1 Ao e a koro bukina bwa ngke a mwananga ana reirei Iesu ma ni kabwarabwarai bwaai ake a tia n ongo man noori, ma ni bwabetito n aran Iesu, e a koro bukina bwa a ikotaki ana reirei ma ni katiteuanaki n te tataro are korakora ma te aki mamatam.

2 Ao Iesu e kaota rabwatana nakoia, bwa a bon tataro nakon te Tama n arana; ao e roko Iesu man tei i buakoia, ao e taku nakoia: Tera ae kam tangiria bwa N na anganingkami?

3 Ao a taku nakoina: Te Uea, ti tangiria bwa ko na tuangira te ara are ti na arana iai te ekaretia aio; bwa bon iai te itabaraaraa i buakoia aomata ni kaineti ma te bwai aio.

4 Ao e taku te Uea nakoia: E koaua, e koaua, ae I tuangkami, e aera ngkai a na ngurengure man itabaraaraa te botanaomata aio ti ibukin te bwai aei?

5 A tuai ni wareki koroboki aika tabu, are e taku bwa kam na katokaa i aomi aran Kristo, are bon arau? Bwa kam na weteaki n te ara aei n te kabanea ni bong;

6 Ao ane e katokaa iaona arau, man teimatoa n uaa te toki, ao e na bon kamaiuaki n te kabanea ni bong.

7 Ngaia are, ane kam na karaoia, ao kam na karaoia n arau; ngaia are kam na arana te ekaretia n arau; ao kam na wetea te Tama n arau bwa e na kakabwaia te ekaretia ibukiu.

8 Ao e na kanga n ae au ekaretia ngkana e aki aranaki n arau? Bwa ngkana e aranaki te ekaretia n aran Mote ao ngkanne bon ana ekaretia Mote; ke ngkana e aranaki n aran te aomata ao ngkanne bon ana ekaretia te aomata; ma ngkana e aranaki n arau ao ngkanne bon au ekaretia, ngkana a kateitei iaon au euangkerio.

9 E koaua ae I tuangkami, bwa kam kateaki iaon au euangkerio; ngaia are kam na aranii bwaai ake kam aranii, n arau; ngaia are ngkana kam wetea te Tama, ibukin te ekaretia, ngkana kam karaoia n arau ao e na ongo te Tama iroumi;

10 Ao ngkana e kateaki te ekaretia iaon au euangkerio ao ngkanne e na kaoti oin ana mwakuri te Tama iai.

11 Ma ngkana e aki kateaki iaon au euangkerio, ma e kateaki iaon aia mwakuri aomata, ke iaon ana mwakuri te riaboro, e koaua ae I tuangkami a bon kimwareirei n aia mwakuri i nanon te tai ae aki maan, ao teutana i mwin teutana ao e na roko te toki, ao a na koreaki man teweaki nako nanon te ai, are akea te oki ma iai.

12 Bwa aia mwakuri a tou mwiia, bwa a bon koreaki ibukin aia mwakuri; ngaia are uring bwaai ake I a tia n tuangkami.

13 Nooria I a tia n angani ngkami au euangkerio, ao aio te euangkerio are I a tia n anganingkami—bwa I roko nakon te aonaba ni karaoa nanon Tamau, ibukina bwa e kanakomaiai Tamau.

14 Ao e kanakomaiai Tamau bwa I aonga n tabekaki rake iaon te kaibangaki; ao i mwina ngkana I tabekaki rake iaon te kaibangaki, N na burimaunia aomata nakoiu, bwa ngkai I a tia n tabekaki rake irouia aomata ao aomata a na manga tabekaki rake iroun te Tama, bwa a na tei imatau, ni motikaki taekaia man aia mwakuri, bwa a raoiroi ke a buakaka—

15 Ao aio bukin ae I tabekaki rake iai; ngaia are, ibukin mwaakan te Tama ao N na burimaunia aomata nakoiu, bwa a na motikaki taekaia n aron aia mwakuri.

16 Ao e na koro bukina bwa ane e rairananona ma ni bwabetitoaki n arau e na nuai; ao ngkana e teimatoa n uaa te toki, nooria, e na bon akea ana bure imatan Tamau n te bong arei ngkana I tei ni motika taekan te aonaba.

17 Ao ane e aki teimatoa n uaa te toki, e na bon koreaki man teweaki nako nanon te ai, are akea te karairaki ma iai, ibukin ana momotiraoi te Tama.

18 Ao aio te taeka are e a tia n anganiia natia aomata. Ao ibukin aio ao e kakoroi bukin taeka ake e a tia n anga, ao e aki kewe, ma e kakoroi bukin ana taeka ni kabane.

19 Ao akea te bwai ae bareka ae kona n rin n ueana; ngaia are akea ae kona n rin i nanon ana rau ma ti naake a tia n teboki aia kunnikai n raraau, ibukin aia onimaki, ao aia rairannano man aia bure, ao aia kakaonimaki n uaa te toki.

20 Ao ngkai aio te tua: Rairinanomi ngkami tokin aonaba, ao nako mai nakoiu ma ni bwabetitoaki n arau, bwa kam aonga ni katabuaki ngkana kam butimwaea te Tamnei ae Raoiroi, bwa kam aonga n tei n akea barekami imatau n te kabanea ni bong.

21 E koaua, e koaua, ae I tuangkami, aio bon au euangkerio; ao kam atai bwaai ake kam riai ni karaoi i nanon au ekaretia; bwa mwakuri ake kam noorai ni karaoi ao anne ae kam riai naba ni karaoi: bwa te bwai are kam noorai ni karaoia ao anne naba are kam na karaoia.

22 Ngaia are ngkana kam karaoi bwaai aikai ao kam na kakabwaiaki, bwa kam na uotaki rake n te kabanea ni bong.

23 Koroi bwaai aikai ake kam a tia n noori man ongo, ma tai karaoi ake a tabuaki.

24 Koroi aia mwakuri te botanaomata aio, are a na karaoi, n aron are a tia ni koreaki, ake bwaai ake a tia n riki.

25 Bwa nooria, a na motikaki taekaia te botanaomata aio, man taian boki ake a tia ni koreaki, ao ake a na koreaki, bwa man boki aikai ao a na ataaki aia mwakuri irouia aomata.

26 Ao nooria, a bane ni koreaki bwaai iroun te Tama; ngaia are man taian boki ake a koreaki ao e na motikaki iai taekan te aonaba.

27 Ao kam ataia bwa kam na riki bwa taan motika taekaia te botanaomata aio, n aron te motikitaeka are N na angani ngkami, are e momotiraoi. Ngaia are aekan aomata raa ngkami? E koaua ae I tuangkami, kam na riki n ai arou.

28 Ao ngkai N na nakon te Tama. Ao e koaua ae I tuangkami, bwa bwaai ni kabane ake kam na tuanga te Tama n arau kam na bon anganaki.

29 Ngaia are, bubuti ao kam na anganaki; karebwerebwe ao e na kaukaki nakoim; bwa ane e bubuti, e na reke irouna; ao nakon ane e karebwerebwe ao e na kaukaki.

30 Ao ngkai, nooria, e a korakora au kimwareirei, n te aro are e a onrake, ibukimi, ao te roro aio; eng, ao e bon kimwareirei te Tama, ao ana anera aika a tabu ni kabane ibukimi ao te roro aio; bwa akea ma i buakoia ae bua.

31 Nooria, I tangiria bwa kam na oota; bwa I kananonaia ake a maiu ngkai ake kaain te roro aio; ao akea ma i buakoia ae bua; ao e bon bwanin kimwareireiu irouia.

32 Ma nooria, i nanokawaki ibukin te kaaua n roro man te roro aio, bwa a kairaki nako ni kabureaki iroun are bon natin betetion; bwa a na kaboai nako n te tirewa ao te koora, ao ibukin are e na kanna te koa ao are a kona n urua taan iraa ma ni kimoaia. Ao n te bong arei N na kawaria, ma ni kaoka oin aia mwakuri iaon atuuia.

33 Ao e a koro bukina bwa ngke e a tia Iesu ni katoki taeka aikai e taku nakoia ana reirei: Riin n te mataroa are e eti; bwa e wariki te mataroa, ao e irariki te kawai are e kaineti nakon te maiu; ao ti tabeman ake a na kunea; ao e rababa te kawai are e kaineti nakon te mate, ao a mwaiti ake a na toua, ni karokoa e roko te bong, are akea aomata ae a kona ni beku iai.