1 Ināianei ā, i pahawa ake i muri i te pahuretanga atu o ētahi tau, i haere mai tētahi tangata ki waenganui i te iwi o Nīwhai, ko tōna ingoa, ko Herema.

2 Ā, i pahawa ake, nā, i tīmata tana kauhau ki waenganui i te iwi, me te whakapuaki atu ki a rātou karekau tētahi Karaiti e puta mai. Ā, he maha ngā mea whakapatipati i kauhau ai ia ki te iwi; ā, i meatia tēnei e ia kia tūraki ai ia i te akoranga a te Karaiti.

3 Ā, i mahi ia i runga i te ngākau ū me kore pea ia e ārahi atu i ngā ngākau o te iwi, nā konei ia i ārahi atu i ngā ngākau maha; me tana mōhio anō ko au, a Hākopa, he mea whakapono i te Karaiti e haere mai ai, i kaha whai ia kia haere mai ai ia ki au.

4 Ā, he matatau ia, nā, he tino nui rawa atu tōna matatau ki te reo o te iwi; nā reira, i taea e ia te whakapatipati nui, ā, he kaha nui ki te kōrero, e ai ki te mana o te rēwera.

5 Ā, he manako nōna kia whakangāueuetia au i taku whakapono, ahakoa ngā whakakitenga maha me ngā mea maha i kitea ai au e pā ana ki ēnei mea; nā te mea i tino pono taku kitenga atu i ngā anahera, ā, kua minita mai rātou ki ahau. Waihoki, i rongo ahau i tō te Ariki reo e kōrero mai ana i ngā kupu katoa, mai i tētahi wā ki tētahi wā; nā reira, kua kore au e taea te whakangāueue.

6 Ā, i pahawa ake, nā, i haere mai ia ki ahau, ā, i runga i tēnei āhua i kōrero mai ai ia ki ahau, e mea ana: E te tuakana, e Hākopa, kua nui taku whai kia kōrero tahi ki a koe; nā te mea kua rongo au, ā, kua mōhio hoki au he nui tō hāereere, e kauhau ana i tāu e kī nei ko te rongopai, ko te akoranga rānei a te Karaiti.

7 Ā, kua ārahi atu koe i tētahi wāhi nui o te iwi, nā konā, e whakapeau ana rātou i te huarahi tika o te Atua, ā, kāore i te pupuri i te ture a Mohi koia nei te huarahi tika; ā, me te tīni i te ture a Mohi ki te koropikotanga atu i tētahi tangata e kīa ana e koe ka haere mai hei ngā rau tau maha noa atu i tēnei wā. Ā, nana ianei, ahau, a Herema, e whakapuaki atu ana ki a koe he mea teka tēnei; nā te mea kāore he tangata e mōhio ana ki ērā momo mea; nā te mea tē taea e ia te kōrero mō ngā mea ka puta mai. Ā, nō tēnei āhuatanga i tohetohe mai a Herema ki ahau.

8 Engari nana, i maringi iho te Ariki te Atua i tōna Wairua ki roto i tōku wairua, nā konei rā i whakapōauautia ia e ahau i roto i ana kupu katoa.

9 Ā, ka kī atu au ki a ia: E whakaparahako ana rānei koe i te Karaiti koia ka haere mai? Ā, ka kī ia: Mēnā he Karaiti, kua kore au e whakaparahako i a ia; engari kei te mōhio au karekau he Karaiti, kīhai i mua, kāore rānei a muri.

10 Ā, nāku i kī atu ki a ia: E whakapono ana rānei koe i ngā karaipiture? Ā, ka kī ia, Āe rā.

11 Ā, i kī atu au ki a ia: Ki te pērā, kāore koe i te mārama ki ērā; nā te mea e whakaatu pono nei ērā mō te Karaiti. Nana, ko tāku ki a koe kāore tētahi poropiti kia tuhituhi, kia poropiti rānei, hāunga tā rātou kōrero e pā ana ki tēnei Karaiti.

12 Ā, ehara tēnei i te katoa—kua whakakitea mai tēnei ki ahau, nā te mea kua rongo, ā, kua kite au; ā, kua whakakitea mai anō hoki ki ahau e te mana o te Wairua Tapu; nā reira, e mōhio ana ahau ki te kore tētahi whakamārietanga e meatia ai kua ngaro ngā tāngata katoa.

13 Ā, i pahawa ake, nā, i kī mai ia ki ahau: Whakaatuhia mai ki ahau tētahi tohu nā runga i tēnei mana nō te Wairua Tapu, nōna nei koe e matatau rawa nei.

14 Ā, i kī atu ahau ki a ia: He aha kē ahau te whakamātau i te Atua kia whakaatuhia atu ki a koe tētahi tohu mō tētahi mea e mōhio ana koe he pono? Heoi ka whakaparahako koe i tēnā, nā te mea nō te rēwera koe. Hei aha koa, ehara tōku e meatia ai; engari mēnā ka patua koe e te Atua, me waiho tēnā hei tohu ki a koe, nā, he mana tōna, i te rangi me te whenua; waihoki, ka tae mai te Karaiti. Ā, ko tōu hiahia, E te Ariki, e meatia ai, ehara ko tōku.

15 Ā, i pahawa ake, i te wā nāku, nā Hākopa, i kōrero atu ēnei kupu, ka tau iho te mana o te Ariki ki runga i a ia, nā konei ka hinga iho ia ki te whenua. Ā, i pahawa ake, nā, i whāngaia ia mō te takiwā o ngā rā maha.

16 Ā, i pahawa ake, nā, i kī atu ia ki te iwi: Whakaminemine mai āpōpō, nā te mea ka mate ahau; nā reira, kei te hiahia ahau ki te kōrero atu ki te iwi i mua i taku matenga.

17 Ā, i pahawa ake, nā, i te aonga ake o te rā i whakaminemine tahi mai te tini; ā, i kōrero atu ia ki a rātou i runga i te mārama nui, ā, i whakaparahakotia ngā mea i whakaakona rātou e ia, ā, i whākina te Karaiti, me te mana o te Wairua Tapu, me te minitatanga o ngā anahera.

18 Ā, i mārama tana kōrero ki a rātou, nā, kua māmingatia ia e te mana o te rēwera. Ā, i kōrero ia mō te ao rēwera, mō te wā mutunga kore anō hoki, mō te whakawhiunga mutunga kore anō hoki.

19 Ā, i kī ia: E wehi ana au kua hara pea ahau i te hara tē taea te muru, nā te mea kua rūkahu atu au ki te Atua; nā te mea kua whakaparahako au i te Karaiti, ā, i kī au kua whakapono au i ngā karaipiture; ā, e whakaatu pono nei ērā mōna. Ā, mōku i rūkahu pēnei ki te Atua, e wehi nui ana au kua kino rawa taku tukunga ihotanga; engari kei te whāki atu au ki te Atua.

20 Ā, i pahawa ake, nā, i te wā i kōrero ai ia i ēnei kupu kāore he kupu atu anō i taea te kōrero, ā, i tukuna atu tōna wairua.

21 Ā, i te wā i kitea e te tini ēnei mea i kōrerotia ai e ia nōna ka tata tukuna atu tōna wairua, ka tino mīharo nui rātou; nā konei rā te mana o te Atua i tau iho ai ki runga i a rātou, ā, i warea rātou, nā, ka hinga iho rātou ki te whenua.

22 Ināianei, i āhuareka tēnei ki ahau, a Hākopa, nā, i inoia tēnei e ahau ki tōku Matua i te Rangi; nā, i rongo ia i tōku tangi, ā, i whakautua tōku inoi.

23 Ā, i pahawa ake, nā, i whakahokia anōtia te rangimārie me te aroha o te Atua ki waenganui i te iwi; ā, i rangahaua ngā karaipiture, ā, kāore i whakarongo tonu ki ngā kupu a tēnei tangata kino.

24 Ā, i pahawa ake, nā, he maha ngā mea i whakaarotia ai kia whakamau anō me te whakahoki i ngā Rāmana ki te mātauranga o te pono; engari auare ake, nā te mea i āhuareka ngā pakanga me te whakahekenga toto ki a rātou, ā, he mauāhara mutunga kore tō rātou ki a mātou, ā rātou teina. Ā, whai ai rātou i runga i te kaha o ā rātou mea whawhai ki te whakangaro i a mātou.

25 Nā reira, i whakapūioio te iwi o Nīwhai ki a rātou nā runga i ā rātou mea whawhai, me tō rātou kaha katoa, e whakawhirinaki ana i te Atua te toka o tō rātou whakaoranga; nā reira, i meinga nei rātou, ko ngā kairaupatu i runga i ō rātou hoariri.

26 Ā, i pahawa ake nāku, nā Hākopa, ka koroheke haere; ā, ko te tuhinga o tēnei iwi e mau ana i runga i ērā atu papa a Nīwhai, nā reira, e whakakapi ana au i tēnei tuhinga, e whakapuaki ana kua tuhituhi au i runga i te tiketiketanga o tōku mōhioranga, mā te kōrerotanga atu, nā, kua pahure atu te wā me tātou, ā, i pahure atu anō ō tātou oranga anō nei he moemoeā ia, ko tātou tētahi iwi mokemoke, ā, he iwi whakaaro tika, he kaewa, kua panaia atu i Hiruharama, i whānau mai ai ki roto i te whakamamaetanga, i roto i te koraha, ā, kua mauāharatia e ō tātou tuākana, kua whakatupungia ngā pakanga me ngā tautohetohenga; nā reira, i pau katoa ō mātou rā i te tangihanga.

27 Ā, nāku, nā Hākopa, i kite au meake nei ka heke iho ki tōku rua tūpāpaku; nā reira, i kī atu au ki taku tama a Enoha: Tīkina ēnei papa. Ā, i kōrero atu au i ngā mea i whakahaua ahau e tōku tuakana a Nīwhai, ā, i whakaae pono mai ia ka whakarongo ki ngā whakahaunga. Ā, ka whakakapi au i aku tuhinga i runga i ēnei papa, ko ngā tuhinga nei he mea iti; ā, hei konei rā e te kaipānui, e manako ana ka tokomaha aku huānga e pānui ai i aku kupu. E ngā huānga, atiu.