1 Ug nahitabo nga sa ingon niana milabay ang kasiyaman ug lima nga tuig usab, ug ang katawhan nagsugod sa pagkalimot sa mga timailhan ug mga katingalahan nga ilang nadungog, ug nagsugod nga nagkaanam nga dili na kaayo mahibulong sa usa ka timailhan o sa usa ka katingalahan gikan sa langit, nga niana nagsugod sila sa pagpatig-a sa ilang mga kasingkasing, ug sa pagbuta sa ilang mga hunahuna, ug nagsugod nga dili na motuo sa tanan nga ilang nadungog ug nakita—

2 Naghanduraw sa pipila ka walay kapuslanan nga butang sa ilang mga kasingkasing, nga kini binuhat sa mga tawo ug sa gahom sa yawa, aron sa pagdani ug paglingla sa mga kasingkasing sa katawhan; ug sa ingon niana si Satanas mipanag-iya sa mga kasingkasing sa katawhan pag-usab, nga sa ingon niana siya mibuta sa ilang mga mata ug midani kanila aron motuo nga ang doktrina ni Kristo usa ka binuang ug walay kapuslanan nga butang.

3 Ug nahitabo nga ang katawhan nag-anam og kalig-on sa pagkadaotan ug mga pagkasalawayon; ug wala sila motuo nga adunay lain pang mga timailhan o mga katingalahan nga ihatag; ug si Satanas miadto, nagdani sa mga kasingkasing sa katawhan, nagtental kanila ug nagsugo kanila sa pagbuhat og hilabihan nga pagkadaotan sa yuta.

4 Ug sa ingon niana milabay ang kasiyaman ug unom nga tuig; ug usab ang kasiyaman ug pito nga tuig; ug usab ang kasiyaman ug walo nga tuig; ug usab ang kasiyaman ug siyam nga tuig;

5 Ug usab usa ka gatos ka tuig ang milabay sukad sa mga adlaw ni Mosiah, nga mao ang hari sa katawhan sa mga Nephita.

6 Ug unom na ka gatos ug siyam ka tuig ang milabay sukad nga si Lehi mibiya sa Jerusalem.

7 Ug siyam na ka tuig ang milabay gikan sa panahon sa dihang ang timailhan gihatag, nga gipamulong sa mga propeta, nga si Kristo moabot dinhi sa kalibotan.

8 Karon ang mga Nephita nagsugod sa pag-ihap sa ilang panahon gikan niini nga panahon nga ang timailhan gihatag, o gikan sa pag-abot ni Kristo; busa, siyam na ka tuig ang milabay.

9 Ug si Nephi, nga amahan ni Nephi, nga gipiyalan sa mga talaan, wala na mobalik sa yuta sa Zarahemla, ug wala na makit-i sa tibuok yuta.

10 Ug nahitabo nga ang katawhan nagpadayon gihapon sa ilang pagkadaotan, bisan pa sa daghang pagsangyaw ug pagpanagna nga gipadala taliwala kanila; ug sa ingon niana milabay ang ikanapulo nga tuig usab; ug ang ikanapulo ug usa nga tuig milabay usab sa pagkadaotan.

11 Ug nahitabo sa ikanapulo ug tulo nga tuig dihay nagsugod nga mga gubat ug mga panagbingkil sa tibuok yuta; kay ang mga tulisan ni Gadianton nahimo nga hilabihan ka daghan, ug mipatay og hilabihan ka daghan nga katawhan, ug migun-ob sa daghang siyudad, ug mipakuyanap og daghan nga kamatayon ug pagpamatay sa tibuok yuta, nga nagkinahanglan na nga ang tanang katawhan, mga Nephita ug mga Lamanita, mogamit og mga hinagiban batok kanila.

12 Busa, ang tanang Lamanita nga nakabig ngadto sa Ginoo nakighiusa sa ilang kaigsoonan, nga mga Nephita, ug napugos, alang sa kahilwasan sa ilang mga kinabuhi ug sa ilang kababayen-an ug sa ilang mga anak, nga mogamit sa hinagiban batok sa mga tulisan ni Gadianton, oo, ug usab sa pagpanalipod sa ilang mga katungod, ug sa mga kahigayonan sa ilang simbahan ug sa ilang pagsimba, ug sa ilang kagawasan ug sa ilang kalingkawasan.

13 Ug nahitabo nga sa wala pa molabay kining ikanapulo ug tulo nga tuig ang mga Nephita gihulga og hingpit nga kalaglagan tungod niini nga gubat, nga nahimong hilabihan kapait.

14 Ug nahitabo nga kadtong mga Lamanita nga nakighiusa sa mga Nephita giihap lakip sa mga Nephita;

15 Ug ang ilang tunglo gitangtang gikan kanila ug ang ilang panit nahimo nga puti sama sa mga Nephita;

16 Ug ang ilang mga batan-ong lalaki ug ang ilang mga anak nga babaye nahimong hilabihan katahom, ug giihap sila lakip sa mga Nephita ug gitawag nga mga Nephita. Ug sa ingon niana natapos ang ikanapulo ug tulo nga tuig.

17 Ug nahitabo nga sa pagsugod sa ikanapulo ug upat nga tuig, ang gubat tali sa mga tulisan ug katawhan ni Nephi nagpadayon ug nahimo nga hilabihan kapait; bisan pa niana, ang katawhan ni Nephi nakaangkon og pipila ka bintaha sa mga tulisan, nga sa ingon niana sila miabog kanila pagawas sa ilang mga yuta ngadto sa ilang kabukiran ug ngadto sa ilang tinago nga mga dapit.

18 Ug sa ingon niana natapos ang ikanapulo ug upat nga tuig. Ug sa ikanapulo ug lima nga tuig gisulong nila ang katawhan ni Nephi; ug tungod sa pagkadaotan sa katawhan ni Nephi, ug sa ilang daghang panagbingkil ug mga panagsumpaki, ang mga tulisan ni Gadianton nakaangkon og daghang bintaha batok kanila.

19 Ug sa ingon niana natapos ang ikanapulo ug lima nga tuig, ug sa ingon niana ang katawhan anaa sa usa ka kahimtang nga daghan og mga kasakit; ug ang espada sa kalaglagan nagbitay dapit sa ilang ulohan, nga sa ingon niana sila hapit na tigbason niini, ug tungod kini sa ilang pagkadaotan.