1 Ko ngā kupu nā Hākopa, te teina a Nīwhai, i kōrero atu ai ki te iwi o Nīwhai, whai muri iho i te matenga o Nīwhai:

2 Ināianei, e aku teina aroha, ko ahau, ko Hākopa, e ai ki te haepapa kei runga i ahau hei mahi māku ki te Atua, kia whakanuia ai tōku tūranga i runga i te whakaaro nui, ā, kia wātea ai ōku kākahu i ō koutou hara, ka kuhu ake au ki roto i te temepara i tēnei rā ki te whakapuaki atu i te kupu a te Atua ki a koutou.

3 Ā, e mōhio ana koutou anō kua ū ahau tae noa mai ki tēnei wā i te tūranga o tōku karangatanga; engari, i tēnei rā tonu, kei te pēhia iho au e te hiahia nui rawa me te mānukanuka mō te painga o ō koutou wairua, he mea nui ake i ō ngā wā o mua, tae noa mai ki tēnei wā.

4 Nana rā, hei a mohoā noa nei, kua ngohengohe koutou ki te kupu a te Ariki, kua hoatu nei e au ki a koutou.

5 Engari nana, whakarongo mai koutou ki ahau, me te mōhio mā te āwhina a te Kaihanga kaha-katoa o te rangi me te whenua e taea ana e au te kōrero atu ki a koe e pā ana ki ō koutou whakaaro, mō tā koutou tīmata ki te mahi hara, he tino mōrikarika nei te āhuatanga o te hara ki ahau, āe rā, he mōrikarika anō ki te Atua.

6 Āe rā, e whakapōurihia ana e ia tōku wairua, ā, i mea ai kia memenge ai ahau i te aroaro o tōku Kaihanga, kia whakaatu atu au ki a koutou e pā ana ki te whakarihariha o ō koutou ngākau.

7 Waihoki, e whakapōurihia ana ahau e ia, nā, me māia rawa taku kōrerotanga atu e pā ana ki a koutou, i te aroaro o ā koutou wahine me ā koutou tamariki, he tokomaha nei o rātou e tino ngāwari ana, ā, e tino hē kore ana, ā, e tūoi ana ō rātou kare ā-roto i mua i te Atua, he mea āhuareka tēnā ki te Atua;

8 Ā, ki aku whakaaro kua haere mai rātou ki runga nei ki te whakarongo ki te kupu āhuareka a te Atua, āe rā, ko te kupu e mahu ai i te wairua mamae.

9 Nā reira, he mea taumaha ki tōku wairua kia meinga rawatia ai au, nā te whakahau uaua kua whiwhi nei au i te Atua, kia whakatūpatoria koutou e ai ki ā koutou taihara, hei whakanui i ngā tūnga o te hunga kua taotū kē, e mahue ana te whakamārie me te mahu i ō rātou tūnga; ā, ko te hunga kāore i taotūhia, mahue te hākari i te kupu whakaāhuareka a te Atua, he oka kē i konā e wero ana i ō rātou ngākau me te taotū i ō rātou hinengaro tūoi.

10 Engari, ahakoa te nui o te mahi, me mahi au e ai ki ngā whakahau uaua a te Atua, me te kōrero atu ki a koutou mō ā koutou whakariharihatanga me ā koutou mōrikarikatanga, i te aroaro o te hunga ngākau urutapu, me te hunga ngākau marū, i raro anō hoki i te tirohanga o te karu wewero o te Atua Kaha Rawa.

11 Nā reira, me kōrero atu e ahau ki a koutou te pono e ai ki te māramatanga o te kupu a te Atua. Nana rā, i a au e inoi ana ki te Ariki, he pēnei mai te kupu ki ahau, e mea ana: E Hākopa, me haere ake koe ki te temepara hei āpōpō, ā, whakapuakina ki tēnei iwi te kupu e hoatu ai e au ki a koe.

12 Ā nana ināianei, e aku teina, koinei te kupu e whakapuaki atu nei au ki a koutou, nā, he tokomaha koutou kua tīmata ki te kimi atu i te kōura, i te hiriwā, me ngā tūmomo oa utu nui katoa, koia rā hoki tēnei whenua, he whenua whakaari ki a koutou me ō koutou uri, e ranea nuitia ana.

13 Ā, kua āhuareka te menemenetanga iho o te ringa whakarawe ki runga i a koutou, nā, kua riro i a koutou ngā taonga maha; ā, nā te mea kua nui ake ō ētahi ō koutou rironga i ō ētahi atu o ā koutou teina, kua neke ake koutou i runga i te whakapehapeha o ō koutou ngākau, ā, he kakī mārō, ā, he māhunga tiketike nā te utu nui o ō koutou kākahu, ā, e whakatoi ana koutou i ā koutou teina nā tō koutou whakaaro he pai ake koutou i a rātou.

14 Ināianei ā, e aku teina, e whakaaro ana koutou ka parahau te Atua i a koutou i roto i tēnei mea? Nana, ko tāku ki a koutou, Kāo. Engari e whakahē ana ia i a koutou, ā, mēnā ka ū tonu atu i ēnei mea ka tau wawe mai āna whakawākanga ki runga i a koutou.

15 Auē kia whakaatu ia ki a koutou e taea ana e ia te wero i a koutou, ā, i te tirohanga kotahi o tana karu ka patua koutou ki te puehu!

16 Auē kia wātea ia i a koutou mai i tēnei hara me tēnei mōrikarika. Ā, Auē kia whakarongo koutou ki te kupu o āna whakahaunga, ā, kia kaua e tukuna tēnei whakapehapeha o ō koutou ngākau e whakangaro ai i ō koutou wairua!

17 Whakaarohia atu ā koutou teina kia rite ki a koutou, ā, me whakahoahoa atu ki te katoa, ā, kia kaua e kaiponuhia ō koutou rawa, kia whairawa anō ai rātou pērā i a koutou.

18 Engari i mua i tā koutou whai atu i te taonga, whaia e koutou te kīngitanga o te Atua.

19 Ā, hei muri iho i tō koutou whiwhinga i tētahi tūmanako i roto i te Karaiti ka whiwhi taonga koutou, mehemea ka whai atu koe i ēnā; ā, ka whai atu koe i ēnā i runga i te hiahia kia mahi pai—kia whakakākahuria te hunga tahanga, me te whāngai i te hunga hiakai, me te whakaora i te herehere, me te tautoko i te hunga tūroro me te hunga e mamae ana.

20 Ināianei ā, e aku teina, kua kōrero atu au ki a koutou e pā ana ki te whakapehapeha; ā, ki a koutou hoki kua whakamamaetia ō koutou hoa nohotata, ā, kua whakahāweatia ia nā te whakapehapeha i roto i ō koutou ngākau, i runga i ngā mea kua homai nei e te Atua ki a koutou, he aha tā koutou mō tēnei?

21 Kāore nei koutou i te whakaaro he mea mōrikarika aua tū mea ki a ia nāna nei ngā kikokiko katoa i hanga? Ā, he ōrite te utu mō tētahi tangata ki tētahi atu i tana titiro. Ā, nō te puehu ngā kikokiko katoa; ā, mō te tikanga kotahi i hangaia ai rātou e ia, kia pupuri rātou i āna whakahaunga me te whakakorōriatia ia mō āke tonu atu.

22 Ināianei ā, ka whakamutu au i taku kōrero e pā ana ki te whakapehapeha. Ā, me i kore he tikanga kia kōrero atu ai au ki a koutou e pā ana ki tētahi taihara kino ake, kua harikoa rawa taku ngākau mō koutou.

23 Engari e taimaha ana au i te kupu a te Atua nā ō koutou taihara kino ake. Nana rā, ko te kupu tēnei a te Ariki: E anga ana tēnei iwi ki te tupu i te kino; kāore rātou i te mārama ki ngā karaipiture, nā te mea e whai ana rātou kia whakawātea i a rātou anō mō ā rātou mahi pūremu, nā ngā mea i tuhia ai e pā ana ki a Rāwiri, me tana tama a Horomona.

24 Nana, he tokomaha mārika ngā hoa wahine me ngā hoa wahine tūtūā ā Rāwiri rāua ko Horomona, he mea mōrikarika i tōku aroaro, e ai tā te Ariki.

25 Nā reira, ko te kupu tēnei a te Ariki, kua ārahina tēnei iwi e ahau ki waho i te whenua o Hiruharama, nā runga i te kaha o tōku ringa, kia whakatupuria ai e ahau he manga tika nō ngā hua o ngā hope o Hōhepa.

26 Nā reira, kua kore tēnei iwi e tukuna e au, e te Ariki te Atua kia pērā ki a rātou o nehe.

27 Nā reira, e aku teina, whakarongo mai ki ahau, me te āta whakarongo mai ki te kupu a te Ariki: Nā, kua kore tētahi tāne i waenganui i a koutou e tokomaha ake nei i te hoa wahine kotahi; ā, kua kore āna hoa wahine tūtūā;

28 Nā te mea au, te Ariki te Atua, e āhuareka ana ki te tapunga o te tīnana o ngā wāhine. Ā, he mōrikarika ngā pūremu i tōku aroaro; e ai tā te Ariki o ngā Mano.

29 Nā reira, ka pupuri tēnei iwi i aku whakahaunga, e ai tā te Ariki o ngā Mano, ka kangaia rānei te whenua mō rātou.

30 Nā te mea ki te hiahia ahau, e ai tā te Ariki o ngā Mano, ki te whakatupu uri ki ahau, ka whakahau au i tōku iwi; ā, ki te kore ka āta whakarongo kē atu rātou ki ēnei mea.

31 Nana rā, nāku, nā te Ariki te pōuri i kite, ā, kua rangona ngā tangi a ngā tamāhine o tōku iwi i te whenua o Hiruharama, āe rā, i ngā whenua katoa o tōku iwi, nā te whakarihariha me ngā mōrikarika o ā rātou hoa tāne.

32 Ā, kua kore au e tuku, e ai tā te Ariki o ngā Mano, nā, ko ngā tangi a ngā tamāhine ātaahua o tēnei iwi, kua ārahina e au ki waho i te whenua o Hiruharama, ka ara ake ki ahau hei tauaro ki ngā tāne o tōku iwi, e ai tā te Ariki o ngā Mano.

33 Nā te mea e kore rātou e ārahi herehere atu i ngā tamāhine o tōku iwi nā tō rātou hūmārietanga, hāunga taku toro atu ki a rātou me tētahi kanga mamae, tae atu pū anō ki te whakangaromanga; nā te mea e kore rātou e mahi pūremu, kia pērā ki a rātou o nehe, e ai tā te Ariki o ngā Mano.

34 Ā nana ināianei, e aku teina, e mōhio ana koutou kua homai ēnei whakahaunga e tō tātou matua, a Rīhai; nā reira, kua mōhio koutou ki ēnā i mua; ā, kua tae koutou ki te whakahēnga nuitanga; nā te mea kua mahia e koutou ēnei mea kāore e tika ana kia mahia e koutou.

35 Nana, kua nui ake ā koutou mahi kino i ā ngā Rāmana, ō tātou tuākana. Kua whatia e koutou ngā ngākau mārie o ā koutou hoa wahine, ā, kua ngaro i a koutou te whakapono o ā koutou tamariki, nā ā koutou tauira kino i mua i a rātou; ā, e kake ake ana a rātou tangi hotuhotu o ō rātou ngākau ki te Atua hei whakahē i a koutou. Ā, nā te uaua o te kupu a te Atua, e tau iho ana ki runga i a koutou, i mate ai ngā ngākau maha, i ngoto ai ki ngā taotūnga hōhonu.