1 Engari nana, ko tāku, tā Hākopa, e hiahia ana ki te kōrero atu ki a koutou te hunga e ngākau urutapu ana. Titiro atu ki te Atua i runga i te hinengaro ū, me te inoi atu ki a ia i runga i te whakapono nui, ā, māna koutou e whakaāio i roto i ō koutou mamaetanga, ā, māna tō koutou whakawākanga e tohe atu, ka whakatau iho hoki i te mea tika ki runga i te hunga e whai ana i tō koutou whakangaromanga.

2 E koutou, te hunga e ngākau urutapu ana, kia ara ake ō koutou māhunga me te whiwhi i te kupu āhuareka a te Atua, me te hākari i tōna aroha; nā te mea e pai ana mō koutou, mehemea e ū ana ō koutou hinengaro, āke tonu atu.

3 Engari, auē, auē, mō koutou kāore nei i te ngākau urutapu, nā, e pokea ana i te aroaro o te Atua i tēnei rā; nō te mea ki te kore koutou e rīpenetā ka kangaia te whenua mō koutou; ā, ko ngā Rāmana, kāore nei i te pokea pērā me koutou, hei ahakoa kua kangaia rātou ki tētahi kanga mamae, ka whiua koutou tae atu anō ki te whakangaromanga.

4 Ā, e wawe mai ana te wā, nā, ki te kore koutou e rīpenetā ka riro i a rātou te whenua o ō koutou tuku ihotanga, ā, ka ārahina atu e te Ariki te Atua te hunga tika i waenganui i a koutou.

5 Nana, ko ō koutou tuākana ko ngā Rāmana, e mauāharatia ana e koutou nā tō rātou pokenga me taua kanga kua tau ki runga i ō rātou kiri, he tika ake rātou i a koutou; nā te mea kāore rātou i wareware ki te whakahaunga a te Ariki, kua homai nei ki tō tātou matua—kia kaua e tokomaha ake i te hoa wahine kotahi, ā, kua kore ā rātou hoa wahine tūtūā, ā, kua kore tētahi mahinga pūremu e mahia ai i waenganui i a rātou.

6 Ināianei ā, e puritia ana e rātou tēnei whakahaunga; nā reira, nā tēnei tirohanga, i te puritanga i tēnei whakahaunga, kāore te Ariki te Atua e whakangaro i a rātou, engari ka whakaaroha ki a rātou; ā, ka meinga rātou he iwi manaakitia hei tōna rā.

7 Nana, e aroha ana ā rātou hoa tāne i ā rātou hoa wāhine, ā, e aroha ana ā rātou hoa wāhine i ā rātou hoa tāne; ā, e aroha ana ā rātou hoa tāne me ā rātou hoa wāhine i ā rātou tamariki; ā, nō ngā hē o ō rātou mātua tō rātou mauāhara ki a koutou; nā reira, he pēhea ake te nui o tō koutou pai i tō rātou, i te tirohanga a tō koutou Kaihanga?

8 E aku teina, e wehi ana ahau, nā, ki te kore koutou e rīpenetā i ō koutou hara ka mā ake ō rātou kiri i ō koutou, ina kumea tahitia koutou me rātou ki te aroaro o te torōna o te Atua.

9 Nā reira, e hoatu nei e ahau tētahi whakahaunga ki a koutou, koia te kupu a te Atua, kia kaua tonu koutou e taunu i a rātou nā te kerekere o ō rātou kiri; kaua rānei koutou e taunu i a rātou nā tō rātou pokenga; engari ka mahara koutou i tō koutou ake pokenga, me te mahara, nā ō rātou mātua tō rātou pokenga i tau ai.

10 Nā reira, ka mahara koutou i ā koutou tamariki, anō tā koutou whakapōuri i ō rātou ngākau nā tā koutou tauira i whakatauirahia ai e koutou i mua i a rātou; hei āpiti, kia mahara, mā koutou pea, nā tō koutou pokenga, ā koutou tamariki e kukume iho ki te whakangaromanga, ā, ka pūrangatia ō rātou hara ki runga i ō koutou māhunga hei te rā whakamutunga.

11 E aku teina, whakarongo ki aku kupu; whakaohokia ngā kaha o ō koutou wairua; whakaoioia koutou e koutou anō kia ara ake koutou i te moe o te mate; ā, wetekina koutou i ngā whakamamaetanga o te ao rēwera kia kaua e meinga hei anahera ki te rēwera, kia makaia ki roto i te roto ahi whānāriki, koia ko te matenga tuarua.

12 Ināianei ā, nāku, nā Hākopa, i kōrero atu anō i ngā mea maha ki te iwi o Nīwhai, e whakatūpatoria ana rātou mō te mahi pūremu me te mahi tūkari, me ngā tūmomo hara katoa, e kōrerohia atu ana ki a rātou te tukunga ihotanga whakarihariha o aua mea.

13 Ā, ko te wāhi whakaterau o ngā whakahaeretanga o tēnei iwi, koia kua anga tokomaha haere ināianei, kāore e taea ana te tuhituhi ki runga i ēnei papa; engari, kua tuhia atu anō ā rātou whakahaeretanga ki runga i ngā papa nui, me ō rātou pakanga, me ā rātou tautohetohenga, me ngā whakahaeretanga a ō rātou kīngi.

14 Kua huaina ēnei papa ko ngā papa a Hākopa, ā, i hangaia e te ringa o Nīwhai. Ā, ka whakamutu ahau i taku kōrero i ēnei kupu.