1 Sa pagkatinuod, sa pagkatinuod, moingon ako nga manghinaot ako nga kamo molimos ngadto sa mga kabos; apan pagmatngon nga ang inyong paglimos dili buhaton atubangan sa mga tawo aron ilang makita; kay kondili, kamo walay ganti sa inyong Amahan nga anaa sa langit.

2 Busa, kon molimos man kamo ayaw pagpatingog og trumpeta sa inyong atubangan, sama sa gibuhat sa mga tigpakaaron-ingnon diha sa sinagoga ug sa kadalanan, aron daygon sila sa mga tawo. Sa pagkatinuod sultihan ko kamo, nga nadawat na nila ang ilang ganti.

3 Apan kon molimos man kamo ayaw pahibaloa ang inyong wala nga kamot unsa ang gihimo sa inyong tuo nga kamot;

4 Aron ang inyong mga paglimos matago; ug ang inyong Amahan nga nakakita sa tago, moganti kaninyo sa dayag.

5 Ug kon kamo mag-ampo sama sa gihimo sa mga tigpakaaron-ingnon, kay ganahan sila nga mag-ampo, nga magbarog diha sa mga sinagoga ug sa mga eskina sa kadalanan, aron makita sila sa mga tawo. Sa pagkatinuod sultihan ko kamo, nga nadawat na nila ang ilang ganti.

6 Apan kamo, kon kamo mag-ampo, sulod sa inyong lawak, ug kon nasira na ninyo ang inyong pultahan, pag-ampo ngadto sa inyong Amahan kinsa anaa sa tago; ug ang inyong Amahan, kinsa nagtan-aw sa tago, moganti kaninyo sa dayag.

7 Apan kon mag-ampo man kamo, ayaw paggamit sa walay kapuslanan nga mga pagbalik-balik, sama sa pagano, kay naghunahuna sila nga paminawon sila tungod sa ilang daghan nga pulong.

8 Busa ayaw kamo pagsunod kanila, kay ang inyong Amahan nasayod na kon unsa ang mga butang nga inyong gikinahanglan sa wala pa kamo mangayo kaniya.

9 Busa sa ingon niini nga paagi kamo mag-ampo: Amahan namo nga anaa sa langit, daygon ang imong ngalan.

10 Ang imong pagbuot matuman dinhi sa yuta maingon sa langit.

11 Ug pasayloa kami sa among mga utang, sama sa among pagpasaylo sa mga nakautang kanamo.

12 Ug dili mo kami itugyan ngadto sa tentasyon apan luwasa kami gikan sa daotan.

13 Kay imo ang gingharian, ug ang gahom, ug ang himaya, hangtod sa kahangtoran. Amen.

14 Kay, kon kamo mopasaylo sa mga tawo sa ilang mga kalapasan ang inyong langitnong Amahan mopasaylo usab kaninyo;

15 Apan kon kamo dili mopasaylo sa mga tawo sa ilang mga kalapasan ang inyong Amahan dili usab mopasaylo sa inyong mga kalapasan.

16 Dugang pa, kon magpuasa kamo ayaw pag-iningon sa mga tigpakaaron-ingnon, nga masulob-on ang panagway, tungod kay ituyo nila nga magsubo ang ilang mga nawong aron makita sa mga tawo nga nagpuasa sila. Sa pagkatinuod sultihan ko kamo, nga nadawat na nila ang ilang ganti.

17 Apan kamo, kon magpuasa kamo, dihogi og lana ang inyong ulo, ug panghilam-os sa inyong nawong;

18 Nga kamo dili mahibaloan sa mga tawo nga nagpuasa, apan ngadto sa inyong Amahan, nga anaa sa tago; ug ang inyong Amahan, nga nagtan-aw sa tago, moganti kaninyo sa dayag.

19 Ayaw pagtigom alang sa inyong mga kaugalingon og mga bahandi dinhi sa yuta, diin ang anunugba ug ang taya modunot, ug ang mga kawatan molungkab ug mokawat;

20 Apan pagtigom alang sa inyong mga kaugalingon og mga bahandi didto sa langit, diin walay anunugba ni taya nga modunot, ug diin ang mga kawatan dili molungkab ni mokawat.

21 Kay kon asa ang inyong bahandi, atua usab ang inyong kasingkasing.

22 Ang kahayag sa lawas mao ang mata; busa, kon ang inyong mata bug-os, ang tibuok ninyong lawas mapuno sa kahayag.

23 Apan kon ang inyong mga mata daotan, ang inyong tibuok lawas mapuno sa kangitngit. Busa, kon ugaling ang kahayag nga anaa kaninyo mao ang kangitngit, labihan kana nga kangitngit!

24 Walay tawo nga makaalagad sa duha ka agalon; kay sa bisan unsa nga paagi kasilagan niya ang usa ug higugmaon niya ang lain, kondili moalagad siya sa usa ug motamay sa lain. Dili kamo makaalagad sa Dios ug sa katigayonan.

25 Ug nahitabo nga sa dihang nasulti na ni Jesus kini nga mga pulong mitan-aw siya sa napulog duha nga iyang gipili, ug miingon kanila: Hinumdomi ang mga pulong nga akong gipamulong. Kay tan-awa, kamo mao kadtong akong gipili nga mangalagad niini nga katawhan. Busa sultihan ko kamo, ayaw kabalak-i ang inyong kinabuhi, kon unsa ang inyong kan-on, o kon unsa ang inyong imnon; ni mabalaka sa inyong lawas, kon unsa ang inyong isul-ob. Dili ba ang kinabuhi labaw pa kaysa pagkaon, ug ang lawas labaw pa kon sa unsay isul-ob?

26 Tan-awa ang mga langgam sa kahanginan, wala sila magpugas, ni mag-ani ni magtigom ngadto sa mga kamalig; apan ang inyong langitnong Amahan mipakaon kanila. Dili ba mas labaw pa kamo kay kanila?

27 Kinsa kaninyo nga pinaagi sa paghunahuna lamang makadugang og sukod sa inyong gitas-on?

28 Ug ngano nga maghunahuna man kamo alang sa igsusul-ob? Hunahunaa ang mga liryo sa umahan giunsa nila pagtubo; wala sila maghago, ni sila maglalik;

29 Ug sa gihapon sultihan ko kamo, nga bisan si Solomon, sa tanan niya nga kahalangdon, wala sul-obi sama sa usa niini.

30 Mao nga, kon ang Dios nagsangkap man sa sagbot sa umahan, nga karon anaa pa, ug pagkaugma isugnod ngadto sa hudno, siya usab mosul-ob og sapot kaninyo, kon dili magkulang ang inyong pagtuo.

31 Busa ayaw kabalaka, nga moingon, Unsa ang among kan-on? o, Unsa ang among imnon? o, Asa kami og isul-ob?

32 Kay ang inyong langitnong Amahan nasayod nga kamo nanginahanglan sa tanan niini nga butang.

33 Apan pangitaa ninyo og una ang gingharian sa Dios ug ang iyang pagkamatarong, ug kining tanan nga butang idugang nganha kaninyo.

34 Busa ayaw kabalak-i ang sunod nga adlaw, kay ang sunod nga adlaw mao na ang mabalaka sa mga butang niini. Igo na ang mga problema karong adlawa.