1 Xcʼulvachitej cʼa chi tok ri Alma xerubij yan re chʼabel reʼ chique rijeʼ, rijaʼ xtzʼuyeʼ pa ri ulef. Jariʼ tok ri Amulek xpaʼeʼ y xuchop quitijoxic y quereʼ xubij:

2 Vachʼalal, yin ninnojij chi manek banel chi rix man ivetaman ta achique ri xtzijox can chirij ri rupetebal ri Cristo. Ja rijaʼ ri nikabij roj chi ja ri Rucʼajol ri Dios. Yin vetaman cʼa chi rix janíla xixtijox chique ronojel reʼ tok manjani tichʼer el iviʼ kiqʼuin.

3 Rix icʼutun cʼa chire ri vachʼalal ri nucʼuʼxlan chi tukʼalajirisaj cʼa chivech achique rucʼamon chi niben roma ri icʼayeval. Roma cʼariʼ tok rijaʼ chʼovinek jubaʼ iviqʼuin richin nunucʼ apon ri inojibal. Chukaʼ cʼa rijaʼ ix rupixaban richin ticukubaʼ icʼuʼx y xquixcochʼon.

4 Xixrupixabaj cʼa chi xa ticukubaʼ cʼa icʼuʼx richin nitic ri chʼabel pan ivánima, richin queriʼ nitejtobej cʼa ri rutzil.

5 Roj kanaben cʼa chi janíla yixnojnot cʼa pa ri inojibal chirij ri chʼabel ri cʼo cʼa riqʼuin ri Rucʼajol ri Dios o vi xa man xticʼojeʼ ta jun Cristo.

6 Rix xitzʼet cʼa chukaʼ chi ri vachʼalal can xujiquibaʼ vi chivech, quiqʼuin qʼuiy cʼutubel tak tzij, chi ri chʼabel richin ri colotajic can cʼo vi pe riqʼuin ri Cristo.

7 Ri vachʼalal e rukʼalajirisan pe ri chʼabel richin ri Zenos, ri niquibij chi ri elesanic pa mac nipe roma ri Rucʼajol ri Dios. Chukaʼ e rukʼalajirisan ri chʼabel richin ri Zenoc. E rutzijon cʼa chukaʼ ri ruchʼabel ri Moisés richin queriʼ nujiquibaʼ chi can kitzij vi ronojel reʼ.

8 Vacami cʼa, kitzij chi can yin chukaʼ xtinjiquibaʼ chivech chi can kitzij vi ronojel reʼ. Can kitzij vi ninbij chive chi ri Cristo xtipe chiquicojol ri calcʼual ri achiʼaʼ. Cʼa cʼariʼ, can xtuqʼuen ka pa ruviʼ rijaʼ ri quikʼajonic pixaʼ ri ruvinak, y xquerutoj ri quimac ri e aj re ruvachʼulef. Can que vi cʼareʼ rubin can ri Ajaf Dios.

9 Roma cʼatzinel cʼa chi niban ri rutojbalil mac. Achiʼel cʼa nubij ri nimalej nucʼunic richin ri Jumul Dios, can cʼo vi chi niban jun rutojbalil mac, o conojel ri vinakiʼ cʼo chi yecom jumul. Can conojel vi e covirisan chic, y e tzankinek, y e sachinek, y can cʼo vi chi xquecom jumul vi man ta niban cʼa ri rutojbalil mac ri can cʼatzinel vi.

10 Roma cʼatzinel chi nibanatej ri nimalej y ruqʼuisibel camelabel. Man ja ta reʼ jun camelabel. Man ja ta reʼ jun camelabel richin jun achin, o richin jun chicop, o xabachique ruvech aj xicʼ chicop. Roma man ja ta reʼ jun camelabel richin jun vinek. Xa can ja vi reʼ jun junelic y jumul camelabel.

11 Can man vi jun achin nitiquir nusuj ri ruquiqʼuel rijaʼ richin yerutoj ri rumac ri jun chic. Vi jun achin nicamisan cʼa, ¿la xtuben ri chojmilej kapixaʼ chi nicamisex ta ri rachʼalal rijaʼ? Ninbij cʼa chive chi mani.

12 Xa can nucʼutuj vi cʼa ri pixaʼ chi nicamisex ri camisanel. Roma cʼariʼ tok manjun chic, xaxe ri junelic rutojbalil mac nitiquir yerutoj ri quimac ri e aj re ruvachʼulef.

13 Roma cʼariʼ, nicʼatzin chi cʼo jun nimalej y ruqʼuisibel camelabel. Cʼa cʼariʼ tok xtitaneʼ, o pa jun chic chʼabel, nicʼatzin chi xtitaneʼ ri rutixic quiqʼuel ri e banalon pe. Ja cʼariʼ tok xtikʼajer can ri rupixaʼ ri Moisés. Can ronojel xtibanatej vi, ronojel cʼa ti rucʼaj y ti chʼap y manjun xtikʼax ta el chek queriʼ.

14 Can kitzij vi cʼa chi jareʼ ri nibecʼulun vi ri pixaʼ. Checonojel ri tak nitzʼ richin ri pixaʼ niquikʼijuj cʼa apon ri nimalej y ruqʼuisibel camelabel. Ri nimalej y ruqʼuisibel camelabel riʼ jariʼ ri Rucʼajol ri Dios, y can junelic vi y jumul.

15 Quereʼ cʼa rijaʼ xtuqʼuen pe ri colotajic chique conojel ri yeniman richin ri rubiʼ. Nibanatej cʼa re ruqʼuisibel camelabel reʼ, richin queriʼ nipe cʼa ri samaj richin ri joyovabel. Ri joyovabel cʼo cʼa ruchukʼaʼ pa ruviʼ ri kʼatoj tzij y nuyaʼ jun rubeyal richin queriʼ ri vinakiʼ xtiquicukubaʼ quicʼuʼx y xtizolin pe quicʼuʼx.

16 Riqʼuin cʼareʼ, ri joyovabel nitiquir nucukirisaj ri nucʼutuj ri kʼatoj tzij y yeruliʼej ri vinakiʼ riqʼuin rukʼaʼ richin rutzil quivech. Jacʼa ri jun ri man nucukubaʼ ta rucʼuʼx y man nitzolin ta pe rucʼuʼx, can nimalix vi can chupan ronojel ri pixaʼ richin ri nucʼutuj ri kʼatoj tzij. Roma cʼariʼ, ri nimalej y jumal rubeyal richin ri elesanic pa mac xaxe utz chire ri vinek ri nucukubaʼ rucʼuʼx y nitzolin pe rucʼuʼx.

17 Roma cʼariʼ, vachʼalal, ri Dios tuyaʼ cʼa kʼij chive rix richin nitiquiribaʼ nicukubaʼ icʼuʼx y nitzolin pe icʼuʼx, richin queriʼ xtichop rucʼutuxic pa ri lokʼolej rubiʼ rijaʼ, richin queriʼ xtujoyovaj cʼa ivech.

18 Jaʼ, ticʼutuj cʼa chire chi xtujoyovaj na ivech, roma rijaʼ nitiquir nicolon.

19 Jaʼ, tichʼutinirisaj cʼa iviʼ y jutakel tibanaʼ lokʼolej chʼoven riqʼuin.

20 Quixchʼo cʼa akʼanij riqʼuin rijaʼ tok ix cʼo pan ijuyuʼ y pa quiviʼ conojel ri ikʼataj.

21 Quixchʼo cʼa akʼanij riqʼuin rijaʼ pa tak ivachoch coma ri e aj pan ivachoch pa nimakʼaʼ, y pa kʼij, pa tikakʼij.

22 Ticʼutuj cʼa chire chi tukʼilaʼ na cʼa ri cuchukʼaʼ ri yeʼetzelan ivichin.

23 Ticʼutuj cʼa chire chi tukʼataʼ na cʼa ri itzel vinek. Jacʼa rijaʼ ri netzelan richin ronojel chojmilal.

24 Ticʼutuj cʼa chire rijaʼ pa ruviʼ ri iticoʼn pa juyuʼ richin xqueqʼuiyer.

25 Ticʼutuj cʼa chire pa quiviʼ ri imolaj chicopiʼ pa juyuʼ richin chi yeqʼuiytisex.

26 Jacʼa man xaxe ta reʼ. Cʼatzinel chi yixchʼo akʼanij riqʼuin rijaʼ riqʼuin ronojel ri ivánima pa ri ivarabal, y ri icʼojlibal e evan can, y chukaʼ pa ri tolan iruvachʼulef.

27 Que cʼariʼ, tok man yixchʼo ta akʼanij riqʼuin ri Ajaf, tinoj cʼa ri ivánima riqʼuin jutakel lokʼolej chʼoven roma ri rutzil ivech rix, y chukaʼ roma ri rutzil quivech ri e cʼo chiʼinakaj.

28 Vacami vachʼalal, ri ix nucʼuʼxlan, can kitzij vi ninbij chive chi man tinojij chi xaxe reʼ nicʼatzin. Roma vi tok ibanon chic ronojel reʼ, yeʼixilkʼotilaʼ can ri vinakiʼ ri cʼo qʼuiy ri nicʼatzin chique, y chukaʼ ri chʼanayiʼ, y man yeʼikʼejelaʼ ta ri yavaʼiʼ y ri e cʼo ri quicʼayeval, y man niyaʼ ta jubaʼ ri cʼo iviqʼuin chique ri cʼo nicʼatzin chique, ninbij cʼa chive chi vi man niben ta reʼ, can kitzij vi, ri lokʼolej ichʼoven riqʼuin ri Dios manek ricʼaʼtz y manek cʼa rejkalen chive. Cʼa cʼariʼ, rix xa ix achiʼel ri caʼiʼ quipalej ri niquevaj ri kitzij tijonic.

29 Roma cʼariʼ, vi man nokaʼ ta cʼa chiʼicʼuʼx chi cʼo chi yixajovan, rix xaxe ix achiʼel ri kʼayis ri niquitorij el ri samajelaʼ, roma manek chic rejkalen, y cʼariʼ nipalibetej roma ri caken ri vinakiʼ.

30 Vachʼalal, vacami icʼulun e qʼuiy jiquibanic y itzʼeton chi ri lokʼolej tzʼibanic chukaʼ nujiquibaʼ ronojel reʼ. Roma cʼariʼ tok ninvajoʼ chi yixpe cʼa y nicʼut chi can nitzolin vi pe icʼuʼx.

31 Kitzij chi ninvajoʼ chi yixpe y man ta nicovirisaj chic ri ivánima. Roma can kitzij vi chi ri vacami jareʼ ri kʼij richin ri icolotajic. Roma cʼariʼ, vi xtitzolin pe icʼuʼx y man xticovirisaj ta chic ri ivánima, can chaʼnin vi xticʼamer pe chive ri nimalej rubeyal richin ri lokʼolej elesanic pa mac.

32 Roma can kitzij vi, re cʼaslen reʼ ja ri kʼij richin chi ri vinakiʼ niquichojmirisaj apon quiʼ richin niquitzʼet ri Dios. Can kitzij vi cʼa, ri kʼij richin re cʼaslen reʼ ja ri kʼij richin chi ri vinakiʼ niquiben ri quisamaj.

33 Vacami cʼa, xinbij can chive chi rix icʼulun chic e qʼuiy jiquibanic. Roma cʼariʼ, yixinpixabaj chi man tiyalaʼ can ri itzolibel cʼuʼx cʼa pa ruqʼuisibel. Roma ri kʼij richin re cʼaslen reʼ niyaʼox chike richin nikachojmirisaj apon kiʼ richin ri cʼaslen jumul. Jacʼa kitzij chi vi man nikachojmirisaj ta kiʼ tok oj cʼo chupan re cʼaslen reʼ, jariʼ tok noc pe ri tocokʼaʼ richin kʼekumal acuchi manjun chic samaj xtiban vi.

34 Tok xquixapon cʼa chupan ri cʼayevilej kʼij riʼ man xquixtiquir ta chic xtibij quereʼ: Vacami xa xtitzolin pe nucʼuʼx y xquijel apon riqʼuin ri nu Dios. Mani. Can manek vi chic beyal richin chi xtibij queriʼ. Roma ri uxlabel ri cʼo chupan ri ichʼacul tok yixel el chupan re cʼaslen reʼ, can ja vi ri uxlabel riʼ xticʼojeʼ ruchukʼaʼ richin nicʼojeʼ chupan ri ichʼacul chupan ri cʼaslen richin jumul.

35 Roma can kitzij vi, vi rix iyalojisan, cʼa pa ri icamic, ri kʼij tok xtivajoʼ xtitzolin pe ri icʼuʼxʼ, jariʼ tok ix jachon chic pa ri uchukʼaʼ richin ri ruxlabal ri itzel vinek, y ja rijaʼ ri nijitzʼon ivichin. Riqʼuin cʼariʼ, ri Ruxlabal ri Ajaf ruchʼaron el riʼ iviqʼuin y manek chic ri rucʼojlibal iviqʼuin. Cʼa cʼariʼ, ri itzel vinek nicʼojeʼ ronojel ruchukʼaʼ pan iviʼ y can quereʼ quibanon can jumul ri e itzel.

36 Y yin vetaman reʼ, roma ri Ajaf rubin can chi rijaʼ man cʼo ta chupan tzʼilolej tak jay. Xa cʼo rijaʼ pa ri cánima ri e choj. Rijaʼ rubin can chukaʼ chi ri e choj can xquetzʼuyeʼ vi pa ri rajavaren rijaʼ y man xqueʼel ta chic. Y ri quitziak can xquesakirisex vi roma ri ruquiqʼuel ri Carneʼl.

37 Vacami cʼa, vachʼalal ri ix nucʼuʼxlan, yin ninvajoʼ chi reʼ nokaʼ chiʼicʼuʼx. Ninvajoʼ cʼa chukaʼ chi nichojmirisaj ri icolotajic riqʼuin xibinriʼil chuvech ri Dios y chi man nibij ta chic chi ri Cristo man xtipe ta.

38 Ninvajoʼ cʼa chi man nipabaʼ ta chic iviʼ chuvech ri Uxlabixel, xa ninvajoʼ chi can nicʼul vi rijaʼ, y niqʼuen pe pan iviʼ ri rubiʼ ri Cristo. Ninvajoʼ chukaʼ chi nichʼutinirisaj iviʼ cʼa pa ri pokolaj, y niyaʼ rukʼij ri Dios riqʼuin ri uxlabel y riqʼuin ri kitzij, xabacuchi ix cʼo cʼa vi. Ninvajoʼ cʼa chi nimatioxij chire rijaʼ kʼij kʼij roma ronojel ri joyovabel y turusanic ri yeruyaʼ rijaʼ chive.

39 Chukaʼ vachʼalal, yin yixinpixabaj chi tichajij cʼa iviʼ y quixchʼo akʼanij jutakel riqʼuin ri Dios. Riqʼuin cʼareʼ, man xquixucʼuex ta el roma ri tejtobenic richin ti itzel vinek, y man xquixrupalibej ta, y man xquixoc ta ri rusamajelaʼ rijaʼ pa ruqʼuisibel kʼij. Roma rijaʼ xa manjun utz xtuyaʼ chive.

40 Vacami cʼa, vachʼalal, ninvajoʼ yixinpixabaj richin ticʼojeʼ cʼa ri icochʼonic, richin queriʼ xqueʼichochʼ cʼa ronojel ruvech cʼayeval. Ninvajoʼ cʼa chi man yeʼiyokʼ ta chic ri yeʼelesan el ivichin xa roma yalan ix mebaʼiʼ. Vi niben cʼa queriʼ, xa xquixoc cʼa aj mac achiʼel rijeʼ.

41 Ninvajoʼ cʼa chi ticʼojeʼ cochʼonic y chi yeʼicoch ri cʼayeval riʼ, y nivoyobej pan ivánima chi cʼo jun kʼij apon tok xquixuxlan pe pa conojel ri icʼayeval.