1 Ug karon nahitabo nga milabay ang kasiyaman ug usa nga tuig ug kadto unom ka gatos ka tuig gikan sa panahon nga si Lehi mibiya sa Jerusalem; ug tuig kadto nga si Lachoneus mao ang labaw nga maghuhukom ug gobernador sa tibuok yuta.

2 Ug si Nephi, ang anak nga lalaki ni Helaman, mibiya sa yuta sa Zarahemla, mihatag og katungdanan sa iyang anak nga lalaki nga si Nephi, nga iyang kamagulangang anak nga lalaki, kabahin sa mga panid nga bronse, ug sa tanang talaan nga gitagoan, ug sa tanang sagrado nga mga butang nga gitipigan sukad sa pagbiya ni Lehi gikan sa Jerusalem.

3 Unya mibiya siya sa yuta, ug kon asa man siya miadto, walay tawo nga nasayod; ug ang iyang anak nga lalaki nga si Nephi mitipig sa mga talaan puli kaniya, oo, ang talaan niini nga katawhan.

4 Ug nahitabo nga sa pagsugod sa kasiyaman ug duha nga tuig, tan-awa, ang mga panagna sa mga propeta nagsugod na sa pagkatuman sa mas hingpit nga paagi; kay dihay nagsugod nga mas daghang timailhan ug mas daghang milagro nga gibuhat taliwala sa katawhan.

5 Apan dihay uban nga nagsugod sa pag-ingon nga ang panahon milabay na aron matuman ang mga pulong, nga gipamulong ni Samuel, nga Lamanita.

6 Ug nagsugod sila sa pagmaya mahitungod sa ilang kaigsoonan, nga nag-ingon: Tan-awa ang panahon milabay na, ug ang mga pulong ni Samuel wala matuman; busa, ang inyong kamaya ug pagtuo kabahin niini nga butang walay kapuslanan.

7 Ug nahitabo nga naghimo sila og dako nga kasamok sa tibuok yuta; ug ang katawhan nga mituo nagmasulub-on sa hilabihan, kay basin pa unya sa bisan unsang paagi kadto nga mga butang nga gipamulong dili na mahitabo.

8 Apan tan-awa, makanunayon sila nga nagbantay nianang adlawa ug nianang gabhiona ug nianang adlawa nga ingon og usa lamang ka adlaw nga ingon og walay gabii, aron ilang masayran nga ang ilang pagtuo wala makawang.

9 Karon nahitabo nga dihay usa ka adlaw nga gitakda sa mga dili matuohon, nga ang tanang mituo niadto nga mga tradisyon kinahanglang pagapatyon gawas kon ang timailhan mahitabo, nga gihatag ni Samuel nga propeta.

10 Karon nahitabo nga sa dihang si Nephi, ang anak nga lalaki ni Nephi, nakakita niini nga pagkadaotan sa iyang katawhan, ang iyang kasingkasing hilabihan ka masulub-on.

11 Ug nahitabo nga migawas siya ug miyukbo sa yuta, ug nangamuyo pag-ayo sa iyang Dios alang sa iyang katawhan, oo, niadtong hapit na malaglag tungod sa ilang pagtuo sa tradisyon sa ilang mga amahan.

12 Ug nahitabo nga nangamuyo siya pag-ayo sa Ginoo sa tibuok adlaw; ug tan-awa, ang tingog sa Ginoo miabot diha kaniya, nga nag-ingon:

13 Ihangad ang imong ulo ug pagmaya; kay tan-awa, ang panahon duol na, ug karong gabii ang timailhan ihatag, ug pagkaugma moabot ako diha sa kalibotan, aron ipakita sa kalibotan nga ako motuman sa tanan nga akong gisugo nga ipamulong pinaagi sa ba-ba sa akong balaan nga mga propeta.

14 Tan-awa, ako moadto sa akong kaugalingong katawhan, aron sa pagtuman sa tanang butang nga akong gipadayag sa mga anak sa mga tawo gikan sa pagtukod sa kalibotan, ug sa pagbuhat sa kabubut-on sa Amahan ug sa Anak—sa Amahan tungod kanako, ug sa Anak tungod sa akong unod. Ug tan-awa, ang panahon duol na, ug karong gabii ang timailhan ihatag.

15 Ug nahitabo nga ang mga pulong nga midangat kang Nephi natuman, sumala sa paagi nga kini gipamulong; kay tan-awa, dihang nagkasalop na ang adlaw walay kangitngit; ug ang katawhan nagsugod sa pagkatingala tungod kay walay kangitngit sa dihang ang gabii miabot.

16 Ug dihay daghan, nga wala motuo sa mga pulong sa mga propeta, kinsa nangatumba sa yuta ug nahimo nga sila ingon og mga patay, kay nasayod sila nga ang dako nga plano sa kalaglagan nga ilang giandam alang niadtong mituo sa mga pulong sa mga propeta napakyas; kay ang timailhan nga gihatag anaa na.

17 Ug nagsugod sila sa pagkasayod nga ang Anak sa Dios sa dili madugay mopakita; oo, sa kataposan, ang tanang katawhan sa ibabaw sa tibuok yuta gikan sa kasadpan ngadto sa silangan, sa yuta sa amihanan ug sa yuta sa habagatan, hilabihan gayod ang katingala nga sila nangatumba sa yuta.

18 Kay nasayod sila nga ang mga propeta mipamatuod niini nga mga butang sulod sa daghang katuigan, ug nga ang timailhan nga gihatag anaa na; ug nagsugod sila sa pagkahadlok tungod sa ilang mga kadaotan ug sa ilang pagkawalay pagtuo.

19 Ug nahitabo nga walay kangitngit nianang tibuok nga gabii, apan kini mahayag sama sa udtong tutok. Ug nahitabo nga ang adlaw misubang pag-usab pagkabuntag, sumala sa naandan; ug nasayod sila nga mao kini ang adlaw nga ang Ginoo matawo, tungod sa timailhan nga gihatag.

20 Ug nahitabo kini, oo, ang tanan nga butang, matag tipik, sumala sa mga pulong sa mga propeta.

21 Ug nahitabo usab nga ang usa ka bag-ong bitoon mipakita, sumala sa pulong.

22 Ug nahitabo nga sukad niini nga panahon dihay nagsugod nga mga bakak nga gisangyaw taliwala sa katawhan, pinaagi ni Satanas, aron mopatig-a ang ilang mga kasingkasing, sa katuyoan nga sila dili motuo sa mga timailhan ug mga katingalahan nga ilang nakita; apan bisan pa niini nga mga bakak ug mga panglingla ang mas daghang bahin sa katawhan mituo, ug nakabig ngadto sa Ginoo.

23 Ug nahitabo nga si Nephi miadto taliwala sa katawhan, ug usab sa daghan pa, nagbunyag ngadto sa paghinulsol, diin dihay usa ka dako nga kapasayloan sa mga sala. Ug sa ingon ang katawhan nagsugod na usab sa pagbaton og kalinaw sa yuta.

24 Ug walay mga panagbingkil, gawas lamang sa pipila nga nagsugod sa pagsangyaw, nga nagtinguha sa pagmatuod pinaagi sa kasulatan nga dili na kinahanglan nga sundon ang balaod ni Moises. Karon niini nga butang sila nasayop, wala makasabot sa mga kasulatan.

25 Apan nahitabo nga sa wala madugay nakabig sila, ug nakaamgo sa sayop nga ilang nabuhat, kay kini gipahibalo ngadto kanila nga ang balaod wala pa matuman, ug nga kini kinahanglan nga matuman sa matag tipik; oo, ang pulong midangat ngadto kanila nga kini kinahanglan nga matuman; oo, nga ang bisan unsa o matag tulbok dili molabay hangtod nga ang tanan matuman; busa niining mao nga tuig gidala sila ngadto sa kasayoran sa ilang sayop ug mikompisal sa ilang kasaypanan.

26 Ug sa ingon ang kasiyaman ug duha nga tuig milabay, nagdala og malipayon nga mga balita ngadto sa katawhan tungod sa mga timailhan nga nahitabo, sumala sa mga pulong sa panagna sa tanang balaan nga mga propeta.

27 Ug nahitabo nga ang kasiyaman ug tulo nga tuig milabay usab nga malinawon, gawas lamang sa mga tulisan ni Gadianton, nga nagpuyo sa kabukiran, nga midagsang sa yuta; kay lig-on kaayo ang ilang mga kuta ug ang ilang dapit nga mga tagoanan nga ang katawhan dili makabuntog kanila; busa nakahimo sila og daghan nga pagpatay, ug nakahimo sa hilabihan nga pagpamatay taliwala sa katawhan.

28 Ug nahitabo nga sa kasiyaman ug upat nga tuig nagsugod sila sa hilabihan nga pagdaghan, tungod kay dihay daghan nga masinupakon sa mga Nephita nga milayas padulong kanila, nga maoy hinungdan sa hilabihan nga kasubo sa mga Nephita nga nagpabilin sa yuta.

29 Ug usab dihay hinungdan sa hilabihan nga kasubo taliwala sa mga Lamanita; kay tan-awa, sila adunay daghang bata nga midagko na ug nag-anam og kalig-on sa katuigan, nga sila nagbuot-buot na sa ilang mga kaugalingon, ug naagni sa pipila ka Zoramita, pinaagi sa ilang mga bakak ug sa ilang mga pag-ulog-ulog, aron motipon ngadto sa mga tulisan ni Gadianton.

30 Ug sa ingon niini ang mga Lamanita gisakit usab, ug nagsugod sa pagkunhod ang ilang pagtuo ug pagkamatarong, tungod sa pagkadaotan sa nagtubo nga henerasyon.