1 I e ora ei loke ta skirbí lo sosodé: kanta, muhé ku ta stéril, abo ku nunka a haña yu; kuminsá kanta, i grita na bos haltu, abo ku nunka a sinti doló di parto; pasobra yunan hòmber di esun desolá lo ta mas hopi ku yunan hòmber di e muhé kasá, Señor ta bisa.

2 Hasi lugá di bo tènt mas grandi, span e kortinanan di bo abitashonnan, No spar, hasi bo kabuyanan mas largu i hasi bo stakanan mas fuerte;

3 Pasobra lo bo plama na man drechi i man robes, i bo simía lo heredá e gentilnan i nan lo biba atrobe den statnan desolá.

4 No tene miedu, pasobra lo bo no keda na bergwensa; ni sintibo humiliá, pasobra lo bo no wòrdu humiliá; pasobra lo bo lubida e bergwensa di bo hubentut, i lo bo no kòrda e menospresio di bo hubentut, i lo bo no kòrda e menospresio ku bo ta viuda mas.

5 Pasobra esun ku a trahabo, bo esposo, su nòmber ta e Señor di Ehérsitonan; i bo Redentor, Esun Santu di Israel — E Dios di henter mundu e lo wòrdu yamá.

6 Pasobra Señor a yamabo manera un esposa bandoná i tristu den spiritu, i manera un esposa di hubentut, ora bo a wòrdu rechasá, bo Dios ta bisa.

7 Pa un momento kòrtiku mi a bandonabo, pero ku gran kompashon lo mi rekohebo.

8 Ku un tiki rabia mi a skonde mi kara for di bo pa un momento, pero ku bondat eterno lo mi tin kompashon di bo, e Señor bo Redentor ta bisa.

9 Pasobra esaki, e awanan di Noé pa mi, pasobra manera mi a hura ku e awanan di Noé lo no tapa tera mas, asina mi a hura ku lo mi no rabia ku bo.

10 Pasobra e montañanan por bai i e serunan por wòrdu kitá, pero mi bondat lo no lagabo, ni tampoko e konvenio di mi pas lo wòrdu kitá, e Señor ku tin miserikordia riba boso ta bisa.

11 O abo aflihí, abatí ku tempestat, i sin konsuelo! Mira, lo mi pega bo piedranan ku kolónan bunita, i pone bo fundeshi di safiro.

12 I lo mi hasi bo bentananan di rubí, i bo portanan di kristal, i tur bo fronteranan di piedranan presioso.

13 I tur bo yunan lo wòrdu siñá pa Señor; i e pas di bo yunan lo ta grandi.

14 Den rektitut lo bo wòrdu stablesé; i lo bo ta leu for di opreshon pasobra lo bo no tin miedu, i for di teror pasobra e lo no yega serka bo.

15 Ata awor, sigur nan lo hunta kontra bo, ma esei lo no bini di mi; esun ku lo reuní kontra bo lo kai pa bo kousa.

16 Ata awor, ami a krea e smet ku ta supla karbon den kandela i ku ta traha un instrumènt pa su trabou; i mi a krea e destruidó pa ruiná.

17 Ningun arma ku ta formá kontra bo lo prosperá; i tur lenga ku ta akusabo den husgamentu, lo bo kondená. Esaki ta e herensia di e serbidónan di Señor, i nan rektitut ta bini di mi, Señor ta bisa.