1 Vacami, nucʼajol, cʼo jubaʼ chic ri xtinbij chave. Roma cʼa, ninnaʼ chi nimayon ri anojibal chirij ri cʼastajibel quichin ri caminakiʼ.

2 Can kitzij vi ninbij chave chi manjun cʼastajibel xtiban, xa cʼa tok xtipe ri Cristo. Pa jun chic chʼabel, ninbij cʼa chave chi re chʼaculaj reʼ ri camel, man xtoc ta man camel ta chic, y re tzʼil reʼ man xtoc ta chʼajchʼoj, xa cʼa tok xtipe rijaʼ.

3 Can kitzij vi chi ja rijaʼ ri xtibanon richin ri cʼastajibel quichin ri caminakiʼ. Man riqʼuin vi cʼariʼ, kitzij nucʼajol, chi manjani tipe ri cʼastajibel. Vacami, yin ninsol chavech jun evan etamabel. Man riqʼuin vi riʼ, e cʼo janíla evan etamabel ri can e yacon vi can, y manjun vi chic etamayon, xaxe cʼa ri Dios. Ninkʼalajirisaj cʼa chavech rat jun evan etamabel ri nucʼutun can chi utzil chire ri Dios, richin queriʼ ninvetamaj. Jareʼ cʼa, nichʼo chirij ri cʼastajibel.

4 Can kitzij vi, cʼo jun kʼij ri can kʼijun vi chique chiquijujunal richin yecʼastej pe pa ri camic. Manjun vinek retaman jampeʼ xtipe ri kʼij riʼ. Jacʼa ri Dios etamayon ri kʼij ri kʼijun can.

5 Manek cʼa rubanon vi cʼo jun mul, o caʼiʼ mul, o oxiʼ mul tok ri vinakiʼ yecʼastej pe pa ri camic. Roma ri Dios retaman ronojel reʼ. Xaxe nicʼatzin chuve chi vetaman chi can cʼo vi jun kʼij ri kʼijun can chique chiquijujunal richin yecʼastej pe chupan ri camic.

6 Cʼo cʼa chi nicʼojeʼ rucojol ri rukʼij ri camic riqʼuin ri rukʼij ri cʼastajibel.

7 Vacami cʼa, quereʼ nincʼutuj: ¿Achique niquiben pe ri quicʼaslemal ri vinakiʼ tok yecom ka rijeʼ, cʼa tok xtokaʼ ri kʼij ri kʼijun can richin yecʼastej pe?

8 Manek cʼa rubanon vi e cʼo e qʼuiy jalajoj ruvech kʼij ri e kʼijun chique ri vinakiʼ richin yecʼastej pe. Roma man yecom ta conojel xa pa jun oc kʼij, y jareʼ manek rubanon. Riqʼuin ri Dios, can ronojel vi xaxe achiʼel jun kʼij, y ri tak kʼij vaveʼ, xaxe e etan can coma ri vinakiʼ.

9 Roma cʼari, cʼo jun kʼij ri kʼijun can chique ri vinakiʼ richin yecʼastej pe pa ri camic. Can cʼo vi rucojol ri camic riqʼuin ri cʼastajibel. Vacami cʼa, ¿achique cami rubaniquil re rucojol reʼ, y achique cʼa xtiquiben ri quicʼaslemal ri vinakiʼ chiriʼ? Jacʼa reʼ ri nucʼutun chi utzil chire ri Ajaf richin ninvetamaj. Can ja vi cʼareʼ ri vetaman yin.

10 Tok nipe cʼa chic ri kʼij tok conojel yecʼastej pe, jariʼ tok rijeʼ xtiquetamaj chi ri Dios retaman conojel ri kʼij ri e kʼijun can chique ri vinakiʼ.

11 Vacami, xquichʼo cʼa chirij ri achique xtuben ri cʼaslemal chucojol ri camic y ri cʼastajibel. Can kitzij vi, jun takonaxel in rutijon chire re naʼoj reʼ. Xirutijoj cʼa chi ri uxlabel quichin conojel ri vinakiʼ, tok yeʼel el riqʼuin re chʼaculaj reʼ ri camel, jariʼ tok xqueʼucʼuex cʼa chic riqʼuin ri Dios ri yoyon ri cʼaslen chique. Quereʼ cʼa xtiquiben ri uxlabel quichin conojel vinakiʼ, stapeʼ e utz, o man e utz ta.

12 Ja cʼariʼ tok xticʼulvachitej chi ri uxlabel quichin ri e choj yecʼul cʼa pa jun naʼoj richin quicoten rubiniʼan ri lokʼolej cʼojilibel richin quicoten. Jariʼ jun cʼojlibel richin uxlanen y uxlanibel cʼuʼx, acuchi xqueʼuxlan vi pe chupan ri quicʼayeval, y ri quikʼaxomal, y ri cʼo chi niquikukaʼ.

13 Cʼa cʼari, xticʼulvachitej chi ri uxlabel quichin ri e itzel xquetorix cʼa el pa jumul kʼekuʼm. Rijeʼ can e itzel vi, roma can kitzij vi chi man jubaʼ chire ri Uxlabel richin ri Ajaf cʼo quiqʼuin. Roma can kitzij vi, rijeʼ quichaʼon ri itzel banobel chuvech ri e utz. Roma cʼariʼ tok ri ruxlabal ri itzel vinek xoc quiqʼuin, y xuchop ri cánima. Rijeʼ xquetorix cʼa el acuchi nicʼojeʼ okʼen, y siqʼuinen, y kachʼachʼen eyaj. Ronojel reʼ, xaxe roma ri itzel quibanobal rijeʼ. Rijeʼ xeʼucʼuex cʼa el, roma e chapon riqʼuin ri rurayibal ri itzel vinek.

14 Quereʼ cʼa ri rubanic ri quicʼojlibal ri quicʼaslemal ri e itzel. Xquecʼojeʼ cʼa pa ri kʼekuʼm, acuchi xtiquitij vi pokonal, y xtiquixbij quiʼ. Jariʼ roma xticoyobej chironojel ri royoval ri Dios, ri xtikaʼ pe chiquij. Can que vi reʼ xquecanej can rijeʼ, y ri e choj xquecanej can chupan ri lokʼolej cʼojlibel richin quicoten, xa cʼa tok nipe ri kʼij richin ri quicʼastajibel.

15 Cʼo cʼa ri cʼojlibel acuchi niquicot vi ri cʼaslemal, o nibison, cʼa tok manjani ticʼastej pe. Chʼakaʼ chic vinakiʼ quinojin chi jariʼ ri nabey cʼastajibel. Kitzij chi ninbij chi cʼo banel richin nibix cʼastajibel chire. Ja cʼareʼ tok ri uxlabel o ri cʼaslemal niyacatej y niyaʼox chupan ri quicoten o ri kʼaxomal, achiʼel cʼa ri betajinek can.

16 Can kitzij vi chi bitajinek can chukaʼ chi nibanatej jun nabey cʼastajibel. Jariʼ, ri cʼastajibel quichin conojel ri xecʼojeʼ pe ojer, y ri yecʼojeʼ vacami, y ri xquecʼojeʼ apon, cʼa tok xticʼastej pe ri Cristo chiquicojol ri caminakiʼ.

17 Vacami cʼa, man nikanojij ta chi re nabey cʼastajibel reʼ, achojchij nitzijox vi quereʼ, ja ri cʼastajibel quichin ri uxlabel, tok yeyaʼox pa jun cʼojlibel richin quicoten o kʼaxomal. Man cʼa tanojij chi queriʼ nibecʼulun chike.

18 Can kitzij vi chi ninbij chive chi man que ta riʼ. Xa nubij chi xtiquitun quiʼ ri cuxlabal y ri quichʼacul ri e cʼo pe chupan ri kʼij richin ri Adán, cʼa tok nicʼastej pe ri Cristo.

19 Vacami cʼa, xtzijox ka chiquij ri cuxlabal y ri quichʼacul ri e itzel y ri e choj. Vaveʼ cʼa, yin man ninbij ta vi rijeʼ xtiquitun chic quiʼ chupan xaxe jun kʼij, o man que ta riʼ. Xaxe nicʼatzin chuve chi ninbij chi can xquecʼastej vi pe. Pa jun chic chʼabel, ri quicʼastajibel rijeʼ xtibanatej nabey chuvech ri quicʼastajibel ri xquecom chirij ri rucʼastajibel ri Cristo.

20 Vacami nucʼajol, man ninbij ta chi ri quicʼastajibel rijeʼ xtibanatej tok xticʼastej pe ri Cristo. Xa can kitzij vi chi yin ninnojij chi ri cuxlabal y ri quichʼacul ri e choj xtiquitun chic quiʼ tok xticʼastej ri Cristo y xtijoteʼ chicaj.

21 Vi quereʼ xtiban chupan ri kʼij tok xticʼastej pe ri Cristo, o xa cʼa chirij ri rucʼastajibel, jariʼ man ninbij ta yin. Xa can ninbij vi quereʼ: Can cʼo vi rucojol ri camic riqʼuin ri rucʼastajibel ri chʼaculaj. Cʼo pe chukaʼ jun quicoten, o jun nimalej bis, xa cʼa tok napon ri kʼij ri nikʼijux roma ri Dios richin xquecʼastej pe ri caminakiʼ, y niquitun chic quiʼ ri uxlabel y ri chʼaculaj. Cʼa cʼariʼ, xquecʼamer chuvech ri Dios, y xtikʼat tzij pa quiviʼ chiquij ri quisamaj.

22 Jaʼ, re cʼulvachitajic reʼ nibanon ri tzolijitajic quichin conojel, achojchiquij quitzijon vi ri e yaʼol lokʼolej rutzijol.

23 Ri uxlabel xtitzolix riqʼuin ri chʼaculaj, y ri chʼaculaj, y ri chʼaculaj riqʼuin ri uxlabel. Jaʼ, conojel aken, y kʼabaj, y bakil, xquetzolix chic riqʼuin ri ruchʼacul. Kitzij cʼa, can man vi jun rusumal viʼaj xtisachtej el, xa can conojel vi xquetzolix cʼa chupan ri choj, y tzʼaket quibaniquil.

24 Vacami, nucʼajol, jareʼ ri tzolijitajic achojchij e tzijovinek vi conojel ri e yaʼol lokʼolej rutzijol.

25 Ja cʼariʼ tok ri e choj xquechʼichʼan apon chupan ri rajaveren ri Dios.

26 Man riqʼuin vi riʼ, kitzij cʼa chi jun cʼayevilej camic xtipe chiquij ri e itzel. Roma rijeʼ yecom cʼa chuvech ri ruchojmilal. Roma rijeʼ can e tzʼil vi, y manjun ri rajavaren ri Dios. Rijeʼ xa e elesan el, y e yaʼon can richin niquitij ri ruyaʼon pe chique ri quisamaj, o ri quibanobal ri can e itzel vi. Rijeʼ niquikum cʼa ri rutzʼilol jun qʼueyilej kumbel.