1 Kunantaq, Amulekpa rimayninkuna Zeezromta upallachisqanta rikuspa Almaqa—Amulekta qollochinanpaq llullakuyninpi atoqrayayninkunapiwan payta Amulek hap’isqantan Almaqa rikurqan—huchankunata yachaspa khatatataytawan qallarisqanta rikuspa imataq Almaqa, siminta kicharispa payman rimariyta qallarirqan, Amulekpa rimayninkunata takyachispa; Amulekpa ruwasqanmanta aswantaraqtaq qelqakunata kicharirqan, ch’uyancharqan ima.

2 Zeezromman Almaq rimarisqan simikunataq muyureqnintinpi kaq runakunaq uyarisqan karqan. Askhapunin runakuna karqanku, khaynatataq Alma rimarirqan:

3 Kunanqa, Zeezrom, rikushankin llullakuyniykipi atoqrayayniykipiwan hap’isqa kasqaykita; manan runakunallamanchu llullakurqanki, ichaqa, Yayamanmi llullakurqanki. Llapan yuyasqaykitan Pay yachan, yachashankitaqmi yuyasqaykikunata Nuna yachachiwasqankuta.

4 Rikushankitaqmi saqraq atoqrayaq kayninman hina atoqrayay ruwayniykikuna yachasqaykuta. Chay ruwayniykitaq karqan kay runakunaman llullakunaykipaq, q’otonaykipaqwan; paykunata noqayku kontra hatarichinaykipaq, k’amiwanankupaq, qarqowanankupaqwan—

5 Kaytaq awqaykiq ruwaynin karqan, qanpitaq atiyninta llank’achirqan. Kay yuyarinaykichistan munayman—qanman rimarisqaytaqa llapan runakunamanmi rimarini.

6 Llapaykichismantaq niykichis, awqaq toqllan kay kasqanta; kay runakuna hap’inanpaqmi churarqan, hark’asqata hina qankunata payman apananpaq, chaqnankunawan muyuchinasuykichispaq, hark’ayninpa atiyninman hina wiñay-wiñaypaq chinkachiywan qankunata watanasuykichispaq.

7 Kay simikunata Alma rimareqtintaq, astawanraq khatatatayta Zeezrom qallarirqan, astawan-astawanraqtaq Yayaq atiyninmanta kunbinsikurqan. Kumbinsisqataqmi karqan, Alma Amulekpiwan paymanta yachasqankuta; sut’intapunin yacharqan sonqonpa munayninkunata yuyasqantawan paykuna yachasqankuta. Atiymi paykunaman qosqa karqan, unanchana nunaman hina kay imaymanakunamanta yachanankupaq.

8 Zeezromtaq paykunata k’uchillaña tapuyta qallarirqan, Yayaq qhapaq-suyunmanta astawan yachananpaq. Paytaq Almata nirqan: Ima ninantan nin, wañusqakunaq kawsariyninmanta Amulekpa rimarisqan, chaninkunapas mana chaninkunapas llapankun wañusqakunamanta hatirimunqaku, Yayaq ñawpaqenmantaq apamusqa kanqaku, ruwayninkuman hina taripasqa kanankupaq, nispa nisqan?, nispa.

9 Kunantaq Almaqa khaynata payman kaykunata ch’uyanchayta qallariqan: Askhamanmi qosqa Yayaq pakasqa imaymanankunamanta yachanankupaq, chaypiwanpas, sut’in kamachiywan churasqan kanku mana qonankupaq, ichaqa, runakunaq wawankunaman Paypa qosqan rimayninpa partenman hinalla; Payta uyakusqankuman, k’uchi kasqankumanwan hinallapiwan.

10 Chhaynaqa, sonqon rumiyacheqqa rimaypa aswan pisillantan chaskin; sonqon mana rumiyacheqmantaq, rimaypa aswan askha t’aqan qosqa kan; Yayaq pakasqa imaymanankunamanta yachananpaq, hunt’atapuni chaykunata yachanankama.

11 Sonqonku rumiyachiqkunamantaq rimaypa aswan pisi t’aqallan qosqa kan, pakasqa imaymanankunamanta mana imatapas yachanankukama; hinamantaq saqraq hark’asqan apasqa kanku, munayninwantaq chinkachiyman apasqa kanku. Kaymi supay wasiq chaqnanpa ima ninan.

12 Sut’intataqmi wañuymanta Amulek rimarirqan, kay wañuqmanta mana wañuqman hatirichisqa kanamanta, ruwayninchiskunaman hina taripasqa kanapaq Yayaq taripananpa ñawpaqenman apamusqa kananchismanta.

13 Hinaqa, sonqonchis rumiyachisqa karqan chayqa, ari, Yayaq rimaynin kontra sonqonchista rumiyachirqanchis, noqanchispi chay rimaykuna mana tarisqa kanankama chayqa, millaypunin imayna kananchis kanqa, chaymantaqmi kundinasqa kasunchis.

14 Rimayninchiskunan kundinawasunchis, ari, llapan ruwayninchiskunan kundinawasunchis. Manan ch’uyachu tarisqa kasun, yuyayninchispas kundinawasunchismi; chhayna millay kaypitaq mana Yayanchista qhawariyta qhariykachasunchu; kusisqataqmi kasway, orqokunata rumikunatawan noqanchis pataman urmaspa Paypa ñawpaqenmanta pakawananchispaq kamachiyta atiswan chayqa.

15 Ichaqa, manan kay kanmanchu; hamunanchismi, ñawpaqenpi, kusiqellpunpi, atiyninpi, kallpanpi, hatun-kayninpi, kamachikuyninpiwan sayananchis. Reqsinanchistaqmi wiñay-wiñaypaq p’enqakuyninchispi, llapan taripayninkuna chanin kasqanta; llapan rimayninkunapi chanin kasqanta, runakunaq wawankunawan khuyapakuq kasqanta, sutinpi kreyiqkunata yuyayman kutirimunapaq chanin ruruta apamoq runakunata qespichinanpaq llapa atiyniyoq kasqantawan.

16 Kunantaq nisaykichis—chaymanmi ishkay kaq wañuy hamunqa, nunapi wañuy; chaymantaq pacha kan, mana-wiñaypaq wañuyman hina huchankupi wañuqkuna nunapipas wañunankupaq; ari, chaninchaymanta kaq imaymanakunaman hinan pay wañunqa.

17 Hinamantaq pacha kanqa, sallu rumiyoq ninayoqpiwan wiñay-wiñaypaq rawraynin wicharimuq qocha hina ñak’ariyninku kananpaq; hinamantaq pacha kanqa, wiñay-wiñay qolluypaq watasqa kanankupaq, saqraq atiyninman hark’ayninmanwan hina, paytaq paykunata munayninman hina watarispan.

18 Hinamantaq qankunata nisaykichis, manapas kutichikapuy kanmanchu karqan hinan paykuna kanqaku. Manan qespichisqa kayta atinkumanchu Yayaq chaninchaninman hinaqa, manataqmi wañuyta atinkumanchu manaña astawan waqlliy kasqanta rikuspanku, nispa.

19 Hinataq, kay simikunata Alma rimariyta tukuqtin, astawanraq runakuna utirayayta qallarirqanku.

20 Paykuna purapi huk kamachikuqtaq karqan Antionah sutiyoq; achhuyamuspataq payta nirqan: Iman kay nisqayki, wañusqakunamantan runa hatarimunqa, kay wañuqtaq mana wañuqman kambiyasqa kanqa, manataq hayk’aqpas nuna wañunqachu nisqayki?

21 Ima ninantan qelqakuna nin—Eden pawqarpa intiq lloqsimunan qayllanpi kerubinta huk rawraq q’anchinatawan Yaya churarqan, ñawpaq tayta-mamanchiskunañataq haykuspanku kawsay sach’aq rurunmanta mikhuspa wiñaypaq kawsankuman? Chhaynataq rikunchis, wiñaypaq kawsanankupaq mana atikusqanta, nispa neq?

22 Kunantaq payta Alma nirqan: Kayta sut’inchanaypaq hinañan kasharqani. Rikunchismi, hark’asqa rurumanta mikhuspa Yayaq rimayninman hina Adan urmasqanta; khaynatataq rikunchis urmayninwan llapa runakuna chinkasqa, urmasqapiwan wakisqankuta.

23 Kunantaq niykichis—chaypacha kawsay sach’aq rurunmanta Adan mikhuyta atinman karqan chayqa, manan wañuy kanmanchu karqan, ch’usaqtaq rimay kanman karqan, Yayata llullakuqta ruwaspa. Khaynatan Pay nirqan: Mikhunki chayqa, cheqaqtapunin wañunki, nispa.

24 Kunanqa rikunchismi, runakunaman wañuy hamusqanta; ari, Amulekpa rimarisqan mana wiñaypaq kaq wañuy. Chaypiwanpas qosqan runaman pacha karqan yuyayninman kutirimunanpaq; chhaynataq kay kawsay pruebakuna pacha wakirqan, Yayawan tupanapaq alistakunapaq; noqayku rimarisqayku chay mana tukukuyniyoq imayna kanapaq alistakunapaq; chaytaq kanqa, wañusqakunamanta kawsarimuna patamanña.

25 Pachaq qallariyninmantapacha churasqa qespiy imayna kanan mana kanmanchu karqan chayqa, manan wañusqakunamanta kawsarimuna kanmanchu karqan. Ichaqa, karqanmi qespiy imayna kanan, chaytaq wañusqakunamanta ña rimarisqaña kawsariyta apamunqa.

26 Kunantaq, rispanku kawsay sach’amanta ñawpaq kaq tayta-mamanchis mikhuyta atikunman karqan chayqa, wiñaypaqmi usuri kankuman karqan, alistakunankupaq mana tiempuyoq kaspanku; chhaynataq kutichikapuna imayna kanan qollunman karqan, Yayaq rimaynintaq ch’usaq kanman karqan, mana imapaq allin kaspa.

27 Ichaqa, manan chhaynachu karqan, wañunankupaqmi runakunaman kamachisqa karqan; wañuy patamantaq taripayman hamunanku, rimarisqayku kikin taripayman, chaytaqmi tukukuy.

28 Kay imaymanakuna runakunaman hamunanpaq churaspataq Yaya rikurqan, paykunaman kamachisqan imaymanakunamanta runakuna yachanankupaq chanin kasqanta;

29 Chhaynataq paykunawan rimanankupaq angelkunata kachamurqan, paykunataq Yayaq kusiqellpunta runakunaman qhawachirqanku.

30 Chay pachamantapachataq sutinta waqyayta runakuna qallarirqanku. Chhaynataq runakunawan Yaya rimarirqan, kay pachaq qallariyninmantapacha akllasqa kutichikapuy imayna kanantataq paykunaman yachachirqan. Kaytataq runakunaman yachachirqan, iñiyninkuman, yuyayman kutirimuyninkuman, qollanan ruwayninkumanwan hina.

31 Hinataq runakunaman kamachiykunata qorqan—kay pachapi kaqman hina qallariypiraq ñawpaq kaq kamachiykunata paykuna p’akispanku, Yayakuna hinataq paykuna wakipurqanku, allinta mana allintawan yachaspanku; paykuna kikinkutataq churakurqanku imatapas ruway atinankupaq utaq munayninkuman munapakusqankumanwan hina ruwanankupaq kaypi churasqa kaspanku; allin ruwanankupaqpas utaq mana allin ruwanankupaqpas—

32 Chhaynataq, kutichikapuy imayna kananta paykunaman yachachisqan pataman paykunaman kamachiykunata Yaya qorqan, millay kaqta mana ruwanankupaq; kaypa chaninnintaq ishkay kaq wañuy, kaytaq chaninchaymanta kaq imaymanakunaman hina wiñay-wiñaypaq wañuy. Khayna runakunapiqa kutichikapuy imayna kananqa mana ima atiyniyoqmi, manataqmi Yayaq hatun sumaq sonqo kayninman hina chaninchaypa ruwayninkunaqa chinkachisqachu kanman.

33 Ichaqa, Churinpa sutinpin runakunata Yaya waqyarqan (kaytaq churasqa kaq kutichikapuy imayna kanan karqan) khaynata nispa: Yuyayniykichisman kutirimunkichis manataq sonqoykichista rumiyachinkichischu chayqa, khuyapakuyniyoqmi qankunawan kasaq, Sapan Churiywan.

34 Chhaynaqa, pipas yuyayninman kutirimunqa sonqonta mana rumiyachispa chayqa, Sapan Churiywanmi khuyapakuyman derechuyoq kanqa, huchankuna panpachaypaq; kaykunataq samariyniyman haykunqaku.

35 Pipas sonqonta rumiyachinqa millaytataq ruwanqa chayqa, phiñarikuyniypin sullullchakusaq, samariyniyman mana haykunanpaq, nispa.

36 Kunantaq wawqeykuna qankunaman nisaykichis, sonqoykichista rumiyachinkichis chayqa, manan Wiraqochaq samariyninman haykunkichischu; chhaynataq millay ruwayniykichis Payta phiñarichin, chaytaq ñawpaq kaq phiñarichiypi hina qankunaman phiñarichiyninta kachamun; ari, rimayninman hina qhepa kaq utaq ñawpaq kaqpipas, wiñay-wiñaypaq nunaykichis qollunanpaq; chhaynataq rimayninman hina, qhepa kaq wañuymanpas ñawpaq kaqmanpas.

37 Kunantaq wawqeykuna, kaykunata yachasqanchista rikuspa—cheqaqpunitaqmi chaykuna kanku—hakuyá yuyayninchisman kutirisun, amataq sonqonchista rumiyachisunchu, qowasqanchis ishkay kaq kamachiypi phiñakuyninta hamuchinanpaq Wiraqocha Yayanchista mana phiñarichinanchispaq; ichaqa, haku rimayninman hina allichasqa Yayaq samariyninman haykusun.