Ko te Pukapuka a Hākopa
te Teina a Nīwhai

1 Nana rā, i pahawa ake te pahuretanga atu i ngā tau e rima tekau mā rima mai i te wā i wehe atu ai a Rīhai i Hiruharama; nā reira, i homai e Nīwhai ki ahau, a Hākopa, tētahi whakahaunga e pā ana ki ngā papa iti, kua whaowhaoa ēnei mea i runga rā.

2 Ā, i homai e ia ki ahau, a Hākopa, tētahi whakahaunga kia tuhi ai au i ētahi mea ruarua i runga i ngā papa iti e whakaarohia ana e au he mea tino utu nui; kia kaua au e pā atu, hāunga he mea pakupaku noa, e pā ana ki te hītori o tēnei iwi kua huaina nei ko te iwi o Nīwhai.

3 Nā te mea i kī ai ia me whaowhao te hītori o tana iwi ki runga i ērā atu o ana papa, ā, kia tiaki ai au i ēnei papa me te tuku iho i ēnā ki ōna uri, mai i tētahi whakatipuranga ki tētahi whakatipuranga.

4 Ā, mehemea he kauhautanga e tapu ana, he whakakitenga rānei e nui ana, he poropititanga rānei, kia whaowhaoa ngā upoko o ēnā e au ki runga i ēnei papa, me te whakapā atu i ēnā e ai ki tāku e taea ai, hei painga mō te Karaiti, ā, hei painga mō tō mātou iwi.

5 Nā, nā te whakapono me te mānukanuka nui, i tino whakakitea mai ki a mātou e pā ana ki tō mātou iwi, he aha ngā mea e pā ai ki a rātou.

6 Ā, i nui anō ō mātou whakakitenga, me te wairua o te poropititanga nui; nā reira, i mātau mātou ki a te Karaiti me tōna kīngitanga, e haere mai nei.

7 Nā reira i kaha tā mātou mahi i waenganui i tō mātou iwi, kia whakapakepake ai mātou i a rātou kia whakatata mai ki te Karaiti, me te tango atu i te painga o te Atua, kia kuhu atu ai rātou ki roto i tōna okiokinga, kei noho kau noa ia e oati ai i runga i tōna riri kia kaua rātou e kuhu ai ki roto, pēnā i te whakapātaritanga i roto i ngā rā whakawai i ngā tamariki a Iharaira e noho ana i te koraha.

8 Nā reira, ko tā māua inoi ki te Atua kia whakapakepake māua i ngā tāngata katoa kia kaua e haututū ki te Atua, kia whakapātarihia ai ia kia riri ai, engari kia whakapono mai ai ngā tāngata katoa i te Karaiti, ā, kia tirohia tōna matenga, ā, kia mamae i tōna rīpeka me te waha i te whakamā o te ao; nā reira, nāku, nā Hākopa, i tikina atu ai i runga i ahau kia whakatutukihia ai te whakahau a tōku tuakana a Nīwhai.

9 Ināianei ā, ka koroheke haere a Nīwhai, ā, ka kite ia ākuanei mate ai ia; nā reira, i whakawāhia he tangata hei kīngi mō runga i tōna iwi i tēnei wā, e ai ki ngā whakahaeretanga a ngā kīngi.

10 Kua arohaina rawatia a Nīwhai e te iwi, kua tū ia hei kaitiaki nui mō rātou, kua hāpaingia e ia te hoari o Rāpana hei tiaki i a rātou, ā, kua mahia e ia hei painga mō rātou i ōna rā katoa—

11 Nā reira, i te hiahia te iwi kia mau tonu i a rātou tōna ingoa i runga i te whakamaumaharatanga. Ā, ka whakahuatia te tangata e whakahaere ai i tōna tūranga e te iwi, ko Nīwhai tuarua, ko Nīwhai tuatoru, ā, haere ake nei, e ai ki ngā whakahaeretanga a ngā kīngi; ā, i pēneitia tā te iwi karanga ki a rātou, ahakoa he aha kē atu ō rātou ingoa.

12 Ā, i pahawa ake, nā, i mate a Nīwhai.

13 Ināianei, ko te hunga ehara nei i ngā Rāmana he Nīwhai; hei aha koa, kua huaina rātou ko ngā Nīwhai, ko ngā Hākopa, ko ngā Hōhepa, ko ngā Hōrama, ko ngā Rāmana, ko ngā Remuere, me ngā Ihimaera.

14 Engari māku, mā Hākopa, e kore nei e karanga i a rātou ki ēnei ingoa ā muri ake nei, engari ka karangatia rātou e au ko ngā Rāmana, nā, ko te hunga e whai ana ki te whakangaro i te iwi o Nīwhai, ā, ka karangatia e au te hunga e pai ana ki a Nīwhai ko ngā Nīwhai, ko te iwi rānei o Nīwhai, e ai ki ngā whakahaeretanga a ngā kīngi.

15 Ināianei ā, i pahawa ake, nā, ko te iwi o Nīwhai, i raro iho i te whakahaere o te kīngi tuarua, i tīmata te pakeke haeretanga i roto i ō rātou ngākau, me te āhua torotoro atu rātou ki ngā mahinga whakarihariha, e pērā ana ki a Rāwiri onamata e hiahia ana ki ngā hoa wahine me ngā hoa wahine tūtūā tokomaha, me Horomona anō hoki, tana tama.

16 Āe rā, i tīmata anō hoki rātou ki te rapurapu i ngā kōura me ngā hiriwā maha, ā, ka āhua tīmata tā rātou nekenga ake i runga i te whakapehapeha.

17 Nā reira nāku, nā Hākopa, i hoatu ki a rātou ēnei kupu i a au e whakaako ana i a rātou i te temepara, i whiwhi tuatahi au i taku mahi mai i te Ariki.

18 Nā te mea au, a Hākopa, māua ko taku teina a Hōhepa i whakatapu ai i ngā tohunga me ngā kaiako mō tēnei iwi, he mea nā te ringa o Nīwhai.

19 Ā, i whakanuia mārika e māua tō māua tūranga tapu ki te Ariki, e pīkauria ana e māua te haepapa, e utaina ana ki runga i ō māua upoko ake ngā hara o te iwi mehemea kīhai māua i ū ki te whakaako i a rātou; nā reira, mā te mahi i runga i ō māua kaha e kore ō rātou toto e tau ai ki runga i ō māua kākahu; ā ki te kore ka tau ō rātou toto ki runga i ō māua kākahu, ā, kua kore māua e kitea koha koretia hei te rā whakamutunga.