Ko te Pukapuka a Ōmoni

1 Nana, i pahawa ake nāku, nā Ōmoni, kua whakahaua nei e tōku matua, a Haroma, kia tuhituhi noa au i runga i ēnei papa, kia tiakina ō mātou whakapapa—

2 Nā reira, i ōku rā, e hiahia ana ahau kia mōhio mai koutou, nā, i nui taku whawhai ki te hoari ki te tiaki i tōku iwi, ngā Nīwhai, i te takanga atu ki ngā ringaringa o ō rātou hoariri, ngā Rāmana. Engari nana, ko au anō he tangata kino, kīhai hoki au i pupuri i ngā ture me ngā whakahaunga a te Ariki e rite ana ki te mea tika hei mahinga māku.

3 Ā, i pahawa ake te pahuretanga atu i ngā tau e rua rau whitu tekau mā ono, ā, i maha ō mātou tau maungārongo; ā, i maha ō mātou tau pakanga kino me te whakaheke toto. Āe rā, hei whakarāpopoto, kua pahure atu ngā tau e rua rau waru tekau mā rua, ā, nāku ngā papa i tiaki e ai ki ngā whakahaunga a ōku tūpuna; ā, ka tukua iho ērā e ahau ki taku tama a Amarona. Ā, ka mutu i ahau.

4 Ināianei ā, māku, mā Amarona, e tuhituhi āku e tuhi ai, he mea torutoru noa iho, i te pukapuka a tōku matua.

5 Nana, i pahawa ake te pahuretanga atu i ngā tau e toru rau rua tekau, ā, i whakangaromia atu te wāhi kino ake o ngā Nīwhai.

6 Nā te mea kāore te Ariki e tuku, nō muri iho i tana ārahi i a rātou ki waho i te whenua o Hiruharama me te tiaki, me te whakahaumaru i a rātou kei taka i ngā ringaringa o ō rātou hoariri, āe rā, kāore ia e tuku kia kore ai e mana ngā kupu kua kōrerotia nei e ia ki ō mātou tūpuna, e mea ana: Ki te kore koutou e pupuri i aku whakahaunga kua kore koutou e whaioranga i te whenua.

7 Nā reira, i toro atu te Ariki ki a rātou i runga i te whakawākanga nui; hei aha koa, nāna te hunga tika i tohu kia kaua rātou e mate, engari i whakaputaina rātou i ngā ringaringa o ō rātou hoariri.

8 Ā, i pahawa ake, nā, nāku ngā papa i tuku atu ki taku teina a Kemihi.

9 Kei te tuhituhi au ināianei, a Kemihi, i ngā mea ruarua e tuhi nei au, i taua pukapuka anō i tuhia ai e tōku tuakana, nāna i tuhi ki tōna ake ringa; nāna i tuhi i te rā tonu i tukuna mai e ia ēnā mea ki ahau. Ā, i tiakina e māua ngā papa i runga i tēnei ritenga, nā te mea e ai ki ngā whakahaunga a ō mātou tūpuna. Ā, ka mutu i ahau.

10 Nana, ahau, a Apinaromo, te tama a Kemihi. Nana, i pahawa ake taku kitenga atu i ngā whawhai maha me ngā tautohetohenga nui i waenganui i tōku iwi, ngā Nīwhai, me ngā Rāmana; ā nāku, ki taku hoari ake, ngā Rāmana tokomaha i whakamate hei tiaki i ōku huānga.

11 Ā nana, kua whaowhaoa ngā kōrero mō tēnei iwi i runga i ngā papa kei ngā kīngi, e ai ki ngā whakatipuranga; ā, kāore au e mōhio ana ki tētahi whakakitenga, tētahi poropititanga rānei, hāunga ērā mea kua tuhia nei; nā reira, kua tuhia ērā mea e tika ana. Ā, ka mutu i ahau.

12 Nana, ko Amareki ahau, te tama a Apinaromo. Nana, ka paku kōrero au e pā ana ki a Mōhia, kua whakakīngihia i runga i ngā whenua o Harahemera; nana rā, i whakatūpatoria ia e te Ariki kia rere atu i te whenua o Nīwhai, ā, me wehe tahi atu anō te hunga katoa e whakarongo ai ki te reo o te Ariki ki waho i te whenua, ki te koraha—

13 Ā, i pahawa ake, nā, ka rite tāna ki tā te Ariki i whakahau ai ki a ia. Ā, i wehe atu rātou ki waho i te whenua ki roto ki te koraha, ko te hunga katoa e whakarongo ai ki te reo o te Ariki; ā, i ārahina rātou e ngā kauhautanga maha me ngā poropititanga maha. Ā, i whakaakona tonutia rātou e te kupu a te Atua; ā, i ārahina rātou e te kaha o tana ringa, mā roto i te koraha kia tae iho rātou ki roto i te whenua e huaina nei ko te whenua o Harahemera.

14 Ā, i rokohina atu e rātou tētahi iwi i karangatia nei ko te iwi o Harahemera. Nā, he nui te hari i waenganui i te iwi o Harahemera; ā, i tino hari nui anō hoki a Harahemera, nā te mea kua tukuna e te Ariki te iwi o Mōhia me ngā papa parāhe e mau nei ngā kōrero a ngā Hūrai.

15 Nana, i pahawa ake, nā, ka kite a Mōhia i haere mai ai te iwi o Harahemera i Hiruharama i te wā i kahakina hereheretia atu ai a Terekia, kīngi o Hura, ki Papurona.

16 Ā, i haere rātou i roto i te koraha, ā, ka whakawhitihia mai ngā wai nunui e te ringa o te Ariki, ki roto i te whenua i kitea ai rātou e Mōhia; ā, kua noho rātou i reira mai i taua wā ake.

17 Ā, i te wā i kitea rātou e Mōhia, kua tino tini noa atu rātou. Hei aha koa, kua maha ā rātou whawhai me ā rātou tautohetohe nanakia, ā, kua hingahinga hoki rātou i te hoari i tētahi wā, i tētahi wā; ā, kua whakatautauhea haeretia tō rātou reo; ā, kāore i mau mai i a rātou he tuhinga; ā, i whakakāhoretia e rātou te oranga o tō rātou Kaihanga; ā, kīhai a Mōhia, te iwi rānei o Mōhia, i mārama ki a rātou.

18 Engari i pahawa ake, nā, i mea a Mōhia kia whakaakona rātou i roto i tōna reo. Ā, i pahawa ake nō muri iho i tā rātou whakaakoranga i te reo o Mōhia, ka tākina e Harahemera ngā whakapapa o ōna matua, e ai ki ōna mahara; ā, kua tuhia ērā, engari kāore i roto i ēnei papa.

19 Ā, i pahawa ake, nā, ka whakakotahi te iwi o Harahemera me te iwi o Mōhia; ā, ka whakatūria a Mōhia hei kīngi mō rātou.

20 Ā, i pahawa ake i ngā rā o Mōhia, i mauria mai tētahi kōhatu nui ki a ia e mau nei ngā whaowhaonga i runga; ā, nāna ngā whaowhaonga i whakamāori i runga i te homaitanga me te mana o te Atua.

21 Ā, i tākina e rātou tētahi kōrero mō tētahi tangata ko Koriatuma, me te patunga o tōna iwi. Ā, i kitea a Koriatuma e te iwi o Harahemera; ā, ka noho tahi ia me rātou mō te takiwā o ngā marama e iwa.

22 I kōrero anō hoki i ētahi kupu ruarua e pā ana ki ōna tūpuna. Ā, i haere mai ōna mātua tuatahi i te pourewa, i te wā i whakapōauautia e te Ariki te reo o te iwi; ā, ka tau iho te riri a te Atua ki runga i a rātou e rite ana ki āna whakawākanga, koinā he mea tika; ā, e takoto mararatia ana ō rātou kōiwi i te whenua whakateraki.

23 Nana, ko au, ko Amareki, i whānau mai i ngā rā o Mōhia; ā, kua kite au i tōna matenga i ahau e ora ana; ā, ko Peniamine, tana tama, e noho ana hei whakakapi mōna.

24 Nana rā, kua kite au, i ngā rā o Peniamine, tētahi pakanga whakawehi, ā, he nui anō te whakahekenga toto i waenganui i ngā Nīwhai me ngā Rāmana. Engari nana, i whiwhi ngā Nīwhai i tētahi kaha nui ki runga i a rātou; āe rā, nā konā ka aia atu rātou e kīngi Peniamine ki waho i te whenua o Harahemera.

25 Ā, i pahawa ake, nā, ka koroheke haere ahau; ā, kāore kau noa ōku uri, me taku mōhio he tangata tika a kīngi Peniamine i te aroaro o te Atua, nā reira, māku ēnei papa e tuku ake ki a ia, e ākina ana ngā tāngata katoa kia haere mai ai ki te Atua, te Mea Tapu o Iharaira, me te whakapono ki ngā poropititanga, ki ngā whakakitenga hoki, ki te minitatanga a ngā anahera hoki, ki te takohatanga o te kōrero i ngā reo kē hoki, ki te takohatanga o te whakamāori i ngā reo hoki, ki ngā mea katoa e pai ana; nā te mea kua puta mai ngā mea pai katoa i te Ariki: ā, kua puta mai ngā mea kino i te rēwera.

26 Ināianei ā, e aku teina aroha, e hiahia ana ahau kia haere mai ai koutou ki te Karaiti, koia te Mea Tapu o Iharaira, me te whakapā atu ki tōna whakaoranga, me te kaha o tōna hokonga. Āe rā, haere mai ki a ia me te tāpae atu i ō koutou wairua katoa ki a ia, me te ū tonu i te nohopuku me te inoi, me te ū ki te mutunga; ā, e ora ana te Ariki, ka whakaorangia koutou.

27 Ināianei ā, e hiahia ana ahau ki te paku kōrero e pā ana ki tētahi hunga i haere ake ki roto i te koraha kia hoki atu ai ki te whenua o Nīwhai; nā te mea he tokomaha rawa i hiahia ki te whakanoho i tō rātou whenua tuku iho.

28 Nā reira, i haere ake rātou ki roto i te koraha. Ā, ko tō rātou kaiwhakahaere tētahi tangata kaha, ā, he tangata kakī mārō, nā reira ia i whakatupu i tētahi ngangaretanga i waenganui i a rātou; ā, ka whakamatea katoatia rātou, atu i ngā mea rima tekau, i te koraha, ā, ka hoki atu anō rātou ki te whenua o Harahemera.

29 Ā, i pahawa ake, nā, ka kawea atu e rātou ētahi atu hunga tokomaha, ā, ka haere atu anō rātou ki roto i te koraha.

30 Ā, he teina tāku, tā Amareki, i haere tahi anō ia me rātou; ā, kāore au i rongo nō muri mai e pā ana ki a rātou. Ā, whano au ka takoto iho i tōku rua tūpāpaku; ā, kua kī ēnei papa. Ā, ka whakamutu au i aku kōrero.