1 Vacami, nucʼajol, nicʼo chic ruviʼ ri xtinbij chave rat, chuvech ri xinbij chire ri animal. ¿La man atzʼeton ta cʼa chi ri animal can cof vi, y chukaʼ can choj vi, y yerutakej chi utzil ri rupixaʼ ri Dios? ¿La man rukʼalajirisan ta cami chavech rat utzilej cʼutubel banobel?

2 Roma, tok oj cʼo chiquicojol ri Zoramiʼ, rat man can ta xanimaj nutzij, achiʼel ri xuben ri animal. Jareʼ cʼa ri voyoval chavij rat. Rat xabananen roma ri avuchukʼaʼ y ri utzilej anojibal.

3 Man xaxe ta reʼ, nucʼajol. Rat xaben achique ri yalan nuyaʼ bis chuve. Roma rat xayaʼ can ri lokʼolej samaj, y xabe chirij ri itzel ixok rubiniʼan Isabel chiriʼ pa ri ruvachʼulef rubiniʼan Siron. Jariʼ cʼo pa ri cʼulbaʼt quiqʼuin ri Lamaniʼ.

4 Kitzij chi ri ixok riʼ xeruchʼec ri cánima e qʼuiy. Man riqʼuin vi riʼ, rat man yacuyutej ta romariʼ, nucʼajol. Rucʼamon cʼa chi xaben ta ri lokʼolej samaj ri xyaʼox chave.

5 ¿La man avetaman ta, nucʼajol, chi ronojel reʼ can itzel vi chuvech ri Dios? Kitzij chi re mac reʼ janíla itzel chiquivech conojel ri chʼakaʼ chic mac. Xaxe cʼa, vi nacamisaj ri man aj mac ta, o vi naxutuj el ri Uxlabixel, xa ja vi riʼ, nim chuvech re mac reʼ.

6 Roma can kitzij vi chi vi naxutuj el ri Uxlabixel tok rijaʼ cʼo chic aviqʼuin, y can avetaman vi chi naxutuj el, ja cʼareʼ jun mac ri manjun bey xticuyutej ta. Kitzij cʼa, chi ri nicamisan tok retaman chic ri rusakil y ri retamabal ri Dios, janíla cʼayef richin rijaʼ nicuyutej. Jaʼ, nucʼajol, can cʼayef vi richin chi rijaʼ nicuyutej.

7 Vacami cʼa, nucʼajol, ja ta cʼa, man ta xaben jun mac can janíla vi nim. Man ta cʼa ninchʼit ri avánima, vi riʼ xa man ta nicʼatzin chave.

8 Man riqʼuin vi riʼ can kitzij chi man yatiquir ta yeʼavevaj ri amac chuvech ri Dios. Vi man nitzolin ta pe acʼuʼx, ri amac can xquejiqueʼ vi chavij pa ri ruqʼuisibel kʼij.

9 Vacami, nucʼajol, ninvajoʼ chi nitzolin pe acʼuʼx, y yeʼayaʼ can ri amac. Ninvajoʼ cʼa chi man yabe ta chic chirij ri itzel rayibel richin ri runakʼ avech. Xa nakʼil ta cʼa aviʼ chupan re rayibel reʼ. Roma vi man que ta reʼ naben, can manek vi banel richin xtavichinaj ri rajavaren ri Dios. Tokaʼ cʼa chacʼuʼx, y tacʼamaʼ ka chave, y takʼilaʼ aviʼ chupan ronojel reʼ.

10 Ninbij cʼa chave chi tabecʼutuj pixabanic chique ri animal chirij ri nabanalaʼ. Roma can kitzij vi chi cʼa at rat cʼajol na, y nicʼatzin chave chi ri animal yatquipixabaj. Y tanimaj cʼa ri quipixabanic.

11 Man tayaʼ cʼa kʼij chi yayukex el roma xabachique ri xa nacanic, o manek ricʼaʼtz. Man tayaʼ chic kʼij chi ri itzel vinek nusiloj ri avánima richin yabe chiquij ri itzel tak ixokiʼ. Can kitzij vi, nucʼajol, chi janíla nim ri etzelal ri xaqʼuen ka chiquij ri Zoramiʼ. Roma tok rijeʼ xquitzʼet ri xabanalaʼ rat, man xcajoʼ ta chic xquinimaj ri nuchʼabel.

12 Vacami cʼa, ri Uxlabel richin ri Ajaf quereʼ nubij chuve: Tabij chique ri avalcʼual chi tiquibanaʼ ri utz, richin queriʼ man ta cʼa xtiquiyukej el ri cánima e qʼuiy vinakiʼ, cʼa chupan ri vulatajic. Roma cʼariʼ, nucʼajol, can ninbij vi chave, riqʼuin xibinriʼil chuvech ri Dios, chi takʼilaʼ aviʼ chupan conojel ri itzel abanobal.

13 Que cʼari, catzolin cʼa riqʼuin ri Ajaf riqʼuin ronojel ri arayibal, ri anojibal, y ri avuchukʼaʼ. Que cʼa chukaʼ reʼ, man cʼa queʼayukej chʼakaʼ chic vinakiʼ richin niquiben ri itzel. Xa catzolin cʼa chi quiqʼuin, y queʼakʼalajirisaj chiquivech rijeʼ ri man utz ta abanobal, y ri mac ri e abanon.

14 Man cʼa queʼacanoj ri beyomel, o achique ri xa aj re ruvachʼulef ri manek ricʼatz. Roma can kitzij vi, chi man xcatiquir ta xqueʼacʼuaj cʼa el aviqʼuin.

15 Vacami, nucʼajol, ninvajoʼ ninbij jubaʼ chave chirij ri rupetebal ri Cristo. Can kitzij vi chi ninbij chave chi can ja vi rijaʼ ri xtipe richin yerelesaj el ri quimac ri vinakiʼ ri e cʼo chuvachʼulef. Kitzij cʼa, chi xtipe richin yeruyaʼ jebel rutzijol chique ri ruvinakul chirij ri colotajic.

16 Vacami, nucʼajol, jareʼ ri lokʼolej samaj achojche xatoyox vi. Jacʼa richin yeʼayaʼ re jebel rutzijol reʼ chique re vinakul reʼ. Riqʼuin cʼariʼ, can cʼo vi banel richin niquichojmirisaj ri quinojibal. Pa jun chic chʼabel, cʼo cʼa banel richin nipe ri colotajic chique rijeʼ. Riqʼuin cʼariʼ, xtquichojmirisaj ri quinojibal ri calcʼual, richin xticacʼaxaj ri ruchʼabel, tok rijaʼ xtokaʼ.

17 Vacami cʼa, xtinvuxlanibej jubaʼ ri anojibal chirij re naʼoj reʼ. Can kitij vi chi janíla nachʼob rij achique roma tok etaman ronojel reʼ qʼuiy junaʼ tok manjani tipe rijaʼ. Can kitzij vi, quereʼ nincʼutuj chave: ¿La man junan ta chuvech ri Dios rejkalen jun cʼaslemal ri cʼo vacami, riqʼuin jun cʼaslemal ri cʼo tok xtipe rijaʼ?

18 ¿La man ta cʼatzinel chi ri nucʼun banel richin ri lokʼolej elesanic pa mac nikʼalajirisex chiquivech re vinakiʼ reʼ, achiʼel cʼa chukaʼ chiquivech ri calcʼual?

19 ¿La man nitiquir ta cami ri Ajaf nutek pe ri takonaxel richin nuyaʼ re jebel rutzijol reʼ chike roj, achiʼel cʼa xtuben quiqʼuin ri kalcʼual, y quiqʼuin ri xquecʼojeʼ cʼa chirij ri rupetebal?