1 Nana ināianei, i pahawa ake nāku, nā Hākopa, kua mahi nui ki tōku iwi i runga i te kupu, (ā, kāore e taea ana e au te tuhituhi hāunga he ruarua noa o aku kupu, nā te uaua o te whao i ā mātou kupu ki runga i ngā papa) ā, e mōhio ana mātou me mau tonu ngā mea e tuhituhi nei mātou i runga i ngā papa;

2 Engari ka memeha atu, ā, ka ngaro atu ngā mea e tuhia nei e mātou ki runga i tētahi mea hāunga i runga i ngā papa; engari e taea ana e mātou ngā kupu ruarua te tuhi i runga i ngā papa, e tuku ai ki ā mātou tamariki, me ā mātou teina aroha, he mātauranga iti e pā ana ki a mātou, e pā ana rānei ki ō rātou tūpuna—

3 E hari ana mātou ināianei i tēnei mea; ā, e kaha mahi ana mātou ki te whao i ēnei kupu ki runga i ngā papa, e manako ana ka whiwhi ō mātou teina aroha me ā mātou tamariki i ēnā i runga i te ngākau whakawhetai, me te titiro iho rātou ki ēnā e ako ai rātou i runga i te koa, kaua i te pōuri, kaua rānei i te whakahāwea, e pā ana ki ō rātou mātua tuatahi.

4 Nā te mea, nō tēnei take i tuhituhi ai i ēnei mea, kia mōhio ai rātou i mātau mātou ki a te Karaiti, ā, he nui hoki tō mātou tūmanako mō tōna korōria i ngā rau tau maha i mua i tana haerenga mai; ā, ehara i te mea ko mātou anake i tūmanako ai mō tōna korōria, engari ko ngā poropiti tapu katoa anō hoki i mua i a mātou.

5 Nana, i whakapono rātou i te Karaiti, ā, i koropikohia e rātou te Matua i runga i tōna ingoa, ā, e koropiko ana anō hoki mātou i te Matua i runga i tōna ingoa. Ā, koinei te take e pupuri ana mātou i te ture a Mohi, e tuhi atu ana ia i ō mātou wairua ki a ia; ā, koia te take i whakatapua ai ia hei tika mō mātou, he pērā anō me te whakatau ki a Aperahama i te koraha kia ngohengohe ai ki ngā whakahaunga a te Atua i tana tāpaenga atu i tana tama a Ihaka, koia tētahi tauritenga i tā te Atua me tāna Tama Kotahi Anake.

6 Nā reira, e rapu ana mātou i tā ngā poropiti, ā, he maha ō mātou whakakitenga me te wairua poropititanga; ā, ka whiwhi mātou i tētahi tūmanako i ēnei whakaatuhanga katoa, ā, ka meinga tō mātou whakapono hei mea tē taea te whakangāueue, nā konā e tino taea ana e mātou te whakahau i runga i te ingoa o Ihu Karaiti, ā, ka whakarongo pū anō ngā rākau ki a mātou, ngā maunga rānei, ngā ngaru rānei o te moana.

7 Hei ahakoa, ka whakaatuhia e te Ariki te Atua ō mātou ngoikoretanga ki a mātou kia mōhio ai mātou mā tōna aroha noa, me ana tapatuhanga nui ki ngā tamariki a te tangata, kia whai kaha ai mātou ki te mahi i ēnei mea.

8 Nana, he mea whakamīharo nui ngā mahi a te Ariki. Anō te hōhonutanga o ana mea ngaro tē taea te kimi; ā, tē taea ōna huarahi katoa e te tangata te kite. Ā, kāore he tangata e mōhio ana mō ōna huarahi hāunga ia e whakakitea ai ki a ia; nā reira, e ngā teina, kei whakahāwea koutou i ngā whakakitenga a te Atua.

9 Nana rā, nā te mana o tana kupu i tau ai te tangata ki runga i te mata o te whenua, ko taua whenua i hangaia ai e te mana o tana kupu. Nā reira, mēnā e taea ana e te Atua te kōrero kātahi ka ai te ao, me te kōrero kātahi ka hangaia te tangata, auē ki te pēnā, he aha e kore ai e taea te whakahau i te ao, i ngā mahinga rānei a ōna ringaringa i runga i tōna mata, e ai ki tāna e hiahia ai, e āhuareka ai anō?

10 Nā reira, e ngā teina, kaua e whai ki te whakatakoto whakaaro ki te Ariki, engari ki te whiwhi i te whakatakotoranga whakaaro mai i tōna ringa. Nana rā, e mōhio ana koutou anō kei te whakatakoto whakaaro ia i runga i te mātauranga, ā, i te tika, ā, i te whakaaroha nui, i runga i āna mahinga katoa.

11 Nā reira, e aku teina aroha, houhia te rongo ki a ia mā roto i te whakamārietanga o te Karaiti, tana Tama Kotahi Anake, ā, kia whiwhi ai koutou i tētahi aranga, e ai ki te mana o te aranga kei roto nei i te Karaiti, ā, kia tāpaea ai hei hua-mātāmua nā te Karaiti ki te Atua, e whakapono ana, ā, kua whiwhi i tētahi tūmanako korōria pai i roto i a ia i mua i tāna whakakitenga i a ia anō i roto i te kikokiko.

12 Ināianei ā, e te mea aroha, kaua e mīharo i taku kōrerotanga atu i ēnei mea; nā te mea he aha e kore ai e kōrero mō te whakamārietanga o te Karaiti, me te whiwhinga ki tētahi tino mātauranga mōna, e pērā ana ki te whiwhinga ki tētahi mōhiotanga mō tētahi aranga me tētahi ao ka puta mai?

13 Nana, e aku teina, ko te tangata e poropiti ana, tukuna ia kia poropiti ai i runga i tō te tangata māramatanga; nā te mea e kōrero pono ana te Wairua, ā, kāore āna teka. Nā reira, e kōrero ana ia i te āhuatanga tūturu o ngā mea ināianei, ā, i te āhuatanga tūturu o ngā mea ka puta mai; nā reira, e whakakitea māramahia ana ēnei mea ki a tātou, mō te whakaoranga o ō tātou wairua. Engari nana, ehara i te mea ko tātou anake i te kaiwhakaatu i ēnei mea; nā te mea i kōrero anō te Atua i ēnei ki ngā poropiti onamata.

14 Engari nana, he iwi kakī mārō ngā Hūrai; ā, i whakahāwea rātou i ngā kupu mārama, ā, i whakamatea ngā poropiti, ā, i whai atu i ngā mea kīhai i taea e rātou te mārama. Nā reira, nā tō rātou matapōtanga, ko taua matapōtanga i ahu mai ai i tā rātou titiro atu ki tua o te māka, me tika pū tā rātou takanga; nā te mea kua tangohia atu e te Atua tana māramatanga mai i a rātou, ā, kua tukuna atu ki a rātou ngā mea maha kāore e taea ana e rātou te mārama, nā tō rātou hiahia. Ā, nā te mea i hiahia rātou, kua meatia e te Atua, kia tatutatu ai rātou.

15 Ināianei ā, ko ahau, a Hākopa, e ārahina atu ana e te Wairua tae atu ana ki te poropititanga; nā, e mōhio ana ahau nā runga i ngā mahinga a te Wairua kei roto nei i ahau, nā, mā te tatutatunga a ngā Hūrai ka whakaparahako rātou i te toka mā runga nei e taea ai te hanga me te whai tūāpapa pūmau.

16 Engari nana, e ai ki ngā karaipiture, ka meinga tēnei toka ko te mea nui, me te mea whakamutunga, me te tūāpapa tūturu anake, e taea ai e ngā Hūrai te hanga ki runga.

17 Ināianei ā, e āku e aroha nei, me pēhea e taea ai e ēnei, i muri iho i tā rātou whakaparahakotanga i te tūāpapa tūturu, te hanga noa ki runga i a ia, kia meinga ai ia ko te upoko o tō rātou kokonga?

18 Nana, e aku teina aroha, māku tēnei mea ngaro e māroha atu ki a koutou; ki te kore au e whakangāueuetia noatia atu mai i taku pūmautanga i roto i te Wairua, me te tatutatu iho nā taku tino mānukanuka nui mō koutou.