Ko ngā Kupu a Moromona

1 Ināianei ā, ko au, a Moromona, e tata tuku ake ana i te tuhinga kua mahia e ahau ki ngā ringaringa o taku tama a Moronai, nana, kua kite au i te nuinga o te whakangaromanga o tōku iwi, ngā Nīwhai.

2 Ā, he maha nei ngā rautau i muri iho i te haerenga mai a te Karaiti e tuku atu nei au i ēnei tuhinga ki ngā ringaringa o taku tama; ā, e whakapono ana ahau ka kite ia i te whakangaromanga katoatanga o tōku iwi. Engari mā te Atua rā ia e tohu kia ora tonu ai, kia paku tuhituhi ia e pā ana ki a rātou, ā, e paku pā ana anō ki te Karaiti, hei painga pea ēnā ki a rātou hei tōna rā.

3 Ināianei ā, ka paku kōrero au e pā ana ki tāku i tuhi nei; nā, nō muri iho i taku whakarāpopototanga mai i ngā papa a Nīwhai, heke iho ana ki te kīngitanga o tēnei kīngi Peniamine, kua kōrerotia nei e Amareki, i tirohia e au ngā tuhinga kua tukuna mai nei ki ōku ringaringa, ā, ka kite au i ēnei papa, i mau nei tēnei kōrero iti a ngā poropiti, mai i a Hākopa heke iho ki te kīngitanga o tēnei kīngi Peniamine, me ngā kupu maha anō hoki a Nīwhai.

4 Ā, ko ngā mea e āhuareka ana ki ahau i runga i ēnei papa, nā ngā poropititanga mō te haerenga mai a te Karaiti; ā, i te mōhio ōku tūpuna kua tutuki ngā mea maha; āe rā, e mōhio ana anō ahau kua tutuki ngā mea maha kua poropititia e pā ana ki a mātou tae atu ana ki tēnei rā, ā, me pahawa rawa ake ngā mea ka meatia hei tua atu i tēnei rā—

5 Nā reira, nāku ēnei mea i whiriwhiri, kia whakamutua taku tuhinga i runga, ka tīkina atu e au te toenga o aku tuhinga mai i ngā papa a Nīwhai; ā, kāore e taea ana e au te tuhi i te wāhi whakaterau o ngā mea o tōku iwi.

6 Engari nana, māku ēnei papa e kawe, e mau nei ēnei poropititanga me ngā whakakitenga, ā, ka whakanohoia tahitia ērā ki te toenga atu o taku tuhinga, nā te mea he nui tōna utu ki ahau; ā, e mōhio ana au ka nui anō tōna utu ki ōku tuākana.

7 Ā, māku tēnei mō tētahi take whai mōhiotanga; nā te mea e kōhimuhimutia nei ahau, e ai ki ngā mahinga a te Wairua o te Ariki kei roto nei i ahau. Ināianei ā, kāore au i te mōhio ki ngā mea katoa; engari e mōhio ana te Ariki ki ngā mea katoa e tae mai ai; nā reira, e mahi ana ia i roto i ahau kia meatia tāna e pai ai.

8 Ā, e hāngai ana taku inoi ki te Atua ki ōku tuākana, kia hoki mai anō rātou ki te mātauranga ki te Atua, āe rā, te hokonga a te Karaiti; kia rerehua mai anō rātou.

9 Īnāianei ā, māku, mā Moromona, e ū tonu ki te whakamutu i taku tuhinga, e tangohia mai nei e ahau mai i ngā papa a Nīwhai; ā, e tuhituhi ana ahau e ai ki te mātauranga me te māramatanga kua homai nei ki ahau e te Atua.

10 Nā reira, i pahawa ake nō muri iho i tā Amareki tuku ake i ēnei papa ki roto i ngā ringaringa o kīngi Peniamine, ka mauria e ia, ā, ka whakanohoia ērā ki te taha o ērā atu papa, i mau nei ngā tuhinga kua tukuna iho e ngā kīngi, mai i tētahi whakatipuranga ki tētahi whakatipuranga tae noa ki ngā rā o kīngi Peniamine.

11 Ā, i tukuna iho mai i a kīngi Peniamine, mai i tētahi whakatipuranga ki tētahi whakatipuranga tae noa ki te wā i taka iho ki roto i ōku ringaringa. Ā, māku, mā Moromona, e inoi atu nei ki te Atua kia tiakina ēnei mai i tēnei wā haere ake nei. Ā, e mōhio ana ahau ka tiakina ēnā; nā te mea kua tuhia ngā mea nunui ki runga rā, i konā te āhuatanga e whakawākia ai tōku iwi me ō rātou tuākana hei te rā whakamutunga nui, e ai ki te kupu a te Atua kua tuhia mai nei.

12 Ināianei ā, mō tēnei kīngi Peniamine—i reira ētahi tautohetohenga i waenganui i tōna iwi.

13 Ā, i pahawa ake, nā, i heke iho ngā tauā a ngā Rāmana ki waho i te whenua o Nīwhai, ki te whawhai atu ki tōna iwi. Engari nana, ka whakahuihui tahitia e kīngi Peniamine āna tauā, ā, ka tū atu ia ki a rātou; ā, ka whawhai ia i runga i te kaha o tōna ake ringa, ki te hoari o Rāpana.

14 Ā, ka kakari atu rātou ki ō rātou hoariri i runga i te kaha o te Ariki, tae atu ana ki tā rātou patupatu i ngā Rāmana manomano maha. Ā, i pahawa ake, nā, i kakari atu rātou ki ngā Rāmana tae atu ki te wā i peia atu ai rātou i ō rātou whenua tuku iho katoa.

15 Ā, i pahawa ake nō muri iho i te putanga mai o ngā Karaiti teka, ā, ka katia hoki ō rātou māngai, ā, ka whiua rātou kia rite ki ō rātou hē;

16 Ā, whai muri iho i te putanga mai o ngā poropiti teka, me ngā kaikauhau teka me ngā kaiako teka ki waenganui i te iwi, ā, kua whiua katoatia ēnei kia rite ki ō rātou hē; ā, whai muri iho i ngā tautohetohenga nui me ngā tītorehanga maha ki ngā Rāmana, nana, i pahawa ake i a kīngi Peniamine, me te āwhina a ngā poropiti tapu i waenganui nei i tōna iwi—

17 Nana rā, he tangata tapu a kīngi Peniamine, ā, nāna tōna iwi i whakahaere i runga i te tika; ā, he tokomaha ngā tangata tapu i te whenua, ā, i kōrerotia e rātou te kupu a te Atua i runga i te kaha me te mana; ā, i koi rawa tā rātou nā te kakī mārō o te iwi—

18 Nā reira, nā tō ēnei āwhina, a kīngi Peniamine, nā tana whakapau i te kaha katoa o tōna tinana me te mauri katoa o tōna wairua, me ngā poropiti hoki, i whakatau iho anō te maungārongo ki runga i te whenua.