1 Ug nahitabo nga si Jesus misugo sa iyang mga disipulo nga magdala sila og pan ug bino ngadto kaniya.

2 Ug samtang nagkuha sila sa pan ug bino, siya misugo sa pundok sa katawhan nga molingkod sila sa yuta.

3 Ug sa pag-abot sa mga disipulo dala ang pan ug bino, gikuha niya ang pan ug gipikas-pikas ug gipanalanginan kini; ug gihatag niya ngadto sa mga disipulo ug misugo nga sila mokaon.

4 Ug sa diha nga nakakaon ug nabusog na sila, siya misugo nga mohatag sila ngadto sa pundok sa katawhan.

5 Ug sa diha nga ang pundok sa katawhan nakakaon ug nabusog, giingnan niya ang mga disipulo: Tan-awa adunay usa nga ordinahan taliwala kaninyo, ug ngadto kaniya ako mohatag og gahom nga siya mopikas-pikas sa pan ug mopanalangin niini ug mohatag niini ngadto sa katawhan sa akong simbahan, ngadto sa tanan nga motuo ug magpabunyag pinaagi sa akong ngalan.

6 Ug kini inyo kanunayng paningkamotan nga buhaton, gani sama sa akong gibuhat, sama sa akong pagpikas-pikas sa pan ug sa pagpanalangin niini ug sa paghatag niini nganha kaninyo.

7 Ug kini inyong buhaton agi og handomanan sa akong lawas, nga akong gipakita kaninyo. Ug kini usa ka pagpamatuod ngadto sa Amahan nga kamo sa kanunay mohinumdom kanako. Ug kon kanunay kamong mahinumdom kanako, magauban kaninyo ang akong Espiritu.

8 Ug nahitabo nga sa dihang nakasulti na siya niini nga mga pulong, siya misugo sa iyang mga disipulo nga kuhaon nila ang bino sa kopa ug moinom niini, ug mohatag usab sila sa pundok sa katawhan aron makainom sila niini.

9 Ug nahitabo nga gibuhat nila kini, ug miinom sila niini ug nabusog; ug gihatag nila ngadto sa pundok sa katawhan, ug miinom sila, ug nabusog sila.

10 Ug sa dihang nabuhat na kini sa mga disipulo, si Jesus miingon kanila: Bulahan kamo niining butang nga inyong gihimo, kay pagtuman kini sa akong mga sugo, ug magsaksi kini sa akong Amahan nga kamo andam sa pagbuhat nianang akong gisugo kaninyo.

11 Ug sa kanunay mao kini ang inyong buhaton ngadto niadtong maghinulsol ug magpabunyag pinaagi sa akong ngalan; ug mobuhat kamo niini agi og handomanan sa akong dugo, nga akong gipaagas alang kaninyo, nga kamo mosaksi sa Amahan nga kamo sa kanunay mohinumdom kanako. Ug kon kanunay kamong mahinumdom kanako, magauban kaninyo ang akong Espiritu.

12 Ug hatagan ko kamo og usa ka sugo nga buhaton ninyo kining mga butanga. Ug kon sa kanunay buhaton ninyo kining mga butanga bulahan kamo, kay kamo natukod diha sa ibabaw sa akong bato.

13 Apan kon kinsa kaninyo ang mobuhat nga sobra o kulang kaysa niini wala matukod sa akong bato, apan natukod sa usa ka balason nga tukoranan; ug sa pagbundak sa ulan, ug sa pag-abot sa mga lunop, ug sa paghuros sa mga hangin, ug mohampak kanila, matumba sila, ug ang ganghaan sa impyerno andam nga bukas sa pagdawat kanila.

14 Busa bulahan kamo kon sundon ninyo ang akong mga sugo, nga gisugo sa akong Amahan kanako nga akong ihatag kaninyo.

15 Sa pagkatinuod, sa pagkatinuod, sultihan ko kamo, nga kamo kinahanglan magbantay ug mag-ampo sa kanunay, basin pa unya og matental kamo sa yawa, ug kamo iyang madala nga bihag.

16 Ug ingon nga ako nag-ampo taliwala kaninyo ingon usab niana kamo mag-ampo diha sa akong simbahan, taliwala sa akong katawhan kinsa naghinulsol ug nagpabunyag pinaagi sa akong ngalan. Tan-awa ako ang kahayag; nagpakita ako og panig-ingnan alang kaninyo.

17 Ug nahitabo nga sa dihang nakapamulong na si Jesus niining mga pulong ngadto sa iyang mga disipulo, miatubang siya pag-usab sa pundok sa katawhan ug miingon kanila:

18 Tan-awa, sa pagkatinuod, sa pagkatinuod, sultihan ko kamo, nga kinahanglan nga magbantay ug mag-ampo kamo kanunay basin pa unya og kamo matental; kay si Satanas nagtinguha sa pag-angkon kaninyo, aron maayag niya kamo sama sa trigo.

19 Busa kamo kinahanglan nga mag-ampo sa kanunay ngadto sa Amahan pinaagi sa akong ngalan;

20 Ug bisan unsa ang inyong pangayoon sa Amahan pinaagi sa akong ngalan, nga matarong, magtuo nga kamo makadawat, tan-awa ihatag kini kaninyo.

21 Pag-ampo uban sa inyong mga pamilya ngadto sa Amahan, sa kanunay pinaagi sa akong ngalan, aron ang inyong mga asawa ug ang inyong mga anak mapanalanginan.

22 Ug tan-awa, managtigom kamo sa kanunay; ug ayaw ninyo pagadid-i si bisan kinsang tawo sa pagtambong uban kaninyo kon managtigom kamo, apan tugoti nga motambong sila uban kaninyo ug ayaw sila did-i;

23 Apan mag-ampo kamo alang kanila, ug ayaw ninyo sila hinginli; ug kon moduol sila kaninyo sa kanunay kamo mag-ampo alang kanila ngadto sa Amahan, pinaagi sa akong ngalan.

24 Busa, ipakita ninyo ang inyong kahayag aron modan-ag kini sa kalibotan. Tan-awa ako ang kahayag nga inyong ipakita—kana nga inyong nakita nga akong gibuhat. Tan-awa nakita ninyo nga ako nag-ampo sa Amahan, ug kamong tanan nakasaksi.

25 Ug inyong nabantayan nga ako misugo nga walay usa kaninyo ang mopalayo, apan hinuon nagsugo nga kamo moduol kanako, aron kamo mobati ug makakita; ingon man usab inyong buhaton ngadto sa kalibotan; ug kon kinsa man kadtong mosupak niini nga sugo nagtugot sa iyang kaugalingon nga madala sa tentasyon.

26 Ug karon nahitabo, nga sa dihang nakapamulong na si Jesus niini nga mga pulong, iyang gitan-aw pag-usab sa iyang mga disipulo nga iyang gipili, ug miingon kanila:

27 Tan-awa sa pagkatinuod, sa pagkatinuod, sultihan ko kamo, ako mohatag kaninyo og lain nga sugo, ug unya mopauli ako ngadto sa akong Amahan aron akong tumanon ang uban nga mga sugo nga iyang gihatag kanako.

28 Ug karon tan-awa, mao kini ang sugo nga akong ihatag kaninyo, nga ayaw ninyo ituyo sa pagpaambit ang akong lawas ug dugo ngadto ni bisan kinsa nga nahibaloan ninyong dili takos, kon magpaambit kamo niini;

29 Kay kinsa kadtong mokaon ug moinom sa akong lawas ug dugo nga dili takos siya mokaon ug moinom sa tunglo sa iyang kalag; busa kon kamo nasayod nga ang usa ka tawo dili takos nga mokaon ug moinom sa akong lawas ug dugo did-i ninyo siya.

30 Bisan pa niana, ayaw ninyo siya hinginli sa paggawas gikan kaninyo, apan mangalagad kamo kaniya ug mag-ampo alang kaniya ngadto sa Amahan, pinaagi sa akong ngalan; ug kon maghinulsol siya ug magpabunyag pinaagi sa akong ngalan, niana kamo modawat kaniya, ug mopaambit kaniya sa akong lawas ug dugo.

31 Apan kon dili siya maghinulsol dili siya pagaiphon taliwala sa akong katawhan, aron dili siya makaangin sa akong katawhan, kay tan-awa ako nakaila sa akong mga karnero, ug sila inihap.

32 Bisan pa niana, dili ninyo siya papahawaon sa inyong mga sinagoga, o sa inyong mga dapit sa pagsimba, kay ngadto kanila padayon kamong mangalagad; kay wala kamo masayod kon sa umaabot sila mobalik ug maghinulsol, ug moduol kanako nga may bug-os nga katuyoan sa kasingkasing, ug ako moayo kanila; ug kamo ang hinungdan sa pagdala og kaluwasan ngadto kanila.

33 Busa, hupti kining mga pulong nga akong gisugo kaninyo aron dili kamo mapaubos sa panghimaraot; kay alaot siya kinsa gipanghimaraot sa Amahan.

34 Ug ako mohatag kaninyo niining mga sugo tungod sa mga panaglalis nga anaa taliwala kaninyo. Ug bulahan kamo kon kamo walay mga panaglalis taliwala kaninyo.

35 Ug karon mopauli ako ngadto sa Amahan, kay gikinahanglan kaayo nga ako mopauli ngadto sa Amahan alang sa inyong kaayohan.

36 Ug nahitabo nga sa dihang nahuman na si Jesus niini nga mga pulong, gihikap niya pinaagi sa iyang kamot ang mga disipulo nga iyang gipili, sa tinagsa, hangtod nga nahikap niya silang tanan, ug namulong kanila samtang siya mihikap kanila.

37 Ug ang pundok sa katawhan wala makadungog sa mga pulong nga iyang gisulti, busa wala sila mopamatuod; apan ang mga disipulo nagpamatuod nga siya mihatag kanila og gahom sa pagtugyan sa Espiritu Santo. Ug akong ipakita human niini nga tinuod kini nga talaan.

38 Ug nahitabo nga sa dihang nahikap na ni Jesus silang tanan, dihay miabot nga panganod ug mitabon sa pundok sa katawhan nga dili na sila makakita ni Jesus.

39 Ug samtang natabonan sila mibiya siya kanila, ug mikayab ngadto sa langit. Ug ang mga disipulo nakakita ug nagpamatuod nga siya mikayab pag-usab ngadto sa langit.