1 Ket napasamak a naglabas ti tallopulo-ket-uppat a tawen, ken kasta met ti tallopulo-ket-lima, ket adtoy nangipatakder dagiti disipulo ni Jesus iti simbaan ni Cristo iti amin a daga iti aglawlaw. Ket adu ti immasideg kadakuada, ket pudno a nagbabawida iti basbasolda, nabuniaganda iti nagan ni Jesus; ket inawatda met ti Espiritu Santo.

2 Ket napasamak nga idi maika-tallopulo-ket-innem a tawen, napasurot dagiti amin a tao iti Apo, iti amin a daga, dagiti Nephite ken Lamanite, ket awan ti nagririri ken nagsisinnuppiat kadakuada, ket nasayaat ti panagkikinnaawatan ti tunggal maysa.

3 Ket agpapadada iti amin a banag; ngarud awan ti nabaknang ken napanglaw, adipen ken siwawayawaya, ngem nawayada amin ken makipaglaklak-am iti nailangitan a sagut.

4 Ket napasamak a napalabas met ti tallopulo-ket-pito a tawen, ket nagtultuloy pay laeng ti kinatalna ti pagilian.

5 Ket adda naindaklan ken nakaskasdaaw nga inaramid dagiti disipulo ni Jesus, iti kasta nangagasda kadagiti masakit, ken pinagungarda dagiti natay, ken pinapagnada dagiti pilay, ken insublida ti panagkita dagiti bulsek, ken ti panagdengngeg dagiti tuleng; ken naaramid ti amin a kita ti milagro kadagiti annak ti tao; ket awan ti inaramidda a milagro a di nainaig iti nagan ni Jesus.

6 Ket kastoy ti panaglabas ti tallopulo-ket-walo a tawen, kasta met ti maika-tallopulo-ket-siam, ken uppat-a-pulo-ket-maysa, ken ti uppat-a-pulo-ket-dua, wen, uray agingga iti uppat-a-pulo-ket-siam a tawen ti napalabas, ken kasta met ti limapulo-ket-maysa, ken ti limapulo-ket-dua; wen, ken agingga a limmabas ti limapulo-ket-siam a tawen.

7 Ket pinagrang-ay ida ti Apo iti pagilian; wen, iti kasta nagipatakderda manen iti siudad kadagiti lugar a nakauraman ti siudad.

8 Wen, impatakderda manen uray pay dayta dakkel a siudad ti Zarahemla.

9 Ngem adu dagiti siudad a limned, ket ngimmato ti danum kadagitoy; ngarud saanen a napabaro dagitoy a siudad.

10 Ket ita, adtoy, napasamak a pimmigsa dagiti tao ni Nephi, ket napardas ti yaaduda, ket nagbalinda a nasayaat ken makaay-ayo nga umili.

11 Ket nagasawada, ken naited a kasimpungalan, ket naparaburanda iti adu a kari nga impaay ti Apo kadakuada.

12 Ket saandan a sinurot dagiti aramid ken pagannurotan iti paglintegan ni Moises; ngem sinurotda dagiti bilin nga inawatda manipud iti Apo a Diosda, nga intultuloyda ti agayuno ken agkararag, ken aguummong tapno sangsangkamaysada nga agkararag ken dumngeg iti balikas ti Apo.

13 Ket napasamak nga awan ti panagririnnupir kadagiti amin a tao, iti amin a pagilian; ngem adda dadakkel a milagro nga inaramid dagiti disipulo ni Jesus.

14 Ket napasamak a napalabas ti maika-pitopulo-ket-maysa a tawen ken kasta met ti pitopulo-ket-dua a tawen, wen, iti ababa a pannao, agingga a pitopulo-ket-siam a tawen ti napalabas; wen, napalabasen uray ti sangagasut a tawen, ket dagiti disipulo ni Jesus, a pinilina, napan aminen iti paraiso ti Dios, malaksid kadagiti tallo a rumbeng nga agbati; ket adda dagiti dadduma a sabali a disipulo a naordenan iti lugarda; ken kasta met nga adu kadagita a kaputotan ti awanen.

15 Ket napasamak nga awan ti panagririnnupir iti pagilian, gapu iti ayat ti Dios a nagnaed iti puso dagiti umili.

16 Ket awan ti innapal, wenno panagpupungtot, wenno riribuk, wenno panagiinnabig, wenno panagulbod, wenno pammapatay, wenno ania man a kita ti panaggartem; ket pudno awanen ti naragragsak a tao kadagiti amin a tao a pinarsua ti Dios.

17 Awan ti tulisan, wenno mammapatay, wenno adda Lamanite, wenno uray ania a kita ti -ite; ngem nagsangsangkamaysada, dagiti annak ni Cristo, ken agtawid iti pagarian ti Dios.

18 Ket anian a naggasatda! Agsipud ta pinaraburan ti Apo ida iti amin nga aramidda; wen, ket naparaburanda ken nagrang-ayda agingga iti sangagasut-ket-sangapulo a tawen ti napalabas; ken idi nakalikuden ti umuna a kaputotan manipud ken ni Cristo, ket awan ti panagririnnupir iti pagilian.

19 Ket napasamak a natay ni Nephi, a nangisurat iti daytoy maudi a kasuratan, (ket insuratna kadagiti pinanid ni Nephi), ket ti anakna a ni Amos ti nangisurat para kenkuana; ket insuratna met iti pinanid ni Nephi.

20 Ket insuratna iti walopulo-ket-uppat a tawen, ket adda pay la talna iti pagilian, malaksid ti bassit a bilang ti umili nga immalsa iti simbaan ket inaramatda a nagan ti Lamanite; ngarud nangrugi manen nga adda Lamanite iti pagilian.

21 Ket napasamak a natay met ni Amos, (ket sangagasut-ken-siam-a-pulo-ket-uppat a tawen manipud iti yaay ni Cristo), ket ti Anakna a ni Amos ti nangisurat iti kasuratan; ket isu met ti nangisurat kadagiti pinanid ni Nephi; ket naisurat met iti libro ni Nephi, nga isu daytoy a libro.

22 Ket napasamak a dua gasut a tawen ti napalabas; ket natay amin ti maikadua a kaputotan malaksid ti sumagmamano.

23 Ket ita siak, ni Mormon, kayatko a maammuanyo nga immadu ti tao, iti kasta naiwarasda iti rabaw ti daga, ket nagbalinda a nabaknang unay, gapu iti panagrang-ayda ken ni Cristo.

24 Ket ita, iti daytoy maika-dua-gasut-ket-maysa a tawen nangrugi a timmanor kadakuada ti napasindayag, kas iti panagaruat iti nangina a kawes, ken amin a kita ti napintas a perlas, ken dagiti napintas a banag iti lubong.

25 Ket manipud iti dayta a panawen saanen a gagangay kadakuada dagiti sanikua ken taraonda.

26 Ket nangrugidan nga agsusupadi iti kasasaad; ket rinugianda ti agipatakder iti simbaan nga agpaay kadakuada tapno bumaknangda, ket inrugida ti mangtallikud iti pudno a simbaan ni Cristo.

27 Ket napasamak nga idi naglabas ti dua-gasut-ket-sangapulo a tawen immadu ti simbaan iti pagilian; wen, immadu ti Simbaan nga agkuna nga ammoda ni Cristo, ngem ketdi tinallikudanda ti ad-adu a paset ti ebangheliona, iti kasta naaddaanda iti amin a kita ti kinadangkes, ket impaayda dagiti sagrado iti tao a di rumbeng nga umawat gapu iti saanna a pannakaikari.

28 Ket immadu daytoy a simbaan iti kasta unay gapu iti basol, ken gapu iti pannakabalin ni Satanas a nagari iti pusoda.

29 Ket manen, adda sabali a simbaan a nangtallikud ken ni Cristo; ket linalaisda ti pudno a simbaan ni Cristo, gapu iti kinapakumbaba ken pammatida ken ni Cristo; ket pinilawda ida gapu iti adu a milagro a naaramid kadakuada.

30 Ngarud inaramatda ti bileg ken turay kadagiti disipulo ni Jesus a nakipagtaeng kadakuada, ket imbaludda ida; ngem gapu iti pannakabalin ti balikas ti Dios, nga adda kadakuada, narba ti pagbaludan, ket nagaramidda iti nabileg a milagro kadakuada.

31 Nupay kasta, ken uray adda dagitoy a milagro, pinatangken dagiti tao ti puspusoda, ket kinalikagumanda a patayen ida, a kas iti panagkalikagum dagiti Hudio idiay Jerusalem a mangpatay ken ni Jesus, kas maibatay iti balikasna.

32 Ket inserrekda ida iti umap-apuy nga urno, ket rimmuarda a di nadangran.

33 Ket naiserrekda met iti rukib dagiti atap nga ayup, ket nakiay-ayamda kadagitoy a kas iti pannakiay-ayam ti ubing iti karnero; ket rimmuarda manipud kadagitoy, a saanda a nadangran.

34 Nupay kasta, pinatangken dagiti umili ti puspusoda, agsipud iti panangipangulo kadakuada ti adu a saserdote ken saan a pudno a propeta a mangipatakder iti adu a simbaan, ken mangaramid iti amin a kita ti kinadakes. Ket dinangranda dagiti tao ni Jesus; ngem saan a bimmales dagiti tao ni Jesus. Ket kastoy ti pannakapukaw ti pammatida ken ti kinadangkesda, iti tinawen, agingga a napalabas ti dua-gasut-ket-tallopulo a tawen.

35 Ket ita napasamak iti daytoy a tawen, wen, iti maika-dua-gasut-ken-tallopulo-ket-maysa a tawen, adda dakkel a pannakabingaybingay dagiti tao.

36 Ket napasamak nga iti daytoy a tawen adda timpuar a tattao a maawagan iti Nephite, ket isuda ti pudno a mamati ken Cristo; ket adda maawagan kadakuada iti Lamanite—Jacobite, ken Josephite, ken Zoramite;

37 Ngarud dagiti pudno a mamati ken Cristo, ken ti pudno nga agdaydayaw ken Cristo, (mairaman kadakuada dagiti tallo a disipulo ni Cristo a nabati) ti naawagan a Nephite, ken Jacobite, ken Josephite, ken Zoramite.

38 Ket napasamak a maawagan dagiti nangtallikud iti ebanghelio iti Lamanite, ken Lemuelite, ken Ishmaelite; ket saan a napukaw ti pammatida, ngem siaayatda a simmuppiat iti ebanghelio ni Cristo; ket insuroda dagiti annakda a di mamati, a kas kadagiti ammada, manipud pay idi punganay, kimmapsut met ti panamatida.

39 Ket gapu dayta iti kinadangkes ken kinarimon dagiti ammada, a kas idi punganay. Ket naisuroda a gumura kadagiti annak ti Dios, kas iti pannakaisuro dagiti Lamanite a manggura kadagiti annak ni Nephi manipud idi punganay.

40 Ket napasamak a dua-gasut-ken-uppat-a-pulo-ket-uppat a tawen ti napalabas, ket kastoy ti inaramid dagiti tao. Ket kaaduan kadagiti nadangkes a tao ti nagbalin a napigsa, ket ad-aduda ngem ti bilang dagiti tao ti Dios.

41 Ket intuloyda ti nagipatakder iti simbaan nga agpaay kadakuada, ket inarkosanda iti adu a kita ti napapateg a banag. Ket kastoy ti panaglabas ti dua-gasut-ket-lima-pulo a tawen, ken kasta met ti dua-gasut-ket-innem-a-pulo a tawen.

42 Ket napasamak nga inrugi manen dagiti nadangkes nga umili a pabilgen ti nalimed a sinnapata ken kinnunsabo ni Gadianton.

43 Ken kasta met a nangrugi a pimmalangguad ti puso dagiti tao a maawagan a tao ni Nephi, gapu iti nalabes a kinabaknangda, ken nagbalinda a napasindayag a kas kadagiti kakabsatda, a dagiti Lamanite.

44 Ket manipud iti daytoy a panawen nangrugi dagiti disipulo nga agladingit gapu kadagiti basol ti lubong.

45 Ket napasamak nga idi limmabas ti tallo gasut a tawen, agpada a nagbalin a nadangkes dagiti tao ni Nephi ken dagiti Lamanite a kas iti tunggal maysa.

46 Ket napalabas a nagwaras dagiti tulisan ni Gadianton iti amin a daga; ket awan ti nalinteg malaksid dagiti disipulo ni Jesus. Ket adu ti balitok ken pirak a naidulinda, ket nagsaedda iti amin a kita ti panagsaed.

47 Ket napasamak a kalpasan ti tallo-gasut-ket-lima a tawen, (ken nagtalinaed pay laeng dagiti umili iti kinadangkes) natay ni Amos; ket ti kabsatna, ni Ammaron, ti nangisurat iti kasuratan.

48 Ket napasamak nga idi tallo-gasut-ket-duapulo a tawen ti napalabas, inlemmeng ni Ammaron, kas ti Espiritu Santo, ti kasuratan a sagrado—wen, uray amin dagiti nasagraduan a kasuratan a nagiinnallawatan dagiti kaputotan, a sagrado—uray agingga iti maika-tallo-gasut-ket-duapulo a tawen manipud iti yaay ni Cristo.

49 Ket inlemmengna dagitoy iti Apo, tapno umaydanto manen kadagiti nabati iti balay ni Jacob, kas maibatay kadagiti padto ken kari ti Apo. Ket kastoy ti naggibusan ti kasuratan ni Ammaron.