1 Ri rupixaʼ ri Mosia xubij cʼa chi rucʼamon chi ronojel ri kʼatoy tzij e tojon. Pa jun chic chʼabel, xubij chi conojel ri e chaʼon richin yeʼoc kʼatoy tzij, yechʼacon achiʼel cʼa ri kʼij ri xesamej y xquikʼet tzij pa quiviʼ ri e cʼamon pe chiquivech.

2 Vi jun achin cʼo rucʼas riqʼuin jun chic, y xa man xutoj ta, jariʼ tok rijaʼ xsujux chuvech ri kʼatoy tzij. Cʼariʼ, ri kʼatoy tzij xukʼet tzij, y xerutek el ri chaponelaʼ richin xquibecʼamaʼ pe chuvech rijaʼ ri achin riʼ. Jariʼ tok ri kʼatoy tzij xukʼet tzij pa ruviʼ ri achin, achiʼel cʼa ri pixaʼ y ri jiquibabel ri cʼo chirij. Queriʼ cʼa, cʼo chi ri achin riʼ xutoj ri rucʼas, o xa xemajtej ronojel ri cʼo riqʼuin, o rijaʼ xelesex el chiquicojol ri vinakiʼ, roma rijaʼ xa jun elekʼom.

3 Ri kʼatoy tzij can tojon vi roma ri samaj xuben. Xucʼul cʼa jun senine kʼana puek vi xsamej jun kʼij, o xucʼul jun senum saka puek. Jariʼ, xa junan riqʼuin ri senine kʼana puek. Queriʼ cʼa xbanatej, roma queriʼ xubij cʼa ri pixaʼ ri yaʼon can.

4 Jareʼ cʼa ri quibiʼ ri jalajoj tak kʼana puek, y saka puek, y ri cajel. Ri biʼaj xi xequiyaʼ ri Nefiʼiʼ chire ri puek, man e junan ta riqʼuin ri quibiʼ ri puek quichin ri e aj Judaʼ ri e cʼo pa Jerusalem. Chukaʼ man junan ta ri quetabal riqʼuin ri xquiben ri e aj Judá. Ri Nefiʼiʼ xa xquijel ri ajilanic, y ri etanic richin ri puek, achiʼel cʼa ri xquirayij y ri xquinojij ri vinakiʼ pa chiquijujunal ri iyaj mamaj ijaʼtzul. Xa queriʼ xquibanalaʼ, cʼa tok xapon ri kʼij tok ja ri kʼatoy tzij xeʼajavarisan. Jariʼ tok ri tataʼal Mosia xujiquibaʼ ri rajilaxic, y ri retaxic ri puek.

5 Ri quibiʼ ri tak puek e jareʼ: ri senine kʼana puek, ri seon kʼana puek, ri xum kʼana puek, y ri limna kʼana puek.

6 Chukaʼ cʼo ri senum saka puek, y ri amnor saka puek, y ri esrom saka puek, y ri onti saka puek.

7 Jun senum saka puek xa junan riqʼuin jun senine kʼana puek. Jun chique riʼ, xa junan riqʼuin jun retabal kirikic ruvech qʼuimal, o jun retabal xabachique chic ruvech qʼuimal.

8 Ri rajel jun seon kʼana puek, xa junan quiqʼuin caʼiʼ senineʼiʼ.

9 Jun xum kʼana puek, xa junan ri rajel quiqʼuin caʼiʼ seoniʼ.

10 Jun limna kʼana puek, junan ri rajel quiqʼuin checonojel ri chʼakaʼ chic.

11 Jun amnor saka puek, xa junan rajel quiqʼuin caʼiʼ senumiʼ.

12 Jun esrom saka puek, junan ri rajel quiqʼuin cajiʼ senumiʼ.

13 Jun onti, junan ri rajel quiqʼuin checonojel ri chʼakaʼ chic.

14 Ri rajel ri tak quipuak chʼutiʼk oc xa jareʼ:

15 Jun xiblon, xa nicʼaj ri rajel jun senum. O pa jun chic chʼabel, jun xiblon xa junan riqʼuin ri nicʼaj retabal kirikic ruvech qʼuimal.

16 Jun xiblum, chukaʼ xa nicʼaj ri rajel jun xiblon.

17 Jun lea xa nicʼaj ri rajel jun xiblum.

18 Jareʼ cʼa, ri rajilaxic y ri retaxic ri quipuak.

19 Jun antion kʼana puek, junan rajel quiqʼuin oxiʼ xibloniʼ.

20 Rijeʼ xaxe xquirayij xquichʼec qʼuiy. Xetojtej rijeʼ roma cʼa ri samaj xquiben. Roma cʼariʼ, rijeʼ xequikʼakʼirisaj ri vinakiʼ, richin queriʼ xequichapalaʼ cʼa quiʼ, y xequinakalaʼ quiʼ, y xquibanalaʼ ri etzelal, richin queriʼ cʼo cʼa janíla quisamaj. Riqʼuin cʼariʼ, xetiquir xechʼacon janíla, achiʼel cʼa ri sujunelaʼ ri xeʼapon chiquivech. Roma cʼariʼ tok xequikʼakʼirisaj ri vinakiʼ, richin chi xeʼoyover chiquij ri Alma y ri Amulek.

21 Ri Zezrom riʼ xuchop rucʼutuxic chire ri Amulek y quereʼ xubij: ¿La xtabij pe chuve achique ri xtincʼutuj apon chave? Ri Zezrom jun achin yalan utz runojibal riqʼuin ri runaʼoj ri itzel vinek. Riqʼuin cʼariʼ, xrajoʼ xuyoj achique ri can utz vi. Roma cʼariʼ tok rijaʼ xubij chire ri Amulek quereʼ: ¿La xtabij pe chuve achique ri xtincʼutuj apon chave?

22 Quereʼ cʼa xubij ri Amulek chire: Jaʼ, vi quereʼ nubij ri Uxlabel richin ri Ajaf ri cʼo viqʼuin. Roma yin can manjun vi xtinbij, vi xa man junan ta riqʼuin ri Uxlabel richin ri Ajaf. Cʼa cʼariʼ, ri Zezrom quereʼ xubij chire: Vaveʼ cʼa, e cʼo vakiʼ ontiʼiʼ saka puek. Xtinyaʼ cʼa chave ronojel reʼ vi nabij chi manek jun Dios.

23 Cʼariʼ, ri Amulek quereʼ xubij: Rat at rucʼajol ri xibalbay. ¿Achique cʼa roma tok yinatejtobej riqʼuin ri etzelal? ¿La man avetaman ta chi re e choj man yeyukʼ ta roma ri tejtobenriʼil queriʼ?

24 ¿La nanimaj cami cʼa rat, chi manek jun Dios? Yin ninbij chave chi mani. Xa rat can avetaman vi chi cʼo jun Dios. Man riqʼuin vi cʼariʼ, janíla navajoʼ ri puek chuvech rijaʼ.

25 Rat atzʼucun cʼa tzij chuve chuvech ri Dios. Quereʼ cʼa xabij chuve: Can kitzij vi chi xquenyaʼ chave re vakiʼ ontiʼiʼ reʼ ri nim cajel. Man riqʼuin vi riʼ, rat xanojij pan avánima chi xa xeʼavevaj ta chinuvech. Xaxe narayij chi yin xinbij ta chi man cʼo ta ri kitzij y cʼaslic Dios, richin queriʼ xinayoj ta cʼa. Can kitzij vi cʼa chi xtacʼul ri rajel ruqʼuexel re etzelal reʼ ri naben.

26 Cʼariʼ, ri Zezrom quereʼ xubij chire: ¿La nabij rat chi cʼo jun kitzij y cʼaslic Dios?

27 Quereʼ cʼa xubij ri Amulek: Jaʼ, can cʼo vi jun kitzij y cʼaslic Dios.

28 Cʼariʼ, ri Zezrom xubij quereʼ: ¿La e cʼo cʼa qʼuiy tak Dios?

29 Rijaʼ xubij cʼa: Mani.

30 Cʼa cʼariʼ, ri Zezrom quereʼ xucʼutuj chire: ¿Achique abanon richin navetamaj ronojel reʼ?

31 Quereʼ cʼa xubij rijaʼ chire: Jareʼ jun takonaxel kʼalajirisayon pe chinuvech.

32 Cʼariʼ, quereʼ xubij ri Zezrom: ¿Achique cʼa ri xtipe apon? ¿La jariʼ cami ri Rucʼajol ri Dios?

33 Rijaʼ xubij cʼa: Jaʼ.

34 Cʼa cʼariʼ tok ri Zezrom quereʼ xucʼutuj: ¿La xquerucol cʼa rijaʼ ri ruvinak quiqʼuin ri quimac? Jariʼ tok quereʼ xubij ri Amulek chire: Yin ninbij chave chi mani, roma rijaʼ man nitiquir ta nrevaj can ri ruchʼabel.

35 Cʼa cʼariʼ, ri Zezrom xubij quereʼ chique ri vinakiʼ: Tokaʼ cʼa chiʼicʼuʼx ronojel reʼ. Ri Amulek xubij cʼa chi xaxe jun Dios cʼo. Man riqʼuin vi riʼ, rijaʼ xubij chi ri Rucʼajol ri Dios xtipe, y xa man xquerucol ta ri ruvinak. Jareʼ xa achiʼel vi ta rijaʼ nitiquir nupixabaj ri Dios.

36 Cʼa cʼariʼ, ri Amulek quereʼ xubij chire: Can kitzij vi chi rat atzʼucun tzij. Yin xinbij chi rijaʼ man xquerucol ta ri ruvinak quiqʼuin ri quimac. Xa romariʼ tok xabij chi xichʼo achiʼel vi ta xitiquir xinpixabaj ri Dios.

37 Ninbij cʼa chive jun bey chic chi manek banel richin yerucol rijeʼ quiqʼuin ri quimac. Roma yin manek banel richin ninvevaj can ri ruchʼabel ri rubin rijaʼ. Ri chʼabel riʼ nubij chi manjun tzʼil nitiquir nrichinaj ri rajavaren ri caj. Roma cʼariʼ, ¿achique cami banel yacolotej vi man navichinaj ta ri rajavaren ri caj? Roma cʼariʼ, manek banel richin yacolotej quiqʼuin ri amac.

38 Cʼariʼ, ri Zezrom quereʼ xubij chire: ¿La kitzij cami chi ri Rucʼajol ri Dios can ja vi rijaʼ ri Jumul Tataʼixel?

39 Ri Amulek xubij cʼa chire quereʼ: Jaʼ, can ja vi rijaʼ ri Jumul Tataʼixel richin ri caj, y ri ruvachʼulef, y richin ronojel ri cʼo chiriʼ. Ja rijaʼ ri tiquirinic y ri qʼuisic, ri nabey y ri ruqʼuisibel.

40 Xtipe cʼa rijaʼ chuvachʼulef richin yerelesaj pe ri ruvinak chupan ri quimac. Rijaʼ xtuqʼuen ka pa ruviʼ ronojel ri kʼajonic pixaʼ quichin ri yeniman ri rubiʼ. Jacʼa rijeʼ ri xticʼojeʼ ri quicʼaslen jumul, y can manjun vi chic xticolotej.

41 Roma cʼariʼ, ri e itzel yecanej can achiʼel vi ta man xbanatej ta ri lokʼolej elesanic. Xaxe xquesolcopitej cʼa pe chupan ri ximibel richin ri camic. Roma can kitzij vi chi xtokaʼ ri kʼij tok conojel xquecʼastej pe pa ri camic, y xqueʼapon chuvech ri Dios. Cʼariʼ, cʼo chi xtukʼet tzij pa quiviʼ chirij ri samaj xquiben.

42 Cʼo cʼa jun camic rubiniʼan ri camic richin ri chʼaculaj. Ri rucamic ri Cristo xtusol ri ximibel richin ri camic riʼ, richin queriʼ, can conojel vi xquecʼastej pe pa ri camic richin chʼaculaj.

43 Ri uxlabel y ri chʼaculaj xtiquitun vi quiʼ jun bey chic pa ri chojmilej rubaniquil. Ri kakʼaʼ kaken y ri kabakil xquetzolix chic pa ri quibaniquil rijeʼ, achiʼel cʼa ri kabanic vacami. Cʼariʼ, xkojcʼuex el richin chi yojpaʼeʼ chuvech ri Dios. Xtiketamaj cʼa chiriʼ, can achiʼel vi ri ketaman vacami, y can choj vi xqueʼokaʼ cʼa chikacʼuʼx ronojel ri kamac.

44 Re cʼastajibel reʼ xtipe chique conojel. Xtipe cʼa chique ri e rijitek chic y ri e alcʼualaʼ na, chukaʼ chique ri e tzʼapel y ri e solcopin. Chukaʼ xtipe chique ri ixokiʼ y ri achiʼaʼ, y chique ri e utz y ri e itzel. Manjun ta rusumal quiviʼ xtisach can. Xa ronojel xtitzolix chic chike pa ri chojmilej rubaniquil, achiʼel cʼa ri kachʼacul vacami. Y conojel xqueʼucʼuex cʼa, y xqueʼoyox chuvech ri cʼojlibel quichin ri Cristo ri Cʼajolaxel y ri Dios ri Tataʼixel, y ri Uxlabixel. Rijeʼ e jun Jumul Dios. Chiriʼ cʼa, ri vinakiʼ xtikʼat tzij pa quiviʼ chirij ri samaj xequibanalaʼ, stapeʼ vi e utz o man e utz ta.

45 Vacami cʼa, can kitzij vi chi in chʼovinek aviqʼuin chirij ri camic richin ri camel chʼaculaj, y chukaʼ chirij ri cʼastajibel richin ri camel chʼaculaj. Ninbij cʼa chave chi re camel chʼaculaj reʼ, can xtoc vi jun chʼaculaj man camel ta chic. Can xticʼastej vi pe chupan ri camic. Xtiyacatej pe chupan ri nabey camic, cʼa pa ri cʼaslen, y chiriʼ cʼa, man xticom ta chic. Ri cuxlabal niquitun quiʼ quiqʼuin ri quichʼacul, y man xquechʼar ta chic. Queriʼ cʼa, chironojel can yeʼoc vi e richin uxlabel, y man e camel ta, y man yetiquir ta chic niquicʼulvachij ri kʼeyitajic.

46 Tok ri Amulek rutanaban re tzijonic reʼ, ri vinakiʼ xquimey jun bey chic. Chukaʼ ri Zezrom xcʼaracʼot. Queriʼ cʼa, xeqʼuis ri ruchʼabel ri Amulek, o ninbij chi xaxe re chʼabel reʼ nutzʼiban can yin.