1 Kunanqa churiy, kaymi qanman astawan rimarinay; rikushanin wañusqakunamanta umayki huk chikanta utirayasqanta.

2 Kayta qanman nisayki, manan kawsarimuy kanchu—huk rimaypiqa niyman, kay wañuqqa manan mana-wañuqta churakunchu, kay waqlliqqa manan mana-waqlliqta churakunchu,—ichaqa, Cristoq hamusqan patamanña.

3 Paymi wañusqakunaq kawsarimuyninkuta wakichin. Ichaqa churiy, manaraqmi kawsarimuyqa kanraqchu. Kunanqa huk pakasqata qanman reqsichisayki; chaypiwanpas, askhan pakasqa imaymanakuna kan, chaykunataq waqaychasqa kanku, manataq pipas chaykunata yachanchu, ichaqa kikin Yayalla. Ichaqa hukta qanman qhawachisayki, chayta yachanaypaqtaq k’uchillaña Yayata tapurqani, chaytaq kawsariymanta.

4 Kanmi señalasqa pacha, wañusqakunamanta llapan runakuna hatarimunankupaq. Kunanqa, hayk’aq kay pacha hamunqa chaytaqa manan pipas yachanchu; ichaqa, Yayaqa yachanmi señalasqa pachata.

5 Kunanqa, ichachus huk kutilla utaq ishkay kuti, utaq kisa kuti kanqa wañusqakunamanta runakuna hatarimunankupaq chayqa, manan imapas qokunchu; Yayan yachan kay tukuy imaymanakunata; allinñataqmi khayna kananmanta yachay—kanmi wañusqakunamanta llapan runakuna hatarimunankupaq señalasqa pacha.

6 Kunanqa, kananmi ch’usaq pacha, wañuna pachaq kawsarimuna pachaq ima chawpinkupi.

7 Kunanqa tapuyman, wañuna pachamanta kawsarimuna pachakama, runakunaq nunankuwan ima kasqanta.

8 Ichachus huk pachamanta aswan kan runakuna sayarinankupaq chayqa, manan imapas qokunchu; manataq llapanchu huk kutillapi wañunku chayqa, manataqmi imapas kay qokunchu. Llapanpas huk p’unchawllan Yaywanqa, runakunallapaqtaqmi pachaqa tupusqa.

9 Chhaynaqa, señalasqan runapaq pacha, wañusqakunamanta sayarinankupaq; kantaqmi pacha, wañuna pachaq kawsarimuna pachaqpiwan chawpinkupi. Kunanqa kay pachamanta, iman kapun runakunaq nunankuwan, chayta yachanaypaqmi k’uchillaña Wiraqochata tapukurqani; kaytaqmi yachasqay.

10 Llapan runakuna sayarinankupaq pacha chayamuqtintaq, paykuna yachanqaku, runakunaman señalasqa pachakunata Yaya yachasqanta.

11 Kunanqa, wañuna pachaq kawsarimuna pachaqpiwan chawpipi nunaq imayna kananmanta—Huk angelpa yachachiwasqanmi kay kawarqan, llapa runakunaq nunanku, kay wañuq runa-kurkumanta ripusqankuman hina, ari, llapa runakunaq nunanku, allinña mana allinña kaqtinpas wasiman apasqa kasqankuta, paykunaman kawsay qoq Yayaman.

12 Hinamantaq, chanin kaqkunaq nunanku, kusiy-kusi kaypi chaskisqa kanqaku, chaytaq kusipawqar sutichasqa, samarina pacha, sumaq kawsay pacha; chaypitaq llapan llakinkunamanta, llapan qhawakuymanta, tukuy muchuymantawan samanqaku.

13 Hinataq, huchasapakunaq nunanku, ari, ancha millay kaqkuna—kaykunaqa, Wiraqochaq Nunanmanta mana imayoq mana huk chikanpiwanmi kanku; millay ruwaykunatan akllarqanku allin kaqmantaqa, chayraykutaq saqraq nunan paykunaman haykurqan, wasinkuta hap’ikuspa—kaykunan tutayaq hawaman qarqosqa kanqaku. Chaypin waqay, qaparqachay, kiru saqtaypiwan kanqa; kaytaq paykuna kikinkuq millay ruwayninkurayku, saqraq munayninman hina hark’asqa apasqa kaspanku.

14 Kaymi huchasapakunaq nunankuq imayna kayninku; paykuna pataman Yayaq wapu phiñarikuyninta, tutayaqpi ancha millay manchakuypi suyay. Chhaynan kay hina kaypi qhepanku, chaninkunachu kusipawqarpi hina, kawsarimunanku pachakama.

15 Kanmi runakuna, kawsarimuy manaraq kashaqtin, nunaq kusikuypi kayninta, ñak’ariypi kaynintawan ñawpaq kaq kawsariy kasqanta hina hamut’aqkuna. Ari, kawsarimuy nikunmanmi nunaq utaq almaq hatariyninta, kusiy-kusi kaymanpas, utaq, ñak’ariymanpas churasqa kayninta, rimasqa siminkunaman hina.

16 Yapamantataq, rimasqan karqan, kanmi ñawpaq kaq kawsarimuy, ña kaq runakunaq, kuna kaqkunaq, utaq kananku kaq llapa runakunaq kawsarimuyninku, wañusqankumanta Cristoq kawsarimuyninkama, nispa.

17 Kunanqa manan yuyaswaychu, khayna rimarisqa ñawpaq kawsariy nunaq kawsarimuynin, kusikuyman utaq ñak’ariymanpas churasqa kanankumantawan kanantaqa. Manan yuyayta atiwaqchu kayta chay ninantaqa.

18 Manan nisaykin; ichaqa nuna runa-kurkuwan huñunakuynintan nin, Adanpa p’unchawninmanta Cristoq kawsarimuyninkama.

19 Ichachus rimarisqa kaq runakunaq nunanku runa-kurkunkupiwan huk pachallapi huñunakunku, huchasapakunapas chanin kaqkunapas, chaytaqa manan ninichu; kay niylla allin kachun, llapankun hatarimunqaku; huk rimaykunapiqa, kawsarimuyninkuqa hamun, Cristoq kawsarimuynin patamanña wañuqkunaq kawsarimuyninkuq ñawpaqnintan.

20 Kunanqa churiy, manan ninichu, kawsarimuyninku Cristoq kawsarimuynin pachapi hamunqa nispachu; ichaqa, noqa kikiy yuyasqallaytan qosaq: Chaninkunaq nunankuqa runa-kurkunkuwan huñunakunqaku Cristoq kawsarimuynin pachapi, hanaqpachaman seqaynin pachapiwan, nispa.

21 Ichari kawsarimuynin pachapichu ichari chay patamanñachu chaytaqa manan ninichu. Ichaqa, kaytan nini: Kanmi pacha, runa-kurkuq wañusqanmanta kawsarimuyninkama; nunaq kaynintaq kusikuypi utaq ñak’ariypi, wañusqakuna hatarimunankupaq Yayaq señalasqan pachakama, nunanku runa-kurkunkuwan yapamanta huñunakunankupaq; Yayaq ñawpaqenpi sayanankupaq apamusqa kaspa, ruwayninkuman hina taripasqa kanankupaq.

22 Ari, kaymi wakichin unanchaqkunaq rimasqan imaymanakunaq yapamanta sayarichiyninta.

23 Runa-kurkumanmi nuna yapamanta churasqa kanqa, runa-kurkutaq nunaman; ari, sapanka runa-kurkuq partinkuna, sapanka moqonkunapiwan runa-kurkunman yapamanta churasqa kanqa. Ari, manan umaq ni huk chukchallanpas chinkanqachu, ichaqa, llapan imaymanakunan yapamanta churasqa kanqa maypi kanan hunt’asqa runa-kurkuman.

24 Kunantaq churiy, kaymi unanchaqkunaq rimasqanku yapamanta sayarichipuy.

25 Chhaynamantaq, Yayaq qhapaq-suyunpi chaninkuna k’ancharinqaku.

26 Ichaqa, huk ancha millay wañuymi huchasapakunaman hamun; wañunkun paykuna, chaninchaymanta kaq imaymanakunaman hina; qhellin paykuna kanku, manataq ima qhelli kaqpas Yayaq qhapaq-suyunta chaskiyta atinmanchu; ichaqa, qarqosqan paykuna kanku millay ruwayninkuq utaq llank’ayninkuq rurunmanta mallinankupaq churasqa; p’oshqo qeroq puchunpa chhanqantataq ukyanku.