1 Kunanqa churiy, aswan askhan qanman ninay kapuwan wawqeykiman nisqaymantaqa. Manachu qhawarqanki wawqeykiq mana kuyuq kasqanta, iñiysapa kasqanta, Yayaq kamachiyninkuna waqaychaypi k’uchi kasqantawan? Manachu allinta pay qhawachirqasunki?

2 Manan wawqeykiq kasusqanta hinachu rimayniykunata kasurqanki zoramitakuna chawpipi. Kaymi qan kontra kapuwan: Kallpaykipi yachaysapa kayniykipiwanmi yupaychakuyta qallarirqanki.

3 Manataqmi llapanchu kay churiy. Ancha llakichiwaqtan ruwarqanki, ruwanaykipaq waqyasqa kasqaykita saqespan Siron hallp’aman rirqanki lamanitakunaq sispayninman, chay ch’aranqara Isabelpa qhepanta.

4 Ashkha runakunaq sonqontan pay suwarqan, ichaqa manan chayraykuchu qanpaq allin chay karqan, churiy. Qanman konfiasqa kasqan serviytan atindiwaq karqan.

5 Manachu yachanki, churiy, Wiraqochaq ñawpaqenpi kaykuna millay-millana kasqanta; ari, llapan huchakunamanta aswan millay-millana, ichaqa, mana-huchayoq yawar sut’uchiyllamanta, Qollanan Nuna mananchayllamantawan mana.

6 Qanpi huk kutin kasqan Qollanan Nunata mananchanki chayqa, yachankitaq chay mananchasqaykita chayqa, mana panpachayniyoq huchan kay. Ari, pipas Yayaq k’anchaynin kontra, yachaynin kontrapiwan sipin chayqa, manan ruwanallachu paypaq panpachay aypay; ari, nisaykin churiy, manan ruwanallachu paypaq panpachay aypay.

7 Kunantaq churiy Yayamanta munayman, chhayna hatun millay huchamanta mana huchayoq kanaykita. Manan huchaykikunamanta rimaymanchu nunaykita llakichinaypaq, allin kayniykipaq mana kanmanchu chayqa.

8 Ichaqa, manan huchaykikunata Yayamanta pakayta atiwaqchu; yuyayman mana kutirimunkichu chayqa, huchaykikunan qan kontra sut’inchaqkuna hina qhepa p’uchawpi sayarinqa.

9 Kunanqa churiy, yuyayman kutirimuspa huchaykikuna wikch’unaykitan munayman, amañataq riychu ñawiykiq munapakusqanpa qhepanta; ichaqa, kay llapan imaymanakuna ruwayta wanay; kayta mana ruwankichu chayqa, manan imaynatapas Yayaq qhapaq-suyunta chaskiwaqchu. Yuyariy, qanpitaq kayta apay, kaykuna ruwaytataq wanay.

10 Noqataq kamachiyki qanpi apanaykipaq, ruwayniykikunapi kurak wawqeykikunawan rimanakunaykipaq. Wayna kaynillaykipiraqmi kashanki, wawqeykikunaq yanapasqan kaytaraqmi nesitanki. Uyariy kunsijonkuta.

11 Ama yanqa waq’a imaymanakunawan apachikuychu; ama saqrata kachariychu yapamanta chay millay-millana ch’aranqarakunaq qhepanta sonqoykita apananpaq. Qhawariy churiy, ancha hatun millaytan zoramitakunaman apamurqanki; ruwasqaykita rikuspankutaqmi rimayniykunapi mana kreyirqankuchu.

12 Kunantaq Wiraqochaq Nunan noqata niwan: Wawaykikunata kamachiy allin kaqta ruwanankupaq; askha runakunaq sonqonkuta imañataq qolluyman apankuman, nispa. Chhaynaqa, qanta kamachiyki churiy, Yayaq manchakuyninpi, millay ruwanaykikunata amaña ruwanaykipaq;

13 Tukuy yuyayniykiwan, atiyniykiwan, kallpaykipiwan Wiraqochaman kutirinaykipaq; amaña astawan runakunaq sonqokuta millay ruwayman pusanaykipaq. Aswanmá paykunaman kutiriy, hinaspataq huchaykikunata chay pantasqa ruwasqaykikunatawan allichamuy.

14 Ama qhapaqyaykunata, nitaq kay pachaq yanqa imaymanankunatapas mashkaychu; manan qanwan kaykunata apayta atiwaqchu.

15 Kunantaq churiy, huk chikanta nisayki Cristoq hamunanmanta. Qantataq nisayki: Paymi cheqaqtapuni runakunaq huchankuna horqoq hamunqa; ari, qespiymanta sumaq willaykunata llaqtanman willaqmi hamunqa.

16 Kunantaq churiy, kay serviymanmi waqyasqa karqanki, yuyayniykita alistanaykipaq kay runakunaman kay sumaq willaykunata willanaykipaq; hukniraq rimaypiqa, qespiy paykunaman hamunanpaq, wawankunaq yuyayninkuta alistanankupaq, Paypa hamunan pachapi Yayaq rimayninta uyarinankupaq.

17 Kunanqa, huk chikanta kay imaymanakunamanta umaykita samarichisaq. Qanqa tapukushanki, imanaqtin kaykuna chhay tukuy ñawpaqtaraq yachakunanmanta. Noqataq nisayki: Manachu huk nuna Yayapaq chaninniyoq kunan pacha hamuq pachapi nuna hina?

18 Manachu nesitakun qespina imayna kanan kay runakunaman yachachina, wawankunaman hina.

19 Manachu atinalla kunan pachapi angelninta Wiraqocha kachamunanpaq, noqanchisman kay sumaq willaykunata willawananchispaq, wawanchiskunaman hina, utaq hamuyninpa pacha patamanpas hina?