1 Ug karon nahitabo nga sa dihang nakapamulong na si Jesus niini nga mga pulong miatubang siya pag-usab sa pundok sa katawhan, ug mibuka na usab sa iyang ba-ba ngadto kanila, nga nag-ingon: Sa pagkatinuod, sa pagkatinuod, sultihan ko kamo, Ayaw paghukom, aron kamo dili pagahukman.

2 Kay sa bisan unsa nga paghukom nga kamo mohukom, kamo pagahukman; ug sa bisan unsa nga sukod nga kamo magsukod, kini mao ang isukod kaninyo pagbalik.

3 Apan ngano nga motan-aw kamo sa puling nga anaa sa mata sa inyong igsoon, apan wala maghunahuna nga adunay nagbabag nga kahoy sa inyong kaugalingon nga mata?

4 O nganong moingon kamo sa inyong igsoon: Kuhaon ko ang puling sa imong mata—ug tan-awa, ang nagbabag nga kahoy anaa sa imong kaugalingon nga mata?

5 Kamo mga tigpakaaron-ingnon, unaha pagkuha ang nagbabag nga kahoy sa inyong kaugalingon nga mata; ug unya kamo makakita pag-ayo aron kuhaon ang puling sa mata sa inyong igsoon.

6 Ayaw ihatag ang mga butang nga balaan ngadto sa mga iro, ni ilabay ang inyong mga perlas ngadto sa mga baboy, basin og tunob-tunoban nila kini sa ilang mga tiil, ug mosumbalik sila ug mokunis-kunis kaninyo.

7 Pangayo, ug kini ihatag kaninyo; pangita, ug kamo makakaplag; tuktok, ug kini pagaablihan nganha kaninyo.

8 Kay ang matag usa nga mangayo, makadawat; ug siya nga mangita, makakaplag; ug ngadto kaniya nga motuktok, pagaablihan.

9 O unsa nga matang sa pagkatawo kamo, kinsa, kon ang iyang anak mangayo og pan, mohatag kaniya og bato?

10 O kon siya mangayo og isda, siya mohatag ba kaniya og bitin?

11 Kon kamo gani, ingon nga daotan, kahibalong mohatag og maayong mga gasa ngadto sa inyong mga anak, unsa pa kaha ang inyong Amahan kinsa anaa sa langit nga mohatag og maayong mga butang ngadto kanila nga mangayo kaniya?

12 Busa, ang tanang butang nga gusto ninyo nga buhaton sa mga tawo nganha kaninyo, buhata kini ngadto kanila, kay mao kini ang balaod ug ang mga propeta.

13 Sulod kamo sa higpit nga ganghaan; kay lapad ang ganghaan, ug dako ang agianan, nga nagpaingon ngadto sa kalaglagan, ug adunay daghan nga mosulod niini;

14 Tungod kay higpit ang ganghaan, ug pig-ot ang agianan, nga nagpaingon sa kinabuhi, ug diyotay lamang ang makakaplag niini.

15 Pagbantay sa dili tinuod nga mga propeta, kinsa moduol kaninyo nga magsul-ob sa sapot sa karnero, apan diay sa sulod kanila sila mga lobo nga manunukob.

16 Kamo makaila kanila pinaagi sa ilang mga bunga. Ang mga tawo mamu-po ba sa mga ubas nga tunokon, o igos sa kudyapa?

17 Maingon man usab ang matag maayo nga kahoy mamunga og maayo nga bunga; apan ang daotan nga kahoy mamunga og daotan nga bunga.

18 Ang usa ka maayo nga kahoy dili mamunga og daotan nga bunga, ni ang usa ka daotan nga kahoy mamunga og maayo nga bunga.

19 Ang matag kahoy nga dili mamunga og maayo nga bunga putlon, ug isugnod sa kalayo.

20 Mao nga, pinaagi sa ilang mga bunga kamo makaila kanila.

21 Dili tanan nga moingon kanako, Ginoo, Ginoo, makasulod sa gingharian sa langit; apan siya nga nagbuhat sa kabubut-on sa akong Amahan kinsa anaa sa langit.

22 Daghan ang moingon kanako niana nga adlaw: Ginoo, Ginoo, kami wala ba managna pinaagi sa imong ngalan, ug pinaagi sa imong ngalan nakahingilin sa mga yawa, ug pinaagi sa imong ngalan nakahimo og daghan nga katingalahan nga mga buhat?

23 Ug unya ako mopadayag kanila: Ako wala gayod makaila kaninyo; palayo gikan kanako, kamo nga nagbuhat og daotan.

24 Busa, kinsa kadtong nakadungog niining akong mga pulong ug nagbuhat niini, ako motandi kaniya sa usa ka tawo nga maalamon, kinsa nagtukod sa iyang balay diha ibabaw sa usa ka bato—

25 Ug ang ulan mibundak, ug miabot ang mga lunop, ug mihuros ang mga hangin, ug mihampak niana nga balay; apan kini wala matumba, tungod kay kini gitukod diha ibabaw sa usa ka bato.

26 Ug ang tanang nakadungog sa akong gipamulong ug dili mobuhat niini ikatandi siya ngadto sa usa ka tawo nga dili maalamon, nga nagtukod sa iyang balay diha ibabaw sa balas—

27 Ug mibundak ang ulan, ug miabot ang mga lunop, ug mihuros ang mga hangin, ug mihampak niana nga balay; ug kini natumba, ug hilabihan ang pagkahugno niini.