1 U ġara li nstema’ leħen fost dawk kollha li jgħammru fl‑art, fuq wiċċ din l‑art kollha, jgħajjat:

2 Ikun tassew ħażin għalih dan il‑poplu; ħażin għalihom dawk kollha li jgħammru f’din id‑dinja kollha jekk huma ma jindmux; għax jidħaq ix‑xitan, u jifirħu l‑anġli tiegħu, minħabba l‑qtil ta’ wlied il‑poplu tiegħi, is‑subien u l‑bniet mill‑aktar sbieħ tagħhom; u huwa minħabba l‑ħażen u l‑abominazzjonijiet tagħhom li huma waqgħu!

3 Araw, lil dik il‑belt kbira ta’ Żaraħemla jiena ħraqt bin‑nar, flimkien ma’ dawk li kienu jgħammru fiha.

4 U araw, lil dik il‑belt kbira ta’ Moroni jiena għaddast f’qiegħ il‑baħar, u lil dawk li kienu jgħammru fiha jien għarraqt.

5 U araw, lil dik il‑belt kbira ta’ Moronija jiena ksejt bit‑terrapien, flimkien ma’ dawk li kienu jgħammru fiha, biex naħbi l‑ħażen u l‑abominazzjonijiet tagħhom minn quddiemi, ħalli demm il‑profeti u l‑qaddisin ma jiġix iżurni aktar bħala xhieda kontrihom.

6 U araw, lill‑belt ta’ Gilgal jien għaddast, u lil dawk li kienu jgħammru fiha jiena dfint f’qiegħ l‑art;

7 Iva, u l‑belt ta’ Onija u dawk li kienu jgħammru fiha, u l‑belt ta’ Mokum u dawk li kienu jgħammru fiha, u l‑belt ta’ Ġerusalemm u dawk li kienu jgħammru fiha; u ordnajt biex jitilgħu l‑ilmijiet minflokhom, ħalli jaħbu l‑ħażen u l‑abominazzjonijiet tagħhom minn quddiemi, sabiex demm il‑profeti u l‑qaddisin ma jitlax aktar quddiemi bħala xhieda kontrihom.

8 U araw, il‑belt ta’ Gadjandi; u l‑belt ta’ Gadjomna, u l‑belt ta’ Ġakobb, u l‑belt ta’ Gimgimno, lil dawn kollha jien għarraqt, u minflokhom għamilt għoljiet u widien; u lil dawk li kienu jgħammru fihom jiena dfint f’qiegħ l‑art, biex naħbi l‑ħażen u l‑abominazzjonijiet tagħhom minn quddiemi, ħalli demm il‑profeti u l‑qaddisin ma jitlax aktar quddiemi bħala xhieda kontrihom.

9 U araw, dik il‑belt kbira ta’ Ġakobbugat, li fiha kienu jgħammru n‑nies tas‑Sultan Ġakobb, jiena ħraqt bin‑nar minħabba dnubiethom u ħżunithom, li kienu agħar mill‑ħażen kollu tad‑dinja kollha, minħabba l‑qtil u l‑alleanzi sigrieti tagħhom; għax kienu huma li qerdu l‑paċi tal‑poplu tiegħi u ġabu fix‑xejn il‑gvern tal‑pajjiż; għalhekk lilhom jiena ħraqt, biex neqridhom minn quddiemi, ħalli demm il‑profeti u l‑qaddisin ma jitlax aktar quddiemi bħala xhieda kontrihom.

10 U araw, il‑belt ta’ Laman, u l‑belt ta’ Ġoż, u l‑belt ta’ Gad, u l‑belt ta’ Kiskumeni, jiena ħraqt bin‑nar, flimkien ma’ dawk li kienu jgħammru fihom, minħabba ħżunithom, għax huma keċċew ’il barra lill‑profeti, u ħaġġru lil dawk li jien bgħatt fosthom biex ixandrulhom dwar il‑ħażen u l‑abominazzjonijiet tagħhom.

11 U peress li huma keċċewhom ’il barra, u ma kien baqa’ ħadd aktar twajjeb fosthom, jiena xħett in‑nar fuqhom u qridthom, biex il‑ħażen u l‑abominazzjonijiet tagħhom ikunu jistgħu jinħbew minn quddiemi, ħalli d‑demm tal‑profeti u tal‑qaddisin, li jiena bgħatt fosthom, ma jitlax jgħajjat kontrihom quddiemi minn ġol‑art.

12 U jien ordnajt biex din l‑art, kif ukoll niesha, jintlaqtu minn qerda mill‑aktar kbira, minħabba ħżunithom u l‑abominazzjonijiet tagħhom.

13 O intom kollha li ħlistuha għaliex kontu aktar twajbin minnhom, lesti intom terġgħu lura għandi, u tindmu minn dnubietkom u tikkonvertu, biex jiena nkun nista’ nfejjaqkom?

14 Iva, tassew ngħidilkom, li jekk intom tiġu għandi intom ikollkom il‑ħajja ta’ dejjem. Araw, driegħi kollu ħniena jinsab lest biex jilqagħkom, u kull min jiġi, lilu jiena nilqa’ għandi; u henjin dawk li jiġu għandi.

15 Araw, jiena Ġesù Kristu, Bin Alla. Jiena ħloqt is‑sema u l‑art, u kull ħaġa li tinsab fihom. Jiena kont mal‑Missier sa mill‑bidu. Jiena ninsab fil‑Missier, u l‑Missier jinsab fija; u fija l‑Missier igglorifika ismu.

16 Jiena ġejt għand niesi, u niesi ma laqgħunix. U l‑iskrittura li titkellem dwar il‑miġja tiegħi ġiet fis‑seħħ.

17 U dawk kollha li laqgħuni, lilhom jiena tajt is‑setgħa li jsiru wlied Alla; u l‑istess nagħtiha lil dawk kollha li jemmnu f’ismi, għax araw, permezz tiegħi tiġi fis‑seħħ il‑fidwa, u fija ġiet fis‑seħħ il‑liġi ta’ Mosè.

18 Jiena d‑dawl u l‑ħajja tad‑dinja. Jiena huwa l‑Alfa u l‑Omega, il‑bidu u t‑tmiem.

19 U intom m’għandkomx toffruli aktar tixrid id‑demm; iva, is‑sagrifiċċji tagħkom u s‑sagrifiċċji tal‑ħruq tagħkom għandhom jieqfu, għax jien mhu se naċċetta mingħandkom l‑ebda sagrifiċċji u sagrifiċċji tal‑ħruq.

20 U bħala sagrifiċċju għandkom toffruli qalb maqsuma u spirtu niedem. U kull min jiġi għandi b’qalb maqsuma u spirtu niedem, lilu jiena ngħammed bin‑nar u bl‑Ispirtu s‑Santu, l‑istess kif il‑Lamaniti, minħabba l‑fidi tagħhom fija fi żmien il‑konverżjoni tagħhom, ġew mgħammda bin‑nar u bl‑Ispirtu s‑Santu, u dan ma kinux jafuh.

21 Araw, jiena ġejt fid‑dinja biex inġib il‑fidwa lid‑dinja, biex insalva d‑dinja mid‑dnub.

22 Għalhekk, min jindem u jiġi għandi bħal tifel ċkejken, lilu jiena nilqa’ għandi, għax ta’ min hu bħalu hija s‑saltna ta’ Alla. Araw, għal dawn jiena tajt ħajti, u erġajt ħadtha lura; għalhekk indmu, u ejjew għandi, intom ilkoll minn tarf għall‑ieħor tal‑art, u iksbu s‑salvazzjoni.