1 Ka sa yaco ni sa cavuta oti na vosa oqo ko Jisu, sa qai vosa vei iratou yadudua na nona tisaipeli ka kaya: A cava ko sa vinakata me’u solia vei iko ni’u sa lako cake vei Tamaqu?

2 Eratou sa vosa, ka vakavo ga e lewe tolu ka kaya: Keitou kerea me keitou lako kusarawa yani vei kemuni ki na nomuni matanitu ni sa oti na neimami bula ka yacova na gauna ni bula ni tamata, io ni sa cava na itavi ko ni sa lesi keimami kina.

3 A sa kaya vei iratou ko Koya: Dou sa kalougata ni dou sa gadreva mai vei au na ka oqo; o koya gona ni dou sa yacova na yabaki vitusagavulu karua, dou na lako yani vei au ki na noqu matanitu; ka dou na kune vakacegu vata kei au.

4 Ia ni sa vosa oti vei iratou, sa qai gole vei iratou na lewe tolu ka kaya: A cava dou sa gadreva me’u kitaka vei kemudou ni’u sa lako cake vua na Tamada?

5 Eratou sa rarawa e yalodratou, ni ratou sa sega ni doudou me vosataka vua na ka eratou sa gadreva.

6 A sa kaya vei iratou ko koya: Raica, au sa kila na nanuma ni lomamudou, dou sa gadreva na ka sa vinakata ko Joni na noqu gone ni toko, ka a cakacaka vata voli kei au ni bera ni ra laveti au cake na Jiu ki na kauveilatai.

7 Raica dou sa kalougata vakalevu cake, ni dou na sega ni tovolea na mate; ia dou na bula tiko ka raica ni sa vakayacori na cakacaka taucoko i Tamada vei ira na luve ni tamata, io me yacova ni sa vakayacori na veika taucoko sara me vaka na lomai Tamada, ena gauna au na lako mai kina ena noqu lagilagi kei na kaukauwa mai lomalagi.

8 Dou na sega sara ni tovolea na mosi ni mate; ia ena vakamataliataki vakasauri me vaka na sauriva ni mata ni’u sa lako mai ena noqu lagilagi, io mai na yago mate oqo ki na yago e tawa mate rawa; ia dou na vakalougatataki ena matanitu i Tamaqu.

9 Dou na sega talega ni sotava na mosi se rarawa ena nomudou bula tiko vakayago, ia dou na rarawataka ga na ivalavala ca ni vuravura; ka’u na vakayacora na veika kece oqo ena vuku ni ka dou sa gadreva vei au, ni dou sa gadreva mo dou kauti ira mai na yalo ni tamata vei au, ni se tu ga na vuravura.

10 Ena vuku ni ka oqo, ena taucoko kina na nomudou marau; ka dou na curu ki na matanitu i Tamaqu; io, ena vuabale na nomudou marau, me vaka sa solia vei au ko Tamada, na reki e taucoko; ia dou na vakataki au, ia koi au, au sa vakataki Tamada; ia ko Tamada kei au keirau sa duavata;

11 Ia na Yalo Tabu sa tukuni Tamada kei au; sa solia na Yalo Tabu ko Tamada vei ira na luve ni tamata ena vukuqu.

12 Ia sa yaco ni sa cavuta oti na vosa oqo ko Jisu, sa tarai iratou yadudua ena iqaqalo ni ligana ka vakavo ga ko iratou na lewe tolu ka ratou na bula tiko, ka sa qai lako yani.

13 Ka raica sa tadola ko lomalagi ka ratou sa kau cake ki lomalagi, eratou sa raica ka rogoca na veika e sega ni vosataki rawa.

14 Ka sa vakatabui me ratou tukuna; ka sega tale ga ni soli vei iratou na kaukauwa me ratou cauraka kina na veika eratou sa raica ka rogoca;

15 Se eratou sa tiko ena yago se ena taudaku ni yago, eratou sega ni kila; ni vaka vei iratou ni ratou a vakamataliataki ka ratou a veisautaki mai na yago mate oqo ki na yago e tawa mate rawa, me ratou raica rawa kina na veika ni Kalou.

16 Ia a sa yaco ni ratou sa qai vunau voli e delai vuravura; ia eratou a sega ga ni vunautaka na ka eratou a raica ka rogoca, me vaka e a vakaroti vei iratou mai lomalagi.

17 Ia mai na gauna eratou sa vakamataliataki kina, au sega ni kila se ratou sa vakaisulu ena yago e tawa mate rawa se sega;

18 Ia oqo ga na ka au sa kila me vaka na kena itukutuku sa soli mai—eratou a lako yani e dela ni vanua ka vunau vei ira na tamata, ka vakaduavatataki ira ki na lotu, ko ira kecega sa vakabauta na nodratou ivunau; ka papitaisotaki ira, ia ko ira kecega sa papitaisotaki era sa vakacurumi ki na lotu ka ra ciqoma na Yalo Tabu.

19 Era sa biuti iratou ki na vale ni veivesu ko ira era sa sega ni lewe ni lotu. Ka sa sega ni tauri iratou rawa na veivale ni veivesu ni ra sa kavida rua.

20 Eratou sa qai biu ki loma ni qara; ia eratou sa yavita na qele ena vosa ni Kalou ka ratou sereki mai na loma ni qara ena nona kaukauwa; a sa sega na qara era kelia me tauri iratou rawa.

21 Eratou sa biu vakatolu ki na lovo ni bukawaqa; ia eratou a sega ga ni kama.

22 Eratou sa biu vakarua ki na qara ni manumanu kila; ka raica eratou sa vaqitori ira me vaka na gone lailai sa vaqitora na luve ni sipi, ka sega na leqa e yacovi iratou.

23 Ka sa yaco ni ratou sa lako yani ena kedra maliwa na tamata kecega i Nifai ka vunautaka na kosipeli i Karisito kivei ira na tamata kecega ena dela ni vanua; ka ra sa saumaki mai vua na Turaga ka curu me lewe ni lotu i Karisito; ka ra sa kalougata kina na itabatamata ko ya me vaka na vosa i Jisu.

24 Koi au ko Momani; au sa tinia toka mada eke ena gauna oqo na noqu vosa me baleta na veika oqo.

25 Raica sa voleka sara me’u vola na yacadra o ira era na sega vakadua ni tovolea na mate, ia sa sega ni vakatara vei au na Turaga; a ka oqo au sa sega kina ni vola, ka sa vunitaki mai vuravura.

26 Ia raica, au a raici iratou, ka ratou sa dau qaravi au.

27 Ka raica eratou na tiko ena kedra maliwa na Veimatanitu Tani, ia era na sega ni kilai iratou na kai Veimatanitu Tani.

28 Eratou na tiko tale ga ena kedra maliwa na Jiu, ia era na sega ni kilai iratou ko ira na Jiu.

29 Ka na qai yaco, ena gauna e raica kina na Turaga ni sa ganita ena nona yalomatua, eratou na qai vunau vei ira kece na veiyavusa i Isireli era sa veiseyaki tu, vei ira tale ga na veimatanitu, veimataqali, duivosavosa kei ira na tamata, ia me vaka na kaukauwa ni Kalou sa tu vei iratou kei na ka eratou sa gadreva, eratou na kauta mai kina e vuqa sara na yalo vei ira ka vakalesuya vei Jisu.

30 Eratou sa vaka na agilosi ni Kalou, ia sa rawa me ratou vakaraitaki iratou vei ira na tamata ka ratou gadreva, kevaka eratou sa masu vei Tamada ena yacai Jisu.

31 O koya eratou na vakayacora kina e liu e vuqa na veika lelevu ka talei, ka na qai yaco e muri na siga sa levu sa roro tiko mai, io na siga me ra na tu kina na tamata kecega ena mata ni i tikotiko ni veilewai i Karisito;

32 Io, eratou na vakayacora talega e liu na cakacaka levu ka talei ena kedra maliwa na Veimatanitu Tani, ena qai yaco e muri na siga ni veilewai.

33 Ia kevaka ena tu vei kemuni na ivolanikalou kece sa tukuni kina na veicakacaka talei i Karisito, ko ni na kila kina ni na yaco vakaidina na veika kece oqo me vaka na vosa i Karisito.

34 Ia ena ca ko koya sa sega ni muria na vosa i Jisu kei na nodra vosa ko ira e digitaka ko koya ka talai ira yani ena kedra maliwa; ia ko ira yadua sa sega ni muria na vosa i Jisu kei na nodra vosa na nona talai, era sa sega ni ciqomi Koya; ia ena sega talega ni ciqomi ira ko Koya ena siga mai muri;

35 Raica e vinaka cake vei ira me ra a kakua ni sucu. Se ko ni nanuma beka ni ko ni na kauta tani rawa na nona lewa dodonu na Kalou sa vakacudrui, o koya ka sa buturaki sobu e yavadra na tamata, me rawa kina na veivakabulai?

36 Ka raica oqo, me vaka ni’u a vosa tiko me baleti ira ka a digitaka na Turaga, io, ko iratou na lewe tolu ka ratou a kau cake ki lomalagi, ni’u a sega ga ni kila se ratou sa vakasavasavataki mai na yago e mate rawa ki na yago e tawamate rawa se sega—

37 Ia raica, au a taroga vua na Turaga ena gauna au volavola tiko kina, ka sa vakatakila vei au ko koya ni a dodonu me vakayacori e dua na veisau ki na yagodratou, ia kevaka e sega eratou na tovolea na mate;

38 O koya gona me ratou kakua kina ni tovolea na mate, e a vakayacori kina e dua na veisau ki na yagodratou, me ratou kakua kina ni kila na mosi se rarawa, ia eratou na rarawataka ga na ivalavala ca ni vuravura.

39 Raica e sega ni tautauvata na veisau oqo kei na ka ena yaco ena siga mai muri; ia e a vakayacori ga e dua na veisau ki na yagodratou me kakua kina ni rawai iratou na kaukauwa i Setani ka na sega ni rawa ni temaki iratou; eratou sa vakatabui vakayago, ka ratou sa savasava, ka sa sega kina ni rawai iratou na kaukauwa ni vuravura.

40 Raica eratou na bula tu vakaoqo me yacova na siga ni veilewai i Karisito; ia ena siga ko ya, eratou na qai ciqoma na veisau levu cake ki na yagodratou, ka curu ki na matanitu i Tamada ka sega ni curu tale ki tuba ka tiko vata kei na Kalou mai lomalagi me tawamudu.