Mwakoro 25
A na kabuekaki ake a kainikatonga ma ni buakaka n aiaron maange n te kauaoki—E na oki Eria i mwaain te bong are e kakannato ma ni kakamaku anne—Kabootaua ma Maraki 4. Uakaan ma 34 N.K.
1 Bwa nooria, e na roko te bong are e na kabuebue n aiaron te ai n umum; ao ni kabane ake a kainikatonga ma ni kakaraoa ae buakaka, a na riki bwa maange; ao te bong are e na roko arei a na kabuekaki iai, e taku aia Uea Taanga ni Buaka, ao a na akea wakaaia ke mwangaia.
2 Ma nakoimi ake kam maaka arau, e na teirake Natin te Raoiroi ma te kamaiu i nanon baina; ao kam na mwananga nako man rikirake n aroia kao ataei ake a mena n nneia n tararuaki.
3 Ao kam na toubekaia ake a buakaka; bwa a na riki ni mannang i aan waemi n te bong are I karaoa aei iai, e taku aia Uea Taanga ni Buaka.
4 Uringa ana tua Mote, au toro, are I anga te tua nakoina i Oreba ibukin Iteraera ni kabane, ma kaetieti ao motikitaeka.
5 Nooria, N na kanakoa Eria, te burabeti i mwaain rokon ana bong te Uea are e korakora ma ni kakamaku;
6 Ao e na rairinanoia taama nakoia natiia, ao nanoia naati nakoia tamaia, bwa mwiina N na roko n orea te aonaba n te maraia.