1 Ā, i pahawa ake, nā, ka pahemo atu ngā tau toru ngahuru mā whā, me te toru ngahuru mā rima, ā nana kua whakaritea e ngā apataki a Ihu i tētahi hāhi a te Karaiti i ngā whenua katoa huri noa. Ā, i rumakina i runga i te ingoa o Ihu ngā tāngata katoa i haere mai ai ki a rātou, me te rīpenetā tūturu i ō rātou hara; ā, i whiwhi rātou i te Wairua Tapu.

2 Ā, i pahawa ake i te tau toru ngahuru mā ono, i whakatahuritia mai te iwi katoa ki te Ariki, i runga i te mata katoa o te whenua, ko ngā Nīwhai me ngā Rāmana, ā, kāore he tautohetohenga me ngā ngangaretanga i waenganui i a rātou, ā, i tika tā ia tāngata mahi tētahi ki tētahi.

3 Ā, ka mahi ngātahi rātou i ngā mea katoa i waenganui i a rātou; nō reira kāore he whairawa, kāore he rawakore, he mauhere, he herekore, engari kua meinga rātou katoa hei mea herekore, e whaiwāhi atu ana ki ngā homaitanga o te rangi.

4 Ā, i pahawa ake, nā, ka pahemo atu anō hoki te tau toru ngahuru mā whitu, ā, ka hono tonu te rangimārie i runga i te whenua.

5 Ā, he maha ngā mahi nunui whakamīharo i meatia nei e ngā apataki a Ihu, nā konā rātou mahū ai i te hunga tūroro, mairanga ai i te hunga mate, mea ai i te hunga kopa kia hīkoi, mea ai te hunga matapō kia kite, me te hunga turi kia rongo; i meatia e rātou ngā tūmomo merekara katoa i waenganui i ngā tamariki a te tangata; ā, kāore rātou i mea i ngā merekara hāunga i runga i te ingoa o Ihu.

6 Ā pēnei pahemo atu ai te tau toru ngahuru mā waru, me te toru ngahuru mā iwa, me te whā ngahuru mā tahi, me te whā ngahuru mā rua, āe rā, tae noa pū anō ki te pahemotanga atu o ngā tau whā ngahuru mā iwa, me te tau rima ngahuru mā tahi anō hoki, me te rima ngahuru mā rua, āe rā, tae noa pū anō kia pahemo atu ngā tau rima ngahuru mā iwa.

7 Ā, nā te Ariki rātou i whaiora ai i runga i te whenua; āe rā, nā konā rātou hanga ake ai i ngā pā i ngā wāhi i tahuna ai ngā pā.

8 Āe rā, ko taua pā nui pū anō o Harahemara i meinga ai e rātou kia hangaia ake anō.

9 Engari he maha ngā pā kua tōremi iho, ā, ka puta mai he wai i tō reira wāhi; nō reira kīhai i taea ēnei pā te whakahou.

10 Ināianei ā, nana, i pahawa ake, nā, ka kaha haere te iwi o Nīwhai, ā, ka whakatokomahatia wawetia rātou, ā, ka meinga rātou hei iwi ātaahua, hei iwi āhuareka.

11 Ā, i mārenatia rātou, ka tukuna kia mārenatia, ā, ka manaakitia rātou e rite ana ki ngā whakaari maha i whakaaria mai ai e te Ariki ki a rātou.

12 Ā, kāore rātou i hīkoi atu anō i runga i ngā meatanga me ngā tikanga tapu o te ture a Mohi; engari i hīkoi rātou i runga i ngā whakahaunga i whiwhi ai rātou i tō rātou Ariki me tō rātou Atua, e hono tonu ana i roto i te inoi me te nohopuku, ā, i te hui putuputu ki te inoi me te whakarongo ki te kupu a te Ariki.

13 Ā, i pahawa ake, nā, kāore he tautohetohenga i waenganui i te iwi katoa, i te whenua katoa; engari i meatia ngā merekara nunui i waenganui i ngā apataki a Ihu.

14 Ā, i pahawa ake, nā, ka pahemo atu te tau whitu ngahuru mā tahi, me te whitu ngahuru mā rua, āe rā, hei whakarāpopoto, tae noa atu ki te pahemotanga atu o te tau whitu ngahuru mā iwa; āe rā, kua pahemo noa atu ngā tau kotahi rau, ā, ko ngā apataki a Ihu, nāna nei i kōwhiri, kua haere katoa rātou ki te pararaiha o te Atua, hāunga ko te tokotoru e noho mai nei; ā, i reira anō ētahi apataki kua whakamanaia i muri i a rātou; ā, kua pahemo atu anō ngā mea tokomaha o taua whakatipuranga.

15 Ā, i pahawa ake, nā, kāore he tautohetohenga i te whenua, nā te aroha o te Atua i noho nei i ngā ngākau o te iwi.

16 Ā, kāore he pūhaehae, he ngangau, he tutūnga puehu, he pūremu, he kōrero teka, he kōhuru, he taikaha rānei o ia āhua, o ia āhua; ā, kāore he iwi i kō atu i tēnei iwi mō te nui o te hari i wenganui i ngā iwi katoa kua hangaia nei e te ringa o te Atua.

17 Kāore he kaipāhua, he kaikōhuru rānei, kāore hoki he Rāmana, he iwi kē rānei; engari he iwi kotahi rātou, ko ngā tamariki a te Karaiti, he kaiwhiwhi ki te kīngitanga o te Atua.

18 Ā, anō tō rātou manaakitanga! Nā te mea i manaaki te Ariki i a rātou i roto i ā rātou mahinga katoa; āe rā, i manaakitia pū anō rātou, ā, i whakakakea rātou tae noa ki te pahemotanga atu o ngā tau kotahi rau kotahi ngahuru; ā, kua pahemo atu te whakatipuranga tuatahi mai i te Karaiti, ā, kāore he tautohetohenga i runga i te whenua.

19 Ā, i pahawa ake, nā, ka mate a Nīwhai, ko ia nāna nei tēnei tuhinga whakamutunga i tuhi, (ā, nāna i tuhituhi i runga i ngā papa a Nīwhai), ā, nā tana tama a Amoho i tuhituhi i muri i a ia; ā, i tuhia e ia i runga i ngā papa a Nīwhai anō hoki.

20 Ā, e waru ngahuru mā whā ngā tau i tuhituhi ai ia, ā, i reira tonu te rangimārie i runga i te whenua, hāunga tētahi wāhi iti o te iwi kua puta kē atu i te hāhi, ā, ka tango ake ki runga i a rātou te ingoa o ngā Rāmana; nō reira ka tīmata atu anō he Rāmana i runga i te whenua.

21 Ā, i pahawa ake, nā, ka mate a Amoho anō hoki, (ā, kua kotahi rau iwa ngahuru mā whā tau mai i te haerenga mai a te Karaiti) ā, nā tana tama a Amoho i tuhi i muri i a ia; ā, i tuhituhi anō ia i runga i ngā papa a Nīwhai; ā, i tuhia anōtia i roto i te pukapuka a Nīwhai, koia tēnei pukapuka.

22 Ā, i pahawa ake, nā, kua pahemo atu ngā tau e rua rau; ā, kua pahemo atu te whakatipuranga tuarua hāunga he mea torutoru nei.

23 Ināianei ahau, a Moromona, e hiahia ana kia mōhio koutou kua whakatokomahatia te iwi, nā konā kua horapa rātou i runga i te mata katoa o te whenua, ā, kua meinga rātou hei mea tino whairawa rawa atu, nā tō rātou kake i te Karaiti.

24 Ināianei ā, hei roto i tēnei tau e rua rau mā tahi ka tīmata i reira ētahi hunga i waenganui i a rātou kua neke ake i runga i te whakapehapeha, pērā i te whakamau i ngā kākahu utu nui, me ngā peara whakapaipai anō o ia āhua, o ia āhua, me ngā mea whakapaipai o te ao.

25 Ā, nō taua wā mai anō heoi anō te mahi ngātahi i ō rātou taputapu me ō rātou rawa i waenganui i a rātou.

26 Ā, ka tīmata tā rātou whakawehewehe ki roto i ngā taumata; ā, ka tīmata rātou ki te whakatū hāhi ki a rātou anō hei mea rapu taonga, ā, ka tīmata tā rātou whakakore atu i te hāhi pono a te Karaiti.

27 Ā, i pahawa ake, nā, i te pahemotanga atu o ngā tau e rua rau kotahi ngahuru kua maha ngā hāhi i te whenua; āe rā, he maha ngā hāhi i kauhau i tō rātou mōhio ki te Karaiti, heoi i whakakore atu rātou i ngā wāhi nui o tana rongopai, nā konā tukua ai e rātou ngā tūmomo whakarihariha katoa, ā, kua tukuna atu ērā mea tapu ki te tangata kua whakahaua kia kaua, he hē hoki nōna.

28 Ā, i whakatokomahatia rawatia tēnei hāhi nā te kino, ā, nā te mana o Hātana i mau ai ki ō rātou ngākau.

29 Hei āpiti anō, i reira tētahi hāhi anō i whakakore atu i te Karaiti; ā, i whakatoi rātou i te hāhi pono a te Karaiti, nā tō rātou whakaiti me tō rātou whakapono i te Karaiti; i whakahāweatia rātou e rātou nō ngā merekara maha i meatia ai i waenganui i a rātou.

30 Nō reira ka whakatupu kaha me te mana i runga i ngā apataki a Ihu i noho mai ai i a rātou, ā, ka makaia rātou e rātou ki roto i te whareherehere; engari nā te mana o te kupu a te Atua, kei roto nei i a rātou, ka wāhiruatia ngā whareherehere ki waenganui, ā, ka haere atu rātou e mahi merekara nunui ana ki waenganui i a rātou.

31 Hei aha koa, ahakoa ēnei merekara katoa, ka whakapakeke te iwi i ō rātou ngākau, ā, ka whai atu ki te whakamate i a rātou, he pērā pū anō i ngā Hūrai i Hiruharama i whai ai ki te whakamate i a Ihu, e ai ki tana kupu.

32 Ā, i makaia rātou e rātou ki roto i ngā oumu ahi, ā, ka puta mamae kore mai rātou.

33 Ā, ka makaia anōtia rātou e rātou ki roto i ngā ana kararehe mohoao, ā, ka tākaro tahi rātou me ngā kararehe mohoao anō nei he tamaiti me tētahi reme; ā, ka puta mai rātou i waenganui i a rātou, kāore ō rātou mamae.

34 Hei aha koa, i whakapakeke te iwi i ō rātou ngākau, nā te mea i ārahina atu rātou e ngā tohunga tokomaha me ngā poropiti teka kia waihanga ake ai i ngā hāhi maha, me te mahi i ngā tūmomo kino katoa. Ā, ka papaki iho rātou ki runga i te iwi o Ihu; engari kāore te iwi o Ihu i papaki atu anō. Ā, pēnei tā rātou memeha atu i runga i te whakaponokore me te whakarihariha, mai i tēnei tau ki tēnei tau, tae atu ki te wā kua pahemo atu ngā tau e rua rau toru ngahuru.

35 Ināianei ā i pahawa ake i tēnei tau, āe rā, i te tau e rua rau e toru ngahuru mā tahi, i reira tētahi wehenga nui i waenganui i te iwi.

36 Ā, i pahawa ake i tēnei tau anō ka mairanga ake ai tētahi iwi e kīa ana ko ngā Nīwhai, ā, he tangata whakapono tūturu i te Karaiti; ā, i waenganui i a rātou anō ko te hunga i karangatia nei he Rāmana—he Hākopa, he Hōhepa, he Hōrama;

37 Nō reira ko ngā tangata whakapono tūturu i te Karaiti, me ngā kaikoropiko pono a te Karaiti, (i waenganui i a rātou ngā apataki tokotoru a Ihu e noho mai ana) i karangatia nei he Nīwhai, he Hākopa, he Hōhepa, he Hōrama.

38 Ā, i pahawa ake, nā, ka karangatia te hunga nāna nei te rongopai i whakaparahako he Rāmana, he Remuere, he Ihimaera; ā, kīhai rātou i memeha atu i runga i te whakaponokore, engari i tino haututū rātou i runga i te hiahia o te ngākau ki te rongopai a te Karaiti; ā, ka whakaako rātou i ā rātou tamariki kia kaua rātou e whakapono, he pērā i ō rātou tūpuna, mai i te tīmatanga, i memeha atu ai.

39 Ā, he mea nā te whakarihariha me te mōrikarika a ō rātou tūpuna, he pērā pū anō i te tīmatanga. Ā, ka whakaakona rātou kia mauāhara ki ngā tamariki a te Atua, he pērā i ngā Rāmana i whakaakona mai nei kia mauāhara ki ngā Nīwhai i te tīmatanga.

40 Ā, i pahawa ake, nā, kua pahemo atu ngā tau e rua rau whā ngahuru mā whā, ā, pēnei ngā āhuatanga o te iwi. Ā, ka kaha haere te wāhi nui o te iwi kino, ā, ka meinga kia tokomaha rawa ake i te iwi o te Atua.

41 Ā, hono tonu tā rātou hangahanga ake i ngā hāhi ki a rātou anō, ā, ka whakarākeihia ki ngā tūmomo mea utu nui katoa. Ā, pēnei pahemo atu ai ngā tau e rua rau rima ngahuru, ā, me ngā tau e rua rau ono ngahuru anō hoki.

42 Ā, i pahawa ake, nā, ka tīmata anō te wāhi kino o te iwi ki te whakarite i ngā oati huna me ngā whakakotahitanga huna o Karianato.

43 Hei āpiti anō ka whakapehapeha haere te iwi i karangatia ai ko te iwi o Nīwhai i roto i ō rātou ngākau, he mea nā tō rātou whairawa nui, ā, ka meinga rātou hei mea horihori pērā i ō rātou tuakana, arā, ko ngā Rāmana.

44 Ā, nō tēnei wā tīmata atu ai ngā apataki kia pōuri mō ngā hara o te ao.

45 Ā, i pahawa ake, nā, i te wā kua pahemo atu ngā tau e toru rau, kua meinga ngā iwi e rua, arā, ko te iwi o Nīwhai me ngā Rāmana hei iwi tino whakarihariha e pērā ana tētahi i tētahi.

46 Ā, i pahawa ake, nā, ka horapa haere ngā kaipāhua o Karianato i runga i te mata katoa o te whenua; ā, kāore i reira tētahi mea tika kotahi hāunga ko ngā apataki a Ihu. Ā, he ranea tā rātou whakatakoto ake i te kōura me te hiriwā, ā, ka mahi rātou i ngā tūmomo mahi hokohoko katoa.

47 Ā, i pahawa ake, nā, whai muri iho i te pahemotanga atu o ngā tau e toru rau mā rima, (ā, i te noho tonu te iwi i roto i te whakarihariha) ka mate a Amoho; ā, nā tana teina, nā Amarona, i tuhituhi ngā tuhinga i muri i a ia.

48 Ā, i pahawa ake, nā, i te wā kua pahemo atu ngā tau e toru rau e rua ngahuru, he mea akiaki a Amarona e te Wairua Tapu, i huna ake i ngā tuhinga e tapu ana—āe rā, ko ngā tuhinga tapu katoa kua tukuna iho mai nei mai i tētahi whakatipuranga ki tētahi whakatipuranga, e tapu ana—tae noa iho pū anō ki te tau toru rau e rua ngahuru mai i te haerenga mai a te Karaiti.

49 Ā, i huna ake ia i ērā mea ki te Ariki, kia puta mai anō ki ngā mōrehu o te whare o Hākopa, e ai ki ngā poropititanga me ngā whakaari a te Ariki. Ā pēnei te whakamutunga o te tuhinga a Amarona.