Ko te Pukapuka a Enoha

1 Nana, i pahawa ake, nāku, nā Enoha, e mōhio ana he tangata tika tōku matua—nā te mea i whakaako ia i a au e pā ana ki tōna reo, e pā ana anō hoki ki te poipoitanga me te whakatūpatoranga a te Ariki—ā, kia whakapaingia te ingoa o tōku Ariki—

2 Ā, māku e kōrero atu ki a koutou mō taku nonoke i te aroaro o te Atua, i mua i taku whiwhinga i tētahi murunga hara.

3 Nana, i haere au ki te aruaru kararehe mohoao i ngā ngahere; ā, ka tirehe hohonu iho ki roto i tōku ngākau ngā kupu i rongorongo ai au i kōrerotia ai e tōku matua e pā ana ki te oranga tonutanga, me te hunga tapu.

4 Ā, i hiakai tōku wairua; ā, ka tūturi iho au i te aroaro o tōku Kaihanga, ā, ka karanga ake ahau ki a ia i runga i te inoi kaha me te ngākau whakaiti mō toku ake wairua; ā, ka karanga ake ahau ki a ia mō te roanga katoa o te rā; āe rā, ā, tae rawa mai te pō ka ara tiketike tonu ake tōku reo, tae noa atu ki ngā rangi.

5 Ā, ka tau mai tētahi reo ki ahau, e mea ana: E Enoha, kua murua ō hara, ā, ka manaakitia koe.

6 Ā, i mōhio au, a Enoha, tē taea e te Atua te rūkahu; nā reira, kua tahia atu ōku kaniawhea.

7 Ā, ka kī au: E te Ariki, me pēhea te meatanga?

8 Ā, ka kī mai ia ki ahau: Nā tō whakapono ki a te Karaiti, ko ia kāore nei koe i rongo, i kite rānei i mua. Ā, ka pahure atu ngā tau maha i mua i tana whakakite i a ia anō i te kikokiko; nā reira, haere, kua mā koe i tō whakapono.

9 Ināianei, i pahawa ake, nā, i taku rongonga i ēnei kupu i anga taku hiahia mō te oranga o ōku huānga, ngā Nīwhai; nā reira, i poua iho tōku wairua katoa ki te Atua mō rātou.

10 Ā, i a au e ngangana pēnei ana i roto i te wairua, nana, ka tau mai anō te reo o te Ariki ki roto i tōku hinengaro, e mea ana: Ka toro atu au ki ō huānga e ai ki tō rātou ū ki te pupuri i aku whakahaunga. Nāku tēnei whenua i hoatu ai ki a rātou, ā, he whenua tapu ia; ā, kua kore ia e kangaia e au hāunga anake mō te hara; nā reira, ka toro atu au ki ō huānga e ai ki tāku i kī ai; ā, māku ō rātou hē e kukume iho i runga i te pōuri ki runga i ō rātou ake upoko.

11 Ā, i muri i tāku, tā Enoha, rongonga i ēnei kupu, ka meinga tōku whakapono i te Ariki kia tūoioi kore; ā, i inoi au ki a ia i runga i ngā ngangana roa maha mō ōku tuākana, ngā Rāmana.

12 Ā, i pahawa ake, nā, whai muri iho i taku inoitanga me taku mahinga i runga i te kaha nui, ka kī mai te Ariki ki ahau: Māku e tuku ki a koe e ai ki ōu hiahia, nā tōu whakapono.

13 Ā, nana ināianei, koinei te hiahia i hiahia ai au i a ia—nā, mēnā e tika ana, kia taka iho tōku iwi ngā Nīwhai ki roto i te hē, me whakangaro atu rānei i runga i tētahi āhuatanga, engari kāore ngā Rāmana e whakangaromia ai, nā, ka tiakina e te Ariki te Atua tētahi tuhinga e pā ana ki tōku iwi, ngā Nīwhai; ki te pērā rawa i runga i te kaha o tana ringa tapu, kia puta rawa mai hei tētahi rā anamata ki ngā Rāmana, nā, tērā pea, ka kukume mai rātou ki te whakaoranga—

14 Nā te mea auare ake ā mātou ngangana i tēnei wā ki te whakahoki i a rātou ki te whakapono tika. Ā, i oati ai rātou i runga i te riri, mēnā e taea ana, ka whakangaro rātou i ā mātou tuhinga, i a mātou hoki, me ngā tikanga katoa anō hoki a ō mātou tūpuna.

15 Nā reira, nā taku mōhio e taea ana e te Ariki te Atua te tiaki i ā mātou tuhinga, i karanga tonu au ki a ia, nā te mea i kī mai ia ki ahau: Ahakoa he aha te mea e tonoa ai e koe i runga i te ngākau whakapono, me te whakapono anō ka whiwhi koe i runga i te ingoa o Ihu Karaiti, ka whiwhi koe.

16 Ā, he whakapono tōku, ā, i karanga au ki te Atua māna ā mātou tuhinga e tiaki; ā, i kawenata ia ki ahau māna ērā e whakaputa mai ki ngā Rāmana a tōna ake wā e tika ana.

17 Ā, i mōhio ahau, a Enoha, ka rite ki te kawenata i kawenata ai ia; nā reira i tau tōku wairua.

18 Ā, i kī mai te Ariki ki ahau: I tono anō hoki ō mātua i tēnei mea ki ahau; ā, ka meatia ki a rātou e ai ki tō rātou whakapono; nā, i rite tō rātou whakapono ki tōu.

19 Ināianei ā, i pahawa ake nāku, nā Enoha, i haere atu ki waenganui i te iwi o Nīwhai, e poropiti ana i ngā mea e puta mai ai, me te whakaatu atu i ngā mea i rongo ai, i kite ai ahau.

20 Ā, e whakaatu ana ahau, nā, i ū te iwi o Nīwhai ki te whakahoki i ngā Rāmana ki te whakapono tika i te Atua. Engari auare ake ā mātou mahi; i te ū kaha tō rātou mauāhara, ā, i ārahina rātou e ō rātou hiahia kino nā konā rātou i mohoao ai, i horetītī ai, ā, he iwi hiakai ki te toto, e kikī ana i te karakia whakapakoko, i te poke hoki; e kai ana i ngā kararehe pārurenga; e noho tēneti ana, ā, e ātiutiu ana i te koraha e mau ana tētahi rāpaki kiri poto i ō rātou hope me ō rātou māhunga kua heua; e whai pūkenga ana rātou ki te kōpere, me te hemitā, me te toki. Ā, he tokomaha o rātou i kai anake i te kikokiko mata; ā, he rite tonu tā rātou whai ki te whakangaro i a mātou.

21 Ā, i pahawa ake, nā, i ngaki te iwi o Nīwhai i te whenua, ā, ka whakatupuria ngā momo kākano kai, ngā hua rākau, me ngā kāhui maha, me ngā kāhui kararehe kai pātītī o ia āhua, o ia āhua, ngā koati, me ngā koati mohoao, me ngā hōiho anō hoki.

22 Ā, he tokomaha rawa atu ngā poropiti i waenganui i a mātou. Ā, he tāngata kakī mārō te iwi, he uaua tā rātou mārama atu.

23 Ā, kāore he aha kē atu hāunga te pakeke nui o te kupu, te kauhautanga me te poropititanga mō ngā pakanga, me ngā tautohetohenga, me ngā whakangaromanga, me te whakamahara tonu i a rātou mō te mate, ā, mō te roanga atu o te wā mutunga kore, ā, mō ngā whakawākanga me te mana o te Atua, ā, koinei mea katoa—e whakaohooho tonu ana i a rātou kia mau tonu ai tō rātou wehi ki te Ariki. E kī ana au kāore i kō mai i ēnei mea, me te mārama nui o te kōrero, e aukati ai tā rātou whakangaromanga wawetanga iho. Ā, nō tēnei āhuatanga au e tuhituhi nei e pā ana ki a rātou.

24 Ā, i kite au i ngā pakanga i waenganui i ngā Nīwhai me ngā Rāmana i ōku rā.

25 Ā, i pahawa ake, nā, ka koroheke haere ahau, ā, kua pahure atu ngā tau e whitu tekau mā iwa mai i te wā i wehe atu ai tō tātou matua a Rīhai i Hiruharama.

26 Ā, i kite au meake heke iho au ki tōku rua tūpāpaku, kua mahia ake e te mana o te Atua kia kauhau ahau, kia poropiti ahau ki tēnei iwi, me te whakapuaki i te kupu e ai ki te pono kei roto nei i te Karaiti. Ā, nāku tērā i whakapuaki i ōku rā katoa, ā, kua harikoa i tērā i runga i tō te ao.

27 Ā, meake au haere ai ki te wāhi o tōku okiokinga, kei tōku Kaihoko; nā tēnā e mōhio nei au ka okioki au i roto i a ia. Ā, e hari ana au i te rā e kākahuria ai tōku ira tangata e te mate kore, me te tū i tōna aroaro; hei konā kite au i tōna mata i runga i te āhuareka, ā, ka mea mai ia ki ahau: Haere mai ki ahau, koutou kua manaakitia nei, kua whakaritea he wāhi mōu i roto i ngā whare nunui o tōku Matua. Āmine.