1 E dina, au sa kaya vei kemuni, au na solia vei kemuni e dua na ivakatakilakila mo ni kila kina na gauna sa na voleka kina ni yaco na veika oqo—au na vakasoqoni ira vata mai na noqu tamata na mataqali i Isireli era a veiseyaki tu vakabalavu me’u vakataudeitaka tale na noqu Saioni ena kedra maliwa;

2 Ka raica, oqo na ivakatakilakila au na solia vei kemuni—ena vakatakilai vei ira na Matanitu Tani na vosa kece au na tukuna vei kemuni, na vosa au na qai tukuna e muri me baleti au, ena kaukauwa ni Yalo Tabu, ka na solia vei kemuni na Tamada, me ra kila kina na veika me baleti ira na tamata oqo ka ra dua na ivovo ni mataqali i Jekope, ka ra na vakatalabusesetaki ira ko ira na Matanitu tani;

3 E dina, e dina, au sa kaya vei kemuni, ena gauna e vakatakila kina vei ira ko Tamada na veika oqo, ka na qai lako mai vua na Tamada, mai vei ira kivei kemuni;

4 Ni sa lewa yalomatua nei Tamada me ra vakataudeitaki ena vanua oqo, me ra dua na matatamata galala ena kaukauwa i Tamada ni na qai lako mai vei ira na veika oqo kivei ira na ivovo ni nomuni kawa me vakayacori kina na veiyalayalati nei Tamada ka a veiyalayalati kina kei ira na nona tamata, ko ira na mataqali i Isireli;

5 O koya gona ena gauna era na kauta yani kina na Matanitu Tani na itukutuku oqo kei na itukutuku ni veika ena qai vakayacori ena kemuni maliwa, kivei ira na nomuni kawa ka ra na malumalumu sobu ena vakabauta ena vuku ni caka cala;

6 Ni sa lewa na Tamada me vakatakilai yani na itukutuku oqo mai vei ira na Matanitu Tani, me vakaraitaka kina vei ira na Matanitu Tani na nona kaukauwa, ena vuku ni ka oqo ni kevaka era sega ni vakaukauwataka na lomadra na Matanitu Tani; me ra veivutuni kina ka lako mai vei au ka papitaisotaki ena yacaqu, ka kila na dina ni veitiki ni noqu ivunau, me ra wili vata kina kei ira na noqu tamata, ko ira na mataqali i Isireli;

7 Ena gauna era sa kila kina na veika oqo ko ira na nomuni kawa—sa na kena ivakatakilakila vei ira ni sa tekivu oti na nona cakacaka na Tamada ena kena vakayacori na veiyalayalati ka a cakava vei ira na tamata, ka ra mataqali i Isireli.

8 Ia ni sa na yaco mai na siga koya ena qai yaco ni ra na galu na tui; ni ra na raica na ka sa sega ni tukuni vei ira; ka vakasamataka na ka era a sega ni rogoca.

9 Ena siga ko ya ena vakayacora ko Tamada ena vukuqu e dua na cakacaka levu ka talei ena kedra maliwa; ka ra na tiko ena kedra maliwa o ira era na sega ni vakabauta e dina ga ni na mai tukuna vei ira e dua na tamata.

10 Ia raica, ena tu e ligaqu na nona bula na noqu italatala; o koya era na sega ni vakamavoataki koya, e dina ga ni ra na vakacacani koya ena vukudra. Ka’u na vakabulai koya ga, ni’u na vakaraitaka vei ira ni sa levu cake na noqu yalomatua mai na ilawaki qaseqase ni tevoro.

11 O koya gona, ko ira kecega sa sega ni vakabauta na noqu vosa koi au ko Jisu Karisito, na vosa ka a vakaroti koya kina na Tamada me kauta yani vei ira na Matanitu Tani, ka solia vua na kaukauwa me kauta yani vei ira na Matanitu Tani (ena vakayacori kina me vaka sa kaya ko Mosese), era na muduki tani mai na kedra maliwa na noqu tamata ni veiyalayalati.

12 Ia era na tiko ena kedra maliwa na Matanitu Tani ko ira na noqu tamata, na ivovo i Jekope, io, era na tu ena kedra maliwa me vaka na laioni ena kedra maliwa na manumanu ni veikau, me vaka na luve ni laioni ena maliwa ni qele ni sipi, o koya ke sa lako yani kina, sa na buturaka sobu ka basuraka ka sega e dua me na vakabula.

13 Era na laveta cake na ligadra vei ira na nodra meca, ia ko ira kece sa cati ira era na muduki tani.

14 Io, ena ca ko ira na Matanitu Tani ka vakavo ga kevaka era veivutuni; ni na yaco ena siga ko ya, sa kaya na Tamada, au na muduka tani na nomu ose mai na kemu maliwa, ka’u na vakarusa na nomu qiqi ni valu;

15 Ka’u na muduka tani na veikoro ena nomu vanua, ka talaraka sobu kecega na nomu veikoro ni valu;

16 Ka’u na muduka tani tale ga na cakaisausau mai na nomu vanua, ia ena sega tale vei iko ko ira era daukilakila;

17 Au na muduka tani tale ga na nomu matakau ceuceu, kei na nomu matakau era vakaduri tu, ia ko na sega tale ni qarava kina na cakacaka ni ligamu;

18 Au na cavuta tani tale ga na nomu veikau mai na kemudou maliwa, ka vakarusa na nomu veikoro.

19 Ka na qai yaco ni na vakaoti mada na lasu, na veivakaisini, na vuvu, na veileti, na bete vakailasu kei na veibutakoci.

20 Ni na qai yaco ena siga ko ya, sa kaya ko Tamada, o ira kece sa sega ni veivutuni ka lako mai vua na Luvequ Lomani, au na muduki ira tani mai vei ira na noqu tamata, o ira na mataqali i Isireli;

21 Au na ia ena cudru waqawaqa na veisausaumi e sa sega mada ni bau rogoci e liu, vei ira, kei ira tale ga na tawa lotu.

22 Ia kevaka era na veivutuni ka muria na noqu vosa ka sega ni vakaukauwataka na lomadra, au na tauyavutaka na noqu lotu ena kedra maliwa, ka ra na curu ki na veiyalayalati ka wili vata kei ira na ivovo i Jekope, ko ira au a solia vei ira na vanua oqo me nodra ivotavota vakawa.

23 Ka ra na vukei ira na noqu tamata na ivovo i Jekope, kei ira kecega na mataqali i Isireli era na lako mai me ra tara e dua na koro ka na vakatokai ko Jerusalemi Vou.

24 Ka ra na qai vukei ira na noqu tamata era sa veiseyaki tu ena dela ni vanua taucoko, me ra soqoni vata yani ki Jerusalemi Vou.

25 Ena qai lako sobu mai ki na kedra maliwa na kaukauwa ni lomalagi; ka’u na tiko tale ga ena kedra maliwa.

26 Ia ena tekivu vakayacori na nona cakacaka na Tamada ena siga koya, io, ena gauna sa vunautaki kina na kosipeli oqo vei ira na kedra maliwa na ivovo ni tamata oqo. Au sa kaya vakaidina vei kemuni, ena tekivu vakayacori ena gauna ko ya na cakacaka i Tamada ena kedra maliwa na noqu tamata kecega era sa veiseyaki tu, io vei ira tale ga na yavusa era sa yali tu, ka a kauti ira tani na Tamada mai Jerusalemi.

27 Io, ena tekivutaki na cakacaka ena kedra maliwa na noqu tamata ka ra veiseyaki tu, ka na vakarautaka ko Tamada na sala me ra lako mai kina vei au, ka masuti Tamada ena yacaqu.

28 Io, ena qai tekivu na cakacaka mai vua na Tamada ena kedra maliwa na veimatanitu kecega, ena vakarautaki ni sala me ra vakasoqoni vata tale kina na nona tamata ki na vanua sa nodra ivotavota vakawa.

29 Era na lako tani mai ena veivanua kecega; ia era na sega ni lako tani vakariri, ka ra na sega ni dro ni ra sa lako tu, ni’u na liu vei ira, ka’u na muri tale ga, sa kaya ko Tamada.