1 Ināianei ā, nana, e aku teina, he pērā ki tāku i kī ai ki a koutou ka poropiti au, nana, koinei taku poropititanga—nā, ko ngā mea i kōrerotia ai e te poropiti a Henohi, e pā ana ki te whare o Iharaira, i konā ia i whakatauritetia ai rātou ki tētahi rākau ōriwa whakatupu, me pahawa rawa ake.

2 Ā, ko te rā māna anō tana ringa e whakatau iho mō te wā tuarua ki te whakahoki i tana iwi, koia te rā, āe rā, ko te wā whakamutunga pū anō, e haere atu ai ngā pononga a te Ariki i runga i tōna mana, kia whāngai me te tapatapahi i tōna māra wāina; ā, hei muri atu i tēnā meake tae mai te mutunga.

3 Ā, anō te nui o te manaaki i te hunga kua ū ki te mahi i roto i tana māra wāina; ā, anō te nui o te kanga ki runga i te hunga ka makaia atu ki roto i tō rātou ake wāhi! Ā, ka tahuna te ao ki te ahi.

4 Ā, anō te nui o te whakaaroha o tō tātou Atua ki a tātou, nā te mea e mahara nei ia i te whare o Iharaira, pakiaka mai, manga mai; ā, e toro atu ana ia i ōna ringa mō te roanga atu o te rā; ā, he iwi kakī mārō, he iwi upoko mārō hoki; engari ko te hunga kāore nei e whakapakeke i ō rātou ngākau ka whakaorangia i roto i te kīngitanga o te Atua.

5 Nā reira, e aku teina aroha, e inoi atu ana au ki a koutou i runga i te whai whakaaro kia rīpenetā ai koutou, ā, kia haere mai i runga i te ngākau tino ū, me te piri ki te Atua e pērā ana ki tana piritanga ki a koe. Ā, i tōna ringa tohu e torona atu ana ki a koe i te mārama o te rā, kaua e whakapakeke i ō koutou ngākau.

6 Āe rā, i tēnei rā, ki te whakarongo koutou ki tōna reo, kaua e whakapakeke i ō koutou ngākau; nā, he aha koutou e mate ai?

7 Nana rā, hei muri i tāu whāngaitanga e te kupu pai a te Atua mō te roanga o te rā, ka hua mai koutou i ngā hua kino, kia tuakina iho koutou ki raro me te makaia iho ki roto i te ahi?

8 Nana, ka whakaparahako rānei koutou i ēnei kupu? Ka whakaparahako rānei koutou i ngā kupu a ngā poropiti; ā, ka whakaparahako hoki koutou i ngā kupu katoa e pā ana ki te Karaiti, nō muri i ngā mea tokomaha kua kōrerotia e pā ana ki a ia; me te whakaparahako i te kupu pai a te Karaiti, me te mana o te Atua, me te tākohatanga o te Wairua Tapu, me te aukati i te awenga o te Wairua Tapu, me te taunu i te mahere nui o te hokonga, kua whakatakotoria mō koutou?

9 Kāore rānei koutou e mōhio ana mēnā ka mahi koutou i ēnei mea, nā, ko te kaha o te hokonga me te aranga, koia i roto nei i te Karaiti, e kūmea mai ai koutou kia tū ai i runga i te whakamā me te kaniawhea nui i mua i te nohonga whakawā o te Atua?

10 Ā, e ai ki te kaha o te tika, nā, kāore te tika e taea te whakaparahako, me haere atu koutou ki roto i tērā roto ahi whānāriki, ko ōna muramura kāore e taea nei te tinei, ā, ko tōna auahi e kake ake ana mō āke tonu atu, ko taua roto ahi whānāriki nei, ko te whakamamaetanga mutunga kore.

11 Nō konei, e aku teina aroha, e rīpenetā koutou, me te kuhu atu ki roto i te kūaha tōtika, me te haere i te ara e whāiti nei, tae atu ana ki tō koutou whiwhi i te oranga tonutanga.

12 E, kia whai whakaaro; he aha kē atu anō tāku?

13 Hei whakakapinga, e poroporoaki nei au ki a koutou, kia tae ki te wā e tūtaki anō ai au ki a koutou i te nohonga whakawā āhuareka o te Atua, ko taua nohonga e whakapāngia ai te hunga kino ki te mataku nui me te wehi nui. Āmine.