1 Ka sa yaco ni me vaka na neimami itukutuku, ka keimami kila ni sa dina na neimami itukutuku, ni a maroroya tu e dua na tamata dodonu—a sa cakava vakaidina ko koya e vuqa na cakacaka mana ena yacai Jisu; ia sa sega na tamata me kitaka na cakacaka mana ena yacai Jisu, kevaka sa sega ni vakasavasavataki mai na nona ivalavala ca kecega—

2 Ka sa yaco, ni kevaka sa sega ni cala na tamata oqo ena nona wilika tiko na neimami gauna, ke sa na oti oqo na ika tolusagavulu katolu ni yabaki;

3 A ra sa tekivu vakaraica matua sara tiko na tamata na ivakatakilakila ka a tukuna na parofita ko Samuela na Leimanaiti, io, ko ya na gauna ena butobuto kina na dela ni vanua taucoko me tolu na siga.

4 A sa tubu ga na vakatitiqa kei na veileti ena kedra maliwa na tamata, e dina sa vakaraitaki oti e vuqa na ivakatakilakila.

5 Ka sa yaco ena ikava ni siga ena imatai ni vula ena ikatolusagavulu kava ni yabaki, sa tubu kina e dua na cava kaukauwa ka sa qai bau kilai vakadua ena loma ni vanua taucoko.

6 A sa liwa talega kina e dua na cagilaba levu ka rerevaki; a sa yaco na kurukuru vakarerevaki ka sa yavala kina na delai vuravura taucoko ena kena kaukauwa me vaka e sa vakarau me kavida rua kina.

7 A sa tibi na livaliva vakadomobula sara ka sa bera ni kilai vakadua ena loma ni vanua taucoko.

8 A sa kama kina na koro ko Saraemala.

9 Sa lutu dromu kina na koro ko Moronai ki na wasaliwa titobu ka ra luvu kece ko ira sa tiko kina.

10 Ka sa tubu cake na qele ena koro ko Moronaia, ka sa yaco ni sa dua na ulunivanua levu na loma ni koro.

11 A sa yaco na veivakarusai levu ka rerevaki ena vanua ki na ceva.

12 Ia raica, sa levu cake sara ka rerevaki na veivakarusai ena vanua ki na vualiku; ia raica, sa veisau sara na irairai ni dela ni vanua, ena vuku ni cagilaba, kei na covulaca, na kurukuru kei na livaliva kei na yavavala levu ni vuravura taucoko;

13 Ka ra sa kakavorovoro na veigaunisala lelevu, ka sa vakacacani na gaunisala tautauvata, ka sa sukusukura e vuqa na veivanua yagoyagovinaka.

14 Era sa lutu dromu e vuqa na veikoro lelevu ka dokai, ka vuqa era kama, ka vuqa era kurelaki me yacova ni ra sa bale ki na qele na kena veivale, ka ra vakamatei na tamata era tiko kina, ka lala na veivanua.

15 Era sa vo tu e so na koro; ia sa vakaitamera sara na ka e ra vakacacani kina ka levu na lewena era sa mate.

16 Ka so e kauti ira na covulaca; ka sa sega na tamata e kila na vanua era kau kina, ia era sa kila ga ni ra sa kau tani.

17 Ia sa tavuki vakalevu sara na irairai ni delai vuravura taucoko, ena vuku ni cagilaba kei na kurukuru, kei na livaliva, kei na yavavala ni vuravura.

18 Ka raica sa kavida rua na veivatu lelevu; era sa kakavorovoro ena delai vuravura taucoko, ka sa laurai ga na kedra kakavorovoro, na tikitikidra kei na kedra ikacakaca, ena dela ni vanua taucoko.

19 Ka sa yaco ni sa mudu na kurukuru, kei na livaliva, na cava kei na tau bi ni uca, kei na cagilaba kei na yavavala ni vanua—ia raica, era sa yaco tiko na ka kece oqo ena rauta ni tolu na auwa; ka ra kaya e so ni a balavu cake sara; ia sa yaco mada ga na veika lelevu ka rerevaki kece oqo ena loma ni tolu na auwa—ka raica, sa qai yaco na butobuto ena dela ni vanua taucoko.

20 Ka sa yaco ni sa ubia na dela ni vanua taucoko e dua na butobuto vavaku, ka rawa vei ira na lewena me ra vakila na cawa ni butobuto;

21 A sa sega ni rawa ni dua na rarama, ena vuku ni butobuto, sa sega na kadrala, se cina; sa sega tale ga ni vakawaqaci rawa na buka ena kau sa mamaca vinaka tu, a sa sega na rarama e kunei rawa;

22 Ka sa sega ni laurai e dua tale na rarama, se bukawaqa, se dua na rarama lailai, se na matanisiga, se na vula, se na veikalokalo, ena vuku ni kabukabu ni butobuto ka sa tu ena dela ni vanua taucoko.

23 Ka sa yaco ni sa taura e tolu na siga na kena sega ni kune e dua na rarama; a sa yaco na rarawa levu kei na qoqolou kei na tagiyaso ena kedra maliwa na tamata; io, era sa vutugu vakalevu na tamata, ena vuku ni butobuto loaloa kei na veivakarusai levu sa yacovi ira.

24 A sa rogo na domo ni tagi ena dua na vanua, era sa kaya: Isa, meda a se veivutuni ga ni bera na siga sa levu ka rerevaki oqo, ke ra a vakabulai na wekada ka ra sega ni kama vata ena koro levu ko Saraemala.

25 Ia ena dua tale na vanua, sa rogo kina ni ra sa tagi ka kaya: Isa, meda a veivutuni ga ni se bera na siga sa levu ka rerevaki oqo, ka meda a sega ni vakaviriki ka vakamatei ira na parofita, ka vakasavi ira tani; ke ra a vakabulai na tinada kei ira na luveda yalewa matavinaka, kei ira na luveda, ka sega ni buluti ira na koro levu ko ya ko Moronaia. Ka sa vakaoqo na nodra qoqolou na tamata ena kena rogolevu ka vakaloloma.