai i buakomi bwa a na buokingkami, ao a na toro iroumi; ao I a tia n anganiia te mwaaka bwa a na bwabetitoingkami n te ran; ao i mwin are a tia ni bwabetitoingkami n te ran, nooria, N na bwabetitoingkami n te ai ao n te Tamnei ae Raoiroi; ngaia are kam na kakabwaiaki ngkana kam kakoauai ma ni bwabetitoaki, i mwin are kam a tia n noorai ma n ataia bwa bon iai Ngai.

2 Ao, a na kakabwaiaki riki naake a na kakoauai ami taeka ibukina bwa kam na kakoaua bwa kam a tia n noorai, ao kam ataia bwa iai Ngai. Eng, a na kakabwaiaki naake a na kakoauai ami taeka, ma ni kananorinanoia nakon kabin te nanorinano ma ni bwabetitoaki, bwa a na kawaraki n te ai ao te Tamnei ae Raoiroi, ao a na karekea kamaunaan aia bure.

3 Eng, a na kakabwaiaki ake a baki tamneia ake a roko nakoiu, bwa aia bwai uean karawa.

4 Ao riki, a na kakabwaiaki ni kabane akana a nanokawaki, bwa a na kabebeteaki nanoia.

5 Ao a na kakabwaiaki aika a nanorinano, bwa aia bwai te aba.

6 Ao a na kakabwaiaki akana a baki ma n taka ibukin te raoiroi, bwa a na kaonaki n te Tamnei ae Raoiroi.

7 Ao a na kakabwaiaki akana a nanoanga bwa a na karekea te nanoangaaki.

8 Ao a na kakabwaiaki akana a itiaki nanoia, bwa a na noora te Atua.

9 Ao a na kakabwaiaki taan raoi, bwa a na aranaki bwa natin te Atua.

10 Ao a na kakabwaiaki ni kabane akana a bwainikirinaki ibukin arau, bwa aia bwai uean karawa.

11 Ao kam na kakabwaiaki ngkana a ribaingkami aomata ma ni bwainikirini ngkami, man taekin aekakin taeka aika a buakaka ibukimi ni kabuakakai ngkami, ibukiu;

12 Bwa e na reke iroumi te kimwareirei ae korakora ao e na rianako kukureimi, bwa e na korakora kanuangami i karawa; bwa ngaia a bwainikirinia burabeti ake imwaaimi.

13 E koaua, e koaua, ae I tuangkami, I rineingkami bwa kam na riki bwa taoron te aba; ma ngkana e mauna tarin te taoro ao teraa ae e na tarinaki iai te aba? E na bon akea manenan te taoro, ma e na teweaki nako man toubekaki i aan waeia aomata.

14 E koaua, e koaua ae tuangkami, I rineingkami bwa ootaia te botanaomata aio. Te kaawa ae bubura ae kateaki iaon te tabuki e bon aki kona n raba.

15 Nooria, a aki kaura te taura te bae aomata ma ni kakia i aan te bwaketi? Tiaki, ma a katoka i aon nnena, ao e anga ootana nakoia ake a mena n te bata;

16 Ngaia are kaotai ami taura i mataia te botanaomata aio, bwa a na noori ami mwakuri aika a raraoi ma ni karaoiroa Tamami are i karawa iai.

17 Tai taku bwa I roko bwa N na kaakea te tua ke burabeti. I aki roko bwa N na kaakeaia ma I roko bwa N na kakoroi bukiia;

18 Bwa nooria I taku nakoimi, bon ake te tamruru ke te taurouro teuana man te tua ae e na bua, ma a tia ni bane ni kakoroaki bukiia irou.

19 Ao nooria, I a tia n anganingkami te tua ao ana tua Tamau, bwa kam na kakoauai, ao bwa kam na rairinanomi man ami bure, ao kam na kawarai ma te nano ae uruaki ao te tamnei are raraoma. Nooria, bon iai te tua imatam, ao e kakoroaki nanon te tua.

20 Mangaia are nakoiu ao kam na kamaiuaki; bwa e koaua ae I tuangkami, bwa ngkana kam aki kaawakin au tua, ake I a tia n anganingkami n te tai aei, kam bon aki kona n rin n uean karawa.

21 Kam a tia n ongo bwa e taekinaki irouia n taai ake ngkoa, ao e bon koreaki naba i imwaaimi, bwa kam na aki tiriaomata, ao ane e tiriaomata e na bon mena n te kaangaanga bwa e na motika taekana te Atua;

22 Ma I taku nakoimi, bwa ane e un iroun tarina e na mena naba i nanon te kaangaanga bwa e na motika taekana. Ao ane e kangai nakon tarina, Raka, e na mena n te kaangaanga bwa e na bowiaki; ao ane e kangai, Ko baba, e na mena n te kaangaanga bwa e na kabuekaki n ain moone.

23 Mangaia are, ngkana kam roko nakoiu, ke kam tangiria n roko nakoiu, ao kam uringnga bwa iai unin tarim iroum—

24 Nako moa nakon tarim, ao raoiakinna, ao ngkanne kawarai ma nanom ae bwanin, ao N na butimwaeko.

25 Kariaia are iroun am kairiribai n te tai ae waekoa ngkana ko mena ni kawaina, bwa mwiina ao ko reke irouna n te taina, ao ko teweaki nako i nanon te nne ni kaikain.

26 E koaua, e koaua, ae I tuangkami, bon akea te anga ae ko kona n otinako ma iai ni karokoa ae ko tia ni kabwaka te kabanea n tienin. Ao i nanon ami tai i nanon te nne ni kaikain kam kona ni kabwaka teuana naba te tienin? E koaua, e koaua ae I tuangkami, Kam aki.

27 Nooria, e koreaki irouia ake ngkoa, bwa kam na aki wenenibure;

28 Ma I taku nakoimi, bwa ane e taraa te aine ma ni kaibwabwaru ibukina, e a tia ni wenenibure mangaia i nanona.

29 Nooria, I anganingkami te tua, bwa kam na bon aki kariaia bwaai aikai bwa a na rin i nanomi;

30 Bwa e raoiroi riki bwa kam na kaakeai bwaai aikai mai iroumi, ao kam na tabeki rake ami kaibangaki, nakon ae kam na teweaki nako moone.

31 E a tia ni koreaki, bwa ane e katuka buuna te aine, ao e na iai ana beeba ni buraure.

32 E koaua, e koaua ae I tuangkami, bwa ane e katuka buuna, ngkana e aki wenenibure ao e bon karekea te anga bwa e na wenenibure; ao ane e mare ma ngaia ae a tia ni buraure e bon karaoa te wenenibure.

33 Ao e a manga koreaki riki, bwa kam na aki berita i bon iroumi, ma kam na karaoa nakon te Uea ami berita;

34 Ma e koaua, e koaua, ae I tuangkami, kam na tai karaoa te berita; tai tuea i karawa, bwa ana kaintokanuea te Atua;

35 Ao tai tuea naba n te aonaba, bwa nnen waena;

36 Ao kam na tai tuea naba n atuumi, bwa kam aki kona ni karoroa ke ni kamainaina iran atuumi.

37 Ao kam na ti taetae ni kangai Eng, eng, Tiaki, tiaki; bwa taeka ake a raka riki nakon aikai bon mai iroun ae buakaka.

38 Ao nooria, e bon koreaki, te mata ibukin te mata, ao te wii ibukin te wii;

39 Ma I taku nakoimi, bwa kam na aki kabooa te buakaka, ma ane e orea tabam ane te atai, ao anganna are teuana naba;

40 Ao ngkana iai te aomata ae e na kateiko n te kabowi n tua ibukin am kabaraaki, ao anganna naba niniram;

41 Ao ane e kairoroiko bwa ko na iria teuana te maire, iria uoua te maire.

42 Aanga nakon ane e bubutiko, ao tai tannako mai iroun are e na tangoa am bwai.

43 Ao nooria e bon koreaki naba, bwa kam na tangira raomi ao kam na riba ami kairiribai

44 Ma nooria I taku nakoimi, tangiriia ami kairiribai, ao kakabwaiaia ake a taetaebuakaingkami, ao karaoa ae raoiroi nakoia ake a kairiribai nakoimi, ao tataro ibukiia ake a kabonganaingkami n te aro ae aki riai ao a bwainikiriningkami;

45 Bwa kam aonga n riki bwa natin Tamami are i karawa; bwa e karaoa taai bwa e na oota i aoia aika a raoiroi ao ake a buakaka.

46 Mangaia are bwaai ni kabane ake ngkoa, ake a mena i aan te tua, a na koro bukiia irou.

47 A bane tain bwaai ake ngkoa, ao a boou bwaai ni kabane.

48 Mangaia are I tangiria bwa kam na kororaoi n arou, ke Tamami are i karawa ngkai e kororaoi.