1 Xcʼulvachitej cʼa chi rijeʼ xebe apon y xquichop ruchʼabalixic ri ruchʼabel ri Dios chique ri vinakiʼ. Xeʼocyaj chupan ri tak jay richin ri quimolojrʼil, y chukaʼ chupan ri tak cachoch. Chukaʼ cʼa, rijeʼ xquitzijoj ri chʼabel pa tak bey.

2 Xcʼulvachitej cʼa chi tok janíla e samajinek chic chiquicojol rijeʼ, ri mebaʼiʼ xquitiquiribaʼ cacʼaxaxic janíla. Roma can kitzij vi chi rijeʼ xeʼelesex el chupan ri jay richin ri quimolojriʼil roma man can ta utz ri quitziak.

3 Roma cʼariʼ tok man xyaʼox ta kʼij chique rijeʼ richin yeʼoc chupan ri jay richin ri quimolojriʼil richin niquiyaʼ rukʼij ri Dios. Ri chʼakaʼ chic xquinojij cʼa chi yalan e tzʼil. Quereʼ cʼa, rijeʼ man qʼuiy ta cʼo quiqʼuin. Ri cachʼalal xequitzʼet cʼa achiʼel ri kʼayis. Quereʼ cʼa, rijeʼ e mebaʼiʼ riqʼuin ri cʼo chuvachʼulef y chukaʼ e mebaʼiʼ pa cánima.

4 Cʼa cʼariʼ, ri Alma xerutijoj ri viankiʼ y xtzijon quiqʼuin pa ri loman juyuʼ rubiniʼan Onida. Jariʼ tok xepe janíla vinakiʼ riqʼuin. Je rijeʼ ri achojchiquij oj chʼovinek vi chic. Rijeʼ e mebaʼiʼ pa cánima roma can e mebaʼiʼ vi riqʼuin ri cʼo chuvachʼulef.

5 Xeʼapon cʼa riqʼuin ri Alma. Cʼa cʼariʼ, ri nabey chique rijeʼ quereʼ xubij chire: ¿Achique cami rucʼamon chi niquiben re vachʼalal reʼ? Rijeʼ yeʼetzelex coma conojel ri vinakiʼ, roma can e mebaʼiʼ vi. Y janíla yeʼetzelex coma ri kateuchunelaʼ. Jaʼ, rijeʼ oj quelesan el pa ri jay richin ri kamolojriʼil. Ri jay riʼ roj can katijon kakʼij richin nikapabaʼ quiqʼuin ri kakʼaʼ. Man riqʼuin vi cʼariʼ, rijeʼ oj quelesan el roma yalan oj mebaʼiʼ. Manek cʼa jun kacʼojlibal richin nikayaʼ rukʼij ri Dios. Roma cʼariʼ, ¿achique cʼa rucʼamon chi nikaben?

6 Tok ri Alma xracʼaxaj reʼ, rijaʼ xupachkʼomij riʼ, y xutzuʼ apon rijaʼ, y xtzuʼun cʼa riqʼuin nimalej quicoten. Rijaʼ xutzʼet cʼa chi ri quicʼayeval rijeʼ can xequichʼutinirisaj vi ri cánima, y chi rijeʼ e chojmirisan chic richin nicacʼaxaj ri chʼabel.

7 Roma cʼariʼ, rijaʼ manjun chic xubij chire ri jun chic molaj vinakiʼ riʼ. Xutzekej ri rukʼaʼ, y can xchʼo vi quiqʼuin ri xerutzuʼ chi can tzolitajinek vi quicʼuʼx. Quereʼ cʼa xubij chique:

8 Yin nintzʼet chi chʼuchʼuj ri ivánima rix. Vi can que vi cʼareʼ, nim ruva ikʼij.

9 Can kitzij vi chi ri ivachʼalal can quereʼ rubin vi: ¿Achique cami xtikaben? Roma roj can oj elesan vi el chupan ri jay richin ri kamolojriʼil. Roma cʼariʼ tok man yojtiquir ta nikayaʼ rukʼij ri ka Dios.

10 Can kitzij vi, ninbij chive quereʼ: ¿La ninojij chi xaxe chupan ri jay richin ri molojriʼil yixtiquir niyaʼ rukʼij ri Dios?

11 Nincʼutuj chukaʼ chive: ¿La ninojij chi xaxe jun kʼij che ri vukukʼij cʼo chi niyaʼ rukʼij ri Dios?

12 Ninbij cʼa chive chi can utz vi chi ix elesan pe chupan ri jay richin ri imolojriʼil. Riqʼuin cʼariʼ, nichʼutinirisaj iviʼ y nivetamaj utzilej nojibel. Janíla cʼatzinel cʼa chi nivetamaj utzilej nojibel. Rix janíla ix mebaʼiʼ, y romariʼ tok ix etzelan coma ri ivachʼalal, y ix elesan pe quiqʼuin. Can xaxe vi romariʼ tok rix nichʼuchʼujirisaj ri ivánima. Xa roma manjun ta chic achique xtiben, xa cʼo chi nichʼutinirisaj iviʼ.

13 Vacami cʼa, nim ruva ikʼij rix roma xban chive chi xichʼutinirisaj iviʼ. Roma tok niban chire jun achin chi nuchʼutinirsaj riʼ, cʼo jantek nrajoʼ nitzolin pe rucʼuʼx. Can kitzij vi cʼa chi ri nitzolin pe rucʼuʼx can xtril vi ri joyovabel. Y ri nicʼulun richin ri joyovabel y nicochʼon, cʼa pa ruqʼuisibel, can xticolotej vi.

14 Vacami cʼa, xinbij chive chi nim ruva ikʼij, roma xban chive chi xichʼutinirisaj iviʼ. Man riqʼuin vi riʼ, ¿la man ninojij ta chi janíla nim ruva quikʼij chivech rix ri niquichʼutinirisaj quiʼ roma ri chʼabel?

15 Jaʼ, cʼo chi xtiturusex ri vinek ri can nuchʼutinirisaj vi riʼ, y nitzolin pe rucʼuʼx pa ri rumac, y nicochʼon cʼa pa ruqʼuisibel. Can janíla xtiturusex cʼa rijaʼ chiquivech ri chʼakaʼ chic ri niban can chique chi niquichʼutinirisaj quiʼ roma yalan e mebaʼ.

16 Roma cʼariʼ, nim ruva quikʼij ri niquichʼutinirisaj quiʼ tok man niban ta chique richin niquichʼutinirisaj quiʼ. Pa jun chic chʼabel, nim ruva rukʼij ri niniman richin ri ruchʼabel ri Dios, y nikasex chuxeʼ yaʼ, y man cof ta ri ránima. Nim cʼa ruva quikʼij ri can yeniman vi tok manjani quetijox chire ri chʼabel, y tok can manjani tiban chique chi niquetamaj.

17 E cʼo cʼa qʼuiy chive rix ri nibij quereʼ: Vi rat nacʼut chikavech jun etal richin ri caj, cʼariʼ can jic vi xtiketamaj. Cʼa cʼariʼ xtikanimaj.

18 Vaveʼ cʼa nincʼutuj chive: ¿La ja cʼareʼ ri cukubabel cʼuʼx? Can kitzij vi ninbij chive chi mani. Roma vi jun achin cʼo achique ri retaman chic, man cʼatzinel ta chi nunimaj riʼ, roma can retaman vi chic.

19 Vacami cʼa, janíla netzelex ri etamayon richin ri rurayibal ri Dios y man nuben ta, chuvech ri xaxe oc nunimaj jubaʼ, o cʼo ri achique roma tok niniman, y chukaʼ nukʼej ri pixaʼ.

20 Jareʼ cʼa ri cʼo chi ninojij rij rix. Vaveʼ cʼa, ninbij chive chi cʼo ri xtibanatej riqʼuin ri jun y chukaʼ ri xtibanatej riqʼuin ri jun chic. Y xtiyatej cʼa rajel chique ronojel vinakiʼ chirij ri quibanalon can.

21 Vacami cʼa, achiʼel xinbij can chirij ri cukubabel cʼuʼx. Ri cukubabel cʼuʼx man ja ta riʼ jun tzʼaket etamabel chirij ronojel. Roma cʼariʼ, vi cʼo icukubabel cʼuʼx, can nivoyobej vi pan ivánima ri man e tzʼeton ta y xa can e kitzij vi.

22 Vacami, can kitzij vi ninbij chive chi ninvajoʼ chi nokaʼ cʼa chiʼicʼuʼx chi ri Dios nujoyovaj quivech conojel ri yeniman richin ri rubiʼ. Roma cʼariʼ, rijaʼ nrajoʼ chi nabey, can ninimaj vi ri ruchʼabel.

23 Vacami cʼa, rijaʼ nutaluj ri ruchʼabel chique ri achiʼaʼ coma ri takonaxelaʼ. Man xaxe ta chique ri achiʼaʼ nujech vi, xa chukaʼ chique ri ixokiʼ. Jacʼa chukaʼ man xaxe ta riʼ. Jutakel yeyaʼox chʼabel chique tak alcʼualaʼ ri niquisukʼ quinaʼoj ri etamanelaʼ y ri vinek ri cʼo utzilej quinojibal.

24 Vacami cʼa, vachʼalal ri ix nucʼuʼxlan, rix icʼutun pe chuve achique rucʼamon chi niben, roma nitij cʼayeval y ix elesan pe. Man ninvajoʼ ta cʼa chi ninojij chi yixinchʼolij, xa can xe vi ri kitzij nincusaj yin.

25 Roma yin man ninbij ta chi rix ivonojel xban chive chi xichʼutinirisaj iviʼ. Roma yin can ninnimaj vi chi e cʼo chʼakaʼ chic chiʼicojol ri xtiquichʼutinirisalaʼ ta quiʼ, xabachique ta xtiban chique.

26 Vacami cʼa, xinbij chi ri cukubabel cʼuʼx man ja ta riʼ jun tzʼaket etamabel. Can que vi chukaʼ riʼ quiqʼuin ri nuchʼabel yin. Xa achiʼel ri cukubabel cʼuʼx man ja ta riʼ jun tzʼaket etamabel, manek chukaʼ banel richin chi can jic vi nivetamaj ta, pa rutiquiribel, vi e kitzij ri nuchʼabel.

27 Man riqʼuin vi riʼ, kitzij chi rucʼamon chi nicʼasoj y nisiloj ri inojibal richin nitejtobej ri nuchʼabel, y nicukubaʼ jubaʼ icʼuʼx riqʼuin. Vi can xaxe vi yixtiquir nirayij ninimaj, tiyaʼ cʼa kʼij chi rayibel riʼ nisamej iviqʼuin, cʼa tok ninimaj chi yixtiquir niyaʼ jun cʼojlibel iviqʼuin chire jubaʼ ri nuchʼabel.

28 Vacami, xtikajunumaj cʼa ri chʼabel riqʼuin jun ijatz. Vi niyaʼ cʼa jun cʼojlibel richin chi jun ijatz nitic pan ivánima, can kitzij vi, vi jariʼ jun kitzij ijatz o jun utzilej ijatz, jariʼ tok xtuchop sipojinen pan icʼuʼx. Quereʼ cʼa chukaʼ xtuben vi man xtitorij ta el roma man ninimaj ta, y man xtixutuj ta chukaʼ el ri Uxlabel richin ri Ajaf. Jacʼa tok ninaʼ chi nisipoj chupan ri icʼuʼx, rix xtibij pan ivánima quereʼ: Can cʼo vi chi utz re ijatz reʼ, o re chʼabel reʼ can utz vi, roma nunimirisaj ri vánima. Chuká nusakirisaj ri vetamanic y janíla utz ninná.

29 Cʼa cʼariʼ, ¿la man ta cʼa xtunimirisaj riʼ ri icukubabel cʼuʼx? Ninbij cʼa chive chi jaʼ. Man riqʼuin vi riʼ, manjani tapon pa jun tzʼaket etamabel.

30 Man riqʼuin vi riʼ, kitzij chi tok ri ijatz nisipoj, y nibos, y nuchop qʼuiyirinen, jariʼ tok cʼo chi nibij chi can utz vi ri ijatz. Roma cʼa can kitzij vi chi nisipoj, y nibos, y nuchop qʼuiyirinen.

31 Vacami cʼa, ¿la can ivetaman vi chi utz ri ijatz riʼ? Ninbij chive chi jaʼ. Roma checonojel ri ijatz yevachin junan quiqʼuin ri acuchi e elenek vi pe.

32 Roma cʼariʼ, vi jun ijatz niqʼuiyer, can utz vi. Jacʼa vi jun ijatz man niqʼuiyer ta, can kitzij vi chi man utz ta. Roma cʼariʼ, cʼo chi nitorix el.

33 Vacami cʼa, can kitzij vi chi itejtoben y iticon ri ijatz. Roma cʼariʼ, vi nisipoj, y nibos, y nuchop qʼuiyirinen, can jic vi ivetaman chi ri ijatz jariʼ utz.

34 ¿La tzʼaket cʼa cami ri ivetamabal? Jaʼ, ri ivetamabal chirij riʼ can tzʼaket vi, y ri icukubabel cʼuʼx xa niver, roma can ivetaman vi. Roma rix ivetaman chic chi ri chʼabel xsipoj pan ivánima, y chukaʼ ivetaman chi xbos, y chi nisakirisex ri ivetamanic, y niqʼuiyer ri inojibal.

35 Cʼa cʼariʼ, ¿la man kitzij ta reʼ? Ninbij chive chi jaʼ, romareʼ can sakil vi. Y ronojel ruvech sakil can utz vi, roma kʼalaj nitzuʼun. Roma cʼariʼ, cʼo chi ivetaman chi jariʼ utz. Vacami cʼa, can kitzij vi chi inaʼon chic re sakil reʼ. ¿La tzʼaket cʼa cami ri ivetamabal?

36 Can kitzij vi ninbij chive chi manjani. Chukaʼ can man rucʼamon ta cʼa chi niyaʼ can ri icukubabel cʼuʼx. Roma rix xaxe icukuban icʼuʼx richin nitic ri ijatz, richin queriʼ xtitejtobelaʼ, y xtinabej vi utz.

37 Que cʼa chukaʼ riʼ tok ri cheʼ nuchop qʼuiyirinen, xtibij cʼa quereʼ: Tikilij cʼa chi utzil, richin chi nicʼojeʼ utz ruxeʼ. Riqʼuin cʼareʼ, xtiqʼuiy y xtivachin utz chike. Vacami cʼa, vi nivilij chi utzil, can xticʼojeʼ vi utz ruxeʼ, y xtiqʼuiy, y janíla xtivachin.

38 Man riqʼuin vi riʼ, vi nimalij can ri cheʼ, y man nivilij ta, jariʼ tok man xtuyaʼ ta ruxeʼ. Cʼa cʼariʼ, tok xtipe ri sakʼij y xtuqʼuet cʼa ka ri cheʼ, can xtichaker vi cʼa, roma manek ri ruxeʼ. Cʼa cʼariʼ xticʼuk y xtitorij el.

39 Vacami cʼa, jariʼ man roma ta ri ijatz man ta utz, ni ta chukaʼ man roma ta ri ruvech man ta nirayix. Jariʼ xa roma ri ulef man samajin ta, y rix man nivilij ta ri cheʼ. Roma cʼariʼ tok manek banel richin nicʼul ri ruvech ri cheʼ riʼ.

40 Quereʼ cʼa chukaʼ, vi man nivilij ta ri chʼabel iviqʼuin, y man nicukubaʼ ta apon ri icʼuʼx chi can nivachin vi, manjun bey xquixtiquir cʼa xtichʼup ri ruvech ri cheʼ richin ri cʼaslen.

41 Xa nicʼatzin chi nivilij ri chʼabel. Jaʼ, tivilij cʼa ri cheʼ tok cʼa nuchop qʼuiyirinen. Tivilij cʼa chi utzil riqʼuin ri icukubabel cʼuʼx, y ri cochʼibel cʼuʼx, y tivoyobej cʼa pan ivánima chi xtibevachin. Vi can niben vi ronojel reʼ, ja cʼariʼ tok utz xticʼojeʼ ri ruxeʼ. Y can kitzij vi chi xtoc jun cheʼ ri niqʼuiy, cʼa pa ri cʼaslen jumul.

42 Queriʼ cʼa, rix nitij ikʼij, y nicukubaʼ icʼuʼx, y yixcochʼon richin nivilij ri chʼabel, richin queriʼ utz xtuyaʼ ri ruxeʼ. Roma cʼa ronojel reʼ, kitzij chi xtichʼup ri ruvech riʼ. Ri ruvech ri janíla jebel, y janíla quiʼ chuvech ronojel ri quiʼ, y janíla sek chuvech ronojel ri sek. Chukaʼ cʼa janíla chʼajchʼoj chiquivech conojel ri e chʼajchʼoj. Y xtitij ri ruvech riʼ, cʼa tok yixnoj, y man xquixnum ta chic y man xquixchakachin ta.

43 Vachʼalal, can ja vi ri tok xticʼul ri rajel roma xicukubaʼ icʼuʼx, y xitij ikʼij, y xixcochʼon, y man chaʼnin to xixcos, y can xivoyobej vi richin chi ri cheʼ cʼo ri nuvachij chive.