1 I awor, ata’ki, mi ta bisa boso, ku boso tin ku listra e kosnan aki. Si, un mandamentu mi ta duna boso pa boso buska e kosnan aki diligentemente; pasobra grandi ta e palabranan di Isaías.

2 Pasobra di bèrdat el a papía tokante tur kos ku ta trata mi pueblo ku ta di e kas di Israel; di manera ku mester ta ku e ta papia na e gentilnan tambe.

3 I tur loke el a bisa tabata i lo ta, asta segun e palabranan ku el a papia.

4 Di manera ku duna atenshon na mi palabranan; skirbi e kosnan ku ami a bisa boso; i di akuerdo na e momento i e boluntat di e Tata nan lo bai na e gentilnan.

5 I kualke ku lo duna orea na mi palabranan i arepentí i wòrdu boutisá, esun lo optene salbashon. Listra e profetanan, pasobra tin hopi di nan ku ta testifiká di e kosnan aki.

6 Awor a sosodé ku ora Jesus a bisa e palabranan aki el a bolbe bisanan, despues ku el a splika tur e skrituranan na nan ku nan a risibí, el a bisanan: mira, mi ta deseá pa boso por skirbi otro skrituranan, ku boso no tin.

7 I a sosodé ku el a bisa Nefi: Trese e registro ku bo a warda.

8 I ora Nefi a trese e registronan, i a ponenan su dilanti, Jesus a pasa su wowonan riba nan i a bisa:

9 Di bèrdat, mi ta bisa boso, mi a manda mi sirbidó Samuel, e lamanita, pa e testifiká na e pueblo aki, ku e dia ku e Tata lo glorifiká su nòmber den mi lo tabatin hopi santunan ku lo lanta for di morto, i lo parse na hopi, i lo ministrá na nan. I el a bisanan: No tabata asina?

10 I su disipelnan a respondé i bisa: Si, Señor, Samuel a profetisá segun bo palabranan, i nan tur a wòrdu kumplí.

11 I Jesus a bisanan: Kon bini boso no a skirbí e kosnan aki, ku hopi santunan a lanta i ministrá na nan?

12 Awor a sosodé ku Nefi a kòrda ku e kos aki no a wòrdu skirbí.

13 I a sosodé ku Jesus a manda pa e wòrdu skirbí; di manera ku el a wòrdu skirbí segun el a manda.

14 Awor a sosodé ku ora Jesus a splika tur e skrituranan huntu, ku nan a skirbi, el a mandanan pa nan siña e kosnan ku el a siñanan.